Kavita Lekhanam

ಕೊಂಕ್ಣಿ ಕಾವ್ಯಾಚ್ಯಾ ಸಂದರ್ಬಾರ್ ಕವಿತಾ ಕಿತ್ಯಾಕ್ ವಾಚಿಜಾಯ್ ? - ಮ್ಯಾಕ್ಸಿಮ್ ಲೋಬೊ

ಕೊಂಕ್ಣಿ ಕಾವ್ಯಾಚ್ಯಾ ಸಂದರ್ಬಾರ್ ಕವಿತಾ ಕಿತ್ಯಾಕ್ ವಾಚಿಜಾಯ್ ?

(ಕವಿತಾ ಫೆಸ್ತ್  2011 ಜನೆರ್ 9 ತಾರಿಕೆರ್ ಕಾರ್ಕೊಳಾಂತ್ ಚಲ್ಲೆಂ. ಹ್ಯಾ ಸಂದರ್ಭಾರ್ ಚಲಲ್ಲ್ಯಾ ವಿಚಾರ್ ಸಾತ್ಯಾಚೆಂ ಅಧ್ಯಕ್ಷಪಣ್ ಕವಿ ಎಚ್ಚೆಮ್ ಪೆರ್ನಾಳಾನ್ ಘೆತಲ್ಲೆಂ. ಶಕುಂತಳಾ ಆರ್ ಕಿಣಿ ತಶೆಂ ಮ್ಯಾಕ್ಸಿಮ್ ಲೋಬೊನ್ ‘ಹಾಂವೆಂ ಕವಿತಾ ಕಿತ್ಯಾಕ್ ವಾಚಿಜಾಯ್’ ವಿಷಯಾಚೆರ್ ಪ್ರಬಂಧ್ ಮಾಂಡ್ಲೆ. ಹಾಂಗಾಸರ್ ಹೆ ಪ್ರಬಂಧ್ ಆಮಿ ಪರ್ಗಟ್ ಕರ್‍ತಾಂವ್ - ಸಂಪಾದಕ್)

 

-ಮ್ಯಾಕ್ಸಿಮ್ ಲೋಬೊ

ಪ್ರಸ್ತಾವನ್:

ಏಕ್ ಕವಿ ಕಿತ್ಯಾಕ್ ಬರೈತಾ? ಕೋಣ್ ಬರಯ್ತಾ ಜಾಂವ್ಕ್ ಪುರೊ ಆಪ್ಣಾಚ್‌ಖಾತಿರ್; ಸ್ವ-ಸಮಾಧಾನಾಕ್, ಕೋಣ್ ನಾಂವಾಕ್, ಕೋಣ್ ಮನೋರಂಜನಾಕ್, ಕೋಣ್ ಹೆರ್ ಕಾರಾಣಾಕ್. ಖಂಯ್ಚೋಇ ಶೆವೊಟ್ ದವರುನ್ ಬರಂವ್ದಿ, ಚಡ್‌ ಕರುನ್ ಸಗ್ಳೆ ಬರವ್ಪಿ ಆಪ್ಲೆಂ ಬರಪ್ ವೆವೆಗ್ಳ್ಯಾ ಮಾದ್ಯಮಾಂನಿ ಫಾಯ್ಸ್ ಕರುಂಕ್ ಪೆಚಾಡ್ತಾತ್. ಥೊಡ್ಯಾಂನಿ ಕಾರಾಣಾಂತರ್ ಘುಟಾನ್ ಬರವ್ನ್ ಫಾಯ್ಸ್ ಕರಿನಾಸ್ತಾನಾ ಕುಶಿಕ್ ದವರಿಲ್ಲೆಂ, ತಾಂಚ್ಯಾ ಜಿವಿತಾ ಆವ್ಧೆ ಉಪ್ರಾಂತ್ ಫಾಯ್ಸ್ ಜಾಲ್ಲೆಂ ಆಸಾ, ಖಾಯ್ಸ್ ಜಾಲ್ಲೆಂ ಆಸಾ. ಮಾಗಿರ್ 'ಹಾಂವ್ ಕವಿತಾ ಕಿತ್ಯಾಕ್ ಬರಯ್ತಾಂ' ಮ್ಹಳ್ಳ್ಯಾ ವಿಶಯಾರ್ ಎಚ್ಚೆಮ್ ಪೆರ್ನಾಲ್ ಆನಿ ಪ್ರಕಾಶ್ ಪೆರಿಯೆಂಕಾರ್ ಹಾಣಿಂ ಕಾಂಯ್ ಮಾಹೆತಿಚಿ ಪ್ರಬಂಧ್ ಆದ್ಲ್ಯಾ ವರ್ಸಾ ಕವಿತಾ ಪೆಸ್ತಾ ಸಂದರ್ಬಿಂ ಸಾದರ್ ಕೆಲ್ಯಾತ್.
 
ಬರಯ್ತೆಲ್ಯಾಂಚಿ ಹಿ ಗಜಾಲ್ ತರ್, ವಾಚ್ತೆಲ್ಯಾಂಚಿ ಕಿತೆಂ? ತಾಂಣಿ ಕಿತ್ಯಾ ಖಾತಿರ್ ವಾಚಿಜೆ? ಕಾಂಯ್ ಮಾಹೆತ್ ಜೊಡುಂಕ್, ಮನೋರಂಜನಾಕ್ ವಾ ಫಕತ್ ವೇಳ್ ಪಾಶಾರ್ ಕರುಂಕ್? ಖಂಯ್ಚ್ಯಾಯ್ ಭಾಸಾಂನಿ ಲೇಕನಾಂ, ಕಾಣಿಯೊಂ, ಕಾದಂಬರಿ ಆನಿ ಹೆರ್ ಸಾಹಿತಾಚ್ಯಾ ಪ್ರಕಾರಾಂಕ್ ಆಸ್ಚಿ ವಿಸ್ತಾರಾಯ್ ಕಾವ್ಯಾಕ್ ನಾ. ಪುಣ್ ಹರ್ ಭಾಸಾಂನಿ ಕವಿತೆಕ್ ತಾಚೆಚ್ ಮ್ಹಳ್ಳೆ ವಾಚ್ಪಿ ಆಸಾತ್ ಆನಿ ಏಕ್ ನಿರ್ದಿಶ್ಟ್ ಶೆವೊಟಾನ್ ತೆ ಕವಿತಾ ವಾಚ್ತಾತ್, ಅಧ್ಯಯನ್ ಕರ್‍ತಾತ್ ಆನಿ ತೆ ವಿಶಿಂ ಚಾರ್‌ಚವ್ಗಾಂ ಲಾಗಿಂ ಉಲಯ್ತಾತ್.

ಕೊಂಕ್ಣಿ ಕಾವ್ಯಾಚ್ಯಾ ಸಂದರ್ಬಾರ್ ಕೊಂಕ್ಣಿ ಕವಿತಾ ಕಿತ್ಯಾಕ್ ವಾಚಿಜೆ? ಮ್ಹಳ್ಳೆಂ ಸವಾಲ್‌ಚ್ ಬೋವ್ ಸುಕ್ಶಿಮ್. ಕೊಂಕ್ಣೆಂತೀ ಕವಿತಾ ಬರಯ್ತೆಲೆ ಚಡ್ ಆಸಾತ್, ವಾಚ್ತೆಲೆ, ವಾಚುನ್ ಚಾರ್‌ಚವ್ಗಾಂ ಮಧೆಂ ತೆ ವಿಶಿಂ ಉಲಯ್ತೆಲೆ ಜಣ್‌ಇ - ಆವ್ಕಾಸ್‌ಇ ಉಣೆ ಆಸಾತ್, ಪ್ರತೇಕ್ ಜಾವ್ನ್ ಮಂಗ್ಳುರಾಂತ್, ಕವಿತಾ ಟ್ರಸ್ಟಾಚೊ ಥೊಡೊ ವಾವ್ರ್ ಸೊಡ್ಲ್ಯಾರ್. ಆಜ್ ಕವಿತಾ ಬರಯ್ತಲೆ ಚಡ್ಲ್ಯಾತ್, ವಾಚ್ತಲೆ ಉಣೆ ಜಾಲ್ಯಾತ್ ಅಶೆಂ ಪಾಮಾಧ್ ಕನಡ ಬರವ್ಪಿ ವಿ.ಗ.ನಾಯಕ್ ಹಾಂಣಿ ಆಯ್ಲೆವಾರ್ ಸಾಂಗ್‌ಲ್ಲೆಂ ಕೊಂಕ್ಣಿ ಕವಿತೆಕ್ ಕಿತ್ಲೆಂ ಸತ್! ಹಾಕಾ ಕಾರಣ್ ಕಿತೆಂ? ಹ್ಯಾ ಪಾಟ್‌ಥಳಾರ್ 'ಕವಿತಾ ಕಿತ್ಯಾಕ್ ವಾಚಿಜೆ?' ವಿಶಯ್ ಸಂಕೀರ್ಣ್.

ಕವಿತೆಂತ್ ಕಿತೆಂ ಮೆಳ್ತಾ?

