ಪಾಕ್ಳೆವ್ನ್, ಫುಲೊನ್, ಪರ್ಮಳ್ಚ್ಯೊ ಮೆಲ್ವಿನ್ ಪಿಂಟೊ ನೀರುಡೆಚ್ಯೊ ಕವಿತಾ
(ಮೆಲ್ವಿನ್ ಪಿಂಟೊ ನೀರುಡೆಚೆಂ ಕವಿತಾ ಪುಸ್ತಕ್ ‘ಮ್ಹೊಂವ್ ಆನಿ ಮೂಸ್’ ಆದ್ಲ್ಯಾ ವರ್ಸಾಚ್ಯಾ ನಿಮಾಣ್ಯಾ ಮ್ಹಯ್ನ್ಯಾಂತ್ ಆಶಾವಾದಿ ಪ್ರಕಾಶನಾಚ್ಯಾ ವಲ್ಲಿ ಕ್ವಾಡ್ರಸಾನ್ ಪರ್ಗಟ್ಲಾಂ. ಯಾಜಕ್ಪಣಾಚಿ ದೀಕ್ಷಾ ಲಾಭ್ಲ್ಲ್ಯಾ ಸಂದರ್ಭಾರ್ ಆಪ್ಲ್ಯಾ ಕವಿತಾಂಚೆಂ ಫುಡ್ಲದ್ ಪುಸ್ತಕ್ ಪರ್ಗಟ್ ಕರುನ್ ಮೆಲ್ವಿನ್ ಪಿಂಟೊ ನೀರುಡೆನ್ ಕವಿತಾ ಶೆತಾಂತ್ ಆಪ್ಲಿ ಪಾವ್ಲಾಂ ಥಿರ್ ಕರ್ಚೆಂ ಪ್ರೇತನ್ ಕೆಲಾಂ. ಪುಸ್ತಕಾಂತ್ ಬಾವೆಚಾಳೀಸ್ ಕವಿತಾ ಆಸಾತ್. ಕವಿ ಎಚ್ಚೆಮ್ ಪೆರ್ನಾಳಾನ್ ಪ್ರಸ್ತಾವನ್ ಬರಯ್ಲಾಂ. ವಿಲ್ಸನ್ ಕಯ್ಯಾರಾನ್ ಭೋವ್ ಆಪುರ್ಬಾಯೆನ್ ಮುಕ್ಲ್ಯಾ ಫೊರಾಚೆಂ ಚಿತ್ರ್ ಸೊಡಯ್ಲಾಂ. ಮೆಲ್ವಿನಾಕ್ ‘ಕವಿತಾ ಟ್ರಸ್ಟ್’ ಸರ್ವಯ್ ಬರೆಂ ಮಾಗ್ತಾನಾ ಆಲ್ವಿ ಕಾರ್ಮೆಲಿತಾನ್ ಬರಯಿಲ್ಲಿ ಪುಸ್ತಕಾ ವಯ್ಲಿ ಖೊಡ್ ಹಾಂಗಾ ಪರ್ಗಟ್ತಾಂವ್ - ಸಂಪಾದಕ್)
"ಮ್ಹೊಂವ್ ಆನಿ ಮೂಸ್" ಮೆಲ್ವಿನ್ ಪಿಂಟೊ ನೀರುಡೆ, ಹಾಚೆಂ ಫುಡ್ಲದ್ ಕವಿತಾ ಪುಸ್ತಕ್. ಹ್ಯಾ ಪುಸ್ತಕಾಂತ್ ಮ್ಹೊಂವಾಚಿ ಪೊಳಿಚ್ ಆಸಾ. ವಾಚ್ತಾಂ, ವಾಚ್ತಾಂ "ಮ್ಹೊಂವಾಚಿ ಗೊಡ್ಸಾಣ್ ಹಾಂವ್ ಚಾಕ್ತೇ ಗೆಲೊಂ. ಹ್ಯಾ ಖಾಣಾಕ್ ದವ್ರುಂಕ್ ಫ್ರಿಡ್ಜ್ಯಾಚಿ ಗರಜ್ನಾ. ಲಾಂಬ್ಕಾಳ್ ಬಾಳ್ಚೆಂ ಖಾಣ್ ಹೆಂ. ಭೊರ್ ಘಾಲುನ್, ಧಾಡಾವ್ನ್ - ಪಿಕೊವ್ನ್ ಸುಕ್ಲ್ಲೆಂ ಖಾಣ್ ನ್ಹಯ್ ಹೆಂ. ಚಾಂದ್ನ್ಯಾ-ಧೊವಾಕ್, ಗುಪ್ತಿಂ, ಲಿಪ್ತಿಂ, ಫುಲೊನ್, ಪಾಕ್ಳೆವ್ನ್, ಪರ್ಮಳ್ಚ್ಯೊ ಕವಿತಾ ಹ್ಯೊ.
