ವಿಕುನ್ ವಚೊನ್ ಸೂಂಬೆ!

ಆಪ್ಣಾಚೆ ಮ್ಹಳ್ಳೆ ಖಾಸ್ ಮನೀಸ್ ದುಡ್ವಾಚ್ಯಾ ಬಳಾ ಮುಕಾರ್, ರಾಜಕೀಯ್ ಬಳಾ ಮುಕಾರ್ ಕಶೆ ವಿಕುನ್ ವೆತಾತ್ ಮ್ಹಳ್ಳಿ ಗಜಾಲ್ ವ್ಯಂಗ್ಯ್ ರಿತಿನ್ ಹೆ ಕವಿತೆಂತ್ ಸಾಂಗ್ಲ್ಯಾ. ಹೆಂ ಬಳ್ ಆಂಬೊ ಮಾತ್ರ್ ನ್ಹಯ್, ಪಾರ್ ಲೆಗುನ್ ಅಶೆಂ ಚಿಂವುನ್ ಆಸ್ತಾ ಕಿ ತ್ಯಾ ಚಿಂವಾಟಾಂತ್ ಆತ್ಮ್ಯಾಕ್ ಲೆಗುನ್ ಸುಟ್ಕಾ ನಾ ಜಾತಾ. ಹೆಂ ಬಳ್ ಬೋವ್ ಥೊಡ್ಯಾಂಕಡೆಂ ಆಸ್ತಾ ಆನಿ ಹೆ ಥೊಡೆ ಲೋಕ್ ಆಖ್ಖ್ಯಾ ಸಮಾಜಾಕ್ ಕೀಡ್ ಲಾಗಾಶೆಂ ಕರ‍್ತಾತ್.

ಅಸಲೆಂ ಏಕ್ ವಿಕಾಳ್ ಬಳ್ ಹರ‍್ಯೆಕಾ ಸಮುದಾಯಾಂನಿ, ಸಮಾಜಾಂನಿ ಆಸ್ತಾ. ಹ್ಯಾ ಎಕಾ ಬಳಾ ಮುಕಾರ್ ಕಿತ್ಲ್ಯಾಯ್ ಲೊಕಾಚ್ಯಾ ಎಕ್ವಟಿತ್ ಬಳಾಕ್ ಪೆಂಕಟ್ ನಾ ಜಾತಾ. ತಶೆಂ ಜಾಲ್ಲ್ಯಾವಿಶಿಂ ಹೆಂ ಕವಿತೆಂತ್ ಕವಿ ಸಾಂಗ್ತಾ.

ಹಾಂಗಾಸರ್ ‘ಸೂಂಬೆ’ ಮ್ಹಳ್ಳೊ ಸಬ್ದ್, ‘ನಾಸ್’ ಯಾ ‘ಅರ್ಥಾಹೀನ್’ ಜಾಂವ್ಚೆಂ ಹ್ಯಾ ಅರ್ಥಾರ್ ವಾಪರ‍್ಲಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ವಿಕುನ್ ವಚೊನ್ ಸೂಂಬೆ!

ವಿಕುನ್ ಗೆಲೆ ಅಶೇಯ್ ತುಮಿ
     ಜಶೆಂ ಬಾಜ್ರಾಂತ್ ಆಂಬೆ
          ಚಿಂವುನ್ ಫಕತ್ ಉರ‍್ಲ್ಯಾ ಪಾರ್
ಮಾಸ್ ತುಮ್ಚೆಂ ಸೂಂಬೆ

ಶೆವೊಟ್ ಶೀದಾ ನಾ ತಾಚೊ
     ಚಿಂವುಂಕ್ ಕಿತೇಂಯ್ ಜಾತೆಂ
          ತರೀ ದಿಲೊ ಮೆಂದು ತುಮಿ
ವಿಚಾರ್ ತುಮ್ಚೆ ಸೂಂಬೆ