ಕವಿತಾ ಕಿತ್ಯಾಕ್ ವಾಚಿಜಾಯ್? ಹೆಂ ಭಾರಿ ಮಹತ್ವಾಚೆಂ ಸವಾಲ್. ಜರ್ಮನ್ ತತ್ವಶಾಸ್ತ್ರಜ್ನ್ ಪ್ರೇಡ್ರಿಕ್ ನಿಟ್ಶೆನ್ ಮ್ಹಳ್ಳೆ ಬರಿಂ ಜರ್ ಆಮ್ಕಾಂ ಜಿಯೆಂವ್ಕ್ 'ಕಿತ್ಯಾಕ್' ಮ್ಹಳ್ಳೆಂ ಆಸಾ ತರ್ 'ಕಶೆಂ' ಮ್ಹಳ್ಳೆ ಸಲಿಸ್ ಜಾತಾ. ಖಂಯ್ಚ್ಯಾಯ್ ಕ್ಷೇತ್ರಾಕ್ ಹೆಂ ಲಾಗು ಕರ್‍ಯೆತಾ. ಕೊಂಕ್ಣೆಂತ್ 'ತುಂ ಕವಿತಾ ಕಿತ್ಯಾಕ್ ವಾಚ್ತಾಯ್' ಮ್ಹಣ್ ವಿಚಾರ್ಚೆಂ ಸವಾಲ್ ಸುಲಭ್ ನ್ಹಯ್! ಕೊಂಕ್ಣಿ ಕವಿತಾ ವಾಚ್ಚ್ಯಾ ಜಣಾಂಕ್ ಟೊರ್ಚ್ ಘಾಲ್ನ್ ಸೊಧಿಜಾಯ್ ಪಡ್ತಾ. ದೆಕುನ್ ಹಾಂವೆ ಸಬಾರಾಂಕ್ ವಿಚಾರ್‌ಲ್ಲೆಂ ಸವಾಲ್: 'ತುಂ ಕವಿತಾ ಕಿತ್ಯಾಕ್ ವಾಚಿನಾಯ್?' ಚಡಾವತ್ ಸರ್ವಾಂನಿ ದಿಂವ್ಚಿ ಸಾಮಾನ್ಯ್ ಜಾಪ್: 'ಕವಿತಾ?' ಮುಖಮಳ್‌ಚ್ ಏಕ್ ಪ್ರಶ್ನಾರ್ಥಕ್ ಸಂಕೇತ್ ಜಾತಾ, 'ಕವಿತಾ?' ಜಿವಿತಾಂತ್ ತಾಚ್ಯಾಕೀ ವರ್ತೆಂ ಸವಾಲ್ ಫುಡ್ ಕರಿನಾತ್ಲ್ಯಾ ಬರಿ! ಆಕೇರಿಕ್, 'ಕವಿತಾ.. ಸಮ್ಜಂಕ್ ಭಾರೀ ಕಶ್ಟ್! ವ ಕವಿತಾ ಏಕ್ದಮ್ ಬೋರಿಂಗ್!' ಆನಿ ಖಬ್ರೊ-ಕಾಣಿಯೆಂನಿ ಮೆಳ್ಚೆಂ ಇನ್ಪೊರ್‍ಮೆಶನ್, ಥ್ರಿಲ್, ಸಮಾಧಾನ್ ಕವಿತೆಂತ್ ಖಂಯ್ ಮೆಳ್ತಾ ಅಶೆಂ ಆನಿ ಥೊಡ್ಯಾಚೆಂ ಕಂಪ್ಲೈನ್. ಒಟ್ಟಾರೆ, ಜೆರಾಲ್ ಭೊಗಪ್: ಕವಿತೆಂತ್ ಕಿತೆಂ ಮೆಳ್ತಾ? 'ಕವಿತೆಂತ್ ಕಿತೆಂ ಮೆಳ್ತಾ?' ಜೊಕ್ತೆಂ ಸವಾಲ್ ಹೆಂ, ಆಯ್ಚೊ ಕನ್ಸುಮರಿಸ್ಟ್ ಮ್ಹಣ್ಜೆ 'ಪಾಯ್ದ್ಯಾಚೆ ದಿಶ್ಟಿನ್ ಪಳೆಂವ್ಚೊ' ಕಾಳ್ ಮಾತ್ರ್ ನ್ಹಯ್. ಕಸ್ಟಮೈಜ್ಡ್ 'ಫಾಯ್ದೊ ಖಾಸ್ಗಿ ಗರ್ಜಾಂಕ್ ಪ್ಯಾಕೆಜ್ ಜಾವ್ನ್ ಮೆಳ್ಚೊ' ಕಾಳ್. ವಾವ್ರ್ ಸಂಪೊನ್ ಘರಾ ಪಾವ್‌ಲ್ಲೊ ಟಿಪಿಕಲ್ ಹಸ್‌ಬೆಂಡ್ ತರ್ ತುಂ ರಿಮೊಟಾಚೆಂ ಕಂಟ್ರೊಲ್ ಹೌಸ್ ವೈಪ್ ಥಾವ್ನ್ ತುಜಾ ಹಾತಾಕ್ ಶಿಪ್ಟ್ ಜಾತಾ. ಗಾಂವಾರ್ ಜಾಂವ್ಚ್ಯೊ ಖಬ್ರೊ ಜಾಯ್ ತುಕಾ. ಸಿರಿಯಾಲಾ ಥಾವ್ನ್ ನ್ಯೂಸ್ ಚಾನೆಲಾಂಕ್ ಸ್ವಿಚ್ ಒವರ್ ಕರ್ತಾಯ್. ತುಕಾ ಜಾಯ್ ಜಾಲ್ಲೆಂ ನ್ಯೂಸ್ ಕಸ್ಟಮೈಸ್ಡ್ ಜಾಲೆಂ ಮೆಳ್ತಾ ಕಾಂಯ್ ಡಜನಾ ವಯ್ರ್ ಚಾನೆಲಾಂನಿ. ಕೊಣಾಚೆ ನ್ಯೂಸ್ ಜಾಯ್ ತುಕಾ, ಪ್ರನೊಯ್ ರೋಯ್‌ಚೆಂ ವ ರಾಜ್‌ದೀಪ್ ಸರ್ದೆಸಾಯ್‌ಚೆಂ ವ ಅರ್ನೊಭ್ ಗೊಸ್ವಾಮಿಚೆಂ ವ ಹೆರ್ ಕೊಣಾಚೆಂ? ತಿಚ್ ಗಜಾಲ್ ಹೆರ್ ಕ್ಷೇತ್ರಾಂನಿ. ಖಂಯ್ಚೆ ಕಾಲೆತಿಚಿಂ ಪಿಲ್ಮಾ ಜಾಯ್ ತುಕಾ, ಖಂಯ್ಚ್ಯಾ ಜಿನ್ಸಾಚೆಂ ಮನೋರಂಜನ್ ಜಾಯ್? ಖೇಳ್, ಸ್ಪರ್ದೆ ಸೀರಿಯಾಲಾಂ, ರೀಯಾಲಿಟಿ ಶೊ, ಸ್ವಯಂವರ್, ಇಮೊಶನಾಲ್ ಅತ್ಯಾಚಾರ್ ಇತ್ಯಾದಿ, ಇತ್ಯಾದಿ. ಇತ್ಲ್ಯಾ ಎಡ್ವನ್ಸ್‌ಡ್ ಹ್ಯಾ ಕನ್ಸುಮರಿಸ್ಟ್ ಆನಿ ಕಸ್ಟಮೈಸ್ಡ್ ಕಾಳಾರ್ ಕವಿತೆಕ್ ತರೀ ಖಂಯ್ ಸ್ಥಾನ್ ಆಸಾ? ಕವಿತೆಂತ್ ನೀಜ್ ಜಾವ್ನ್ ಕಾಂಯ್ ತರೀ ಮೆಳ್ತಾ? ಹೆಂ ಖತ್ಕತೆಂ ಸವಾಲ್!

ಜೆರಾಲ್ ಥರಾನ್ ಕಾವ್ಯೆಂ:

ಸಾಹಿತ್ಯಾಚ್ಯಾ ಹೆರ್ ಪ್ರಕಾರಾ ಪಯ್ಕಿ ಕಾವ್ಯಾಚೆಂ ಉಗಮ್ ಪುರ್‍ವಿಲೆಂ ಅಶೆಂ ಮಾನುನ್ ಘೆತಾತ್. ಸುಮೆರಿಯಾನಾಂಚೆ ಗಿಲ್‌ಗಾಮೆಶ್ ಮಹಾ ಕಾವ್ಯೆಂ, (2700 ಕ್ರಿ.ಪೂ), ಬೈಬಲಾಚೆ ಥೊಡೆ ಬೂಕ್, ಹೊಮರಾಚೆ ಇಲಿಯೆಡ್ ಆನಿ ಓಡೆಸ್ಸಿ ಆನಿ ಭಾರಾತಾಚೆಂ ರಾಮಾಯಾಣಾ ಆನಿ ಮಹಾಭಾರಾತ್ ಮಹಾಕಾವ್ಯಾಂ ಹಾಕಾ ಥೊಡೆ ದಾಕ್ಲೆ. (http://wikipedia.org/wiki/Literature). ತಶೆಂ ಮ್ಹಣ್ ಚರಿತ್ರೆಂತ್ ಕವಿತೆಕ್ ಖಾಯ್ಸ್ ಕರ್ಚೊ ಲೋಕ್ ಕೆದ್ನಾಯ್ ಖೂಬ್ ಆಸ್‌ಲ್ಲೊ ಮ್ಹಣ್ಚೆಂ ಕಿತ್ಲೆಂ ಸಾರ್ಕೆಂ ತೆಂ ವಾದಾಚೆಂ. ಗ್ರೀಕ್ ಮಹಾತತ್ವಜ್ವ್ಹಾನಿ ಸೊಕ್ರೆಟೆಸ್ ಆನಿ ಪ್ಲೇಟೊ ಹಾಂಣಿ ಕವಿತೆಚ್ಯಾ ಕಾಯ್ದ್ಯಾಶಿರ್‌ಪಣಾವಿಶಿಂ ಸಯ್ತ್ ತರ್ಕ್ ಮಾಂಡ್‌ಲ್ಲೆಂ ಆಸಾ! (http://www.ravenchronicles.org/raven/rvback/issues/0497/forum/Olsen.html)

