ಕೊಂಕಣಿ ಕವಿ ಲಿಯೊ ಡಿ’ಸೋಜಾಕ್ (ಕಾವ್ಯದಾಸ್) ‘ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್’
 
ಕೊಂಕಣಿ ಕವಿ ಲಿಯೊ ಡಿ’ಸೋಜಾ ಹಾಕಾ ‘ಕವಿತಾ ಟ್ರಸ್ಟ್’ ಹಾಂಣಿ ದಿಂವ್ಚೊ 2009 ವರ್ಸಾಚೊ ‘ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್’ ಫಾವೊ ಜಾಲಾ. ಹೊ ಪುರಸ್ಕಾರ್ ರು. 10,000 ನಗ್ದಿ, ಮಾನ್‌ಪತ್ರ್ ತಶೆಂ ಯಾದಿಸ್ತಿಕಾ ಆಟಾಪ್ತಾ.  ಕೊಂಕಣಿ ಕಾವ್ಯಾಚಿ ವೊಳಕ್ ಲೊಕಾಮೆರೆನ್ ಪಾವಂವ್ಚ್ಯಾಂತ್ ಧಾ ವರ್ಸಾಂಚ್ಯಾಕಿ ಚಡಿತ್ ವಾವ್ರ್ ಕೆಲ್ಲ್ಯಾ ಸಂಸಾರಾಂತ್ ಖಂಯ್ಸರಿ ವಸ್ತಿ ಕರ್‍ಚ್ಯಾ ವ್ಯಕ್ತಿಂಕ್, ದುಬಾಯ್ ಮೆರಿಟ್ ಫ್ರೈಟ್ ಸಿಸ್ಟಮ್ಸ್ ಹಾಚೊ ಮ್ಹಾಲಕ್, ಕುಪ್ಪೆಪದವುಚ್ಯಾ ಜೋಸೆಫ್ ಮಥಾಯಸಾನ್ ದಿಂವ್ಚೊ ಹೊ ಪುರಸ್ಕಾರ್ ಫಾವೊ ಜಾತಾ.
 
ಲಿಯೊ ಜೊನ್ ಡಿ’ಸೋಜಾ 1934 ಇಸ್ವೆಚ್ಯಾ ಮಾಯ್ 6 ತಾರಿಕೆರ್ ಮಂಗ್ಳುರಾಂತ್ ಜಲ್ಮಲ್ಲೊ.  ಲಿಯಾಬಾನ್ ಕಾವ್ಯದಾಸ್ ನಾಂವಾಖಾಲ್ ತೀನ್ ಹಜಾರಾಂಚ್ಯಾಕ್‌ಯ್ ಮಿಕ್ವೊನ್ ಕವಿತಾ ಬರಯ್ಲ್ಯಾತ್.  ’ದೇವ್ ಹಾಸ್ಲೊ’ ತಾಚೊ ಕವಿತಾ ಪುಂಜೊ. ಹೆಂಚ್ ಪುಸ್ತಕ್ ಇಂಗ್ಲಿಷಾಂತ್ `And God Smiled’ ನಾಂವಾಖಾಲ್ ಪರ್ಗಟ್ ಜಾಲಾಂ.  ಕವಿತಾ ಟ್ರಸ್ಟಾನ್ ತಾಚೆಂ ‘ಜಾಣ್ತ್ಯಾಂಚ್ಯಾ ಪಾವ್ಲಾಂನಿ’ ಪುಸ್ತಕ್ ಪರ್ಗಟ್ ಕೆಲ್ಯಾ ಉಪ್ರಾಂತ್ ಆಯ್ಲೆವಾರ್ ‘ದೆಣಿಂ ದೆವಾಚಿಂ’ ಕವಿತಾ ಪುಸ್ತಕ್ ತಾಚೆಂ ಪರ್ಗಟ್ ಜಾಲಾಂ.  ನವಲಿಕಾ, ರಾಜಕೀಯ್, ಸಾಮಾಜಿಕ್, ಧರ್ಮಿಕ್ ಲೇಖನಾಂ ತಾಣೆ ಕೊಂಕಣಿ ತಶೆಂ ಕನ್ನಡ ಪತ್ರಾಂಕ್ ಧಾರಾಳ್ ಬರಯ್ಲ್ಯಾಂತ್.
 
