ಮೆಲ್ವಿನ್ ರೊಡ್ರಿಗಸ್ ಹಾಕಾ ವಿಮಲ ವಿ. ಪೈ ವಿಶ್ವ ಕೊಂಕಣಿ ಕವಿತಾ ಪುರಸ್ಕಾರ್
ಕವಿತಾ ಟ್ರಸ್ಟ್ ಅಧ್ಯಕ್ಷ್ ತಶೆಂ ಕೊಂಕಣಿ ಪೊಯೆಟ್ರಿ ಜಾಳಿಜಾಗ್ಯಾಚೊ ಸಂಪಾದಕ್ ಮೆಲ್ವಿನ್ ರೊಡ್ರಿಗಸ್ ಹಾಕಾ ವಿಮಲ ವಿ. ಪೈ ವಿಶ್ವ ಕೊಂಕಣಿ ಕವಿತಾ ಪುರಸ್ಕಾರ್ ಫಾವೊ ಜಾಲಾ. ಎವರ್ಶೈನ್ ಪ್ರಕಾಶನಾನ್ ಪರ್ಗಟ್ ಕೆಲ್ಲ್ಯಾ ಮೆಲ್ವಿನಾಚ್ಯಾ 'ದೇವಿ ನಿನ್ಕಾಸಿ' ಪುಸ್ತಕಾ ಖಾತೀರ್ ರುಪಯ್ 1 ಲಾಖ್ ನಗ್ದೆನ್, ನವೆಂಬ್ರಾಂತ್ ಚಲ್ಚ್ಯಾ ಎಕಾ ಸಂಭ್ರಮಾವೆಳಿಂ ಫಾವೊ ಜಾತಲೊ.
ಮೆಲ್ವಿನಾ ಸಾಂಗಾತಾ ಸುಧಾ ಖರಂಗಟೆ ಹಿಚ್ಯಾ 'ಕಪ್ಯಾಳೆಂ' ಪುಸ್ತಕಾ ಖಾತೀರ್ ಅತ್ಯುತ್ತಮ್ ಪುಸ್ತಕ್ ಪುರಸ್ಕಾರ್ ಜಾವ್ನ್ ರುಪಯ್ ಏಕ್ ಲಾಖ್ ಫಾವೊ ಜಾತಲೊ ತರ್, ಮ್ಹಾಲ್ಗಡೊ ಲೇಖಕ್, ಸಂಶೋಧಕ್ ಅರವಿಂದ್ ಭಾಟೀಕಾರ್ ಹಾಂಕಾಂ 'ವಿಶ್ವ ಕೊಂಕಣಿ ಜೀವನ್ ಸಿದ್ಧಿ' ಪುರಸ್ಕಾರ್ ಲಾಭ್ಲಾ. ಹೊ ಪುರಸ್ಕಾರ್ ಸೈತ್ ರುಪಯ್ ಏಕ್ ಲಾಖ್ ನಗ್ದೆನ್ ಆಟಾಪ್ತಲೊ.
ನವೆಂಬ್ರಾಂತ್ ಚಲ್ಚ್ಯಾ ಸಂಭ್ರಮಾವೆಳಾ ಹ್ಯಾ ಪುರಸ್ಕಾರಾಂಚೊ ಪ್ರಾಯೋಜಕ್ ಟಿ.ವಿ. ಮೋಹನ್ದಾಸ್ ಪೈ ಹಾಜರ್ ಆಸ್ತಲೊ ಮ್ಹಣುನ್ ವಿಶ್ವ ಕೊಂಕಣಿ ಕೇಂದ್ರಾನ್ ಕಳಯ್ಲಾಂ.
ಮೆಲ್ವಿನ್ ರೊಡ್ರಿಗಸಾನ್ ಹ್ಯಾ ಆದಿಂ 'ಮೊಗಾಪೆಳೊ', 'ಫಿಂತಾಂ', 'ವಾಟ್', 'ಪ್ರಕೃತಿಚೊ ಪಾಸ್' ಕವಿತಾ ಪುಸ್ತಕಾಂ ಪರ್ಗಟ್ ಕೆಲ್ಯಾಂತ್. ತಾಚ್ಯಾ 'ಪ್ರಕೃತಿಚೊ ಪಾಸ್' ಪುಸ್ತಕಾ ಖಾತೀರ್ ಡೊ. ಟಿ. ಎಮ್. ಎ. ಪೈ ಅತ್ಯುತ್ತಮ್ ಪುಸ್ತಕ್ ಪುರಸ್ಕಾರ್, ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ ಫಾವೊ ಜಾಲ್ಯಾತ್. ಹ್ಯಾ ಭಾಯ್ರ್ ತಾಚ್ಯಾ ಸಮಗ್ರ್ ವಾವ್ರಾಖಾತೀರ್ ಕೊಂಕಣಿ ಕುಟಮ್ ಬಾಹ್ರೇನ್ ಪುರಸ್ಕಾರ್, ದಾಯ್ಜಿ ದುಬಾಯ್ ಸಾಹಿತೀಕ್ ಪುರಸ್ಕಾರ್, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಗೌರವ್ ಪ್ರಶಸ್ತಿ ಆನಿ ಪಾಂಡುರಂಗ್ ಭಾಂಗಿ ಬಿಂಬ್ ಪುರಸ್ಕಾರ್ ಫಾವೊ ಜಾಲಾ.