ಕಾಳಾ, ಕಾಳಾರ್ ಆನಿ ಪ್ರತ್ಯೇಕ್ ಜಾವ್ನ್ ಸಂಪಲ್ಲ್ಯಾ ದಾಕ್ಡ್ಯಾರ್ ಕಾಂಯ್ ಥೊಡ್ಯಾಂನಿ ಕವಿತೆಕ್ ಮರ್ಣಾಚೆ ಫಿರ್ಯಾದ್ ವಾಚುನ್, ನಿಕೆಪುಂಚೆಂ ಪ್ರೇತನ್ ಕೆಲ್ಲೆಂ ಆಸಾ. 1991 ಇಸ್ವೆಂತ್ 'ಕಾವ್ಯೆಂ ಪ್ರಸ್ತುತ್‌ಗೀ?' ‘Can poetry matter?’ ಮ್ಹಳ್ಳ್ಯಾ ಪ್ರಬಂಧಾಂತ್ ಡಾನಾ ಜೊಯಾ ಅಶೆಂ ಬರಯ್ತಾ: ಆಮೇರಿಕನ್ ಕಾವ್ಯೆಂ ಆತಾಂ ಪ್ರಮುಕ್ ಕಲಾತ್ಮಾಕ್ ಆನಿ ವಿಚಾರ್‌ವಂತ್ ಜಿವಿತಾಚೆಂ ಭಾಗ್ ಜಾಯ್ನಾಸ್ತಾ ಕೇವಲ್ ಎಕಾ ದಾಕ್ಟ್ಯಾ ಆನಿ ವೊರೆವಿಂಗಡ್ ಪಂಗ್ಡಾಚಿ ವಿಶಿಶ್ಟ್ ವೃತ್ತಿ ಜಾಂವ್ಕ್ ಪಾವ್ಲ್ಯಾ ಆನಿ ವಿಜ್ಮಿತ್ ಪಾಂವ್ಚೊ ವಿಶಯ್ ಮ್ಹಳ್ಳಾರ್ ಹೆಂ ಘಡೊನ್ ಆಸ್ಚ್ಯಾ ಹ್ಯಾ ಕಾಳಾರ್ ಕಾವ್ಯಾಕ್ ಯೆದೊಳ್ ಜಾಯ್ನಾತ್ಲಿ ತಸಲಿ ವಿಸ್ತಾರಾವ್ಣಿ ಲಾಬ್ಲ್ಯಾ ಕಾಂಯ್ ಕವಿತೆಚೆ ಆನಿ ಕವಿತೆ ವಿಶಿಂ ಪರ್ಗಟ್ ಜಾಂವ್ಚಾ ಸಬಾರ್ ಬೂಕಾಂ ದ್ವಾರಿಂ ವ ಕವಿ ಜಾವ್ನ್ ಎಕ್ಲ್ಯಾನ್ ಆಪ್ಲೊ ದಿಸ್ಪಡ್ತೊ ಗ್ರಾಸ್ ಜೊಡುಂಕ್ ಹೆರ್ ಕಾಳಾ ಪ್ರಾಸ್ ಆತಾಂ ಸಕ್‌ಲ್ಲ್ಯಾನ್.'  (http://www.danagioia.net/essays/ecpm.htm) ಬಹುಶಾ ಹೆಂ ಆಮೆರಿಕಾಂತ್ ಮಾತ್ರ್ ನ್ಹಯ್, ಹೆರ್ ದೇಶಾಂನಿ ಜಾಂವ್ಚಿ ಗಜಾಲ್. ಪುಣ್ ಸಂತೊಸ್ ಪಾಂವ್ಚಿ ಗಜಾಲ್ ಮ್ಹಳ್ಳ್ಯಾರ್: ಕವಿತಾ ವೆಗ್ಳ್ಯಾ ವೆಗ್ಳ್ಯಾ ಮಾಧ್ಯಾಮಾಂನಿ ಲೊಕಾಚಿಂ ಚಡ್ ಆನಿ ಚಡ್ ಕಾಳ್ಜಾಂ ಜಿಕುನ್ ಆಸಾ. ಕವಿತೆಚಿ ಲೊಕಾಮೊಗಾಳಾಯ್ ಇಂಟರ್‌ನೆಟಾರ್ ಅಂತ್ರಳಾಕ್ ಚಡ್ಲ್ಯಾ ಅಶೆಂ ಬ್ರಿಟಿಷಾಂ ಥಾವ್ನ್ ಚಲ್ಚ್ಯಾ ಪೊಯೆಟ್ರಿ ಆರ್‍ಕಾಯ್ವ್ ಜಾಳಿಜಾಗ್ಯಾ ವಿಶಿಂ Stephen Adams 2008 ಇಸ್ವೆಂತ್ ಬರಯ್ತಾ. ತೆದ್ನಾಂ ಸುಮಾರ್ 1,25,000 ವ್ಯಕ್ತಿಂನಿ ಹ್ಯಾ ಜಾಳಿ ಜಾಗ್ಯಾಚಿ ಬೆಟ್ ಕೆಲ್ಲಿ. (http://www.telegraph.co.uk/culture/books/3560735/Poetrys-popularity-soars-online.html) ಜಾವ್ಕ್ ಪುರೊ ಹೆ ಕೇವಲ್ ಆಂಕ್ಡೆ, ಪುಣ್ ಹೆ ಆಂಕ್ಡೆ ಆನಿ ಹೆಂ ಟ್ರೆಂಡ್ ಭುಕೆಲ್ಲ್ಯಾ ಕವಿತೆಚ್ಯಾ ರಸಿಕಾ ವಿಶಿಂ ಕಾಂಯ್ ತರೀ ಸಾಂಗ್ತಾತ್. ಕೊಂಕಣಿ ಪೊಯೆಟ್ರಿ.ಕೊಮ್ ಜಾಳಿ ಜಾಗೊ ಏಕ್ ಅಸಲೊ ಜಾಳಿ ಜಾಗೊ, ಜಾಚೆ ವರ್ವಿಂ ಥೊಡ್ಯಾಂಚಿ ತರೀ ಕಾವ್ಯಾಚಿ ಭುಕ್ ಥಾಂಬ್ಲ್ಯಾ. ಕೊಂಕ್ಣಿಪೊಯೆಟ್ರಿ.ಕೊಮ್ ಆನಿ ಹೆರ್ ಜಾಳಿಜಾಗ್ಯಾ ವರ್ವಿಂ ಕೊಂಕ್ಣಿ ಕವಿತಾ ಸಬಾರ್ ಕೊಂಕ್ಣಿ ಮೊಗಿಂಕ್ ಪಾವ್ಲ್ಯಾ ಅಶೆಂ ಆಮಿ ಖಂಡಿತ್ ಸಾಂಗುಂಯೆತಾ.

ಕೊಂಕ್ಣಿ ಕಾವ್ಯಾಚೊ ಸಂಧರ್ಬ್:
 
ಸಕ್ಕಡ್ ಭಾಶೆಂ ಬರಿಂ ಕೊಂಕ್ಣಿ ಭಾಸ್ ನ್ಹಯ್, ಕೊಂಕ್ಣಿ ಭಾಸ್ ವಿಶಿಶ್ಟ್. ಕೊಂಕ್ಣಿ ಭಾಶೆಚೊ ಸಂಧರ್ಬ್ ವೆಗ್ಳೊ. ದೆಕುನ್ ಕೊಂಕ್ಣಿ ಕಾವ್ಯಾಚೊ ಸಯ್ತ್ ಸಂಧರ್ಬ್ ಏಕ್ದಮ್ ವೆಗ್ಳೊ. ಹೆಂ ಸತ್ ವಿಶೇಶ್ ಥರಾನ್ ಮ್ಹಾಕಾ ಸುಸ್ತಲೆಂ ಪರ್ಗಾವಾಂತ್ ಆಸ್ತಾನಾ! ಸ್ಪಾನಿಶ್ ಆನಿ ಇಟೆಲಿಯಾನ್ ಭಾಶೆಕ್ ತಾಂತಾಂಚೆ ಆಖ್ಖೆ ಪರ್ಜೆ ಥಾವ್ನ್ ಮೆಳ್ಚೊ ಮಯ್ಪಾಸ್, ಭಕ್ತ್ ಅಸಾಮಾನ್ಯ್. ಎಕಾ ಪುಟ್‌ಬೊಲ್ ಸ್ಟೇಡಿಯಮಾಂತ್ ಹಜಾರಾನಿ ಲೋಕ್ ಜಮ್ತಾನಾ ಸಗ್ಳ್ಯಾಂನಿ ಮ್ಹಳ್ಳ್ಯಾರಿ ಹರ್‍ಯೆಕ್ಲಾನ್ ಕಸ್ಲೊಚ್ ತಪಾವತ್ ನಾಸ್ತಾನಾ ಎಕಾಚ್ ತಾಳ್ಯಾನ್, ಎಕಾಚ್ ಸ್ತರಾನ್ ಗಾಂವ್ಚೆಂ ತೆಂ ಕಸ್ಲೆಂಯ್ ಗೀತ್ ಆಂಗಾರ್ ಲೋಂವ್ ಉಬಿ ಕರ್ಚೆ ತಸಲೆಂ. ಕೊಂಕ್ಣೆಂತ್ ಕೆದ್ನಾಂ ಅಶೆಂ ಜಾಂವ್ಚೆಂ? ಅಶೆಂ ಮ್ಹಾಕಾ ಭೊಗ್‌ಲ್ಲೆಂ ಆಸಾ. ವಾಸ್ತವ್ ಗಜಾಲ್, ಆಮಿ ಕೊಂಕ್ಣಿ ಲೋಕ್ ಕೇವಲ್ ಧಾ ಜಣ್ ಎಕಾ ಮನಾಚೆ, ಎಕೆ ಕಾಲೆತಿಚೆ ಸಾಂಗಾತಾ ಮೆಳ್‌ಲ್ಲೆ ಕಡೆನ್ ಏಕ್ ಸಾಂಸ್ಕ್ರತಿಕ್ ಪದ್ ಗಾಂವ್ಕ್ ಕಿತ್ಲೆಂ ಖರ್ಶೆತಾಂವ್? ಹೊ ಕೊಂಕ್ಣೆಚೊ ಸಂಧರ್ಬ್!

ಕೊಂಕ್ಣಿ ಭಾಸ್ ಕಾಂಯ್ ಪಾಂಚ್ ಲಿಪಿಂನಿ ತಿ ಬರಂವ್ಚಿ ಆನಿವಾರ್‍ಯತಾ. ಥಂಯ್ಚ್ ಜಾಲೆ ಥೊಡೆ ಪಾಂಟೆ. ವೆಗ್ಳ್ಯಾ ವೆಗ್ಳ್ಯಾ ಜಾಗ್ಯಾಂನಿ, ಥರಾವಳ್ ರಿತಿನ್ ಉಲಯ್ತಾನಾ ತಿಂ ಕೊಂಕ್ಣಿ ಉಲಯ್ತಾತ್‌ಗೀ ವ ಕೊಂಕ್ಣೆಚೊ ದೆಸ್ವಾಟ್ ಕರ್ತಾತ್‍ಗಿ ಮ್ಹಳ್ಳೆಂ `ಹೈ ಕ್ಲಾಸ್' ಭೊಗಪ್ ಥೊಡ್ಯಾಂಕ್. ಆಮ್ಕಿಚ್ ಲಿಪಿ ಕೊಂಕ್ಣೆಚಿ ಲಿಪಿ ಜಾಯ್ಜಾಯ್, ತಸಲೆ ಲಿಪಿಕ್ ಮಾತ್ರ್ ಸಮ್ಮಾನ್ ಅಶೆಂ ವಾದ್, ವಿವಾದ್ ಆನಿ ಥೊಡ್ಯಾಂಚೊ. ಹೊ ಕೊಂಕ್ಣೆಚೊ, ಕೊಂಕ್ಣಿ ಕಾವ್ಯಾಚೊ ಸಂಧರ್ಬ್.

ಎಕಾ ಸಿರ್ಸಿಚ್ಯಾ ಕೊಂಕ್ಣಿ ವಾವ್ರಾ ಸಾಂಗೊಡ್ಯಾಕ್ ಹಾಂವ್ ವಿಚಾರಿ: 'ತುಂ ಕೊಂಕ್ಣಿ ವಾಚ್ತಾಯ್ಗಿ?' 'ಕೊಂಕ್ಣೆಕ್ ಲಿಪಿ ನಾ ನ್ಹಯ್ ? ಲಿಪಿ ಆಸಾ ತರ್ ವಾಚ್ಚೆಂ?' ತಿಚಿ ಮಟ್ವಿ ಜಾಪ್. ಜಾಪ್ ವಾಜ್ಬಿ. ಪುಣ್ ಜಾಪಿಚೊ ಭಾವ್ ಕೊಂಕ್ಣೆಂತೀ ವಾಚ್ಚೆಂ ಆಸಾಗೀ, ಕೊಂಕ್ಣೆಂತೀ ಸಾಹಿತ್ಯ್ ಆಸಾಗಿ ಮ್ಹಳ್ಳೆಂ. ಹೋಯ್ ಏಕ್ ಕೊಂಕ್ಣಿ ಕಾವ್ಯಾಚೊ ಸಂದರ್ಬ್. ಕುಂದಾಪುರ್ಚಾ ಆನ್ಯೆಕಾ ಸಾಂಗೊಡ್ಯಾ ಥಾವ್ನ್ ತೊಚ್ ಉದ್ಗಾರ್! ಮಡಿಕೇರಿಚಾ ಆನ್ಯೆಕ್ಲ್ಯಾನ್ ಮ್ಹಜಿ ಮಾಂಯ್ ಭಾಸ್ ಕೊಂಕ್ಣಿ ಪುಣ್ ಮ್ಹಾಕಾ ಕೊಂಕ್ಣಿ ವಾಚುಂಕ್ ಯೇನಾ ಮ್ಹಳ್ಳೆಂ ಬಹುಶಾ ಜಾಯ್ತ್ಯಾ ಕೊಂಕ್ಣಿ ಪರ್ಜೆ ಥಾವ್ನ್ ಅಜ್ ಆಯ್ಕೊಂಕ್ ಮೆಳಾತ್. ಹಾಂವ್ ಲ್ಹಾನ್ ಥಾವ್ನಚ್ ಬೆಂಗ್ಳೂರ್ ಆಸಾಂ, ಕೊಂಕ್ಣಿ ಡ್ಯಾಡಿ, ಮಾಮ್ಮಿ ಮಾತ್ರ್ ಉಲಯ್ತಾತ್ ಅಶೆಂ ಮ್ಹಣ್ಚಾಂಚೊ ಸಂಕೊ ಆಜ್ ಅಧಿಕ್ ಜಾಲಾ. ಕೊಂಕ್ಣ್ಯಾಂಕ್ ತಳ್ಮಳಾಂವ್ಚಿ ಗಜಾಲ್ ಹಿ!