ಚಡುಣೆ ಸಾಟ್ ವರ್ಸಾಂ ಥಾವ್ನ್ ಕೊಂಕಣಿ ಕವಿತಾ ಶೆತ್ ಜಿವಾಳ್ ದವ್ರುಂಕ್ ಕೆಲ್ಲಿಂ ತಾಚಿಂ ಖಳನಾತಲ್ಲಿಂ ಪ್ರೇತನಾಂ ಮಾಂದುನ್ ಘೆವ್ನ್; ಹೆರ್ ಭಾಸಾಂಚ್ಯೊ ಜಾಯ್ತ್ಯೊ ಕವಿತಾ ತರ್ಜಣ್ ಕರುನ್ ಕೊಂಕಣಿ ಭಾಷೆಕ್ ದೇಣ್ಗಿ ದಿಲ್ಲ್ಯಾಕ್; ಪಾರಂಪಾರಿಕ್ ಕವಿತೆಚ್ಯಾ ಕಾಳಾಂತ್ಲ್ಯಾ ಜಾಯ್ತ್ಯಾ ಕವಿಂ ಥಂಯ್ ಹುಮೆದ್ ಭರೊನ್, ಕಾವ್ಯ-ಗಿನ್ಯಾನ್ ವಾಂಟ್ಚೆಂ ಪ್ರಾಮಾಣಿಕ್ ಕಾಮ್ ಕೆಲ್ಲ್ಯಾ ಖಾತೀರ್ - ಹೆ ಪ್ರಶಸ್ತೆ ಖಾತೀರ್ ಕವಿತಾ ಟ್ರಸ್ಟಾನ್ ತಾಚಿ ವಿಂಚವ್ಣಿ ಕೆಲ್ಯಾ.
 
ಲಿಯಾಬಾಕ್ 2002  ಇಸ್ವೆಂತ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ ಪತ್ರಿಕೋದ್ಯಮಾಕ್ ತಾಣೆ ದಿಲ್ಲಿ ಸೆವಾ ಮಾನುನ್ ಘೆವ್ನ್ ಪ್ರಶಸ್ತಿ ದಿಲ್ಯಾ.
 
ರಾಕ್ಣೊ ಪತ್ರಾಚೊ ಸಭಾರ್ ಕಾಳಾಕ್ ತೊ ಸಹ-ಸಂಪಾದಕ್ ಜಾವ್ನಾಸ್‌ಲ್ಲೊ. ಬಿ.ಎ., ಬಿ.ಎಡ್. ಶಿಕಪ್ ಜೊಡಲ್ಲೊ ಲಿಯಾಬ್ ಮಂಗ್ಳುರ್‍ಚ್ಯಾ ‘ಸಂದೇಶ’ ಕೇಂದ್ರಾಂತ್ ಮ್ಯಾನೆಜರ್ ಜಾವ್ನ್ ವಾವುರ್‍ತಾ.
 
