ಭೌತಿಕ್ ಜಿವಿತ್ ಕವಿತಾ ರಚುಂಕ್ ಸಕನಾ: ಕನ್ನಡ್ ಕವಯಿತ್ರಿ ವೈದೇಹಿ
ಜಾನಕಿ ಶ್ರೀನಿವಾಸ್ ಮೂರ್ತಿ, ಕನ್ನಡ್ ಸಾಹಿತ್ಯ್ ಸಂಸಾರಾಂತ್ ‘ವೈದೇಹಿ’ ನಾಂವಾನ್ ಸಗ್ಳ್ಯಾಂಕ್ ವೊಳ್ಕಿಚಿ. ಆಪ್ಲ್ಯಾ ನವಲ್, ಕವಿತಾ, ಭುರ್ಗ್ಯಾಂಚೆ ನಾಟಕ್ ತಶೆಂ ನವಲಿಕಾಂ ಖಾತೀರ್ ತಿಣೆ ಖೂಬ್ ನಾಂವ್ ಕೆಲಾಂ. 1979 ಇಸ್ವೆಂತ್ ಆಪ್ಲೆಂ ‘ಮರ ಗಿಡ ಬಳ್ಳಿ’ ಪುಸ್ತಕ್ ಪರ್ಗಟ್ ಜಾಲ್ಯಾ ಉಪ್ರಾಂತ್ ತಿಣೆ ಪಾಟಿಂ ಪಳೆಲ್ಲೆಂ ನಾ ಆನಿ ಯೆದೊಳ್ ಪಾಸುನ್ ತಿಚಿಂ 32 ಪುಸ್ತಕಾಂ ಪರ್ಗಟ್ ಜಾಲ್ಯಾಂತ್. ತಿಚ್ಯೊ ಜಾಯ್ತ್ಯೊ ಕೃತಿಯೊ ಹೆರ್ ಭಾಸಾಂಕ್ ತರ್ಜಣ್ ಜಾಲ್ಯಾತ್ ಮಾತ್ರ್ ನ್ಹಯ್ ವಿಶ್ವ್ ವಿದ್ಯಾನಿಲಯಾಂನಿ ಆನಿ ಶಾಳೆಂನಿ ಶಿಕಯ್ತಾತ್. ತಿ ಮಣಿಪಾಲಾಂತ್ ವಸ್ತಿ ಕರ್ತಾ.
ತಿ ೨೦೦೮ ಇಸ್ವೆಚ್ಯಾ ಜನೆರ್ 12 ತಾರಿಕೆರ್ ಮಂಗ್ಳುರ್ಚ್ಯಾ ಸಾಂ ಲುವಿಸ್ ಕೊಲೆಜಿಚ್ಯಾ ಎರಿಕ್ ಮಥಾಯಸ್ ಸಭಾಸಾಲಾಂತ್ ಚಲ್ಲೆಲ್ಯಾ ಕವಿತಾ ಫೆಸ್ತಾಕ್ ಮುಕೆಲ್ ಸೈರಿಣ್ ಜಾವ್ನ್ ಆಯಿಲ್ಲಿ. ತ್ಯಾ ಸಂದರ್ಭಾರ್ ಕವಿತಾ ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ತಿಚೆಲಾಗಿಂ ಘೆತಲ್ಲ್ಯಾ ಸಂಭಾಷಣಾಂತ್ಲೆ ಗಾಳಲ್ಲೆ ವಿಶಯ್:
ಜಿವಿತಾಂತ್, ಕವಿತಾ ತುವೆಂ ಕಿತೆಂ ಮ್ಹಣೊನ್ ಘೆತ್ಲ್ಯಾಯ್?