ಹ್ಯಾ ಮ್ಹೊಂವಾ ಭೊಂವಾರಾಂತ್ ಮೂಸ್ಯಿ ಆಸಾ. ತೊ ಚಾಬ್ತಾ. ಪುಣ್ ಹಿ ಚಾಬ್ಣಿ ಮರ್ಣಾ ಭ್ರಾಂತೆಚಿ ನ್ಹಯ್. ತಿ ಜಾಗ್ವಣೆಚಿ. ತಿ ಸವಾಲಾಂ ಉಡಯ್ತಾ. ಪಂಚಾಂಗ್ ಹಾಲಯ್ತಾ, ಕೊಶೆಡ್ಡ್ ಕೊಚಾಯ್ತಾ. ಹಿ ಕಲಾ ಮೆಲ್ವಿಚ್ಯಾ ಕವಿತೆಂನಿ ಝಳ್ಕೊಂಚಿ ನಿಜಾಯ್ಕಿ ಮೆಚ್ವಣೆಚಿ.
ಕವಿಕ್ ವ ಕವಿತೆಕ್ ಧುಂಪಂವ್ಚೆಂ, ಘಾಂಟಿ ವೊಡ್ಚ್ಯೊ ಯಾ ಲೊಣಿ ಸಾರಂವ್ಚಿ ಪ್ರಕ್ರಿಯಾ ಹಿ ನ್ಹಯ್. ವಾಚ್ತಾಂ ವಾಚ್ತಾಂ ಕಾಂಯ್ ಥೊಡೆಂ ಬರಯಾಂ ಮ್ಹಣ್ ಭೊಗ್ಲೆಂ. ತೆಂ ಬರ್ಪಿಂ ಲಿಖ್ಲೆಂ. ಉರ್ಬೆನ್ ಕೆಲ್ಲಿ ಹಿ ಸುರ್ವಾತ್ ಚರ್ಬೆನ್ ಕುರ್ವನಾ ಜಾಂವ್ ಮ್ಹಳ್ಳಿ ಮಾತ್ರ್ ಮ್ಹಜಿ ಆಶಾ.
ಹ್ಯಾ ಬುಕಾಚೆಂ ತಾಬೆರ್ನಾಕ್ಲ್ ಆಸಾ ‘ಮ್ಹೊಂವ್ ಆನಿ ಮೂಸ್’ ಮ್ಹಳ್ಳೆ 36 ವೆ ಕವಿತೆಂತ್. ಆಬ್ಲೆಶಿ ಗಿದಾನ್ ಮುಸಾಕ್ ಮ್ಹೊಂವಾಂ ಥಾವ್ನ್ ವಿಂಗಡ್ ಕೆಲಾಂ. ಮ್ಹೊಂವ್ ವೊಂಕ್ಚ್ಯಾ ಜಾತಿಚ್ಯಾಂನಿ ಮ್ಹೊಂವಾ ರಾಯಾಕ್ ಗ್ರಾಶಿಲಾಂ. ದೆಕುನ್ ಮ್ಹೊಂವ್ ಕೊಡು ಜಾಲಾಂ, ಹಾಂಗಾ ಮ್ಹೊಂವ್ ವೀಕ್ ಜಾಲಾಂ, ಮ್ಹೊಂವ್ ದೀಕ್ ಜಾಲಾಂ!
