ಸಂಪಾದಕೀಯ್:
ಕಾಳ್ಜಾಂ ಮಧ್ಲೊ ಬಾಂಧ್ ಘಡ್ಸನಾ ತರ್?
ಕೊಂಕ್ಣಿ ಬಾಪಯ್ ಸ್ವಾಭಿಮಾನಿ. ತೊ ರಡ್ತಾ ತರೀ ದುಖಾಂ ದೆಂವನಾಂತ್. ಫಾಂತ್ಯಾ ಥಾವ್ನ್ ರಾತಿ ಮ್ಹಣಾಸರ್ ಘೊಳ್ತಾ. ಘಟ್ಟ್ ಜೆವ್ತಾ, ಪುಣ್ ಚಡ್ ಉಲಯ್ನಾ. ತೊ ಸೊಸ್ಣಿಕ್ ತರೀ, ಶಿಸ್ತ್ ಸಾಂಡಿನಾ. “ಬೇತ್ ಪಾಟಿಂ ಕಾಡ್, ಭುರ್ಗೊ ಜಾಲೊ ಪಾಡ್” ಮ್ಹಣ್ ಭುರ್ಗ್ಯಾಂನಿ ಚಡ್ ಉಪ್ರಾಳಿ ಕೆಲ್ಯಾರ್ ಸರ್ಸರಿತ್ ಪಡ್ತಾತ್. ಹ್ಯಾ ವರ್ವಿಂ ಭುರ್ಗಿಂ ತಾಕಾ ಕಾಂಪ್ತಾತ್. ತೊ ಚಡ್ ಕೊಂಡಾಟೊ ಕರಿನಾ. ಉಮಾಳ್ಯಾಂಕ್ ಚಡ್ ಗಣ್ಣೆಂ ಕರಿನಾ. ಸಿಂತಿಮೆಂತಾಂಚಿ ಫಿಕಿರ್ ನಾ. ತಶೆಂ ಭುರ್ಗ್ಯಾಂ ಲಾಗಿಂ ಚಡ್ ಭೊಗ್ಣಾಂಚೊ ಸಂಬಂಧ್ ಉಬ್ಜಾನಾ. ಪುಣ್ ಆಯ್ಚಿಂ ಭುರ್ಗಿಂ ಸಿಂತಿಮೆಂತಾಳ್. ಬದ್ಲಲ್ಲ್ಯಾ ಕಾಳಾ ತೆಕಿದ್ ಭುರ್ಗಿಂ ಬಾಪಾಯ್ ಥಾವ್ನ್ ಭೊಗ್ಣಾಂಚೊ ಸಂಬಂಧ್ ಆಶೆತಾನಾ ತೊ ಮೆಳನಾ ತರ್ ಕಾಳ್ಜಾ ಕಾಳ್ಜಾಚೊ ಗಾಂಚ್ ಘಡ್ಸನಾ ತರ್ ಭುರ್ಗೊ ಆಪ್ಣಾ ಭಿತರಚ್ ಖತ್ಕತ್ತಾ ಆನಿ ಮ್ಹಣ್ತಾ “ಉಗ್ಡಾಸ್ ತುಜೊ ಕಾಡ್ತಾಂ ಪಾಪ್ಪಾ, ದುಕಾಂ ಗಳ್ಳಿಂ ನಾಂತ್”.
ಪಿಳ್ಗೆ ಮಧ್ಲೊ ಅಂತರ್ (generation gap) ಆನಿ ತ್ಯಾ ವರ್ವಿಂ ಉಬ್ಜೊಂಚ್ಯಾ ಭೊಗ್ಣಾಂಚ್ಯಾ ಘರ್ಶಣಾಚಿಂ ಕಿಟಾಳಾಂ ಹ್ಯೆ ಕವಿತೆಂತ್ ಆಸಾತ್. ಬಾಪಯ್ ಜಿವಂತ್ ಆಸ್ತಾನಾಂಚ್, ಸಮ್ಜಣೆಚ್ಯಾ ಸುತಾಂನಿ ಹ್ಯಾ ಅಂತರಾಕ್ ಕಶೆಂ ಬಾಂದ್ಯೆತ್ ಆನಿ ಕಾಳ್ಜಾಂ ಕಶೆಂ ಗುಂತ್ಯೆತ್, ಹ್ಯಾವಿಶಿಂ ಚಿಂತುಂಕ್ ಹಿ ಕವಿತಾ ಆವ್ಕಾಸ್ ಕರ್‍ನ್ ದಿತಾ. ಕವಿ ಜೇಸನಾನ್ ವಿಂಚ್ಚೆ ವಿಶಯ್, ಕವಿತಾ ಶೆತಾಂತ್ ತಾಚ್ಯೆ ವಾಡಾವಳಿಚಿ ರುಜ್ವಾತ್ ದಿತಾತ್.
