ದುಬಾಯ್ ಕೊಂಕ್ಣಿ ಸೊಭಾಣಾಂತ್ ಲೊಕಾಚಿಂ ಮನಾಂ ಜಿಕ್ಲ್ಲಿ ಕವಿಗೋಷ್ಟಿ
'ಮಾ ಕ್ರಿಯೇಶನ್' ಹಾಂಣಿ ಹ್ಯಾಚ್ ಜ್ಯೂನ್ ಮ್ಹಯ್ನ್ಯಾಚೆ 13 ತಾರಿಕೆರ್ ದುಬಾಯ್ ಶೆರಾಂತ್ ಮಾಂಡುನ್ ಹಾಡ್ಲ್ಲ್ಯಾ "ಕೊಂಕ್ಣಿ ಸೊಭಾಣಾಂತ್" ದೊನ್ಪಾರಾಂಚ್ಯಾ ಕಾರ್ಯಕ್ರಮಾಚೊ ವಾಂಟೊ ಜಾವ್ನ್ ಕೊಂಕ್ಣೆಂತ್ ಚಡಾವತ್ ಸರ್ವ್ ಬೋಲಿಂಚ್ಯಾ ಕವಿಂಕ್ ಸಾಂಗಾತಾ ಹಾಡುನ್, ಕವಿ ರೊಬರ್ಟ್ ಫೆರ್ನಾಂಡಿಸ್ ಉದ್ಯಾವರ್ ಹಾಂಚ್ಯಾ ಅಧ್ಯಕ್ಷ್ಪಪಣಾಖಾಲ್ ಏಕ್ ಅಪುರ್ಬಾಯೆಚಿ ಕವಿಗೋಷ್ಟಿ ಸಾದರ್ ಜಾಲಿ.
ಕೊಂಕ್ಣಿ ಸೊಭಾಣಾಕ್ ಹಾಜರ್ ಜಾಂವ್ಕ್ ಜಾಯ್ ಆಸ್ಲ್ಲೆ ಫಾಮಾದ್ ಕವಿ ಮೆಲ್ವಿನ್ ರೊಡ್ರಿಗಸ್ ಕಾರಣಾಂತರ್ ಯೇಂವ್ಕ್ ಸಕ್ಲೆ ನಾಂತ್ ತ್ಯಾ ದೆಕುನ್ ತಾಂಣಿ ಧಾಡುನ್ ದಿಲ್ಲೊ ಲಿಖಿತ್ ಸಂದೇಶ್ ಕಾರ್ಯಾಕ್ ಹಾಜರ್ ಆಸಲ್ಲೆ ತಾಂಚಿ ಪತಿಣ್ ಎವ್ರೆಲ್ ರೊಡ್ರಿಗಸಾನ್ ಎಕ್ಟಾಂಯ್ ಜಾಲ್ಲ್ಯಾ ಸರ್ವ್ ಲೊಕಾಂ ಹುಜಿರ್ ವಾಚುನ್ ಸಾಂಗ್ಲೊ.
ಆಯ್ಚ್ಯಾ ದಿಸಾ, ಆಮ್ಚ್ಯಾ ಭೊಂವ್ತಣಿಚ್ಯಾ ಸಮಸ್ಯಾಂಕ್, ಗೊಂದೊಳಾಂಕ್, ಸ್ಕಾಂದಲಾಂಕ್ ಕವಿಂನಿ ತಾಂಚ್ಯಾ ಕವಿತಾಂ ಮಾರಿಫಾತ್ ಜಾಪಿ ದಿಂವ್ಚೆಂ ಆನಿ ಜಾಪಿ ಸೊದ್ಚೆಂ ಕಾಮ್ ಕರಿಜಾಯ್ ಜಾಲಾಂ. ಪಾಫ್ಸುನ್ ವೆಚ್ಯಾ ಮನಾಂಕ್, ಶಿಂದುನ್ ವೆಚ್ಯಾ ಕಾಳ್ಜಾಂಕ್ ಸಮಾಧಾನಾಚೆಂ, ಆಶಾವಾದಾಚೆಂ ಹಾತೆರ್ ಜಾವ್ನ್ ಕವಿತೆನ್ ಕಾಮ್ ಕರಿನಾ ಜಾಲ್ಯಾರ್ ಆಮಿ ಕವಿ ಜಾವ್ನ್ ಕಾಂಯ್ ಫಾಯ್ದೊ ನಾ. ಆಯ್ಚ್ಯಾ ಕಾಳಾರ್ ಹರ್ಯೆಕ್ ಮೆಟ್ ಕಾಡ್ತಾನಾ ತುಕಾ ಭೃಷ್ಟಾಚಾರ್ ಝಳ್ಕತಾ. ಸಮಾಜಾಚೆ ರಾಕಣ್ ಭಡ್ವೆ ಮ್ಹಣೊನ್ ಝಳ್ಕೊಂಚೆ ಮನೀಸ್, ಜಾಂವ್ಕ್ ಪುರೊ ಸಮಾಜ್ ಮುಕೆಲಿ, ಜಾಂವ್ಕ್ ಪುರೊ ರಾಜಕೀಯ್ ಫುಡಾರಿ, ಜಾಂವ್ಕ್ ಪುರೊ ಧಾರ್ಮಿಕ್ ಮನೀಸ್, ಜಾಂವ್ಕ್ ಪುರೊ ಮೀಡಿಯಾ, ಜಾಂವ್ಕ್ ಪುರೊ ಸಂಸ್ಕೃತಿಚೆ ಕಾರ್ಬಾರಿ - ಸಗ್ಳೆ ಎಕಾ ನಾ ಎಕೆ ರಿತಿಚ್ಯಾ ಭೃಷ್ಟಾಚಾರಾಂತ್ ಬುಡೊನ್ ಗೆಲ್ಯಾತ್. ಸಾದ್ಯಾ ಮನ್ಶಾಕ್ ಆಯ್ಚೆಂ ಜಿವಿತ್ ಕಾಂಟಾಳ್ಯಾಚೆಂ ಜಾವ್ನ್ ಗೆಲಾಂ. ಆಮಿ ಬರೊವ್ಪ್ಯಾಂನಿ ಪಯ್ಲೆಂ ಸ್ವತಾಚಿಂ ಸೊದ್ನಾಂ ಕರುನ್, ಹ್ಯಾ ಮ್ಹೆಳ್ಯಾಥಾವ್ನ್ ಮುಕ್ತಿ ಆಪ್ಣಾಯ್ಜಾಯ್ ಆನಿ ಆಮ್ಚ್ಯಾ ಬರ್ಪಾಂ ಮಾರಿಫಾತ್ ಸಮಾಜಾಕ್ ಮುಕ್ತಿ ದಿಂವ್ಚಿಂ ಪ್ರೇತನಾಂ ಕರುಂಕ್ ಜಾಯ್ ಮ್ಹಣೊನ್ ಮೆಲ್ವಿನಾಚ್ಯಾ ಉಲೊವ್ಪಾಂತ್ಲಿಂ ಉತ್ರಾಂ ಆಸಲ್ಲಿಂ.
ಕೊಡಿಯಾಳ್-ಉಡ್ಪಿ ಪ್ರದೇಶಾಚೆ ಕವಿ ಅರ್ಥರ್ ಪಿರೇರ್ ಒಮ್ಜೂರ್, ಪಿಯುಸ್ ಜೇಮ್ಸ್ ಕರುಗಳ್ನಡೆ ಮಾತ್ರ್ ನ್ಹಯ್ ಆಸ್ತಾಂ, ಭಟ್ಕಳ್ ನವಾಯತ್ ಸಮುದಾಯಾ ಥಾವ್ನ್ ಅಬುಬಾಕರ್ ಸಯ್ಯದ್ ಮಲೀಕಿ, ಗೊಂಯ್ಕಾರ್ ಕವಿ ನಕಾಶ್ ಬೋರ್ಕರ್, ಗೌಡ್ ಸಾರಸ್ವತ್ ಸಮುದಾಯಾಚೆ ಹರೀಶ್ ಶೆಣೈ ಆನಿ ಕಾಸರ್ಗೋಡ್ ಪ್ರದೇಶಾಕ್ ಪ್ರತಿನಿಧಿತ್ವ್ ಕರುನ್ ಸ್ಟ್ಯಾನಿ ಬೆಳಾ ಹಾಂಚೆಂ ಮೆತೆರ್ಪಣ್ ಕವಿಗೋಷ್ಟಿಚಿ ವಿಶೇಷತಾ ಜಾಂವ್ಕ್ ಪಾವ್ಲಿ.
