ಸಂಪಾದಕೀಯ್:
ಗಲಾಟ್ಯಾಚೆ ಮೂಸ್ ಆನಿ ಶಾಂತ್ ಪಿಸೊಳಿಂ
ಜಿಯೆಂವ್ಚ್ಯಾ ಹಕ್ಕಾಂಚೆರ್ ಆಕ್ರಮಣ್ ಜಾತಾನಾ ಪ್ರತಿಭಟನ್ ಘಡ್ತಾಚ್. ಜಿಯೆಂವ್ಚೆಂ ಹಕ್ಕ್ ಫಕತ್ ಮನ್ಶಾಂಕ್ ಮಾತ್ ನ್ಹಯ್, ಮೊನ್ಜಾತಿ, ಸುಕ್ಣಿಂ, ಮೂಸ್ ಆನಿ ಪಿಸೊಳ್ಯಾಂಕೀ ಆಸಾ. ತೀಂಯ್ ತಾಂಚೆರ್ ಅಕ್ರಮ್ ಜಾತಾನಾ ಪ್ರತಿಭಟನ್ ಕರ್‍ತಾತ್. ಪ್ರತಿಭಟನ್ ಗಲಾಟೊ ಕರ್‍ನ್ ಜಾತಾ ನಾ ತರ್ ಶಾಂತ್ ರೀತಿನ್ ಘಡ್ತಾ. ಪರ್ಜಾರಾಜಾಂತ್ ಸಾರ್ವಜನಿಕ್ ಪ್ರತಿಭಟನ್ ಕರ್‍ಚ್ಯಾ ಹಕ್ಕಾಕ್ ಆನಿ ಅಭಿವ್ಯಕ್ತಿ ಸ್ವಾತಂತ್ರ್ಯಾಕ್ ಗಾಂಚ್ ಆಸಾ.
ಹಾಂಗಾ ಕವಿ ಗಲಾಟ್ಯಾಚ್ಯಾ ಆನಿ ಶಾಂತ್ ಪ್ರತಿಭಟನಾಕ್ ಮೂಸ್ ಆನಿ ಪಿಸೊಳ್ಯಾಂಚ್ಯಾ ಪ್ರತಿಭಟನಾಕ್ ಸರಿ ಕರ್‍ನ್ ಭಾರಿಚ್ ಆಪುರ್ಬಾಯೆನ್ ಆಪ್ಲೆ ವಿಚಾರ್ ಪರ್ಗಟ್ ಕರ್‍ತಾ. ಎಕಾ ಶಾಣ್ಯಾ ಕವಿಕ್ ಆಪ್ಲೆ ವಿಚಾರ್ ಪರ್ಗಟುಂಕ್ ವಾಚ್ಪ್ಯಾಂಚ್ಯಾ ಮತಿ ಪಡ್ದ್ಯಾರ್ ಪಿಂತುರಾಂ ರಂಗೊಂವ್ಚಿ ಸಕತ್ ಅಸ್ತಾ. ಕವಿ ಮೆಲ್ವಿನಾನ್ ಅಸಲೆಂ ಶಾಣೆಪಣ್ ಹ್ಯೆ ಕವಿತೆಂತ್ ದಾಕಯ್ಲಾಂ. ಶಾಂತ್ ಪ್ರತಿಭಟನಾ ವರ್ವಿಂ ಹಕ್ಕಾಂಚೆರ್ ಜಾಂವ್ಚೆಂ ಅಕ್ರಮಣ್ ಥಾಂಬತ್? ವಾ ಗಲಾಟ್ಯಾವರ್ವಿಂ ಬದ್ಲಾವಣ್ ಘಡತ್? ಕವಿತಾ ವಾಚ್ತಾನಾ ವಾಚ್ಪ್ಯಾಚ್ಯಾ ಚಿಂತ್ಪಾಕ್ ಪಾಕಟೆ ಫುಟುಂಕ್ ಪುರೊ. ಆಯ್ಲೆವಾರ್ ಆಮ್ಚ್ಯಾ ದೇಶಾಂತ್ ಆನಿ ರಾಜ್ಯಾಂತ್ ಪಾಟಾಪಾಟ್ ಪ್ರತಿಭಟನಾಂ ಜಾಲ್ಯಾಂತ್. ಪ್ರತಿಭಟನಾವರ್ವಿಂಚ್ ಗಾಂವ್ ಮ್ಹೆಳೊ ಜಾಲಾ ಆಸ್ತಾಂ ಹಿ ಕವಿತಾ ಸಕಾಳಿಕ್ ಜಾವ್ನ್ ಉದೆಲ್ಯಾ.
-ಆಂಡ್ರ್ಯೂ ಎಲ್. ಡಿಕುನ್ಹಾ
ಕವಿತಾ:
ಪ್ರತಿಭಟನ್
ಪೋರ್ ಸಕಾಳಿಂ
ಹಾಂವ್ ಚಲುನ್ ವೆಚ್ಯೆ
ವಾಟೆರ್ -
ಗಾಂವಾಕ್ ಆಮ್ಚ್ಯಾ
ಗಟಾರ್ ಕರ್‍ಚೆಂ
’ಮ್ಹೆಳೆಂ’...
ದೀಸ್ ಫುಲುನ್ ಯೆತಾನಾ
ಕೊಣೆಗೀ ಯೇವ್ನ್
ನಿತಳ್ ಕೆಲ್ಲೆಂ...