ಹೊ ಕವಿ ಎಕೆ ವಾಟೆನ್ ಘುಸ್ಪಡ್ಲಾ. ತೊ ರಚ್ನಾರಾನ್ ಪೃಥ್ವೆರ್ ಘಾಲ್ಲಿ ಮಾಂಡ್ಣಿ ಚೊಯ್ತಾ. ಹರ್ಯೆಕೆ ರಚ್ನೆ ಪಾಟ್ಲ್ಯಾನ್ ಏಕ್ ದಿಸನಾತ್ಲೊ, ಸಮ್ಜನಾತ್ಲೊ ಉದ್ದೇಶ್ ಆಸಾ ಮ್ಹಣ್ ತಾಕಾ ಭೊಗ್ತಾ. ಹೊ ಉದ್ದೇಶ್ ಅಸ್ತ್ವೆಸ್ತ್ ಕೆಲ್ಲೊ ಪೊಟಾ ಜಾಳ್ ತಾಕಾ ಸೊಸುಂಕ್ ಜಾಯ್ನಾ. ರಚ್ನಾರಾಚೆ ಮಾಂಡಾವಳೆಕ್ ರಚ್ನೆ ಥಾವ್ನ್ ಬಲಾತ್ಕಾರಾನ್ ವಿಂಗಡ್ ಕರ್ಚೆಂ ಪ್ರೇತನ್ ಚಲ್ಚೆಂ ಮಾರ್ಮಿಕ್ ರಿತಿನ್ ತೊ ಪಿಂತ್ರಾಯ್ತಾ.
ಜಿವಿತ್ ಫುಲಂವ್ಚೊ ನಾಚ್ ರಾವ್ತಾ (ನಾಚ್"- 42)
‘ಹಿ ಧರ್ತಿ ಪೂರ್ತಿ ಮನ್ಶಾಂ ಪಾತ್ಕಾಂನಿ ಥಕೊನ್ ವೆತಾ, ಶಿಜೊನ್ ವೆತಾ. ದೆಕುನ್ ಜೀವ್ ದಿಂವ್ಚೆ ಮಾತಿಯೆಕ್ ಪ್ರಾಣ್ ಕಾಡ್ಚಿ ಗಿರಾಂತ್, ಪಾವ್ಸಾ ಪಾವ್ಳೆ ಧಾರುಣ್ ಜಾತಾತ್, ಉಜೊ ಪಾವ್ಸ್ ಜಾತಾತ್’ ("ದುಕಾಳ್ ಗಿತಾಂ ಆನಿ..."- 37)
’ಪೃಕೃತಿ ಮಾಯೆಚೆರ್ ಅತ್ಯಾಚಾರ್ ಜಾತಾ, ವಾರೆಂ ವಿಕಾಳ್ ಜಾತಾ, ಉದಕ್ ಆಂಬೊಟ್ ಜಾತಾ. ಧರ್ತಿ ಧಾವೆನ್ ಲಾಸ್ತಾ. ಉದ್ಕಾಶೆಳ್ ನಪಯಿಂಚ್ ಜಾತಾ.’
