Kavita Kullar


ಸಂಪಾದಕೀಯ್:

ನಪ್ಪಟ್‌ನಾರ್ ಜಾಲ್ಲ್ಯಾ ಜಿವಿತಾಚಿ ಕರಾಳ್ ಕಾಣಿ

ಭಾರತಾಂತ್ಲ್ಯಾ ದಲಿತ್ ಶೆತ್ಕಾರ್‍ಯಾಚಿ ಕರಾಳ್ ಕಾಣಿ ಮಾರ್ಮಿಕ್ ಉತ್ರಾಂನಿ ವಿಣುನ್, ಅಪ್ರೂಪಾಚ್ಯಾ ಪ್ರತಿಮಾಂನಿ ನೆಟವ್ನ್ ಹೆ ಕವಿತೆಂತ್ ಸಾದರ್ ಜಾಲ್ಯಾ. ಗಾಂವ್ಚೆಂ ಕಶ್ಟಿ ಜಿವಿತ್ ಆನಿ ಹ್ಯಾ ಜಿವಿತಾಪಾಟ್ಲ್ಯಾ ಜಿವಾಚೆಂ ಖಳನಾತ್‌ಲ್ಲೆಂ ಶೋಷಣ್ ಹೆ ಕವಿತೆಂತ್ ಧರ್‌ಧರ್ ಮ್ಹಣೊನ್ ಉಟೊನ್ ದಿಸ್ತಾ. ನಿಮಾಣೆ ಅಸಲೊ ಏಕ್ ಜೀವ್ ವಿಕಾರ್ ರೂಪ್ ಜೊಡುನ್, ಪರ್ಕಿ ಗಿದಾಂಕ್ ಭೆಶ್ಟಾಯ್ತಾನಾ ತೊ ನಪ್ಪಟ್‌ನಾರ್ ಜಾಲ್ಲೊ ಜೀವ್ ಚಿಂತುನ್ ದೊಳ್ಯಾಂಥಾವ್ನ್ ದುಕಾಂ ದೆಂವ್ತಾತ್, ಸಾಂಗಾತಾ ಅಸಲೊ ಜೀವ್‌ಯ್ ಶೋಷಣೆ ವಿರೋಧ್ ತಾಳೊ ಉಟಯ್ತಾ ನ್ಹಯ್ ಮ್ಹಣ್ ಚಿಂತುನ್ ಖುಶಿ ಜಾತಾ!

ಪುಣ್ ಅಸಲೊ ಏಕ್ ಆವಾಜ್ ಉಟಂವ್ಕ್ ಹ್ಯಾ ಜಿವಾನ್ ಅಸಲೆ ಗತಿಪರ್‍ಯಾಂತ್ ಪಾವಜೆ ಕಾಂಯ್? ಆಮ್ಚೆ ಭಾರತೀಯ್ ಸಮಾಜೆಚೆಂ ಲಕ್ಷಣ್‌ಚ್ ಹೆಂ ಕಾಂಯ್?

ವಿಲ್ಸನ್, ಕಟೀಲ್ ಬೋವ್ ತರ್ನೆ ಪ್ರಾಯೆರ್ ಅನ್ಭೋಗಾಚ್ಯಾ ಸೊರ್ಮುಣಾಂತ್ ಭಾಜ್‌ಲ್ಲೆ ಭಾಶೆನ್ ಕವಿತಾ ಲಿಖ್ತಾ. ತಾಚೆ ಕವಿತೆಂನಿ ಠರಾವಣಾಂಕ್ ಜಾಂವ್, ಪ್ರತಿಮಾಂಕ್ ಜಾಂವ್ ತುರ್ಪಣ್‌ಕಾಯ್ ಝಳ್ಕನಾ. ಹ್ಯಾ ಅನ್ಭೋಗಾಚೆಂ ಆದಾನ್ ಸದಾಂನೀತ್ ಕವಿತೆಚೆ ರಾಂದ್ಣಿರ್ ತೊ ಚಡಯ್ತ್ ಜಾಲ್ಯಾರ್ ಆನಿ ಕವಿತೆಂತ್ಲ್ಯಾ ಉತ್ರಾಂಚೆ ಮಾಂಡಾವಳಿಚೆರ್ ಇಲ್ಲೆಂ ಚಡಿತ್ ಧ್ಯಾನ್ ದೀವ್ನ್ ತಾಂತುನ್ ಥಾವ್ನ್ ವ್ಹಾಳ್ಯೆತ್ ಜಾಲ್ಲ್ಯಾ ಸಂಗೀತಾಕ್ ಗುಮಾನ್ ದೀತ್ ಜಾಲ್ಯಾರ್ - ವೆಗಿಂಚ್ ತೊ ಕವಿಂಚೆ ಫಂಗ್ತಿಂತ್ ಉಂಚಾಯೆಚೆಂ ಚೆರೆಲ್ ಸೊಭಯ್ತಲೊ ತೆಂ ಖಂಡಿತ್!