ಕೊಂಕ್ಣಿ ಭಾಶೆಂತ್ ಆನಿ ಸಂಸ್ಕ್ರತೆಂತ್ ರೊಂಬ್‌ಲ್ಲ್ಯಾ ಆಮ್ಚ್ಯಾ ಕಾಂಯ್ ವ್ಹಡಿಲಾಂನಿ ಬರೊ, ಸುಶೆಗಾಚೊ ಪುಡಾರ್ ಆಪ್ಲ್ಯಾ ಭುರ್ಗ್ಯಾಂಕ್ ದೀಂವ್ಕ್ ಕೊಂಕ್ಣೆಕ್ ತಾಂಚೆ ಥಾವ್ನ್ ಲಿಪಯ್ಲೆಂ ಬರ್‍ಯಾ ಇರಾಧ್ಯಾನ್, ತಾಂಕಾಂ ಕೊಂಕ್ಣೆಚಿ ಸಾವ್ಳಿ ಪಡಾನಾಸ್ಲೆ ಪರಿಂ ಸಾಂಬಾಳ್ಳೆಂ ಬರ್‍ಯಾಚ್ ಇರಾದ್ಯಾನ್, ಪುಣ್ ಕಸ್ಲ್ಯಾ ಪರಿಣಾಮಾಕ್? ಎಕಾ ಜನಾಂಗಾಕ್‌ಚ್ ತಾಂಚ್ಯಾ ಹಕ್ಕಾಚಿ ಭಾಸ್ ಆನಿ ಸಂಸ್ಕೃತೆ ಥಾವ್ನ್ ವಂಚಿತ್ ಕರ್‍ಚ್ಯಾಂತ್ ! ಹೆಂ ಸಾರ್ವತ್ರಿಕ್ ಸತ್ ಆಯ್ಲೆವಾರ್ ಉತ್ತರ್‌ಖಂಡಾಚಿ ಗವರ್ನರ್ ಮಾರ್ಗರೆಟ್ ಆಳ್ವಾ ಹಿಣೆಂ ಪರತ್ ಸಾಂಗ್ಲೆ: ಆಜ್ ಕೊಂಕ್ಣಿ ಕುಟ್ಮಾಂ ಕೊಂಕ್ಣಿ ಉಲಯ್ನಾಂತ್. ಆಮಿ ಕೊಂಕ್ಣಿ ಉಲಂವ್ಕ್ ವಿಸ್ರಾನಾಯೆ, ಲಜೆನಾಯೆ. ಆಮ್ಚೆಂಯ್ ಮಾಗ್ಣೆ ಹೆಂಚ್.  ಪುಣ್ ಹೊ ಆಸಾ ಕೊಂಕ್ಣೆಚೊ ಸಂಧರ್ಬ್! ಹೊ ಕೊಂಕ್ಣಿ ಭಾಶೆಚೊ, ಕೊಂಕ್ಣಿ ಸಾಹಿತ್ಯಾಚೊ ಆನಿ ಕೊಂಕ್ಣಿ ಕಾವ್ಯಾಚೊ ಸಂಧರ್ಬ್.

ಕೊಂಕ್ಣಿ ಕಾವ್ಯೆಂ:

ಎಕಾ ಕಾಳಾರ್ ವಾಚುಂಕ್ ವಾಪರ್ಚೊ ವೇಳ್ ಆಜ್ ಟಿವಿ, ಪಿಲ್ಮಾಂ, ಇನ್‌ಟರ್‌ನೆಟ್ ಹಾಂಕಾಂ ವೆತಾ. ವಾಚುಂಕ್ ಕಿತೆಂ ವಿಂಚ್ಲ್ಯಾರಿ ತೆಂ ಬಹುಶಾ ಖಬ್ರೊ, ಕಾಣಿಯೊಂ, ವಿನೋದ್ ಹಾಂಚ್ಯಾ ವಾಂಟ್ಯಾಕ್ ವೆತಾ. ಕವಿತಾ ಮ್ಹಳ್ಳಾರ್ ಕಸ್ಲೆಂ ಜಡಾಯೆಚೆಂ, ಸಂಕೀರ್ಣ್ ವಾಚಪ್, ಸಾದ್ಯಾ ಮನ್ಶಾಕ್ ತೆಂ ಸೀಮಿತ್ ನ್ಹಯ್.

ತರೀಪುಣ್ ಆಜ್ ಕೊಂಕ್ಣಿ ಕಾವ್ಯಾಕ್ ಮಾತ್ಶೆ ಬರೆ ದೀಸ್ ಆಯ್ಲ್ಯಾತ್ ಅಶೆಂ ಆಮಿ ಮ್ಹಣ್ಯೆತ್ ಕೊಣ್ಣಾ. ಆಯ್ಚೆ ಕವಿತೆಚೆ ದೀಸ್ ಪಳೆಯ್ಲಾರ್, ಮ್ಹಾಕಾ ಬೊಗ್ತಾ ಥೊಡ್ಯಾ ವರ್ಸಾಂ ಆದಿಂ ಕೊಂಕ್ಣಿ ಕವಿತಾ ಖಂಡಿತ್ ಘಟ್ ಆಸ್‌ಲ್ಲಿ ಪುಣ್ ಪಾತಳ್ ಥಂಯ್ ಹಾಂಗಾ ಆಸ್‌ಲ್ಲಿ. ಕವಿ, ಸಾಹಿತಿಂಚ್ಯಾ ಹಾತಾಂತ್ ಜರೂರ್ ತಿ ಆಸ್‌ಲ್ಲಿ, ಪುಣ್ ಸಾದ್ಯಾ ಲೊಕಾಕ್ ತಿ ಆಯ್ಚೆಬರಿಂ ಪಾವೊಂಕ್ ನಾಸ್‌ಲ್ಲಿ. ಕಾಂಯ್ ಅಪ್ರೂಪ್ ಕವಿಗೋಷ್ಠಿ ಚಲ್ತಲ್ಯೊ ಖಂಡಿತ್. ಪುಣ್ ತ್ಯೊ ಕಾಂಯ್ ರೊಬಿನ್ ವಿಲಿಯಮ್ಸಾನ್ ಅಬಿನಯ್ ಕೆಲ್ಲೆಂ ಪಿಲ್ಮ್, 'ಡೆಡ್ ಪೊಯೆಟ್ಸ್ ಸೊಸೈಟಿ' ಂತ್ಲ್ಯಾ ಗುಪಿತ್ ಆನಿ ಭಾಯ್ಲ್ಯಾಭಾರ್ ಮ್ಹಳ್ಳೆಭಾಶೆನ್.! 'ಡೆಡ್ ಪೊಯೆಟ್ಸ್ ಸೊಸೈಟಿ' ಪಿಲ್ಮಾಂತ್ಲೊ ಮೆಸ್ತ್ರಿ ಆಪ್ಲ್ಯಾ ವಿಶಿಶ್ಟ್ ಕವಿತಾ ಆನಿ ಸಾಹಿತ್ಯ್ ಶಿಕ್ಪಾ ದ್ವಾರಿಂ ತರ್ನ್ಯಾ ಜನಾಂಗಾಚ್ಯಾ ಹರ್ದ್ಯಾಂತ್ಲಿ ಪರಾಂಪರಾತ್ಮಕ್ ಆನಿ ಕನ್ಪೊರ್‍ಮಿಸ್ಟ್ ಧುಳ್ ಪಾಪುಡ್ನ್ ಅಭಿವ್ಯಕ್ತಿಚಿ ಆನಿ ಸ್ವತಂತ್ರ್ ಚಿಂತ್ಪಾಚಿ ಹುಮೆದ್ ಭರ್ತಾ. ಹ್ಯಾ ಪಿಲ್ಮಾಂತ್, ಏಕ್ ಜೀವ್ ಬಲಿ ಜಾವ್ನ್, ಮಸ್ತ್ರಿ ಕೊಲೆಜಿ ಥಾವ್ನ್ ಡಿಬಾರ್ ಜಾಲೊ ತರ್‌ಯ್ ಜಿವ್ಯಾ ಕವಿಂಚೊ, ಜಿವ್ಯಾ ಜನಾಂಗಾಚೊ ಉಗಮ್ ಜಾತಾ. ಕಾಂಯ್ ಅಸಲ್ಯಾ ಡೆಡ್ ಪೊಯೆಟ್ ಸೊಸೈಟಿಂತ್ ಎಕಾ ಚಾಪ್ರಾ ದೆಕೊಸ್ತಾಚೊ, ಏಕಾ ಮೆಲ್ವಿನಾ ರೊಡ್ರಿಗಸಾಚೊ ವಾವ್ರ್ ಕಿತೆಂ ತೊ ಕೊಂಕ್ಣಿ ಕವಿತೆಕ್ ಕಳಿತ್. ಪುಣ್ ಆಜ್ ಕೊಂಕ್ಣೆಂತ್ ಮೆಲ್ವಿನ್ ಹುಮೆದಿಚಿಂ ವೊಕ್ತಾಂ ಭರ್‍ಚೊ ಮೆಸ್ತ್ರಿ ಪಾರ್ ಎಕ್ಸೆಲೆನ್ಸ್ ತೆಂ ಆಮ್ಚೆಂ ಭಾಗ್!