ತಾಣೆ ’ಪುತಾ ಪಾಟಿಂ ಯೇ’ ಕಾದಂಬರಿ ಬರಯ್ಲ್ಯಾ.  ಪಂದ್ರಾ ಪುಸ್ತಕಾಂ ತರ್ಜಣ್ ಕೆಲ್ಯಾಂತ್.  ತ್ಯಾಪಯ್ಕಿ ಪರ್ಲ್ ಬಕ್ಕಾಚೊ `ಸೈತಾನ್ ಕೆದಿಂಚ್ ನಿದನಾ' (Satan Never Sleeps)  ; ರಗ್ತಾಳೆಂ ರತ್ನ್ (Blood on the Mountain); ಮಾರ್ಸೆಲಿನೊ (Marcelino); ರಾಜು ಆನಿ ರಾಯ್ ಕುಂವರ್ (Prince and the Pauper); ಮಾರ್ಟಿನ್ ಪೊರೆಸಾಚೊ ಲಿಮಾಚೊ ಭುರ್ಗೊ (Lad of Lima); ವಿಂಕಲಾಚಿ ಕಥಾ (Rip Van Winkle); 80 ದಿಸಾಂನಿ (Around the World in 80 Days); ಗಲಿವರಾಚಿ ಕಥಾ (The Travels of Gulliver); ಅಪಾಯಾಚೆ ವಾಟೆರ್ (Sinister Signpost); ಸೊಂಶ್ಯಾಚಿ ಸಾವ್ಳಿ (The Crisscross Shadow); ಜಾಕೊಬಾಚಿ ಕಥಾ (Jacob the Faithful) ಹಿಂ ಪುರಾಯ್ ಪುಸ್ತಕಾಂ ಫಾಮಾದ್ ಜಾಲ್ಯಾಂತ್. 
 
ಕವಿತಾ ಟ್ರಸ್ಟಾನ್ ಪಾಟ್ಲ್ಯಾ ಎಕಾ ವರ್ಸಾ ಥಾವ್ನ್ ಹೊ ಪುರಸ್ಕಾರ್ ದೀಂವ್ಕ್ ಸುರು ಕೆಲ್ಲೊ ಆಸೊನ್, ಆದ್ಲ್ಯಾ ವರ್ಸಾ ಮುಂಬಯ್ಚಿ ಕವಯಿತ್ರಿ ಅರುಣಾ ರಾವ್ ಕುಂದಾಜೆ ಹಿಕಾ ಹೊ ಪುರಸ್ಕಾರ್ ಲಾಭ್‌ಲ್ಲೊ.  2010 ಜನೆರ್ 10 ತಾರಿಕೆರ್ ಉಡುಪಿ ಜಿಲ್ಲ್ಯಾಚ್ಯಾ ಬಾರ್ಕೂರ್ ಮೂಢಾಡು ಕುದ್ರ್ಯಾಚೆರ್ ರಿಚ್ಚರ್ಡ್ ಸೊಜಾಂಗೆಲ್ಯಾ ಮಾಟ್ವಾಂತ್ ಚಲ್ಚ್ಯಾ ‘ಕವಿತಾ ಫೆಸ್ತ್’ ಸಂದರ್ಭಾರ್ ಹೊ ಪುರಸ್ಕಾರ್ ತಾಕಾ ಹಾತಾಂತರ್ ಜಾತಲೊ.  ಹ್ಯಾ ಸಂದರ್ಭಾರ್ ಕನ್ನಡಾಚೊ ನಾಮ್ಣೆಚೊ ಸಾಹಿತಿ ತಶೆಂ ಗೀತ್‌ಕಾರ್ ಜಯಂತ ಕಾಯ್ಕಿಣಿ ಮುಕೆಲ್ ಸೈರೊ ಜಾವ್ನ್ ಆನಿ ಮರಾಠಿ ಫಿಲ್ಮ್ ಸಂಗೀತ್ ನಿರ್ದೇಶಕ್ ಅನಂತ್ ಅಮ್ಮೆಂಬಳ್ ತಶೆಂಚ್ ದುಬಾಯ್ಚೊ ಉದ್ಯಮಿ ಜೋಸೆಫ್ ಮಥಾಯಸ್ ತಶೆಂ ತಾಚಿ ಪತಿಣ್ ಫ್ಲೇವಿಯಾ ಮಥಾಯಸ್ ಮಾನಾಚಿಂ ಸೈರಿಂ ಜಾವ್ನ್ ಯೆತಲಿಂ.  ಹ್ಯಾಚ್ ಸಂದರ್ಭಾರ್ ಚಲ್ಚ್ಯಾ ಬಹುಭಾಷಾ ಕವಿಗೋಷ್ಟಿಚೆಂ ಸುಂಕಾಣ್ ಗೊಂಯ್ಚೊ ಕವಿ ಹನುಮಂತ್ ಚೋಪ್ಡೆಕಾರ್ ಘೆತಲೊ ಜಾಲ್ಯಾರ್ ಯುವ ಕವಿಗೋಷ್ಟಿಚೆಂ ಸಂಚಾಲನ್ ಎಲ್ಯೆರ್ ತಾಕೊಡೆ ಘೆತಲೊ.
 