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಮ್ಹಜಿ ಕೃಶಿ

ಹಾಂವ್...
ಮಾತ್ಯೆಸ್ವಾಸಾಕ್ ಭುಲ್‌ಲ್ಲೊ
ಕೃಶಿ ಮ್ಹಳ್ಯಾರ್ ಜೀವ್ ಸೊಡ್‌ಲ್ಲೊ
ಏಕ್ ದುಬ್ಳೊ ರೈತ್.
ಶೆತಾಕ್ ಮ್ಹಜ್ಯಾ ಬೊರಿಯಾಂಚೊ ದೊರೊ!
ಉತ್ರೊನ್ ಭಿತರ್ ಯೆಯಾ
ರಗತ್ ಚಿಂವೊನ್ ಹಾಸ್ಚೊ ಗುಲೊಬ್
ಯೆವ್ಕಾರ್ ಮಾಗ್ತಾ!


ಬೊಟಾಂ ಮ್ಹಜಿಂ ಬೆಂಡುನ್
ಭೆಂಡಾಂಚ್ಯಾ ಝಾಡಾಕ್ ಶಿರ್‍ಕಯ್ಲ್ಯಾಂತ್!
ಆಣ್ಕಿಟಿ ಕುಡ್ಕೆ ಕುಡ್ಕೆ ಕರುನ್
ಆಲ್ಸಾಂದೆಚೆ ವಾಲಿಕ್ ಸುಂರ್‍ಗಾರಾಯ್ಲಾಂ!
ಶಿರೊ ಮುಳಾಥಾವ್ನ್ ಲುಂವೊನ್
ವಾಳ್ಚೆಭಾಜಿಯೆಚ್ಯಾ ಮಾಟ್ವಾರ್ ಚರಯ್ಲ್ಯಾತ್!

ಸುಜ್‌ಲ್ಲ್ಯಾ 'ಲಿವರಾ'ಕ್ ಭಾಲೊ ತೊಪುನ್
ಆಳ್ಮ್ಯಾಬರಿ ಸಜಯ್ಲಾಂ!
ಉಪಾಶಿಂ ನಿದ್ಲಲ್ಯಾ ಬಾಳಾಂಚ್ಯಾ ಫೊಂಡಾವಯ್ರ್
ದಾಟೆ-ಮೊಟೆ ದೆಂಟೆ ವಾಡ್ಲ್ಯಾತ್!
ಧರ್‍ಣಿಕ್ ಬಾಗ್ವಲ್ಲ್ಯಾ ವಾಂಯ್ಗ್ಯಾಂ ರೊಂಪಿಯೆಕ್
ಚಿಂವ್ಳೊನ್ ಗೆಲ್ಲ್ಯಾ ಥಾನಾಂಚೊ ಉಮ್ಕೊಳ್!