ಸಮಾಜ್ ಬೊಟಾನ್ ಖೆಳಂವ್ಕ್ ತಾಣೆಂ
     ವಿಂಚ್ಲೆ ತುಮ್ಕಾಂ ಮ್ಹಜ್ಯಾಂಕ್
          ವಾಟ್ಲೆಂತ್ ತುಮ್ಚ್ಯಾ ಕರೋಡ್ ಪಡ್ತಾಂ
ಇಷ್ಟಾಗತ್‌ಯ್ ಸೂಂಬೆ

ಕರೋಡ್ ಘೆತ್ಲ್ಯಾರ್ ಪರ್ವಾ ನಾತ್ಲಿ
     ವಾಟ್ಲಿ ಲೆಂವೊನ್ ರಾವ್ಲ್ಯಾತ್
          ಆತಾಂ ತುಮ್ಚೊ ಜಾಲಾ ಬೊರೊಡ್
ಜಿಣಿ ಸಗ್ಳಿ ಸೂಂಬೆ

ವಿಕುನ್ ಗೆಲೆ ಅಶೇಯ್ ತುಮಿ
     ಜಶೆಂ ಬಾಜ್ರಾಂತ್ ಆಂಬೆ
          ಚಿಂವುನ್ ಉರಲ್ಲಿ ಪಾರ್ ಲೆಗುನ್
ಜಾಂವ್ಚ್ಯಾಕ್ ಪುರೊ ಸೂಂಬೆ

ಥೊಡೆ ಮಧ್ಯಮ್ ವಯ್ವಾಟಾಚೆ
     ತಾಚ್ಯಾ ಪಾಂಯಾಂಕ್ ಪಡ್ಲೆ
          ಮಾತ್ಯಾರ್ ಮೂತ್ ವೊತ್ಲೆಂ ತರೀ
ಪಾವ್ಸ್ ಚಿಂತುನ್ ಸೂಂಬೆ

ಥೊಡೆ ಈಷ್ಟ್ ಸಂಸ್ಕೃತೆಚೆ
     ತಾಚ್ಯಾ ಪಾಟ್ಲ್ಯಾನ್ ಧಾಂವ್ಲೆ
          ಘಾಣಿ ತಾಚ್ಯೊ ಹುಂಗೊನ್ ಹುಂಗೊನ್
ದಾಯ್ಜಾಪುಂಜ್ಯಾಂತ್ ಸೂಂಬೆ

ರಾಜಕೀಯ್ ಥೊಡೆ ಈಷ್ಟ್
     ಎಲಿಸಾಂವಾಂತ್ ಜಿಕ್ಲೆ, ಆತಾಂ
          ಜಿಣಿ ಸಗ್ಳಿ ತಾಚೆ ಪಾಟ್ಲ್ಯಾನ್
ಗುಲಾಮ್ ಜಾವ್ನ್ ಸೂಂಬೆ

ಥೊಡೆ ಕೊಂಕಣಿ ಸಂಸಾರಾಂತ್ಲೆ
     ಪ್ರೊಜೆಕ್ಟ್ ಘೆವ್ನ್ ಧಾಂವ್ಲೆ
          ತಾಚೆ ಮುಟಿಂತ್ ಸಂಸಾರಾಂತ್ಲೆಚ್
ರಿಜೆಕ್ಟ್ ಜಾವ್ನ್ ಸೂಂಬೆ

ಮಾಗೀರ್ ಥೊಡೆ ಶಿಂಪಡ್ಲಲೆ
     ಥಾರೊ ತಾಂಕಾಂ ನಾಸ್ಲೊ
          ತಾಚ್ಯಾ ಹಾತಾಂತ್ ಸದಾಂಕಾಳಾ
ನಾಚುನ್ ನಾಸ್ ಜಾವ್ನ್ ಸೂಂಬೆ

ವಿಕುನ್ ಗೆಲೆ ಅಶೇಯ್ ತುಮಿ
     ಜಶೆಂ ಬಾಜ್ರಾಂತ್ ಆಂಬೆ
          ಪಾರ್ ತುಮ್ಚಿ ಅಶಿ ಚಿಂವ್ಲ್ಯಾರ್
ಆತ್ಮೊ ಲೆಗುನ್ ಸೂಂಬೆ!

-ಮೆಲ್ವಿನ್ ರೊಡ್ರಿಗಸ್