ಸಗ್ಳೆಂ ಜಿವಿತಚ್ ಏಕ್ ಕವಿತಾ. ಮನ್ಶಾ ಜಿವಿತ್ ಆಪುರ್ಬಾಯೆಚೆಂ ಮಾತ್ರ್ ನ್ಹಯ್, ಏಕ್ ಆನ್ಯೇಕಾ ಥಾವ್ನ್ ಸಂಪೂರ್ಣ್ ವೆಗ್ಳೆಂ ಜಾಲ್ಲ್ಯಾನ್ ಕವಿತೆಕ್ ಗರ್ಜೆಚಿ ಮಾಂಚಿಚ್ ಹಾಂಗಾಸರ್ ಸದಾಂಕಾಳ್ ತಯಾರ್ ಆಸ್ತಾ. ಹರ್ಯೆಕ್ ಮನೀಸ್ ಆಪ್ಲೆಸ್ತಕಿಂ ಏಕ್ ಕವಿ. ಪುಣ್ ಥಂಯ್ಸರ್ ಏಕ್ ಸಾನ್ ಸಮಸ್ಸೊ ಆಸಾ. ಹರ್ಯೆಕ್ಲ್ಯಾಕ್ ಉತ್ರಾಂಚಿ ಮಾಂಡಾವಳ್ ಅಸಾಧ್ಯ್ ಜಾಲ್ಲ್ಯಾನ್, ಬೋವ್ ಥೊಡಿಂ ಮಾತ್ರ್ ಕವಿ ಜಾಂವ್ಕ್ ಸಕ್ತಾತ್. ಅರ್ಥಾಭರಿತ್ ಆವಾಜ್ ಆನಿ ಆಡ್ಕಳೆವೀಣ್ ಉಚಾರಾಂಚಿಂ ಉತ್ರಾಂ ಆಪುರ್ಬಾಯೆನ್ ಮಾಂಡುನ್ ದವರಲ್ಲ್ಯಾ ವೆಳಾರ್ ಕವಿತಾ ಜಾತಾ. ಜಾನಪದ್ ಗೀತ್ ಜಾಂವ್, ಆಧುನಿಕ್ ಕವಿತಾ ಜಾಂವ್, ಭಾಶೆಚಿ ಮಾಂಡಾವಳ್ ಕವಿತೆಕ್ ಗರ್ಜೆಚಿ. ದಿಸಾಚಿಂ ಸಾದಿಂ ಸಂಭಾಶಣಾಂ ಆಸಲೆ ಮಾಂಡಾವಳೆಂತ್ ದವರ್ತಾನಾ ಕವಿತಾ ಜಾಂವ್ಕ್ ಸಕ್ತಾತ್. ‘ಚಂದ್ರೆಮ್ ಮ್ಹಳ್ಯಾರ್ ಚಂದ್ರೆಮ್’ ಮ್ಹಣ್ತಾನಾ ಕಾಂಯ್ ವಿಶೇಸ್ ಭೊಗನಾ. ‘ಚಂದ್ರಾಚೆಂ ಚಾನ್ನೆಂ ದುಧಾಬರಿ’ ಮ್ಹಳೆಂ ಜಾಲ್ಯಾರ್ ಥಂಯ್ಸರ್ ಕವಿತಾ ಝಳ್ಕತಾ.
ಬರಿ ಕವಿತಾ ಬರೊಂವ್ಕ್ ಕಿತೆಂ ಗರ್ಜೆಚೆಂ ಮ್ಹಣ್ತಾಯ್?
ಜಿವಿತಾಂತ್ಲ್ಯಾನ್ ಕವಿತೆಚೆ ಕೊಮ್ರೆ ಫುಟ್ಚೆ. ಆಯ್ಚೊ ದೀಸ್ ಆಮಿ ಜಿಯೆಲ್ಲ್ಯಾವರ್ವಿಂ ಆನಿ ಜಿಯೆಲ್ಲ್ಯೊ ತ್ಯೊ ಘಡಿ ಸುಖಾಳ್ ವಾ ದುಖಾಳ್ ಜಾಲ್ಲೆ ವರ್ವಿಂಚ್ ಕವಿತಾ ಫುಲ್ತಾ. ಏಕ್ ಭಾಸ್, ಆನ್ಯೇಕೆ ಭಾಶೆಪ್ರಾಸ್ ಉಂಚ್ಲಿ ಮ್ಹಣೊನ್ ನಾ. ಆಧುನಿಕ್ ಜಿವಿತಾಚೊ ಹಿಸೊ ಜಾವ್ನಾಸ್ಚಿ ವೆವ್ಹಾರಿಕ್ ಭಾಸ್, ಉತ್ತೀಮ್ ಕವಿತಾ ರಚುಂಕ್ ಸಕನಾ. ಆನ್ಯೇಕಾ ಉತ್ರಾನ್ ಸಾಂಗ್ಚೆಂ ತರ್, ಏಕ್ ಉತ್ತೀಮ್ ಆಪುರ್ಬಾಯೆಚಿ ಕವಿತಾ ರಚಿಜೆ ತರ್, ವಿಶಿಷ್ಟ್ ಪ್ರತಿಭಾ ತಶೆಂ ಸ್ಪಂದನ್ಶೀಳತಾ ಎಕ್ಲ್ಯಾಕ್ ಆಸಜೆ ಪಡ್ತಾ. ಭೌತಿಕ್ ಜಿವಿತ್ ಕವಿತಾ ರಚುಂಕ್ ಸಕನಾ. ತ್ಯಾ ದೆಕುನ್ ಕವಿತಾ ರಚ್ತೆಲ್ಯಾಂನಿ ಬರಿ ಕವಿತಾಅ ರಚ್ಚೆಖಾತೀರ್ ಅಸಲಿಂ ಖಂದ್ಕಾಂ ಉತ್ರೊನ್ ವಚಜೆ ಪಡ್ತಾ.