ಕವಿ ಸ್ಟ್ಯಾನಿ ಬೆಳಾ'ನ್ "ಘರಾ ಭೊಂವಾರ್ಚಿಂ ಪಾಠ್ಶಾಳಾಂ" ಆನಿ "ಉಗ್ತೆಂ ಜನೆಲ್" ಕವಿತಾ ಭೋವ್ ಅಪುರ್ಬಾಯೆನ್ ಪೇಶ್ ಕೆಲ್ಯೊ ತರ್ ಕವಿ ಹರೀಶ್ ಶೆಣೈ ಹಾಂಣಿ "ಹಾಸ್ಯ ಅಂತರ್" ಆನಿ "ಹಾಂವ್ಯೀ ಇಂಗ್ಲಿಷ್ ಶಿಕ್ಲೊಂ" ಮ್ಹಳ್ಳ್ಯೊ ಕವಿತಾ ವಾಚುನ್ ಲೋಕಾಂಕ್ ದಾಧೊಸ್ ಕೆಲೆಂ. ಕವಿ ಅಬೂಬಕರ್ ಸಯ್ಯದ್ ಮಲೀಕಿ ಹಾಣಿಂ "ತುಕಾ ಸೊಡುನ್ ಹಾಂವ್ ರಾಂವ್ಚಿಂ ನಾ" ಆನಿ "ಜಿಂದಕೀ-ಚೊ ಸಫರ್" ಕವಿತಾ ಗಾವ್ನ್ ಪೇಶ್ ಕೆಲ್ಯೊ.
ಕವಿ ಪಿಯುಸ್ ಜೇಮ್ಸಾನ್ ಆಪ್ಲಿ ಲೊಕಾಮೊಗಾಳ್ ಕವಿತಾ "ಅಖ್ರೇಚಿ ಸೈರಿಕ್" ವಾಚುನ್ ಸಾಂಗ್ಲಿ ಆನಿ "ತುಜೆ ವೆಂಗೆಂತ್" ಕವಿತಾ ಗಾಯ್ಲಿ. ಕವಿ ಆರ್ಥರ್ ಪಿರೇರ್ ಒಮ್ಜೂರ್ ಹಾಣಿಂ "ತೆಂ ದೂಕ್.. ಥೆಂಬೊ ಥೆಂಬೊ" ಕವಿತಾ ವಿಷಿಶ್ಟ್ ರಿತಿನ್ ಸಾದರ್ ಕೆಲಿ ಆನಿ ಗೊಂಯ್ಚೊ ಕವಿ ನಕಾಶ್ ಬೋರ್ಕರ್ ಹಾಣಿಂ "ತುಜೊ ಮೋಗ್", "ಜಿವಿತ್" ಆನಿ "ದರ್ಯಾ ವೇಳ್ ಮೊಗಾ ಖೆಳ್" ಕವಿತಾ ವಾಚುನ್ ಲೊಕಾಂಕ್ ಸಂತೊಸಾಯ್ಲೆಂ. ಕವಿ ರೊಬರ್ಟ್ ಫೆರ್ನಾಂಡಿಸ್ ಉದ್ಯಾವರ್ ಹಾಂಣಿ "ಮ್ಹಾಕಾಯ್ ಸಂಗಿಂ ಆಪವ್ನ್ ವ್ಹರ್" ಮ್ಹಳ್ಳ್ಯಾ ಕವಿತಾ ಬರಾಬರ್ ಥೊಡ್ಯೊ ಹೈಕು ಕವಿತಾ ಆನಿ ಹಾಸ್ಯ್ ಚುಟುಕಾಂ ವಾಚುನ್ ಸಾಂಗ್ಲಿಂ.
ಸುಮಾರ್ ಏಕ್ ವೋರ್-ಭರ್ ಚಲ್ಲ್ಲಿ ಹಿ ಕವಿಗೋಷ್ಟಿ, ಪ್ರೇಕ್ಷಕಾಂಚಿ ಕಾಳ್ಜಾಂ-ಮನಾಂ ಜಿಕೊಂವ್ಕ್ ಸಕ್ಲಿ ಮ್ಹಣ್ಚ್ಯಾಕ್ ಪ್ರೇಕ್ಷಕಾಂ ಥಾವ್ನ್ ಮೆಳ್ಲ್ಲಿ ಅದ್ಭುತ್ ಪ್ರತಿಕ್ರಿಯಾಚ್ ಸಾಕ್ಸ್.
-ಭಾತ್ಮಿ