ಸೃಷ್ಟೆಕ್ ಲುಟ್ಲ್ಲ್ಯಾ ಬರಿಚ್ / ಅದೀರ್ ಸ್ರೀಯಾಂಚೆ ಸುಸ್ಕಾರ್ / ಆಟೆವಿಟೆ ಜಿಣ್ಯೆ ಅಂಧ್ಕಾರ್ / ವಾಡೊನ್ಚ್ ವೆತಾತ್ ತೆಂ / ಅಬ್ಲೆಶಿ ಪುರುಷಾಕ್ / ಗಮ್ಚೆಂ ತರ್ಯಿ ಕೆದ್ನಾಂ? ("ಸೃಷ್ಟೆಕ್ ಲುಟ್ಲಾಂ, ಸ್ರೀಯೆಕ್ ದುಕ್ಲಾಂ" - 29)
ಅಸಲ್ಯಾ ಭೊಂವಾರಾಂತ್ ಜಿಯೆತಾನಾ ಕವಿ ಹಿ ಮಾಂಡಾವಳ್ ಪರತ್ ಪಾಟಿಂ ರಚ್ನೆಂತ್ ಘಾಲುಂಕ್ ಆಡ್ಡೊಸ್ ಮಾಗ್ತಾ. ಕೆದಳಾ ನಂಯ್ತ್ಲೊ ತಿಗುರ್, ಗುಲೊಬಾಂತ್ಲೊ ಭೊಂವರ್, ಉತ್ರಾಕ್ ಉತರ್, ಸುರಾಕ್ ಸುರ್, ಕೆಸಾರ್ ಆಬೊಲೆಂ, ವಾತಿಕ್ ಕಾಡಿ, ವಾಲಿಕ್ ಧಾಂಕ್, ಚಿಡ್ಕೊನ್ ಉರ್ತಾತ್, ತೆದಳಾ ತಾಂಚೊ ಸಂಗಮ್ ಜಾತಾ.
ಮನ್ಶಾ ಮನಿಸ್ ಸೊಡ್ದೊಡ್ / ಮೊಗಾನ್ ಲಾಗಿಂ ಆಯ್ಲೊ ತರ್ / ಸಂಸಾರ್ ಸೊಭಿತ್ ಸುಂದರ್, ದೀಸ್ರಾತ್" ("ಪ್ರಕೃತೆ ಪುರುಶಾ ಮಿಲನ್"-4)
ಹ್ಯಾಚ್ ದೆಕುನ್ ಕವಿ ಕಾಳೊಕಾಕ್ ದುರ್ಸನಾಸ್ತಾಂ ಆಶೆಚೆಂ ಕೀರ್ಣ್ ಫಾಂಕಂವ್ಕ್ ಮಿಣ್ಕುಂಚಿ ವಾತ್ ಜಾಂವ್ಕ್ ದೆವಾಚಿ ಕುರ್ಪಾ ಮಾಗ್ತಾ.
ರಿತ್ಯಾ ರಿತ್ಯಾ ಸಂಸ್ರಾಂತ್ ಹಾಂಗಾ / ಮನ್ಶಾ ಕಾಳೀಜ್ ಖಾಲಿ ಖಾಲಿ / ನಿರಾಶಿ ಕಾಳ್ಜಾಂನಿ ಆಶೆಚೆಂ ಕೀರ್ಣ್ ಫಾಂಕಂವ್ಕ್ ಸಕ್ಚಿ / ಮಿಣ್ಕುಂಚಿ ವಾತ್ ತರ್ಯಿ ಕರ್"("ಮ್ಹಾಕಾ ಬರೊ ಪಾದ್ರಿ ಕರ್" - 13)
ದುಸ್ರ್ಯಾನ್ ಮ್ಹಾಕಾ ಹ್ಯಾ ಕವಿ ಥಂಯ್ ದಿಸ್ಲೆಂ ತಾಚೆಂ ಖಾಲ್ತೆಂ ಮನ್. ಶಿಕ್ಚಿ ಆಶಾ. ಕುರ್ಪೆಚೊ ವ್ಹಾಳೊ ಸದಾಂಚ್ ತಪ್ಕಾಟ್ ಸುವಾತ್ ಸೊದ್ತಾ. ಗರ್ವಾಚ್ಯಾ ದೊಂಗ್ರಾರ್ ತೊ ಚಡನಾ. ತಶೆಂಚ್ ಹ್ಯಾ ಕವಿನ್ ಲಿಖ್ಲ್ಲ್ಯಾ ಕಾಂಯ್ ಥೊಡ್ಯಾ ಕವನಾಂನಿ ತಾಚೆಂ ಹೆಂ ತಪ್ಕಟ್ಪಣ್ ದಿಸೊನ್ ಯೆತಾ.
