ಸಂಪಾದಕೀಯ್:
ಮೊಂತ್ ಸೆರಾತ್ ಕೊಂಕಣಿ ಲೊಕಾಚ್ಯಾ ಪಾಂಯಾಂ ಥಳಾ
ಮೊಂತ್ ಸೆರಾತ್ ಸ್ಪೇಯ್ನಾಚ್ಯಾ ಬಾರ್ಸೆಲೊನ್ ಶಹರಾಂತ್ಲೊ ಏಕ್ ದೊಂಗ್ರಾಳ್ ಜಾಗೊ. ಬಾರ್ಸೆಲೊನಾ ಥಾವ್ನ್ ನೊವೊದ್ ಮಿನುಟಾಂಚಿ ರಸ್ತ್ಯಾಚಿ ವಾಟ್. ಹಾಂಗಾಚ್ಯಾ ದೊಂಗ್ರಾಂನಿ, ಫಾತರ್ ಮ್ಹಳ್ಳೆ ತೆ ಎಕಾ ವಯ್ರ್ ಏಕ್, ಕಾಂಯ್ ಎಕ್ಶೆಂ ಫುಟಿ ಉಬಾರಾಯೆಕ್, ಎಕಾ ಶಿಲ್ಪಕಾರಾನ್ ಕೊರಾಯಿಲ್ಲೆಬರಿ ಮಾಂಡುನ್ ದವರ್ಲ್ಯಾತ್ ತಶೆಂ ದಿಸ್ತಾತ್. ಹಿ ನೈಸರ್ಗಿಕ್ ಸೊಬಾಯ್ ವಿಜ್ಮಿತಾಂಚಿ.
ಕಾಳಿ ಮೆಡೊನ್ನಾಕ್ ಸಮರ್ಪಿಲ್ಲಿ ಇಗರ್ಜ್ ಹಾಂಗಾ ಆಸಾ. ಆಗೋಸ್ತಿನಿಯನ್ ಮಠ್ವಾಸಿ ಹೆಂ ಕೊಪೆಲ್ ಸಾಂಬಾಳ್ತಾತ್. ಮೆಡೊನ್ನಾಚಿ ಕಾಳಿ ಇಮಾಜ್ ಬಕ್ರೆ ಚರೊಂವ್ಚ್ಯಾ ಭುರ್ಗ್ಯಾಂಕ್ ಹಾಂಗಾಸರ್ ಮೆಳಲ್ಲಿ ಆನಿ ತಿ ಇಮಾಜ್ ಶಹರಾಕ್ ವ್ಹರುಂಕ್ ಜಾಲಿನಾ ಮ್ಹಣುನ್ ಇತಿಹಾಸ್ ಸಾಂಗ್ತಾ. ಕಾಂಯ್ ವರ್ಸಾಂ ಆದಿಂ ಹ್ಯಾ ದೊಂಗ್ರಾ ವ್ಹಯ್ಲೊ ಏಕ್ ಶಿಳಾಫಾತರ್ ಲೊಳುನ್ ಸಕ್ಲಾ ದೆಂವ್ಲೊ ಆನಿ ಹಾಂಗಾ ವಸ್ತಿ ಕರ‍್ಚೆ 27 ಮಠ್ವಾಸಿ ಮರಣ್ ಪಾವಲ್ಲೆಂ ದುರಂತ್ ಘಡ್ಲೆಂ.