ಕೊಂಕುನ್ ಕಾಡ್‌ಲ್ಲೆ
ಟೊಮೆಟೊ ಜಶೆ ತಾಂಬ್ಶೆಲ್ಲೆ ದೊಳೆ
ಕುರ್ಡ್ಯಾ ಫುಡಾರ್‍ಯಾಚೆ ತಸ್ವಿರೆಕ್ ಮಾರುನ್ ಹೊಗ್ಡಾಯ್ಲ್ಯಾತ್!
ಮೊಲಾಂವ್ಕ್ ಆಯಿಲ್ಲ್ಯಾಂಚೊ ನಾಕ್ಷೊ ತೊಪುನ್
ತರ್ನೆ ತರ್ನೆ ಬೊಬ್ಳ್ಯಾಕುಲೆ ಕುಸ್ಲ್ಯಾತ್
ಕಿಡ್ನ್ಯಾಂ ಬಿಯೊ ಮ್ಹಜ್ಯೊ
ಲೆಬೋರೇಟರಿಂತ್ ಕೃಶಿ ಕರ್‍ಚ್ಯಾಕ್
ದಾಕ್ತೆರಾಂಕ್ ದಾನ್ ಕೆಲ್ಯಾತ್!

ರಾಗಾಕ್ ಮ್ಹಜ್ಯಾ
ಮಿರ್ಸಾಂಗೆಚ್ಯಾ ಪಾಳಾಂನಿ ಚಿಂವೊನ್ ಕಾಡ್ತಾಂ!
ಮೊಗಾಚೆ ಸಮಾಧಿಚೆರ್
ಪಾರ್‍ತೇನಿಯಮ್ ಝಾಡ್ ಫುಲ್ಲಾಂ
ಕಾಳೀಜ್ ಹುಂಬ್ಲ್ಯಾಂಚೊ ಘೊಂಟೆರ್ ಜಾಲಾಂ!
ಉಸ್ವಾಸಾ ಪೊತಿ ವಿಕಾಳ್ ಮುಸಾಂಚಿ ಫೊಳಿ!

ಬೊಡ್ ಮ್ಹಜೆಂ
ಬಿಯಾಕ್ ದವರ್‍ಲಲ್ಯಾ ದುಧಿಯಾಬರಿ
ಭಿತರ್‍ಲೊ ಮೆಂದು ಸುಕೊನ್ ಸುಕೊನ್ ನಾಂಚ್ ಜಾಲಾಂ!
ದೋನ್‌ಯ್ ಹಾತಾಂನಿ ಹಾಲಯ್ಶಾತ್ ತರ್
ಹಾ! ಕಟಾ! ಕಟಾ!
ಆಜೂನ್ ಫಾಲೆಂ ಜಾಯ್ನಾತ್ಲ್ಯಾ ಸಪ್ಣಾಂಚಿ
ಬೊಬಾಟ್ ಆಯ್ಕೊವ್ಯೆತಾ!

ಮಾಡಾಂಕ್ ಉಜೊ ಪೆಟ್ಲಾ! ಬಾಂಯ್ಚೊ ಘಾಮ್ ಸುಟ್ಲಾ!
ಸರ್‍ಕಾರಿ ಬೋರ್‌ವೆಲ್ ತಾನೆನ್ ತಾಪ್ಲಾಂ!
ಮಾಡಾಕ್ ಆಧುನಿಕತೆಚೊ ಘಡ್ಗಡೊ ಮಾರ್‍ಲಾ
ಪಾಚ್ವೆಂ ಮೊಡಲ್ ಬಾವೊನ್ ಜಡ್ಲಾಂ
ಬದ್ಲಾಕ್ ಶೆಜಾರ್‍ಯಾಚೆಂ ಟಿ.ವಿ. ಆಂಟೆನಾ ಚಡ್ಲಾಂ!
ಸುಕೊನ್ ಗೆಲ್ಲೆ ಮಾಡಿಯೆ ತಕ್ಲೆರ್
ದಳ್ದಿರ್‌ಪಣಾನ್ ಬಾವ್ಟೊ ಉಬಾರ್‍ಲಾ!

ಹಾಂಗಾಸರ್ ಗಡಾಯ್ ಕಾತರ್‍ಲ್ಯಾರ್
ದೀಕ್ ದೆಂವನಾಬಗರ್ ದೂಕ್ ದೆಂವ್ತಾ
ಖತಾಂ ಮಾಜ್ವನಾಂತ್
ಹಾತ್-ಪಾಂಯ್ ಪೆಂಕಡ್ ಮೊಡುನ್
ಧಿಗೊ ದಿಲಾ!