'ದೇವಿ ನಿನ್ಕಾಸಿ' ಪುಸ್ತಕ್ ಕೆನ್ಯೂಟ್ ಕೆಲರಾಯ್ ಹಾಣೆಂ ಎವರ್ಶೈನ್ ಪ್ರಕಾಶನಾ ಖಾತೀರ್ ಪರ್ಗಟ್ ಕೆಲ್ಲೆಂ ಆಸುನ್ ಎಚ್ಚೆಮ್ ಪೆರ್ನಾಳಾನ್ ಸುರ್ವಿಲಿಂ ಉತ್ರಾಂ ಬರಯ್ಲ್ಯಾಂತ್.
ಆದ್ಲ್ಯಾ ವರ್ಸಾ ಹೊ ಪುರಸ್ಕಾರ್ ಕವಿತಾ ಪಬ್ಲಿಕೇಶನ್ಸಾನ್ ಪರ್ಗಟ್ ಕೆಲ್ಲ್ಯಾ ಆಂಡ್ರ್ಯು ಎಲ್. ಡಿಕೂನ್ಹಾಚ್ಯಾ 'ಆಂಜುರಾಚೆಂ ಪಾನ್' ಪುಸ್ತಕಾಕ್ ಫಾವೊ ಜಾಲ್ಲೊ.
मेल्विन रोड्रिगस हाका विमल वी. पै विश्व कोंकणी कविता पुरस्कार
कविता ट्रस्ट अध्यक्ष तशें कोंकणी पोयेट्री जाळिजाग्याचो संपादक मेल्विन रोड्रिगस हाका विमल वी. पै विश्व कोंकणी कविता पुरस्कार फावो जाला. एवरशैन प्रकाशनान पर्गट केल्ल्या मेल्विनाच्या 'देवी निनकासी' पुस्तका खातीर रुपय १ लाख नगदेन, नवेंबरांत चलच्या एका संभ्रमावेळीं फावो जातलो.
मेल्विना सांगाता सुधा खरंगटे हिच्या 'कप्याळें' पुस्तका खातीर अत्युत्तम पुस्तक पुरस्कार जावन रुपय एक लाख फावो जातलो तर, म्हाल्गडो लेखक, संशोधक अरविंद भाटीकार हांकां 'विश्व कोंकणी जीवन सिद्धी' पुरस्कार' लाभला. हो पुरस्कार सैत रुपय एक लाख नगदेन आटापतलो.
नवेंबरांत चलच्या संभ्रमावेळा ह्या पुरस्कारांचो प्रायोजक टी.वी. मोहनदास पै हाजर आसतलो म्हणून विश्व कोंकणी केंद्रान कळयलां.
मेल्विन रोड्रिगसान ह्या आदीं 'मोगापेळो', 'फिंतां', 'वाट', 'प्रकृतिचो पास' कविता पुस्तकां पर्गट केल्यांत. ताच्या 'प्रकृतिचो पास' पुस्तका खातीर डॉ. टी. एम. ए. पै अत्युत्तम पुस्तक पुरस्कार, साहित्य अकाडेमी पुरस्कार फावो जाल्यात. ह्या भायर ताच्या समग्र वावराखातीर कोंकणी कुटम बाह्रेन पुरस्कार, दायजी दुबाय साहितीक पुरस्कार, कर्नाटक कोंकणी साहित्य अकाडेमी गौरव प्रशस्ती आनी पांडुरंग भांगी बिंब पुरस्कार फावो जाला.
'देवी निनकासी' पुस्तक केन्यूट केलराय हाणें एवरशैन प्रकाशना खातीर पर्गट केल्लें आसून एच्चेम पेरनाळान सुरविलीं उतरां बरयल्यांत.
आदल्या वरसा हो पुरस्कार कविता पब्लिकेशन्सान पर्गट केल्ल्या आंड्र्यू एल. डिकून्हाच्या 'आंजुराचें पान' पुस्तकाक फावो जाल्लो.