ಕವಿ ಎಮ್. ಪಿ. ರೊಡ್ರಿಗಸ್ ದೋನ್ ವರ್ಸಾಂ ಆದಿಂ (2019) ಎಪ್ರಿಲಾಂತ್ ಹ್ಯೆ ಸುವಾತೆಕ್ ಪಾವಲ್ಲೊ. ತೊ ಉಡಾಸ್ ತಾಣೆಂ ಆಪ್ಲೆ ಕವಿತೆಂತ್ ಬೋವ್ ಸುಂದರ್ ರಿತಿನ್ ಬಾಂದುನ್ ಧರ‍್ಲಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮೊಂತ್ ಸೆರಾತ್
ಮೊಂತ್ ಸೆರಾತ್, ಮೊಂತ್ ಸೆರಾತ್
ಮೊಂತ್ ಸೆರಾತ್, ಮೊಂತ್ ಸೆರಾತ್
ಸೊಧ್ಲೆಂ ತುಕಾ ಕೊಣೆ
ಥೊಡೆ ತುಕಾ ವ್ಹರುನ್ ಗೆಲೆ
ತಾಂಚ್ಯಾ ಅಧ್ಬುತ್ ಕ್ಯಾಮರಾಂನಿ
ಹಾಂವೆಂ ತುಕಾ ಭರುನ್ ಹಾಡ್ಲೆಂ
ಮ್ಹಜ್ಯಾ ಸಾನ್ ದೊಳ್ಯಾಂನಿ
ಖಡ್ಪಾ ವಯ್ರಿ ಖಡಪ್ ಬಸ್ಲಾಂ
ಮುಡ್ಯಾ ವಯ್ರ್ ಮುಡ್ಯಾಪರಿಂ
ಖಂಯ್ಚ್ಯಾ ಮೆಸ್ತಾನ್ ಸುತ್ ಧರ್ಲಾಂ
ಖಂಯ್ಚ್ಯಾ ಗೊಂದಾನ್ ಬಸೊವ್ನ್ ಸೊಡ್ಲಾಂ
ಮೊಡ್ಕೆ ವಯ್ರ್ ಮೊಡ್ಕೆಂಬರಿ
ಅಧ್ಬುತ್‘ಕಾಯೆಕ್ ನಾಂಚ್ ಸರಿ
ಕಾಳ್ಶಿ ನಾರಿ, ನಾಕಾಕ್ ನೊತಿಂ
ಪಾಯಾಂಕ್ ತಿಚ್ಯಾ ಪಾಯ್ಜಣಾಂ
ನಾಚ್ಪಾಕ್ ಆತಾಂ ತಯಾರ್ ಜಾಲ್ಯಾ
ಮಾತ್ಯಾರ್ ಸೊಭವ್ನ್ ಆಯ್ದಾನಾಂ
ಹಜಾರ್ ದೊಳೆ ಚೊಯ್ತಾತ್ ತಿಕಾ
ಆಟೊವ್ನ್ ತಿಚಿಂ ವಿಸ್ಮಿತಾಂ
ನೀಳಿ ಗಗನ್ ಮಾಂತ್ ತಿಕಾ
ಪಾಚ್ವೆಂ ಫಾಲ್ಕೆಂ ನಾಚ್ಪಾ ತಬಕ್
ಮಠ್ವಾಸಿಂಚ್ಯೊ ಮಾಗ್ಣ್ಯಾ ಘಾಂಟಿ
ನಾಚಾಕ್ ದಿತಾತ್ ಮಧುರ್ ಸಂಗೀತ್
ಪರ್ವತಾಂಚೆಂ ಪ್ರಶಾಂತ್ ವಾರೆಂ
ಕಾನಾಂಕ್ ದಿತಾ ಗಾಯಾನ್ ರಂಗೀತ್
ಹ್ಯಾಚ್ ದೊಂಗ್ರಾರ್ ಪ್ರಸನ್ನ್ ಜಾಲಿ
ಖಡ್ಪಾಂಚೆರಿ ಮಾತಾ ಮರಿ
ಶ್ಹೆರಾಕ್ ಯೇಂವ್ಕ್ ತಿ ಜಾಲ್ನಾ ಕಬೂಲ್
ದೆಕುನ್ ಥಂಯ್ಸರ್ ಇಗರ್ಜ್ ಉಬಿ
ಲೊಯೊಲಾಚಾ ಇನಾಸಾನ್ ಸಯ್ತ್
ಸಾಉದ್ ಜೊಡ್ಲೆಂ ಮಾರುನ್ ದಿಂಬಿ
ಮೊಂತ್ ಸೆರಾತ್, ಮೊಂತ್ ಸೆರಾತ್
ವಿಸ್ರೊಂ ತುಕಾ ಕಶೆಂ?