ಕುಲ್ಪಾಂ ಖೊಡಿ ಆಯ್ಕೊಂಕ್ ಮೆಳ್ತಾನಾ ಆಪ್ಲೆಂ ಜಿವಿತ್ ಸಾಣ್ಯಾಕ್ ಧರ್ನ್ ಪುನರ್ ವಿಮರ್ಸೊ ಕರ್ಚೆಂ ಖಾಲ್ತೆಪಣ್ ತೊ ಮಾಗ್ತಾ. ("ಮ್ಹಾಕಾ ಬರೊ ಪಾದ್ರಿ ಕರ್" - 13)
‘ಚಾಫ್ರಾ ಮ್ಹಳ್ಳ್ಯಾ ಸುರ್ಯಾ ಮುಕಾರ್ ಮಿಣ್ಕುಂಚಿ ಅಸ್ಕತ್ ವಾತ್’ ಆಪುಣ್ ಮ್ಹಣ್ ತೊ ಮ್ಹಣ್ತಾ. ‘ತಾಚೊ ಶಿಸ್ ಜಾಂವ್ಕ್ ಫಾವೊ ನಾತ್ಲೊ ಕಿರ್ಕೊಳ್ ಕಿಡೊ’ ಮ್ಹಣ್ ಆಪ್ಣಾಕ್ ವೊಲಾಯ್ತಾ. ("ದಾರ್ಶನಿಕ್ ಕವಿಕ್ ಚಿಂತುನ್"- 7)
ಗಾಂಧಿ, ಮದರ್ ತೆರೆಜಾ ಆನಿ ಸೊಮ್ಯಾ ಥಂಯ್ ಹೊ ಕವಿ, ಕವಿಂ ಕವಯಿತ್ರಿಂಚೊ ಅತ್ಮೊ ದೆಖ್ತಾ ತಾಂಣಿ ಕವಿತಾ ಬರಯ್ನಾಸ್ತಾನಾಂಚಿ ಕವಿ ಜಾಲ್ಲೆಂ ನಿಯಾಳ್ನ್, ಕವಿ ಗೋಶ್ಟಿಂನಿ ಝೆಲೆ, ಮಾನ್ ಪುರಸ್ಕಾರ್, ಇನಾಮಾಂನಿ ಫುಮಾರೊನ್ ಶಿಂಗಾಂ ಫುಟ್ಲ್ಲ್ಯಾ ಆಪ್ಣಾಂ ಥಂಯ್ ತೊ ಲಜ್ತಾ. ಆಪುಣ್ ನೀಜ್ ಕವಿ ನ್ಹಯ್ ಮ್ಹಣೊನ್ ಚುನೊ ಕಾಡ್ಲ್ಲೆಂ ಆಪ್ಲೆಪಣ್ ಖಾಲ್ತಿಕಾಯೆನ್ ತೊ ಒಪ್ತಾ. ("ಚ್ಯಾರ್ ಕವಿ"- 39)
‘ಉಂದ್ರಾಕ್ ಮಾರ್ನ್ ವಾಗಾಕ್ ಮಾರ್ಲೊ’ ಮ್ಹಳ್ಳೆ ಪರಿಗತೆಂತ್ ಜಿಯೆತಾನಾ ಮೆಲ್ವಿಚಿಂ ಮ್ಹಳ್ಳಿಂ ಭೊಗ್ಣಾಂ ನಿಜಾಯ್ಕಿ ಖಾಲ್ತಿಕಾಯೆಚಿಂ ತರೀ, ವಾಸ್ತವಿಕತಾ ಹಿ ಕೀ, ಆಮಿ ಆಮಿಂಛ್ ಜಾಲ್ಯರ್ ಚಡ್ ಸೊಭಾಯ್. ನಾ ತರ್ ಕವಿನ್ ಸಾಂಗ್ಲ್ಲೆಬರಿ ‘ಕವಿತಾ ಸಲ್ವತಾ’ (ಸಲ್ವಲ್ಲಿ ಕವಿತಾ- 1)
ತಿಸ್ರ್ಯಾನ್ ಕವಿ ಮೆಲ್ವಿ ಥಂಯ್ ಮ್ಹಾಕಾ ದಿಸೊನ್ ಆಯಿಲ್ಲೊ, ‘ತಿಸ್ರ್ಯಾ ಸಂಸ್ರಾಂತ್ಲ್ಯಾ ಲೊಕಾಚೊ ತಾಕಾ ಆಸ್ಚೊ ಮೋಗ್, ತ್ಯಾಚ್ ವಗ್ತಾ ಹಿ ಪರಿಗತ್ ಹಾಡ್ಲ್ಲ್ಯಾ ಪಯ್ಲ್ಯಾ ಆನಿ ದುಸ್ರ್ಯಾ ಸಂಸಾರಾಕ್ ತೊ ಸರ್ಸರಿತ್ತ್ ಯೆಟ್ತಾ. ತಾಂಚೆಂ ಕೊಶೆಡ್ಡ್ ಪೊಕೊರ್ತಾ.