ಜಾಯ್ತೆಂ ಪಾವ್ಟಿ ಎಕೆ ವ್ಯಕ್ತಿಚ್ಯಾ ವಾವ್ರಾ ದ್ವಾರಿಂ ಕವಿತೆಕ್ ತ್ರಾಣ್ ಲಾಬ್‌ಲ್ಲೆಂ ಆಸಾ. ಓಸ್ಕರ್ ಪುರಸ್ಕಾರ್ ವಿಜೇತ್ ‘La vita é bella’ ‘Life is beautiful’  ಪಿಲ್ಮಾಚೊ ಆಕ್ಟರ್ ರೊಬೆರ್ತೊ ಬೆನೀನಿ ಇಟೆಲಿಚ್ಯಾ ಶೆರಾಂ, ಶೆರಾಂನಿ ತಶೆಂ ಟಿವಿರ್, ತೆರಾವ್ಯಾ-ಚವ್ದಾವ್ಯಾ ಶೆಕ್ಡ್ಯಾಚೊ ಪ್ರಕ್ಯಾತ್ ಇಟೆಲಿಯೆನ್ ‘sommo poeta’ ಪರಮ್ ಕವಿ, ಥಾಂತೆ ಅಲ್‌ಗಿಯೆರಿಚಿ 'ಡಿವೈನ್ ಕೊಮಿಡಿ' ಅಸಾಧಾರಾಣ್ ಉರ್ಬೆನ್ ಲೊಕಾಕ್ ಪ್ರಸ್ತುತ್ ಕರ್ತಾ. 'ಡಿವೈನ್ ಕೊಮಿಡಿ' ಏಕ್ ಕ್ಲಾಸಿಕ್ ಮ್ಹಣ್ ಅಲ್ತಾರಿರ್ ಚಡವ್ನ್ ಲೋಕ್ ಪುಜಾ ಕರ್ತಾನಾ, ಹ್ಯಾ ಕ್ಲಾಸಿಕಾಕ್ ಅಲ್ತಾರಿರ್ ಥಾವ್ನ್ ದೆವವ್ನ್ ಬೆನಿನಿ ಹಿ ಕವಿತಾ ಲೊಕಾಚ್ಯಾ ಕಾಳ್ಜಾ-ಮನಾಂನಿ ಘೊಂಟೆರ್ ಭಾಂದ್ಚೊ ತಸಲೊ ವಾವ್ರ್ ಕರ್ತಾ ಆನಿ ಕವಿತಾ ಆನಿ ಸಾಧ್ಯಾ ಲೊಕಾ ಮಧೆಂ ಅಪ್ರೂಪಾಚಿ ಸಯ್ರಿಕ್ ಘಡ್ತಾ.

ಕೊಂಕ್ಣಿ ಕವಿತಾ ಕಿತ್ಯಾಕ್ ವಾಚಿಜಾಯ್?

ಕವಿತಾ ಕಿತ್ಯಾಕ್ ವಾಚಿಜಾಯ್ ಮ್ಹಳ್ಳ್ಯಾ ಸವಾಲಾಂತ್ ಕವಿತಾ ಚಡ್ ಲೋಕ್ ವಾಚಿನಾ ಮ್ಹಳ್ಳೆಂ ಮಾರ್ಮಿಕ್ ಸತ್ ಆಸಾ. ತರ್ ಕವಿತಾ ಕಿತ್ಯಾಕ್ ವಾಚಿನಾಂತ್? ಎಕಾ ಸ್ಪಾನಿಶ್ ಕ್ಲಾಶಿಂತ್ ಥೊಡ್ಯಾ ವಿಧ್ಯಾರ್ಥಿಂ ಸಂಗಿಂ ಫಾಮಾದ್ ನೊಬೆಲ್ ವಿಜೆತ್ ಕವಿ ಪಾಬ್ಲೊ ನೆರುದಾಚಿ ಏಕ್ ಅಪುರ್ಬಾಯೆಚ್ಯಾ ಮೊಗಾಚೆ ಕವಿತೆಚೆಂ ಶಿಕಪ್ ಕರ್ತಾನಾ, ವಿದ್ಯಾರ್ಥಿಂಚಿ ನಿರಾಸಕ್ತ್ ಪಳೆವ್ನ್ ಹಾಂವ್ ಆಜ್ಯಾಪ್ ಪಾವ್ಲೊಂ. ನೊಬೆಲ್ ಕವಿ, ರೊಮ್ಯಾಂಟಿಕ್ ಕವಿತಾ, ಪುಣ್ ತರ್ನ್ಯಾ ಜನಾಂಗಾಚಿ ನಿರಾಸಕ್ತ್! ಕಿತ್ಯಾಕ್ ಅಶೆಂ? ಜಾಂವ್ಕ್ ಪುರೊ, ಆಮ್ಚಾ ಶಿಕ್ಷಣ್ ರಿತಿಂತ್ ಕವಿತೆಚೊ ವಿಶಯ್ ಏಕ್ ಗಂಭೀರ್ ವಿಶಯ್ ಕಸೊ ಜಾಯಿರ್ ಜಾಂವ್ಚೊ! ಶಾಳಾ ಕೊಲೆಜಿಂತ್ ಕವಿತಾ ಶಿಕನಾಸ್‌ಲ್ಲೆ ಕೊಣಿ ನಾಂತ್. ಪುಣ್ ಮ್ಹಾಕಾ ಭೊಗ್ತಾ ಅಸಲೆ ಪ್ರಕ್ರಿಯೆಂತ್ ಕವಿತಾ ಏಕ್ ಸಂಕೀರ್ಣ್, ಮಿಸ್ತೆರಾಚೊ ವಿಶಯ್ ಅಶೆಂ ಪ್ರಸ್ತುತ್ ಜಾತಾ. ದೊನ್ ವೊಳಿಂಚೆ ಕವಿತೆಂತ್ ದೊನ್ ಪಾನಾಂಚೊ ಅರ್ಥ್, ಜಿಣ್ಯೆಂತ್ ಆಯ್ಕಾನಾಸ್‌ಲ್ಲೆ ಸಬ್ದ್ ಆನಿ ಸಬ್ಧಾಂಚೆಂ ಜಬರ್‌ದಸ್ತ್ ಸರ್ಕಸ್... ಅಶೆಂ ಬಹುಶಾ ಕವಿತಾ ಲೊಕಾಕ್ ತಿಚೆ ಲಾಗಿಂ ವೊಡ್ಚಾ ಪ್ರಾಸ್, ಪಯ್ಸ್ ವ್ಹರ್ತಾ. ಹಾಕಾ ಪರಿಹಾರ್ ಏಕ್ ವೆಗ್ಳೊ ವಿಶಯ್! ಮಂಗ್ಳುರಾಂತೀ ಕೊಂಕ್ಣೆಚೆಂ ಶಿಕಪ್ ಶಾಳಾನಿ ಸುರು ಜಾಲಾಂ. ಕವಿತೆಚ್ಯಾ ಶಿಕ್ಪಾ ವರ್ವಿಂ ಅಶೆಂ ಜಾಯ್ನಾಯೆ ಬಗರ್ ಕೊಂಕ್ಣಿ ಕವಿತೆಚೆ ಮೊಗಿ ತರ್ನ್ಯಾ ಜನಾಂಗಾ ಥಾವ್ನ್ ಕಿರ್ಲೊಂದಿ ಅಶೆಂ ಆಮಿ ಬಾಳ್ಗುಂಚೆಂ. ತರ್ ಆತಾಂ ಆಮಿ ಕೊಂಕ್ಣಿ ಕವಿತಾ ಕಿತ್ಯಾಕ್ ವಾಚಿಜಾಯ್ ಮ್ಹಳ್ಳೆವಿಶಿಂ ಥೊಡೆಂ ಚಿಂತನ್ ಆಟಯಾಂ.

1. ಕವಿ ವಿಚಿತ್ರ್ ಮನಿಸ್ ನ್ಹಯ್, ತೊ ಏಕ್ ನೊರ್ಮಲ್ ವ್ಯಕ್ತಿ:  ಕವಿತಾ ಮಿಸ್ತೆರಾಚೊ ವಿಶಯ್ ತರ್, ಕವಿ ಕಾಂಯ್ ಸುಮಾರ್ ವ್ಯಕ್ತಿಗೀ? ಅಸಾಮಾನ್ಯ್ ಮನಿಸ್ ತೊ. ಮೊಡಾಂನಿ ಜಿಯೆಂವ್ಚೊ, ಮಿಸ್ತೆರಾಂನಿ ಥಕಂವ್ಚೊ ಜಿನೊಸ್ ತಾಚೊ. ಸುಟಾವೆಂ ಸಾಂಗ್ಚೆಂ ತರ್ ಅಬ್‌ನೊರ್ಮಲ್ ತೊ. ಇಟೆಲಿಂತ್ ಮ್ಹಜೊ ಈಸ್ಟ್ ಎಕ್ಲೊ, ಕೊಣಿ ಇಂಪ್ರಕ್ಟಿಕಲ್, ಥಿಯೆರೆಟಿಕ್ ಮನ್ಶಾಕ್ ಕವಿ ಮ್ಹಣ್ ವೊಲಾಯ್ತಾಲೊ, ಹೋ.. ದಾವಿದ್‌ಗೀ, ವ್ಹಡ್ಲೊ ಕವಿ ತೊ ಅಶೆಂ ಕಿತ್ಲ್ಯಾ ಕವಿಂಕ್ ತಾಣೆ ತೆಲಾಯ್ಲಾಂ ಜಾಂವ್ಕ್ ಪುರೊ. ತಿತ್ಲಿ ಕವಿಕ್ ಮರ್ಯಾದ್  ದಾಂತೆಚ್ಯಾ ಗಾಂವಾಥಾವ್ನ್! ಬಹುಶಾ ಕವಿಂಕ್ ಮೆಳ್ಚಾ ಹೆ ಮರ್ಯಾದೆಕ್ ಖಂಯ್ಚ್ಯಾಯ್ ದೇಶಾಂತ್ ಫರಕ್ ನಾ!! ಕಾಂಯ್ ಥೊಡೆ ಕವಿ ತಸಲೆಯ್ ಆಸ್ತಿತ್. ಪುಣ್ ಆಯ್ಲೆವಾರ್ಚಾ ದಿಸಾಂನಿ ಕವಿಚೆಂ ಹೆಂ ಚಿತ್ರಣ್ ಬದ್ಲೊನ್ ಆಸಾ. ಆಜ್ ಕವಿ ಎಕ್ದಮ್ ನೊರ್ಮಲ್ ಮನಿಸ್ ಜಾಂವ್ಕ್ ಪೆಚಾಡ್ತಾ. ಮಾಗಿರ್ ಕವಿ ಮ್ಹಳ್ಳ್ಯಾನ್ ಸಾದೊ, ಸರ್ವಾಂಚೊ ಮನಿಸ್ 'ಕೊಮನ್ ಮ್ಯಾನ್' ಜಾಯ್ಜಯ್ ಮ್ಹಣ್ ಶ್ರೀ ಜಯಂತ್ ಕಾಯ್ಕಿಣಿನ್ ಪೊರುಂ ಕವಿತಾ ಫೆಸ್ತಾರ್ ಮ್ಹಳ್ಳೆಂ ಕಿತ್ಲೆಂ ಸೂಕ್ತ್!