ನಶ್ವರ್ ಜಿಣೆ ಫಾಲ್ಯಾಂ ಕಿತೆಂ
ಮನ್ ಜಾಲಾಂ ಪಿಶೆಂ
ಮ್ಹಜ್ಯಾ ಗಾಂವಾಕ್ ವ್ಹರ್ತಾಂ ತುಕಾ
ವೊಳಿಂನಿ ಹ್ಯಾ ಅಶೆಂ
-ಎಮ್. ಪಿ. ರೊಡ್ರಿಗಸ್
संपादकीय:
मोंत सेरात कोंकणी लोकाच्या पांयां थळा
मोंत सेरात स्पेयनाच्या बार्सेलोन शहरांतलो एक दोंग्राळ जागो. बार्सेलोना थावन नोवोद मिनुटांची रसत्याची वाट. हांगाच्या दोंग्रांनी, फातर म्हळ्ळे ते एका वयर एक, कांय एक्षें फुटी उबारायेक, एका शिल्पकारान कोरायिल्लेबरी मांडून दवरल्यात तशें दिसतात. ही नैसर्गीक सोबाय विज्मितांची.
काळी मेडोन्नाक समर्पिल्ली इगर्ज हांगा आसा. आगोसतिनियन मठवासी हें कोपेल सांबाळतात. मेडोन्नाची काळी इमाज बक्रे चरोंवच्या भुर्ग्यांक हांगासर मेळल्ली आनी ती इमाज शहराक व्हरुंक जालिना म्हणून इतिहास सांग्ता. कांय वर्सां आदीं ह्या दोंग्रा व्हयलो एक शिळाफातर लोळून सकला देंवलो आनी हांगा वसती कर्चे २७ मठवासी मरण पावल्लें दुरंत घडलें.
कवी एम. पी. रोड्रिगस दोन वर्सां आदीं (२०१९) एपरिलांत ह्ये सुवातेक पावल्लो. तो उडास ताणें आपले कवितेंत बोव सुंदर रितीन बांदून धर्ला.
-मेलवीन रोड्रिगस
कविता:
मोंत सेरात
मोंत सेरात, मोंत सेरात
मोंत सेरात, मोंत सेरात
सोधलें तुका कोणे
थोडे तुका व्हरून गेले
तांच्या अधबूत क्यामरांनी
हांवें तुका भरून हाडलें
म्हज्या सान दोळ्यांनी
खडपा वयरी खडप बसलां
मुड्या वयर मुड्यापरीं
खंयच्या मेसतान सूत धरलां
खंयच्या गोंदान बसोवन सोडलां
मोडके वयर मोडकेंबरी
अधबूत‘कायेक नांच सरी
काळशी नारी, नाकाक नोतीं
पायांक तिच्या पायजणां
नाचपाक आतां तयार जाल्या
मात्यार सोभवन आयदानां
हजार दोळे चोयतात तिका
आटोवन तिचीं विस्मितां
नीळी गगन मांत तिका
पाचवें फाल्कें नाचपा तबक
मठवासिंच्यो मागण्या घांटी
नाचाक दितात मधूर संगीत
पर्वतांचें प्रशांत वारें
कानांक दिता गायान रंगीत
ह्याच दोंग्रार प्रसन्न जाली
खडपांचेरी माता मरी
श्हेराक येवंक ती जालना कबूल
देकून थंयसर इगर्ज उबी
लोयोलाचा इनासान सयत
साऊद जोडलें मारून दिंबी
मोंत सेरात, मोंत सेरात
विस्रों तुका कशें?
नश्वर जिणे फाल्यां कितें
मन जालां पिशें
म्हज्या गांवाक व्हर्तां तुका
वोळिंनी ह्या अशें
-एम. पी. रोड्रिगस