ಕೊಂಕಣಿಕ್ ಬೊಲ್ಪ್ಯಾಂಥಾವ್ನ್ ಕವಿಂನಿ ರಾಕುನ್ ವ್ಹರುಂಕ್ ಜಾಯ್: ಎಚ್ಚೆಮ್ ಪೆರ್ನಾಳ್
ಪಾಟ್ಲ್ಯಾ ಥೊಡ್ಯಾ ವರ್ಸಾಂ ಥಾವ್ನ್ ಪ್ರಕಾಶನಾಚ್ಯಾ ವಾವ್ರಾಥಾವ್ನ್ ವಿರಾಮ್ ಘೆವ್ನ್ ಆಸಲ್ಲೆಂ 'ಆಶಾವಾದಿ ಪ್ರಕಾಶನ್' ಹ್ಯಾಚ್ ಜುಲಾಯ್ ಮ್ಹಯ್ನ್ಯಾಚೆ 19 ತಾರಿಕೆರ್ ನವ್ಯಾ ಲಾಂಛನಾಸವೆಂ, ನವಿ ಹುಮೆದ್ ಘೆವ್ನ್ ಪರ್ತ್ಯಾನ್ ಏಕ್ ಪಾವ್ಟಿಂ ವಾವ್ರಾಕ್ ಲಾಗಲ್ಲ್ಯಾ ಸಂದರ್ಭಾರ್ ಮಂಗ್ಳುರ್ಚ್ಯಾ ಡೊನ್ ಬೊಸ್ಕೊ ಸಭಾ ಸಾಲಾಂತ್ ಏಕ್ ಮೆಳಾವೊ ಘಡೊವ್ನ್ ಹಾಡಲ್ಲೊ. ಪ್ರಕಾಶಕ್ ತಶೆಂ ಬರೊವ್ಪಿ ವಲ್ಲಿ ಕ್ವಾಡ್ರಸಾನ್ ಆಪ್ಲ್ಯಾ ಪ್ರಾಸ್ತಾವಿಕ್ ಉಲೊವ್ಪಾಂತ್ ಪ್ರಕಾಶನಾಚೆ ಗರ್ಜೆವಿಶಿಂ ಮ್ಹಾಯೆತ್ ದಿಲಿ ಆನಿ ಫುಡಾರಾಚೆ ವಾಟೆವಿಶಿಂ ಉಜ್ವಾಡ್ ಫಾಂಕಯ್ಲೊ.
ಬರೊವ್ಪಿ ತಶೆಂ ಕವಿ ವಾಲ್ಟರ್ ದಾಂತಿಸಾನ್ ನವೆಂ ಲಾಂಛನ್ ವಿಮೋಚನ್ ಕೆಲೆಂ ಜಾಲ್ಯಾರ್, ಕವಿ ಎಂಡ್ರ್ಯೂ ಡಿಕುನ್ಹಾನ್ ಆಶಾವಾದಿ ಪ್ರಕಾಶನ್ ತಶೆಂ ದಾಯ್ಜ್ ಜಾಳಿಜಾಗೊ ಚಲುನ್ ಆಯಿಲ್ಲೆ ವಾಟೆವಿಶಿಂ ಸವಿಸ್ತಾರ್ ಮ್ಹಾಯೆತ್ ದಿಲಿ.
ಹ್ಯಾಚ್ ಸಂದರ್ಭಾರ್ ಕವಿ ತಶೆಂ ವಿಮರ್ಶಕ್ ಎಚ್ಚೆಮ್ ಪೆರ್ನಾಳಾಚ್ಯಾ ಅಧ್ಯಕ್ಷಪಣಾಖಾಲ್ ಕವಿಗೋಷ್ಟಿ ಚಲ್ಲಿ. ಗೋಷ್ಟಿ ಮ್ಹಳ್ಳೊ ಸಬ್ದ್ ಗೊರ್ವಾಂಚಿ ರಾಕಣ್ ಕರ್ಚ್ಯಾ ಮನ್ಶಾಂಕ್ ಸಂಬಂಧ್ ಜಾಲ್ಲೊ. ರಾತ್ಚ್ಯಾ ಫಾರಾರ್ ಗೊರ್ವಾಂಕ್ ಬೊಲ್ಪ್ಯಾಂಥಾವ್ನ್ ರಾಕಣ್ ಕರ್ಚ್ಯಾಕ್ ಗೊವ್ಳಿ ಜಾಗೆ ರಾವ್ತಾಲೆ ಆನಿ ನೀದ್ ಯೇಂವ್ಕ್ ನಜೊ ಮ್ಹಣುನ್ ಗಜಾಲಿ ಕರ್ತಾಲೆ. ಹೆ ಕರ್ನೆಕ್ ಗೋಷ್ಟಿ ಮ್ಹಳ್ಳೆಂ ನಾಂವ್ ಪಡ್ಲೆಂ. ಆಜ್ ಜಾಲ್ಯಾರಿ, ಕೊಂಕಣಿಚ್ಯಾ ಸಂದರ್ಭಾಂತ್ ಆಮಿ ಕವಿಂನಿ ಅಸಲ್ಯಾ ಬೊಲ್ಪ್ಯಾಂಥಾವ್ನ್ ಕೊಂಕಣಿಕ್ ರಾಕ್ಚೆಂ ಕಾಮ್ ಕರಿಜಾಯ್ ಮ್ಹಣುನ್ ತಾಣೆ ಉಲೊ ದಿಲೊ. ಕವಿಂನಿ ಚಡ್ ಕರುನ್ ವಾಚುಂಕ್ ಜಾಯ್. ಬರ್ಯಾ ಆನಿ ಖರ್ಯಾ ವಾಚ್ಪಾಂತ್ ಬರಿ ಕವಿತಾ ಜಲ್ಮುಂಕ್ ಸಾಧ್ಯ್ ಆಸಾ ಮ್ಹಣ್ ತಾಣೆ ಸಾಂಗ್ಲೆಂ.