2. ಸರ್ವ್ ಕವಿತಾ ಸಂಕೀರ್ಣ್ ನ್ಹಯ್. ಕವಿತಾಯ್ ಸಲಿಸ್ ಆಸಾತ್: ಕವಿತಾ ಕಾಣ್ಯೆ, ಕಾದಂಬರಿ ಬರೀ ಸಲೀಸ್ ನ್ಹಯ್, ತೊ ತಾಚೊ ಸಂಯ್ಭ್ ನ್ಹಯ್. ಸೊಂಪ್ಯಾ ಉತ್ರಾಂನಿ ಮೆಲ್ವಿನ್ ರೊಡ್ರಿಗಸ್ ಮ್ಹಣ್ತಾ, ಏಕ್ ಕಥಾ ಮನಾಚೆ ಮೊಡ್ಕೆಂತ್ ಶಿಜೊನ್, ಆಟೊನ್, ಆಟಟೀತ್ ಜಾವ್ನ್ ವಿರ್‍ಗಳ್ತಾನಾ, ವಿರ್‍ತಾನಾ ಯಾ ಇರ್‍ತಾನಾ ಥಂಯ್ಸರ್ ಏಕ್ ಕವಿತಾ ಕಿರ್‍ಲತಾ, ಆಂಕ್ರೆತಾ, ಪಾಲೆತಾ ಆನಿ ಫುಲ್ತಾ.  ಕತೆಚೆಂ ವಿರ್‍ಗಳಾಯಿಲ್ಲೆಂ ರೂಪ್‌ಚ್ ಕವಿತಾ! (`ಕುಪಾಂ ಪೊಂದ್ಲಿಂ ಮುಖಾಂ' -ಸಂ: ಮೆಲ್ವಿನ್ ರೊಡ್ರಿಗಸ್, ಪ್ರಸ್ತಾವನ್). ತರ್ ಕವಿತಾ ಆನಿ ಸಾಹಿತ್ಯಾಚ್ಯಾ ಹೆರ್ ಪ್ರಕಾರಾಂ ಮಧೆಂ ಹೊ ಮಹತ್ವಾಚೊ ತಪಾವತ್ ಆಮಿ ಮಾನುನ್ ಘೆಜಾಯಿಚ್. ಹಾಂವೆಂ ಬರಯಿಲ್ಲ್ಯಾ ಕವಿತೆಂಕೀ ಮ್ಹಾಕಾ ಚಡ್ತಾವ್ ಜಣಾಂನಿ ದಿಲ್ಲಿ ಪ್ರತಿಕ್ರಿಯಾ ಹಿಚ್: ತುಜೊ ಬೂಕ್ ಇಲ್ಲೊ ವಾಚ್ಲೊ, ಮ್ಹಾಕಾ ಕಾಂಯ್ ಸಮ್ಜೊನಾಂ! ಜಾಂವ್ಕ್ ಪುರೊ ಕವಿತೆಚೆಂ ಸುಕ್ ಬೊಗುಂಕ್ ಆಮಿ ಥೊಡೆಂ ‘mental  tuning’ ಕರಿಜಾಯ್ ಪಡ್ತಾ. ಆನಿ ಥೊಡೆ ಪಾವ್ಟಿಂ ಕವಿತಾ ಸಮ್ಜೊಂಕ್ ಕಾಂಯ್ ಥೊಡೊ ವೇಳ್ ಲಾಗ್ತಾ. ತಶೆಂ ಮ್ಹಣ್ ಸರ್ವ್ ಕವಿತಾ ಸಂಕೀರ್ಣ್ ನಾ, ಆನಿ ಸಂಕೀರ್ಣ್ ಕವಿತಾಯ್ ಸಮ್ಜೊಂಕ್ ಅಸಾಧ್ಯ್ ಖಂಡಿತ್ ನ್ಹಯ್. ದೆಕುನ್ ಕವಿತಾ ಸಮ್ಜನಾ ಮ್ಹಣ್ ಕೊನ್ಶಾಕ್ ಲೊಟ್ಚೆಂ ಕಿತ್ಲೆಂ ಸಾರ್ಕೆಂ. ಮಾಗಿರ್ ಜಿಣ್ಯೆಂತ್ ಮೊಲಾಧಿಕ್ ಸುಕ್ ಸಲಿಸಾಯೆನ್ ಕಾಂಯ್ ಮೆಳ್ತಾ? ಹಾಂವೆ ಸಮ್ಜೊಂಕ್ ಕಶ್ಟ್ ಮ್ಹಣ್ ಲೆಕ್‌ಲ್ಲೊ ಕವಿ ಎಚ್ಚೆಮ್ಮಾಚಿ 'ಜನೆಲ್' ಕವಿತಾ ವಾಚಾ: ಘರ್‌ಚೆಂ ಜನೆಲ್ ದಾರಾ ತೆದೆಂ, ವ್ಹಡ್ ಕಾಂಯ್ ನ್ಹಂಯ್... ಮುಂದರುನ್ ದಾರ್ ಘೊವಾಚೆಂ, ಜನೆಲ್ ಪ್ರೇಮಿಚೆಂ, ದೆಕುನ್ ಮಿಸ್ತಾ ಎಕಾ ಘರಾಕ್ ದಾರ್ ಏಕ್, ಜನೆಲಾ ಮಾತ್ ಸಬಾರ್. ಸುಡಾಳ್, ಸಲೀಸ್ ಚಾರ್ ಸಬ್ದಾಂನಿ ಕಾಂಯ್ ಹಜಾರ್ ಜಿಣ್ಯೆ ಕಾಣಿಯೊಂ ಪ್ರಸ್ತುತ್ ಜಾತಾತ್. ಹೆಂ ಕವಿತೆಂತ್ ಮಾತ್ರ್ ಜಾಂವ್ಕ್ ಸಾಧ್ಯ್. ದೆಕುನ್ ಕವಿತೆಕ್ ಆಮಿ ಆವ್ಕಾಸ್ ದೀಜಾಯ್ ಪಡ್ತಾ.

3. ಕವಿತಾ ಘಡ್ಯೆನ್ ವಾಚುನ್ ಕಾಡ್ಯೆತ್: ಕವಿತಾ ವಾಚುಂಕ್ ವೊರಾಂ ನಾಕಾತ್. ಮಿನುಟಾಂನಿ ಏಕ್ ಕವಿತಾ ವಾಚುನ್ ಕಾಡ್ಯೆತ್. ಮ್ಹಳ್ಯಾರ್, ವೆಳಾಚೊ ಅಭಾವ್ ಆಸ್‌ಲ್ಲ್ಯಾ ಆಯ್ಚೆ ಪರ್ಜೆಕ್ ಕವಿತಾ ಸಾಹಿತ್ಯಾಚಿ ಭುಕ್ ಖಂಡಿತ್ ಥಾಂಬಂವ್ಕ್ ಸಕತ್. ಎಚ್ಚೆಮ್ಮಾಚಿ  'ಜನೆಲ್' ಕವಿತಾ ಘೆಯಾ ವ ಎಲ್ಯೆರ್ ತಾಕೊಡೆಚಿ 'ಸತ್' ಕವಿತಾ ಘೆಯಾ, ಜಂಯ್ ಕವಿ ಮ್ಹಣ್ತಾ: ತುಜಿಂ ಹಾಂವೆಂ ಫಿಂತಾಂ ಧರ್‍ಲಿಂ, ಕೊಂತಾಂ ಧರ್‍ಲಿಂ, ಸುತಾಂ ಧರ್‍ಲಿಂ, ಪುಣ್ ಸತಾಂ ಧರಿಜೆ ತರ್ ತಿಂತಾಂ ಧರಿಜೆ ಪಡ್ಲಿಂ! ಕಾಂಯ್ ಮಿನುಟಾನ್ ಆಪುರ್ಬಾಯೆಚಿ ಕವಿತಾ ವಾಚುನ್ ಕಾಬಾರ್ ಆನಿ ತಾಚಿ ದಾದೊಸ್ಕಾಯ್ ಆನಿ ಧಾರ್ ಉರತ್ ಕಾಂಯ್ ಸಾಸ್ಣಾಕ್!

'ಮೋಗ್ ಆನಿ ಪಿಯಾವ್' ಕವಿತೆಂತ್ ಚಾಪ್ರಾ ಮ್ಹಣ್ತಾ: ಮೋಗ್ ಪಿಯಾವಾಚ್ಯಾ ಕಾಂದ್ಯಾಬರಿ, ಸಗ್ಳೊ ಆಸ್ತಾಂ ಹಾತಾಂತ್ ಖೆಳ್ತಾ, ಸುರಿಯೆ ಧಾರಿನ್ ಕಾತರ್‌ಲೊ ತರ್, ಕಸಾಪ್ಪ್ಯಾಚೇಯ್ ದೊಳೆ ಪಿಳ್ತಾ. ಪರತ್ ದೋನಚ್ ಉತ್ರಾಂನಿ ಮೊಗಾಚೆ ಹಾಲ್ ಪಿಚಾರ್!

4. ಕವಿತೆಂತ್ ಮನೋರಂಜನ್ ಆಸಾ: ಕವಿತಾ ಹಾಸಯ್ತಾ, ಹಾಸವ್ನ್-ಹಾಸವ್ನ್ ತುಕಾ ಜಾಗಯ್ತಾ. ಕೆನ್ನಾಂ ತುಕಾ ರಡಯ್ತಾ, ರಡವ್ನ್-ರಡವ್ನ್ ತುಜಿ ಜೆಮ್ ಸುಟಯ್ತಾ. ಸಿಜೈಸ್ ತಾಕೊಡೆಚ್ಯಾ 'ಇಜ್ಮೊಲಾಚಿ ವಾಟ್ಲಿ' ಕವಿತೆಂತ್ ಕವಿ ಹಾಸ್ಯಾಚೆಂ ಲ್ಹಾರ್‌ಚ್ ಉಟಯ್ತಾ: ಆಯ್ತಾರಾಚಿ ಘಾಂಟ್ ವ್ಹಾಜ್ಲಿ, ಕೊನ್ಶಾಂತ್ ಪಡ್‌ಲ್ಲಿ ಗುಟ್ಲಿ ಗುಟ್ಲಿ ಇಜ್ಮೊಲಾಚಿ ಸೊಬಿತ್ ವಾಟ್ಲಿ, ಆಳ್ಸಾಯೆನ್ ದೊಳೆ ಘಸ್ಟುನ್, ಲಾಂಬಾಯೆನ್ ಜಾಂಬಾಯ್ ಕಾಡುನ್, ಸೊಡವ್ನ್ ಆಪ್ಲಿ ಸಾಟ್ಲಿ ಪೊಟ್ಲಿ, ನವೆ ಹೊಕ್ಲೆಪರಿಂ ಮಿರಿಯೊ ಫುಲವ್ನ್, ವಳೂ ವಳೂ ಉಟ್ಲಿ! ಹೆ ಕವಿತೆಂತ್ ಆಸ್ಚೊ ಕವಿತೆಚೊ ವಿಶಿಶ್ಟ್ ಅವಾಜ್ ತುಕಾ ಬರ್ಪೂರ್ ಧಲಯ್ತಾ. ತೆಚ್ ಪರಿಂ 'ಮಂಗ್ಳುರ್‍ಚೆ ರಸ್ತೆ' ಕವಿತೆಂತ್ ಆಲ್ವಿ ಕಾರ್‍ಮೆಲಿತ್ ಹಾಸವ್ನ್-ಹಾಸವ್ನ್, ಪದ್ವೆರ್ ಆಸ್‌ಲ್ಲ್ಯಾಂಕ್ ಕೊಚಾಯ್ತಾ: ಮಂಗ್ಳುರಾಂತ್ಲ್ಯಾ ಮಾರ್ಗಾಂನಿ, ಬಸ್ಸಾಂ ಜಾಲಿಂ ತಾರ್‍ವಾಂ, ಮಾರ್ಗಾ ಮಧ್ಲ್ಯಾ ಫೊಂಡ್ವ್ಯಾಂನಿ, ಖುಶೆನ್ ನ್ಹಾಲಿಂ ಗೊರ್‍ವಾಂ!