ಹೊ ಘಾಯ್ ಪರತ್ ಪರತ್ ಜೀವ್ ಜಾಂವ್ಚೊ ಕ್ರಿಸ್ಮಸ್ ಪರ್ಬೆ ವೆಳಾ. ಬಹುಶಾ ಘೆಂವ್ಚ್ಯಾ - ದಿಂವ್ಚ್ಯಾ ಭಾಯ್ಲ್ಯಾ ಆಚರಣಾಂನಿ ಹೆಂ ಫೆಸ್ತ್ ಜಾಯ್ತ್ಲೆ ಪಾವ್ಟಿಂ ಆಖೇರ್ ಜಾತಾ ಜಾಲ್ಲ್ಯಾನ್ ಹೆ ಪರ್ಬೆಚ್ಯಾ ಭಾಯ್ಲ್ಯಾ ಆಡಂಬರಾಚೆರ್ ಕವಿಕ್ ವಿಶೇಸ್ ತಾತ್ಸಾರ್ ಝಳ್ಕತಾ. ದೆಕುನ್ ದಿಸ್ತಾ, ಸುಮಾರ್ 6 ಕವನಾಂ ತೊ ಹೆ ಪರ್ಬೆ ಭೊಂವಾರಿಂ ಗುಂತ್ತಾ.
‘ನವೊ ಸೂಟ್, ವಿದೇಶಿ ಸುಗಂಧ್, ನೊಟಾಂಚ್ಯೊ ಆಟ್ಟ್ಯೊ ಕ್ಲಬ್ಬಾಂತ್ಲ್ಯೊ ಪಾರ್ಟ್ಯೊ, ಕಾಜುಚ್ಯೊ ಕಾಲ್ದ್ಯೊ, ವೊಬಾ ಪೊಡಿ, ರಸ್ಮಾಚಿ ಸಾಡಿ, ವಾರ್ಯಾ ವೆಗಾನ್ ಧಾಂವ್ಚಿ ಟಿವಿಎಸ್ ಗಾಡಿ, ಹೈ ಹೀಲ್ಡ್ ಮೊಚ್ಯಾಂಚಿ ಜೊಡಿ, ಟಾಯ್ಟ್ ಫಿಟ್ಟಿಂಗ್, ಮೊಧ್ಯಾನೆ ರಾತಿಚೊ ವಿಣ್ಗೊ ನಾಚ್, ಸೊರ್ಯಾಚೊ ವಾಸ್, ಖಾಣಾಂಚಿ ರಾಸ್’ (ಕವನಾಂ 3, 10, 12, 14, 28, 29)
ಹ್ಯಾ ಸರ್ವಾಂ ಮಧೆಂ ಕವಿ ಭಕ್ತಾಂಕ್ ಜಾಗಯ್ತಾ:
ತುಮಿ ಸಂಭ್ರಮ್ಚೆಂ ನತಾಲಾಂ ಫೆಸ್ತ್ / ಮ್ಹಜೇಂಯ್ ಫೆಸ್ತ್ / ಕಿತ್ಯಾಕ್ / ತೊ ಮ್ಹಜೊ ಜಲ್ಮಾ ದೀಸ್!’ ("ಮ್ಹಜೊ ಉಡಾಸ್ ದವರಾ" - 28)