ಸಾಂಜ್ ಜಾತಚ್
ತ್ಯೆಚ್ ವಾಟೆರ್
ರಾಸ್ ಮುಸಾಂಚೆಂ
ಪ್ರತಿಭಟನ್
*
ಕಾಲ್ ಸಾಂಜೆರ್
ಆಮ್ಚ್ಯಾ ಗಾಂವ್ಚ್ಯಾ
ಫುಲಾಂ ವೊಡ್ತಾಂತ್
ಸುವಾಧ್ ಪಾಚಾರುಂಕ್
ಆಯ್ತೆಂ ರಾವಲ್ಲ್ಯಾ
ಫುಲಾ ಪಿಲಾಕ್
ಕೊಣೆಗಿ ಚಿರ್ಡುನ್
ಮಾರ್‍ನ್ ಘಾಲ್ಲೆಂ...
ಆಜ್ ಸಕಾಳಿಂ ಸಕಾಳಿಂಚ್
ಪಿಸೊಳ್ಯಾಂಚೆಂ ಪ್ರತಿಭಟನ್
*
ಮೂಸ್ ಆನಿ ಪಿಸೊಳಿಂ
ದೊಗಾಂಯ್ಚ್ಯಾ ಪ್ರತಿಭಟನಾಂಚೊ
ಶೆವೊಟ್ ಏಕಚ್
ಪೊಟಾಚಿ ಭುಕ್...
ಪುಣ್ ಸುರೂಪ್ ವೆಗ್ಳೆಂ
ಮುಸಾಂಚೆಂ ಪ್ರತಿಭಟನ್
ಉಬ್ಚ್ಯಾ ಹೆಲಿಕೊಪ್ಟರಾನ್
ಕರ್‍ಚ್ಯಾ ಆವಾಜಾಪರಿಂ...
ಪಿಸೊಳ್ಯಾಂಚೆಂ ಪ್ರತಿಭಟನ್
ಎಕ್ದಮ್ ಶಾಂತ್...
ಮೊರ್ನಾ ಫೊಂಡಾ
ಭೊಂವ್ತಿಂ ಜಮಲ್ಲ್ಯಾ ಖಾಸ್
ಕುಟ್ಮಾದಾರಾಂಪರಿಂ...
-ಮೆಲ್ವಿನ್ ಕೊಳಾಲ್‌ಗಿರಿ
संपादकीय:
गलाट्याचे मूस आनी शांत पिसोळीं
जियेंवच्या हक्कांचेर आक्रमण जाताना प्रतिभटन घडताच. जियेंवचें हक्क फकत मनशांक मात न्हय, मोनजाती, सुकणीं, मूस आनी पिसोळ्यांकी आसा. तींय तांचेर अक्रम जाताना प्रतिभटन करतात. प्रतिभटन गलाटो करन जाता ना तर शांत रितीन घडता. पर्जाराजांत सार्वजनीक प्रतिभटन करच्या हक्काक आनी अभिव्यक्ती स्वातंत्र्याक गांच आसा.
हांगा कवी गलाट्याच्या आनी शांत प्रतिभटनाक मूस आनी पिसोळ्यांच्या प्रतिभटनाक सरी करन भारीच आपुरबायेन आपले विचार पर्गट करता. एका शाण्या कवीक आपले विचार पर्गटुंक वाचप्यांच्या मती पडद्यार पिंतुरां रंगोंवची सकत असता. कवी मेल्विनान असलें शाणेपण ह्ये कवितेंत दाकयलां. शांत प्रतिभटना वर्वीं हक्कांचेर जांवचें अक्रमण थांबत? वा गलाट्यावर्वीं बदलावण घडत? कविता वाचताना वाचप्याच्या चिंतपाक पाकटे फुटुंक पुरो. आयलेवार आमच्या देशांत आनी राज्यांत पाटापाट प्रतिभटनां जाल्यांत. प्रतिभटनावर्विंच गांव म्हेळो जाला आसतां ही कविता सकाळीक जावन उदेल्या.
-आंडऱ्यू एल. डिकुन्हा
कविता:
प्रतिभटन
पोर सकाळीं
हांव चलून वेच्ये
वाटेर -
गांवाक आमच्या
गटार करचें
’म्हेळें’...
दीस फुलून येताना
कोणेगी येवन
नितळ केल्लें...
सांज जातच
त्येच वाटेर
रास मुसांचें
प्रतिभटन
*
काल सांजेर
आमच्या गांवच्या
फुलां वोडतांत
सुवाध पाचारुंक
आयतें रावल्ल्या
फुला पिलाक
कोणेगी चिर्डून
मारन घाल्लें...
आज सकाळीं सकाळिंच
पिसोळ्यांचें प्रतिभटन
*
मूस आनी पिसोळीं
दोगांयच्या प्रतिभटनांचो
शेवोट एकच
पोटाची भूक...
पूण सुरूप वेगळें
मुसांचें प्रतिभटन
उबच्या हेलिकॉप्टरान
करच्या आवाजापरीं...
पिसोळ्यांचें प्रतिभटन
एकदम शांत...
मोर्ना फोंडा
भोंवतीं जमल्ल्या खास
कुटमादारांपरीं...
-मेल्विन कोळालगिरी