5. ಕವಿತಾ ವಾಸ್ತವಿಕತೆಚೆಂ ಕೊಡು ಸತ್ ಮುಲಾಜ್ ನಾಸ್ತಾಂ ಸಾಂಗ್ತಾ:  'ಮ್ಹಾಕಾ ಸೊಧ್ತಾಂ ಹಾಂವ್' ಕವಿತೆಂತ್ ಎಡ್ಡಿ ಸಿಕೇರ್:  ಮ್ಹಾಕಾ ಸೊಧ್ತಾಂ ಹಾಂವ್, ಕೊಣ್ ಖಂಯ್ಚೊ ಹಾಂವ್, ಖಂಯ್ಸರ್ ಕಿತ್ಯಾಕ್ ಹಾಂವ್, ಮ್ಹಾಕಾಚ್ ಸೊಧ್ತಾಂ ಹಾಂವ್...  ಮುಂದರುನ್ ಹಾಂಗಾ ಹಾಂವ್ ಆಸಾಂ ಪರ್ದೆಶಿ, ಆಂವ್ಡೆಲ್ಲ್ಯಾ ಗಾಂವಾಕ್ ಪಾವ್ತಾಂ ತರ್ ಥಂಯ್ ಪರ್ದೆಶಿ ಹು:! ಕಶ್ಟಿ ಜಿವಿತಾಚೆಂ ಆಡೂಕ್ ಸತ್ ಹೆಂ!

'... ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ' ಕವಿತೆಂತ್ ಪ್ರಕಾಶ್ ಪಡ್‌ಗಾಂವ್ಕಾರ್ ಅಪ್ರತಿಮ್ ಸ್ವ-ಸಮ್ಜಣಿ ಪೇಶ್ ಕರ್ತಾ: ಕಾಲ್‌ಮೆರೆನ್ ಹಾಂವೆಂ, ಝಗ್‌ಝಗೀತ್ ಉಜ್ವಾಡಾಂತ್ ರಾವುನ್, ಬೆಳ್ಶೆಲ್ಲ್ಯಾ ಕಾಳ್ಖಾಚಿ ನಿಂದಾ ಕೆಲ್ಲಿ ಆನಿ,  ಆಯ್ಜ್ ಹಾಂವ್ ಅಚ್‌ಕೀತ್ ಹ್ಯಾ ಕಾಳ್ಖಾಂತ್ ಖೋಲ್ ಬುಡುನ್ ಗೆಲೊಂ.
 
'ಜಾಯೊ-ಜುಯೊ' ಕವಿತೆಂತ್ ಮನೋಹರ್ ಸರ್ದೆಸಾಯ್: ಅಶೆಂಚ್ ಕರೀತ್ ಆಯ್ಲೆ: ಫಾತ್ರಾಂಚ್ಯಾ ದೆವಾಂಕ್ ರಗ್ತಾನ್ ನ್ಹಾಣಯ್ಲೆ, ರಗ್ತಾಚ್ಯಾ ಮನ್ಶಾಂಕ್  ಫಾತ್ರಾನ್ ಧಾಡಾಯ್ಲೆ! ಮ್ಹನ್ಶಾಚೆಂ ಪೊಕೊಳ್ ಧಾರ್ಮಿಕ್‌ಪಣ್ ನಾಗ್ಡೆಂ, ನಾಗ್ಡೆಂ ಕರ್ಚಿ ಶಾತಿ ಹೆ ಕವಿತೆಚಿ!

6. ಕವಿತಾ ಚಿಮ್ಟೆ ಕಾಡ್ತಾ, ಧಾಗ್ ದಿತಾ, ಬಂಡಾಯ್ ಉಟಯ್ತಾ: ಚರಿತ್ರೆಂತ್ ಕವಿತೆಂನಿ ಆಖ್ಖ್ಯಾ ದೆಶಾರ್‌ಚ್ ಕ್ರಾಂತಿ ಉಟಯ್ಲ್ಯಾ. ಆಪ್ಲ್ಯಾ `ಸ್ವಾಧಿಕ್ ಸಾಕ್ರಾಮೆಂತ್' ಕವಿತೆಂತ್ ಎಲ್ಯೆರ್ ತಾಕೊಡೆ ಧರ್ಮಾಚೆಂ ಕಪಟ್‌ಪಣ್ ಉಜಾರ್ ಕರ್ತಾ: ಬೆಣ್ಸಿ ಬಿಯಾಂನಿ ರಂಗ್ ಇರಯ್ಲೆಲ್ಯಾ ಮನ್ಶಾ ಜಿವಾಂನಿ, ರಗ್ತಾಂ ವಾರಯ್ಲೆಲ್ಯಾ ಮ್ಹಜ್ಯಾ ಗಾಂವ್ಚ್ಯಾ ಅಶೀರ್ ವಾಟಾಂನಿ, ವಿಲಾಯ್ತೆ ಕಾರಾಚ್ಯಾ ರೊದಾಂಕ್ ಝರವ್ನ್, ಸ್ವಾದಿಕ್ ಸಾಕ್ರಾಮೆಂತ್ ಪಾಶಾರ್ ಜಾತಾ!

'ಆಜ್ಯಾಪಿ ಮನ್ಶಾಂಕ್' ಕವಿತೆಂತ್ ವಿಲ್ಸನ್ ಕಟೀಲ್ ತೆಚ್ ಹಿಪೊಕ್ರಿತ್ ಧರ್ಮ್‌ಪಣಾವಿಶಿಂ ಆಂಗ್ ಕಾಡ್ತಾ ಮ್ಹಣೊನ್:  ಆವ್ತಾರ್ ತುಮ್ಚೆ ಪಳೆವ್ನ್ ಪಳೆವ್ನ್,  ಫಾತರ್ ಜಾಲಾಂ ಕಾಳಿಜ್ ಮ್ಹಜೆಂ ಆಜ್ಯಾಪಿ ಮನ್ಶಾಂನೊ, ತೆಂಚ್ ಆತಾಂ ಭೆತುನ್ ಹಾಡ್ಲಾಂ ಕಾಣಿಕ್ ಜಾವುನ್.

7. ಕವಿತೆಚೆಂ ಕಲ್ಪನ್ ತುಕಾ ಪಿಶ್ಯಾರ್ ಘಾಲ್ತಾ: ಮಲೆಕೊಡಿ ಕವಿತೆಂತ್ ಮೆಲ್ವಿನ್ ರೊಡ್ರಿಗಸ್ ಅಸೊಯ್ ಭುಲ್ತಾ:  ಸಾಂಜೆ ಮಾರುತಾಚೆ ಮೊವ್ಸಾಣೆಂತ್ ಚಾಂದಡ್ಯಾಚ್ಯಾ ಝಡೊಂಕ್ ರಾವ್‌ಲ್ಲ್ಯಾ - ಸೊವ್ಲ್ಯಾಂನಿ ಸಯ್ತ್ ಸೊಳಾಂಚೆ ಚಲಿಯೆಚೊ ಉದ್ರೇಕ್! ಭೇಶ್! ಅದ್ಭುತ್ ಕಲ್ಪನ್ ಹೆಂ!

8. ಕವಿತೆಂತ್ ನವೆ ವಿಚಾರ್, ನವೊ ದಿಶ್ಟಾವೊ ಜಾಯಿರ್ ಜಾತಾ: 'ಒತ್ತಾಯ್ ಕೋರ್‍ನಾಕ್ಕಾ ಮಾಕ್ಕಾ'  ಕವಿತೆಂತ್ ಆಪ್ಲೆಪಣ್, ಅಸ್ಮಿತಾಯ್ ಸಾಂಬಾಳುಂಕ್ ಸುಧೀರ್ ಕೊಡಕಣೀ ಉಲೊ ದಿತಾ:  ಒತ್ತಾಯ್ ಕೋರ್‍ನಾಕ್ಕಾ ಮಾಕ್ಕಾ ತುಗೆಲೆ ವಾಟ್ಟೆನ್ ಯೇಂವ್ಕಾ ಮ್ಹಣೂ ಮಗೆಲೆ ಗೂಣ್ ಆನ್ನಿ ಧರ್ಮ್ ಸೋಣ್ಣು ಹೊಡ್ಡಾಂಕ್ ಪ್ರಿಯ್ ಜಾಂವ್ಕಾ ಮ್ಹಣೂ!.

'ಮೊಡ್ಕ್ಯೊ' ಕವಿತೆಂತ್ ವಿಲ್ಸನ್ ಕಟೀಲ್ ಜಾಣ್ವಾಯೆಚೆಂ ದಿರ್ವೆಂ ಉಗಡ್ತಾ: ಬಿತರ್ ಉಜೊ ಪೆಟ್ಲ್ಯಾ ಶಿವಾಯ್, ಬಾಯ್ಲ್ಯಾ ವೊತಾ ಭ್ರಮಿದೆಂತ್, ಕೆನ್ನಾಯ್ ಪೇಜ್ ಶಿಜಾನಾ ಸಾಧ್ಯಾ ವಿಶಯಾಚಾ ಹ್ಯಾ ಕವಿತೆಚಿ ತಾಕಾತ್ ಮಾಪುಂಕ್ ಆಸಾಧ್ಯ್!