ಉಪ್ರಾಂತ್ ಚಲಲ್ಲೆ ಕವಿಗೋಷ್ಟಿಂತ್ ವಿಲ್ಸನ್ ಕಟೀಲ್, ಎಡ್ವಿನ್ ಜೆ ಎಫ್ ಡಿಸೋಜಾ, ಫೆಲ್ಸಿ ಲೋಬೊ, ವಾಲ್ಟರ್ ದಾಂತಿಸ್, ವಿನ್ಸಿ ಪಿಂಟೊ ಆಂಜೆಲೊರ್, ಜೊನ್ ಶುಂಠಿಕೊಪ್ಪ, ಎಂಡ್ರ್ಯೂ ಎಲ್. ಡಿಕುನ್ಹಾ, ಜೊ ಸಿ ಸಿದ್ದಕಟ್ಟೆ, ಜಿಯೊ ಆಗ್ರಾರ್, ವಲ್ಲಿ ಕ್ವಾಡ್ರಸ್, ನವೀನ್ ಸುರತ್ಕಲ್ ಆನಿ ಎಚ್ಚೆಮ್ ಪೆರ್ನಾಳಾನ್ ಕವಿತಾ ವಾಚ್ಲ್ಯೊ.
ಹ್ಯಾ ಕಾರ್ಯಾಕ್ ಲೇಖಕ್ ಎಡಿ ನೆಟ್ಟೊ, ಶ್ರೀಮತಿ ಜೆ. ಸಿ. ವೇಗಸ್ (ಸಿರಿವಂತಾಚಿ ಪತಿಣ್), ಡೊ ಜೆರಿ ನಿಡ್ಡೋಡಿ, ಮೆಲ್ವಿನ್ ರೊಡ್ರಿಗಸ್, ಎಡ್ಡಿ ಸಿಕೇರ್, ಮಾವ್ರಿಸ್ ಡೆಸಾ, ಸಿಕೇರಾಮ್ ಸುರತ್ಕಲ್ ಹಾಜರ್ ಆಸಲ್ಲೆ.
कोंकणीक बोलप्यांथावन कविंनी राकून व्हरूंक जाय: एच्चेम पेरनाळ
पाटल्या थोड्या वर्सां थावन प्रकाशनाच्या वावराथावन विराम घेवन आसल्लें 'आशावादी प्रकाशन' ह्याच जुलाय म्हयन्याचे १९ तारिकेर नव्या लांछनासवें, नवी हुमेद घेवन पर्त्यान एक पावटीं वावराक लागल्ल्या संदरभार मंगळुरच्या डोन बोसको सभा सालांत एक मेळावो घडोवन हाडल्लो. प्रकाशक तशें बरोवपी वल्ली क्वाड्रसान आपल्या प्रास्ताविक उलोवपांत प्रकाशनाचे गर्जेविशीं म्हायेत दिली आनी फुडाराचे वाटेविशीं उजवाड फांकयलो.
बरोवपी तशें कवी वालटर दांतिसान नवें लांछन विमोचन केलें जाल्यार, कवी एंडऱ्यू डिकुन्हान आशावादी प्रकाशन तशें दायज जाळिजागो चलून आयिल्ले वाटेविशीं सविस्तार म्हायेत दिली.
ह्याच संदरभार कवी तशें विमर्शक एच्चेम पेरनाळाच्या अध्यक्षपणाखाल कविगोष्टी चल्ली. गोषटी म्हळ्ळो सब्द गोरवांची राकण करच्या मनशांक संबंध जाल्लो. रातच्या फारार गोरवांक बोलप्यांथावन राकण करच्याक गोवळी जागे रावताले आनी नीद येवंक नजो म्हणून गजाली करताले. हे करनेक गोषटी म्हळ्ळें नांव पडलें. आज जाल्यारी, कोंकणिच्या संदर्भांत आमी कविंनी असल्या बोलप्यांथावन कोंकणीक राकचें काम करिजाय म्हणून ताणे उलो दिलो. कविंनी चड करून वाचूंक जाय. बऱ्या आनी खऱ्या वाचपांत बरी कविता जल्मूंक साध्य आसा म्हण ताणे सांगलें.
उपरांत चलल्ले कविगोष्टींत विल्सन कटील, एडविन जे एफ डिसोजा, फेल्सी लोबो, वालटर दांतिस, विन्सी पिंटो आंजेलोर, जोन शुंठिकोप्प, एंडऱ्यू एल. डिकुन्हा, जो सी सिद्दकट्टे, जियो आगरार, वल्ली क्वाडरस, नवीन सुरत्कल आनी एच्चेम पेरनाळान कविता वाचल्यो.
ह्या कार्याक लेखक एडी नेट्टो, श्रीमती जे. सी. वेगस (सिरिवंताची पतिण), डो जेरी निड्डोडी, मेल्विन रोडरिगस, एड्डी सिकेर, मावरिस डेसा, सिकेराम सुरत्कल हाजर आसल्ले.