‘ಹಾಂವ್ ಕಿತ್ಯಾಕ್ ಕವಿತಾ ಬರಯ್ತಾಂ?’ ವಿಷಯಾಚೆರ್ ಕವಿ ಆಂಡ್ರ್ಯೂ ಡಿಕುನ್ಹಾಚ್ಯಾ ಅಧ್ಯಕ್ಷ್‌ಪಣಾಖಾಲ್ ವಿಚಾರ್ ಸಾತೆಂ ಚಲ್ಚೆಂ ಆಸೊನ್ ಕವಿ ಎಚ್ಚೆಮ್ ಪೆರ್ನಾಲ್ ಆನಿ ಪ್ರಕಾಶ್ ಪರಿಯೆಂಕಾರ್ ಆಪ್ಲೆ ವಿಚಾರ್ ಮಾಂಡ್ತಲೆ. ಬಾಬಣ್ಣ ನಾಯ್ಕ, ಯಡ್ತಾಡಿ ಆನಿ ಪಂಗ್ಡಾ ಥಾವ್ನ್ ಕುಡ್ಮಿ ನಾಚ್, ಆಂಟನಿ ಬಾರ್ಕೂರಾಚ್ಯಾ ‘ಕಾಟ್ ತುಟ್ಚೊ ವೇಳ್’ ಪುಸ್ತಕಾಚೆಂ ಮೊಕ್ಳೀಕ್ ಆನಿ ಸಂಗೀತಾಚೊ ದಬಾಜೊ ಹ್ಯಾ ಸಂದರ್ಭಾರ್ ಚಲ್ಚೊ ಆಸೊನ್ ಗೊಂಯ್ಚೆ, ಕರ್ನಾಟಕಾಚೆ, ಮುಂಬಯ್ಚೆ ಆನಿ ಕೇರಳಾಚೆ ಕವಿ ಹ್ಯಾ ಫೆಸ್ತಾಂತ್ ಭಾಗ್ ಘೆತಲೆ. 
 
ಸರ್ವಯ್ ಕೊಂಕಣಿ ಮೋಗಿಂಕ್ ಹ್ಯಾ ಫೆಸ್ತಾಕ್ ಆಪೊವ್ಣೆಂ ಆಸಾ. 

• ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರಾವಿಶಿಂ ಜಾಣಾ ಜಾಂವ್ಕ್ ಹಾಂಗಾ ಚಿಚಾಯಾ
• ಕವಿತಾ ಫೆಸ್ತ್ - 2010 ವಾಚುಂಕ್ ಹಾಂಗಾ ಚಿಚಾಯಾ
• ಮಾಯ್‍ಭಾಸ್ ಜಾಳಿಜಾಗ್ಯಾವಯ್ಲಿ ಲಿಯಾಬಾಚಿ ವೊಳಕ್ ವಾಚಾ

• ಕಣ್ಶಿಚೆಂ ಕಾಜಾರ್
• ಭುಂಯ್ ಕಮಳ್
• ಭಾರತಾಚೊ ಮಹಾತ್ಮಾ ತುಂ
• ಪರತ್ ಆಯ್ಲ್ಯಾರೇ ದಿವಾಳಿ
• ಭುರ್ಗ್ಯಾಂಚೆಂ ಸವಾಲ್
• ನಮಾನ್ ತುಕಾ ತಿರಂಗ್ ಬಾವ್ಟ್ಯಾ