9. ಕವಿತಾ ಮಿಸ್ತಿಕಾತೆಚ್ಯಾ ದೊಂಗ್ರಾಕ್ ವರ್ನ್ ಪಾಯ್ತಾ: 'ಪ್ರಕೃತಿಚೊ ಪಾಸ್' ಕವಿತೆಂತ್ ಮೆಲ್ವಿನ್ ರೊಡ್ರಿಗಸ್ ಉದ್ಗಾರ್ತಾ: ಹಾಂಗಾಸರ್ ಸಗ್ಳೆಂ ಶಾಂತ್, ನಾ ಕಸ್ಲೀಯ್ ಭಿರಾಂತ್, ಖಿಣಾ ಕಣಾಂತ್, ಕವಿತೆಚಿಂ ಫುಲಾಂ ಮನಾಂತ್, ನಕ್ತಿರಾಂಚಿ ಮಾಳಾ ಗಳ್ಯಾಂತ್, ಮುಕ್ತಿಚಿಂ ಕಿರ್‍ಣಾಂ ದೊಳ್ಯಾಂತ್! ವ್ಹಾವ್! ಮಿಸ್ತಿಕಾತೆಚ್ಯಾ ಶಿಮೆಕ್ ಪಾಂವವ್ಚೊ ಕವಿತೆಚೊ ಜಾದು!! ತೆಚ್ ಭಾಶೆನ್ ಕವಿತೆಚೊ ಅವಾಜ್ ತುಕಾ ದುಸ್ರ್ಯಾಚ್ ಸಂಸಾರಾಕ್ ವರುಂಕ್ ಸಕ್ತಾ: 'ಹೆ ರೆಂವೆನ್' ಕವಿತೆಂತ್ ಮೆಲ್ವಿನ್ ರೊಡ್ರ್ರಿಗಸ್ ಜಿವಿತಾಚ್ಯಾ ವಿರೋಧಾಭಾಸಾಚೆಂ ಚಿತ್ರಣ್ ಪೇಶ್ ಕರ್ನ್ ಸುಮಧುರ್ ಅವಾಜಾಚೆಂ ಫೆಸ್ತ್ ಉಟಯ್ತಾ: `ಹೆ ರೆಂವೆನ್ ಸ್ವಾಸ್ ದಿಲಾ, ದಿತಾಂ ಗಳ್ಯಾ ಪಾಸ್ ಘಾಲಾ, ಹೆ ರೆಂವೆನ್ ಮಾಸ್ ದಿಲಾಂ, ದಿತಾಂ ಕಾಳ್ಜಾ ಘಾಸ್ ಘಾಲಾ, ಹೆ ಭುಂಯ್ಚ್ಯಾ ಆಂಗಾಂತ್-ಮುಂಗಾ ತೆಲಾಝರಿ ವ್ಹಾಳ್ತಾತ್, ತಾಂತ್ಲೆ ಥೆಂಬೆ ಪುಂಜಾಂವ್ಕ್ ಗೆಲ್ಲ್ಯಾನ್ ಸದಾಂಚ್ ಕಾಂಟೆ ತೊಪ್ತಾತ್'.

10. ಕವಿತಾ ಪುನರ್‌ಜೀವಂತ್ ಕರುಂಕ್ ಸಕ್ತಾ: ಕೊಂಕ್ಣಿ ಭಾಸ್ ಕಸಲ್ಯಾಕಿ ಉಪ್ಕಾರಾಕ್ ಪಡನಾತ್‌ಲ್ಲಿ ಚಿಲ್ಲರ್ ಭಾಸ್ ಮ್ಹಣ್ ಎಕಾ ಕಾಳಾರ್ ಲೆಕ್‌ಲ್ಲ್ಯಾ ಮರಾಠಿ ರಂಗಸಂಗೀತ್ ನಿರ್ದೇಸಕ್ ಅನಂತ್ ಅಮ್ಮೆಂಬಳ್ ಮ್ಹಣ್ತಾ ಜ್ಯಾ ದಿಸಾ ಹಾಂವೆ ಕೊಂಕ್ಣಿ ಕವಿತಾ ವಾಚ್ಲ್ಯೊ, ತ್ಯಾ ದಿಸಾ ಮ್ಹಜೆಂ ಥಂಯ್ ಅಜ್ಯಾಪಿ ಪರಿವರ್ತನ್ ಘಡ್ಲೆಂ. ಪುಡೆಂ ತೊ ಮ್ಹಣ್ತಾ: ಕವಿತೆಂತ್ ಆಸ್ಚೆಂ ಮೌನ್ ಆನಿ ಮೆಳ್ಚೊ ಸುಶೆಗ್ ಮನ್ಶಾಕ್ ಪುನರ್‌ಜೀವಿತ್ ದಿತಾತ್

ಆಶೆಂ ಕೊಂಕ್ಣಿ ಕವಿತಾ ಕಿತ್ಯಾಕ್ ವಾಚಿಜಾಯ್ ಮ್ಹಣ್ ಸಾಂಗೊನ್‌ಚ್ ವಚ್ಯೆತ್! ಮ್ಹಜ್ಯಾ ಹಾತಾಂಕ್ ಕೊಂಕ್ಣಿ ಕವಿತಾ ಪಡೊಂಕ್ ಜಾಯ್ತಿಂ ವರ್ಸಾಂ ಲಾಗ್ಲಿಂ. ಏಕ್ಪಾವ್ಟಿಂ ತಿ ಮ್ಹಜ್ಯಾ ಹಾತಾಂತ್ ಪಡ್ಲಿ, ತಿ ಮ್ಹಾಕಾ ಭೊವ್ ಚಡ್ ರುಚ್ಲಿ ಆನಿ ಸವ್ಕಾಸ್ ಹಾಂವೆಂ ಕಾಂಯ್ ಕಾಳ್ಜಾಚೆ ದಾಧೊಸ್ಕಾಯೆಕ್ ವ ಭಾಶೆಚ್ಯಾ ಆನಿ ಕವಿತೆಚ್ಯಾ ಮೊಗಾಕ್ ಕೊಂಕ್ಣಿ ಕವಿತಾ ಸೊದುನ್ ವಾಚ್ಲಿ, ಪುಣ್ ಕೊಂಕ್ಣಿ ಕವಿತೆಚಿ ವಿಶೇಶ್ ವ್ಹೊಡ್ ಮ್ಹಾಕಾ ಲಾಗ್ಲಿ ಪರ್ಗಾವಾಂಕ್ ಪಾವ್‌ಲ್ಲ್ಯಾ ವೆಳಾರ್. ಸ್ಪಾನಿಶ್ ಭಾಶೆಚೆಂ ಶಿಕಪ್ ಹಾಂವೆಂ ಸುರು ಕೆಲ್ಲೆ ತವಳ್. ಎಕೆ ಕುಶಿನ್ ಪರ್ಕಿ ಸಂಸ್ಕ್ರತೆಂತ್ 'ಭಾಯ್ಲೊ' ಮ್ಹಳ್ಳೆಂ ಬೊಗಪ್ ಕಾಂಡ್ತಾನಾ, ಆನ್ಯೆಕೆ ಕುಶಿನ್ ಪರ್ಕಿ ಭಾಶೆಚ್ಯಾ ಶಿಕ್ಪಾಂತ್, ಕೊಂಕ್ಣೆಚಿ ಅಸ್ಮಿತಾಯ್ ಜಿವಾಳ್ತಾನಾ. ಕೊಂಕ್ಣಿ ಕವಿತೆಂತ್ ಹಾಂವೆ ಮಯ್ಪಾಸ್ ದೆಕ್ಲೊ, ಆತ್ಮಿಯತಾ ಭೊಗ್ಲಿ. ಮ್ಹಜ್ಯಾ ಆವ್ಯಕ್ತ್ ಭೊಗ್ಣಾಂಕ್, ಸಿಂತಿಮೆಂತಾಂಕ್ ಕೊಂಕ್ಣಿ ಕವಿತೆ ದ್ವಾರಿಂ ರುಪಾಂ ಲಾಬ್ಲಿಂ. ಅಶೆಂ ಕೊಂಕ್ಣಿ ಕವಿತಾ ಪ್ರತ್ಯೇಕ್ ಥರಾನ್ ಮ್ಹಜಾ ಜಿಣಿ ಅಂಧ್ಕಾರಾಂತ್ ಚಡ್ಪಡ್ತಾನಾ ದಿವ್ಟಿ ಜಾವ್ನ್ ಜಾಗ್ಲಿ. ಹಾಂವ್ ಹೆರ್ ಭಾಶೆಚಿ ಕವಿತಾ ಪಸಂದ್ ಕರ್ತಾಂ, ಪುಣ್ ಕೊಂಕ್ಣಿ ಕವಿತಾ, ಸತಚ್ ಸಾಂಗ್ತಾಂ, ಮ್ಹಾಕಾ ವೆಗ್ಳಿಚ್ ದಾಧೊಸ್ಕಾಯ್ ದಿತಾ ಆನಿ ಕೆನ್ನಾ ಮ್ಹಾಕಾ ವೆಗ್ಳ್ಯಾಚ್ ಸಂಸಾರಾಕ್ ವರ್ನ್ ಪಾಯ್ತಾ.

ಆಕೇರ್ ಕರ್ತನಾ, ಕವಿತಾ ಸಕ್ಡಾಂಕ್ ರುಚಾಜಾಯಿಚ್ ಮ್ಹಣ್ ಆಮಿ ಮ್ಹಣ್ಚೆಂ ನ್ಹಯ್ ಹಾಂಗಾ. ಪುಣ್ ಕವಿತೆಚಿ ರೂಚ್ ಚಾಕ್ಚೆಂ ಧೈರ್ ಘೆತ್ಲ್ಯಾರ್ ಮಾತ್ರ್ ಆಮ್ಕಾಂ ಕಳ್ತಲೆಂ ಖಂಯ್ಚೆಂ  ಆಮ್ಕಾಂ ಖಾಯ್ಸ್ ಜಾತಾ ಆನಿ ಖಂಯ್ಚೆಂ ಆಮ್ಕಾಂ ಖಾಯ್ಸ್ ಜಾಯ್ನಾ ಮ್ಹಣ್! ಕೊಂಕ್ಣ್ಯಾ, ಕೊಂಕ್ಣಿ ಕವಿತಾ ತುಕಾ ಸುಕಾಚಾ ಸಾಗೊರಾಂತ್ ಉಪ್ಯೆಂವ್ಕ್ ವ್ಹರ್ಚ್ಯಾಂತ್ ದುಭಾವ್ ನಾ. ಕೊಂಕ್ಣಿ ಕವಿತೆ ವರ್ವಿಂ ತುಜೆಂ ಬರೆಂ ಜಾತಲೆಂ ತೆಂ ಖಂಡಿತ್ ಆನಿ ತುಜೆವಿಣೆಂ ಕೊಂಕ್ಣಿ ಕವಿತೆಚೊ ಪ್ರಾಸ್ ಆನಿ ಸ್ವಾಸ್ ಅಧುರೊಚ್ ಉರ್‍ತಲೊ.

-ಸಮಾಪ್ತ್


 ಮೊತಿಯಾಂಚಿಂ ಮೊಲಾಂ:


ಮ್ಯಾಕ್ಸಿಮ್ ಲೋಬೊಚಿಂ ಲೇಖನಾಂ: 


ಮ್ಯಾಕ್ಸಿಮ್ ಲೋಬೊಚ್ಯೊ ಕವಿತಾ:



Title : ಕೊಂಕ್ಣಿ ಕಾವ್ಯಾಚ್ಯಾ ಸಂದರ್ಬಾರ್ ಕವಿತಾ ಕಿತ್ಯಾಕ್ ವಾಚಿಜಾಯ್ ? - ಮ್ಯಾಕ್ಸಿಮ್ ಲೋಬೊ

Please fill in the form below with your feedback/ suggestions .

Fields marked with * are necessary



Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.