ಉರ್‌ಲ್ಲೆಂ ಪೂರಾ
ಆಂತ್-ಪೀಂತ್, ಕೇಸ್.... ಎಕ್ಟಾವ್ನ್
ಭಾತೆಣ್ಯಾಂತ್ ಗುಟ್ಲಾವ್ನ್
ಏಕ್ ಜೋಡ್ ವಸ್ತುರಾಭಿತರ್ ಚೆಪ್ಲಾಂ!
ಖುರಾವಯ್ಲಿ ಶೆಳೆಲ್ಲಿ ಖಾಲಿ ಮೊಡ್ಕಿ
ಗೊಮ್ಟೆರ್ ವೊಮ್ತಿ ಘಾಲ್ಯಾ!

ಆನಿ ಹ್ಯಾ ಮ್ಹಜ್ಯಾ ವಿಕಾರ್ ರುಪ್ಣ್ಯಾಕ್
ಕೃಶೆಕ್ ಬೋಂಚ್ ಲಾಂವ್ಕ್ ಯೆಂವ್ಚ್ಯಾ
ಪರ್ಕಿ ಗಿದಾಂಕ್ ಭೆಶ್ಟಾಂವ್ಚ್ಯಾಖಾತೀರ್
ಶೆತಾಮಧೆಗಾತ್ ಖುರ್‍ಸಾಯ್ಲಾಂ!

- ವಿಲ್ಸನ್, ಕಟೀಲ್

 

ಇಮಾಜ್ - 8/25/2017
ವಾಸ್ತವ್ - 2/24/2017
ಧರಾ-ಗಾ ಥಾನಾಂ ಮ್ಹಜಿಂ! - 2/25/2016
ಸಿಟಿ ಸರ್ಕಲ್ - 8/30/2015
ಉಜೊ ಆನಿ ದಿವ್ಯಾ ಮಧೆಂ - 9/6/2014
ಪ್ಲೀಸ್ ನೋಟ್ ದಿಸ್! - 8/14/2013
ಭುಮಿ ವೈಂಕುಟ್ ಆನಿ ಮಾಂಕ್ಡಾಸೈನ್ - 9/10/2012
ಪಪ್ಪಾಲಾಗಿಂ - 4/29/2012
ಮ್ಹಜೆಂ ಪರ್ನೆಂ ಟ್ರಂಕ್ - 1/18/2012
ರಾಜಕೀಯಾಚ್ಯೊ ಥೊಡ್ಯೊ ಗಜಾಲಿ - 8/2/2011
ಮ್ಹೆಳೆಂ - 10/4/2010
ಮೊಡ್ಕ್ಯೊ - 12/11/2009
ಏಕ್ ಗ್ಲಾಸ್ ಬಿಯರ್ - 11/10/2008
ಆಜ್ಯಾಪಿ ಮನ್ಶಾಂಕ್ - 7/16/2008
ನವೊ ಸೊಲ್ಲೊ - 4/1/2008
ಸಿಲ್ವಿಯಾ- ತುಕಾ ವಾಚುನ್ - 9/12/2007
ಯುರೇಕಾ - 8/27/2007
ಮಾತ್ಶೆಂ ರಾವ್ ಸ್ವಾಸಾ... - 8/12/2007
ಶೆಣ್ ಝಾಡ್ಚೆಂ ಕಾರ್ಯೆಂ - 7/29/2007
ಬಾಜ್ವೆ ಭಿತರ್... - 7/18/2007
ಭುಂಯ್‌ಗೋಳಿಕ್ ಮೆಸ್ತ್ರಿಣ್ - 5/29/2007
ಬಿಡಿಯೆಚ್ಯಾ ಚೆಡ್ವಾಕ್ - 2/22/2007
ಆಮಿ ಆನಿ ತುಮಿ - 1/19/2007
ಮ್ಹಜಿ ಕೃಶಿ - 6/18/2005

Please fill in the form below with your feedback/ suggestions about this article.
Fields marked with * are necessary
Your Name:  *
E-mail:  *
Present Place:  *
Country:  *
Phone:
Address:
Your Message:  *
Security Validation
Enter the characters in the image above
 
Disclaimer: Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.

  A   B   C   D   E   F   G   H   I   J   K   L   M
  N   O   P   Q   R   S   T   U   V   W   X   Y   Z