-ಆಂಡ್ರ್ಯೂ ಎಲ್. ಡಿಕುನ್ಹಾ
ಕವಿತಾ:
ಉಗ್ಡಾಸ್ ತುಜೊ ಕಾಡ್ತಾಂ ಪಾಪ್ಪಾ
ಉಗ್ಡಾಸ್ ತುಜೊ ಕಾಡ್ತಾಂ ಪಾಪ್ಪಾ
ಖಿಣಾಂ ಝಳ್ಕನಾಂತ
ಸೊಧುನ್ ದೋನ್ ಮೆಳ್ಳ್ಯಾರ್‌ಯ್
ತಿಂ ತುಕಾ ವೊಳ್ಕನಾಂತ
ಪಾನೊ ತುಜೊ ಚಿಂವುಂಕ್ ನಾ
ಪಾಲಂವ್ ತುಜೊ ವೊಡುಂಕ್ ನಾ
ಹಾಂಡಿಯೆ ವಯ್ರ್ ಬಸುನ್ ತುಜ್ಯಾ
ಏಕ್ ಘಾಸ್ ಗಿಳುಂಕ್ ನಾ
ಕಶೆಂ ತರ್ ವ್ಹಾಳೊ ವ್ಹಾಳೊಂವ್
ರೆಂವೆನ್ ಇರ್‍ತಾನಾ
ಆವೊ ಜಾಲ್ಲೆ ಅತ್ರೇಗ್ ತುಜೆ
ಫೊಂಡಾಕ್ ದೆಂವ್ತಾನಾ?
ಉಗ್ಡಾಸ್ ತುಜೊ ಕಾಡ್ತಾಂ ಪಾಪ್ಪಾ
ದುಕಾಂ ಗಳ್ಳಿಂ ನಾಂತ್
ಮುರೆ ಫುಟುನ್ ಮಾತಿ ಜಾಲೆ
ಝರಿ ಫುಟ್ಲ್ಯೊ ನಾಂತ್.
ಕಾನಿಂ ಖೆಳ್‌ಲ್ಲಿಂ ಗಾಣಾಂ ನಾಂತ್
ರಡುನ್ ವೆಂಗ್‌ಲ್ಲಿಂ ವೊರಾಂ ನಾಂತ್
ಮ್ಹಾಕಾ ತುಕಾ ಸಾಂತೆ ಸಾಲಾಂತ್
ಸಂಗಿಂ ದೆಕ್‌ಲ್ಲಿಂ ಜಣಾಂ ನಾಂತ್
ಕಶೆಂ ತರ್ ತ್ಯಾ ನೆಣ್ತೆ ಮತಿಕ್
ಮೋಗ್ ತುಜೊ ಕಳತ್
ಭಾತಾಂ ನಾಸ್ತಾಂ ಕಣ್ಶಿ ಕಶಿ
ಕೊಯ್ತೆಕ್ ಆಯ್ತಿ ರಾವತ್?
ಉಗ್ಡಾಸ್ ತುಜೊ ಕಾಡ್ತಾಂ ಪಾಪ್ಪಾ
ಪಾನಾಂ ಭರ್‍ಲಿಂ ನಾಂತ್
ಮೊಗಾ ಸಂಗಿಂ ಲ್ಹಾರಾಂ ಹಾಡ್ಲಿಂಯ್
ಪಾವ್ಲಾಂ ಉರ್‍ಲಿಂ ನಾಂತ್
ತರ್ ವ್ಹಾಳ್ಳೊ ಕಸೊ ಉತ್ರಾಂ ವ್ಹಾಳೊ
ತುಜ್ಯಾ ಮರಣಾಂತ್?