ಹಾಂಗಾ ಕಳೊನ್ ಯೆತಾ, ಹೆ ಭಕ್ತ್ ತೊಂಡಾನ್ ಮಾತ್ರ್ ದೆವಾಚೆಂ ಆರಾಧನ್ ಕರ್ತಾತ್. ತಾಂಚೆಂ ಕಾಳಿಜ್ ದೆವಾ ಥಾವ್ನ್ ಪಯ್ಸ್ ಆಸಾ. ವಿಪರ್ಯಾಸ್ ಹೊ ಕೀ ಜ್ಯಾ ದೆವಾಚೊ ಜಲ್ಮಾ ದೀಸ್ ತೆ ಆಚರಣ್ ಕರ್ತಾತ್ ತ್ಯಾಚ್ ದೆವಾಚಿ ಖರಿ ವೊಳಕ್ ತೆ ವಿಸ್ರಲ್ಯಾತ್. ಆನಿ ತೊಚ್ ದೇವ್ ತಾಂಕಾಂ ಆಪ್ಲೊ ಜಲ್ಮಾ ದೀಸ್ ಸಂಭ್ರಮ್ಚ್ಯಾ ಲೊಕಾಕ್ ‘ತೊ ಆಪ್ಣಾಚೊ ಜಲ್ಮಾ ದೀಸ್’ ಮ್ಹಣ್ ಉಗ್ಡಾಸ್ ಕರ್ತಾ!
ನಿಮಾಣೆಂ ಹೊ ಕವಿ ಏಕ್ ಜಬ್ಬೊರ್ ಆಶಾವಾದಿ. ಕಾಳ್ಜಾ ಥಾವ್ನ್ ಸಕಾರಾತ್ಮಕ್, ದೆಕುನ್ ತಾಕಾ ಬರೊ ಫುಡಾರ್ ಆಸಾ. ತಾಚ್ಯಾ ಕವಿತಾಂಕ್ಯ್ ಬರೆಂ ಭವಿಶ್ಯ್ ಆಸಾ.
ಪ್ರಾಯ್ ಪಿಕತ್ ಕಾಳಿಜ್ ನ್ಹಯ್ / ಜೀವ್ ಸುಕತ್ ಜೀವನ್ ನ್ಹಯ್ / ಕೂಡ್ ಕುರ್ವತ್ ಅತ್ಮೊ ನ್ಹಯ್ / ನಾಡ್ ರಾವತ್ ಭೊಗ್ಣಾಂ - ಗಡ್ ನ್ಹಯ್... / ಕುಡಿಂತ್ ಬಳ್ ನಾತ್ಲ್ಯಾರ್ಯ್ / ಶಿರಾಂನಿ ರಗತ್ ಸುಕ್ಲ್ಯಾರ್ಯ್ / ಜಿವಾ ಸಕತ್ ಕರ್ಗಲ್ಯಾರ್ಯ್ / ಕಾಳ್ಜಾಂತ್ ತರ್ನೊ ಉರ್ಚಿ ಆಶಾ / ಕೆದಿಂಚ್ ಮಾಜ್ವೊನ್ ವೆಚಿನಾ (ಹಾಂವ್ ಮ್ಹಾತಾರೊ ಜಾಂವ್ಚೊನಾ- 15)
ಶಾಬಾಸ್ ಮೆಲ್ವಿ ಖಂಡಿತ್ ತುಂ ಮ್ಹಾತಾರೊ ಜಾಯ್ನಾಕಾ. ಲಿಖ್ಣೆಂತ್ ತುಜಾ ತಿಂತೆರ್ ಸುಕಯ್ನಾಕಾ, ಬರಯ್ತ್ ವಚ್. ಚಿಂತ್ನಾಂಕ್ ತುಜ್ಯಾ ಸಾಂಜ್ ಯೇನಾ ಜಾಂವ್!
-ಆಲ್ವಿ ಕಾರ್ಮೆಲಿತ್