ಸಾಹಿತ್ಯಾಂತ್ಲ್ಯಾ ಸರ್ವಯ್ ಪ್ರಕಾರಾಂ ಪಯ್ಕಿ, ಕವಿತೆಚ್ಯಾ ಪ್ರಕಾರಾಕ್ ವಾಚ್ಪಿ ಆಸ್ಚೆ ಬೋವ್ ಉಣೆಂ. ಕವಿತಾ ಲೊಕಾಮೊಗಾಳ್ ಕರುಂಕ್ ಕಿತೆಂ ಕರ್ಯೆತಾ?
ಹಾಂವ್ ಮಾನ್ತಾಂ. ಪುಣ್ ಹಾಂವೆಂ ಕವಿತಾ ಬರೊಂವ್ಚಿ ಕಿತ್ಯಾಕ್ಗಿ ಮ್ಹಳ್ಯಾರ್ ಮ್ಹಾಕಾ ತಿ ಬರೊಂವ್ಕ್ ಜಾಯ್. ತಿ ಕೊಣಯ್ ವಾಚ್ತಾ ವಾ ನಾ ಮ್ಹಳ್ಳೆಂ ಮ್ಹಾಕಾ ಗರ್ಜೆಚೆಂ ನ್ಹಯ್. ವಾಚ್ಪಿ ನಾಂತ್ ಮ್ಹಣೊನ್ ಕವಿತಾಮನ್ ಕೆನ್ನಾಂಯ್ ಮೊರನಾ. ಕವಿತಾ ಲೊಕಾಮೊಗಾಳ್ ಕರುಂಕ್ ಜಾಯ್ತ್ಯೊ ವಾಟೊ ಆಸಾತ್ - ಕವಿತೆಕ್ ಸಂಗೀತ್ ಬಸಯಿಲ್ಲ್ಯಾ ವರ್ವಿಂ ಸಾದ್ಯಾ ಲೊಕಾಕ್ ತಿ ಪಾವೊಂವ್ಕ್ ಸಾಧ್ಯ್ ಆಸಾ.
ಭುರ್ಗ್ಯಾಂ ಮಧೆಂ ಕವಿತೆಚಿ ಆಸಕ್ತ್ ವಾಡೊಂವ್ಕ್ ಕಿತೆಂ ಕರ್ಯೆತಾ?
ಭುರ್ಗ್ಯಾಂ ಥಂಯ್ ಕವಿತೆಚಿ ಆಸಕ್ತ್ ಜಾಯ್ತ್ಯಾ ನಮುನ್ಯಾಂನಿ ಹಾಡ್ಯೆತ್. ಪುಸ್ತಕಾಂತ್ಲಿ ಕವಿತಾ ವಾಚಿಶೆಂ ಕೆಲ್ಲ್ಯಾವರ್ವಿಂ ತಾಂಚೆರ್ ಚಡಿತ್ ಪ್ರಭಾವ್ ಪಡ್ತಾ. ವಾಚ್ತಾನಾ, ಉತ್ರಾಂಚೊ ಅರ್ಥ್, ಭಾಶೆಚಿ ಆಪುರ್ಬಾಯ್ ತಾಂಕಾಂ ಸಮ್ಜನಾ ಜಾಂವ್ಕ್ ಪುರೊ. ಪುಣ್ ಫುಡಾರಾಂತ್ ತಿಂ ಹ್ಯೊ ಗಜಾಲಿ ಖಂಡಿತ್ ಸಮ್ಜೊಂಕ್ ಸಕ್ತಲಿಂ. ದಾಕ್ಲ್ಯಾಕ್ ಹಾಂವ್ ಪ್ರಾಯ್ಮರಿಂತ್ ಆಸ್ತಾನಾ ‘ನಳ ಉಪಖ್ಯಾನ’, ‘ಚಂದ್ರಮತಿ ವಿಳಾಪ’ ಶಿಕಲ್ಲಿಂ. ಆತಾಂಯ್ ತೊ ಉಡಾಸ್ ಜಿವೊ ಆಸಾ. ಕವಿತಾ ಬರಯ್ತಲ್ಯಾಂನಿ ‘ಲಯ’ ಆನಿ ‘ರಾಗ’ ತಸಲ್ಯೊ ಗಜಾಲಿ ಮತಿಂತ್ ಧರ್ಲ್ಯೊ ಜಾಲ್ಯಾರ್, ಭುರ್ಗ್ಯಾಂಕ್ ಕವಿತೆ ಥಂಯ್ ಕೊಣಾಯ್ಕಿ ಆಕರ್ಶಿತ್ ಕರುಂಕ್ ಸಾಧ್ಯ್ ಆಸಾ