ಚಡ್ಲೆಂ ಮೊಲ್ ಸಸಾರ್ ಜಾಲ್ಲ್ಯಾ
ಪರ್ನ್ಯಾ ಧೋರಣಾಂಕ್
ಮ್ಹಾರಗ್ ಜಾಲಿಂ ಮೊಡ್‌ಲ್ಲಿಂ ಬೆತಾಂ
ದಿಂಬಿ ಘಾಲೊವ್ನ್ ಮೆಜ್‌ಲ್ಲಿಂ ಕೊಂತಾಂ
ದೋನ್ ಗಿ ಚಾರ್ ಪಯ್ಶೆ ಚೊರ್‍ತಾಂ
ಕಮಾಯ್ಲಲಿಂ ಸವಾಯ್ ಸತಾಂ
ಇತ್ಲಿಂ ಸೊಡ್ಲ್ಯಾರ್ ಉಗ್ಡಾಸಾಚಿಂ
ಖಿಣಾಂ ಝಳ್ಕನಾಂತ್
ಪುಣ್ ತುಜೊ ಪೂತ್ ಮ್ಹಳ್ಳ್ಯಾ ಶಿವಾಯ್
ಗಾಂವಾಂತ್ ವೊಳ್ಕನಾಂತ್.
-ಜೇಸನ್ ಸಿಕ್ವೇರಾ
संपदकीय:
काळजां मधलो बांध घडसना तर?
कोंकणी बापय स्वाभिमानी. तो रडता तरी दुखां देंवनांत. फांत्या थावन राती म्हणासर घोळता. घट्ट जेवता. पुण चड उलयना. तो सोसणीक तरी, शिस्त सांडीना. "बेत पाटीं काड, भुरगो जालो पाड" म्हण भुरग्यांनी चड उप्राळी केल्यार सर्सरीत पडतात. ह्यावरवीं भुरगीं ताका कांपतात. तो चड कोंडाटो करीना. उमाळ्यांक चड गण्णें करीना. सिंतिमेंतांची फिकीर ना. तशें भुरग्यां लागीं चड भोगणांचो संबंध उबजाना. पुण आयचीं भुरगीं सिंतिमेंताळ. बदल्ल्या काळा तेकीद भुरगीं बापाय थावन भोगणांचो संबंध आशेताना तो मेळना तर काळजाचो गांच घडसना. तर भुरगो आपणा भितरच खतखत्ता आनी म्हण्ता: "उगडास तुजो काडतां पाप्पा, दुकां गळ्ळीं नांत.".
पिळगे मधलो अंतर (generation gap) आनी त्या वरवीं उबजोंच्या भोगणांच्या घर्शणाचीं किटाळां हे कवितेंत आसात. बापय जीवंत आसतानांच, समजणेच्या सुतांनी ह्या अंतराक कशें बांद्येत आनी काळजां कशें गुत्येंत ह्याविशीं चिंतूंक ही कविता आवकास करन दिता. कवी जेसनान विंचचे विशय, कविता शेतांत ताचे वाडावळिची रुजवात दितात.
- एंड्र्यू एल. डिकून्हा
कविता:
उगडास तुजो काडतां पाप्पा
उगडास तुजो काडतां पाप्पा
खिणां झळकनांत
सोधुन दोन मेळ्ळ्यारय
तीं तुका वोळकनांत
पानो तुजो चिंवूंक् ना
पालंव तुजो वोडूंक ना
हांड्ये वयर बसून् तुज्या
एक घास गिळूंक ना
कशें तर व्हाळो व्हाळोंव
रेंवेन इरताना
आवो जाल्ले अत्रेग तुजे
फोंडाक देंवताना?
उगडास तुजो काडतां पाप्पा
दुकां गळ्ळीं नांत
मुरे फुटून माती जाले
झरी फुटल्यो नांत
कानीं खेळल्लीं गाणां नांत
रडून वेंगल्लीं वोरां नांत
म्हाका तुका सांते सालांत
संगीं देकल्लीं जणां नांत
कशें तर त्या नेणते मतीक
मोग तुजो कळत
भातां नासतां कणशी कशी
कोयतेक आयती रावत?
उगडास तुजो काडतां पाप्पा
पानां भरलीं नांत
मोगा संगीं ल्हारां हाडलींय
पावलां उरलीं नांत
तर व्हाळ्ळो कसो उतरां व्हाळो
तुज्या मरणांत?
चडलें मोल ससार जाल्ल्या
परन्या धोरणांक?
म्हारग जालीं मोडल्लीं बेतां
दिंबी घालोवन मेजल्लीं कोंतां
दॊनगी चार पयशें चोरतां
कमायललीं सवाय सतां
इतलीं सोडल्यार उगडासाचीं
खिणां झळकनांत
पुण् तुजो पूत म्हळ्ळ्या शिवाय
गांवांत वोळक्नांत.
-जेसन सिकवेरा