ಕೊಂಕಣಿ ಕವಿತೆಚೆಂ ಜೈತೆವಂತ್ ಫೆಸ್ತ್ - ಕವಿತಾ ಫೆಸ್ತ್
-ಕವಿತಾ ಟ್ರಸ್ಟ್ ಕೊಂಕಣಿ ಕವಿಂಕ್ ಸಾಂಗಾತಾ ಹಾಡ್ತಾ

`ಕವಿತಾ, ಕಾಳ್ಜಾಚಿ ಭಾಸ್. ತಿ ಎಕೆ ವ್ಯಕ್ತಿಚೆ ದೊಳೆ ಉಗ್ತೆ ಕರ‍್ತಾ ಮಾತ್ರ್ ನ್ಹಯ್ ಆಪ್ಣಾ ಭೊಂವಾರಿಂಚ್ಯಾ ಸಂಗ್ತಿಂ ಥಂಯ್ ಸಂವೇದನ್‍ಶೀಳ್ ಕರ‍್ತಾ. ಲೊಕಾಂ ಮಧ್ಲ್ಯಾ ಖಂದ್ಕಾಂಚೆರ್ ಸಾಂಕೊವ್ ಬಾಂದ್ತಾ, ಆಮ್ಕಾಂ ಖರೆ ಮನೀಸ್ ಕರ‍್ತಾ ಆನಿ ನಿಜಾಯೆ ಥಂಯ್ ಲಾಗಿಂ ಕರ‍್ತಾ.  ಆಯ್ಚೆ ಸಂಕೀರ್ಣ್ ಸಮಾಜೆಂತ್, ಕವಿತಾ ಭರ‍್ವಶ್ಯಾಚೆಂ ಕೀರ್ಣ್ ಫಾಂಕಯ್ತಾ ಆನಿ ಆಮ್ಕಾಂ ಕಸಲ್ಯಾಯ್ ಅವ್ಘಡಾಂತ್ಲಿ ಬಚಾವಿ ಜೋಡ್ನ್ ದೀಂವ್ಕ್ ಸಕ್ತಾ’ ಅಶೆಂ ಮ್ಹಣಾಲೊ ಕನ್ನಡ ಸಾಹಿತಿ ತಶೆಂ ಗೀತ್‌ಕಾರ್ ಜಯಂತ ಕಾಯ್ಕಿಣಿ.  ತೊ, ಮೂಢಾಡು ಕುದ್ರು,ಬಾರ್ಕೂರ್ ಹಾಂಗಾಸರ್ ಕವಿತಾ ಟ್ರಸ್ಟ್ ಹಾಂಣಿ ‘ದಿ ಎಕ್ಸಪ್ರೆಶನ್ಸ್’ ಆನಿ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಹಾಂಚ್ಯಾ ಜೋಡ್ ಆಶ್ರ್ಯಾಖಾಲ್ ಮಾಂಡುನ್ ಹಾಡಾಲ್ಲ್ಯಾ ಕವಿತಾ ಫೆಸ್ತ್ - 2010 ಸಂದರ್ಭಾರ್ ಮುಖೆಲ್ ಸೈರ‍್ಯಾಚ್ಯಾ ನಾತ್ಯಾನ್ ಉಲಯ್ತಾಲೊ. 

ಬಾರ್ಕೂರ‍್ಚ್ಯಾ ನೈಸರ್ಗಿಕ್ ಸೊಭಾಯೆಚ್ಯಾ ಪಾಕ್ಯಾಭಿತರ್, ಮಾನೆಸ್ತ್ ರಿಚರ್ಡ್ ಸೊಜಾಚ್ಯಾ ಘರ‍್ಚ್ಯಾ ಆಂಗ್ಣಾಂತ್, ಸೀತಾ ನಂಯ್ಚೆ ತಡಿರ್, ಜಶೆಂ ಖಂಯ್ಚ್ಯಾಯ್ ಲಗ್ನಾಂಕ್ ಮಾಟವ್ ಘಾಲ್ತಾತ್ ತಶೆಂ ಕವಿತಾ ಫೆಸ್ತಾ ಖಾತೀರ್ ಮಾಟವ್ ಘಾಲ್ಲೊ. ತಶೆಂ ಜಾಲ್ಲ್ಯಾನ್ ಹ್ಯಾ ಆಂಗ್ಣಾಕ್ ಪಾಯ್ ತೆಂಕ್ತಲ್ಯಾಂಕ್ ದಾಧೊಸ್ಕಾಯೆಕ್ ಉಣೆಪಣ್ ನಾತಲ್ಲೆಂ.  ಆಂಗ್ಣಾ ಥಾವ್ನ್ ದಿಸ್ಚಿ ನಂಯ್, ಭೊಂವ್ತಿ ವಿಸ್ತಾರಲ್ಲೆಂ ಮಾಡಾಂಚೆಂ ಹಿತಲ್, ಕವಿತೆಚ್ಯಾ ದಾಸಾಂಕ್ ಆನಿ ಕಾವ್ಯರಸಿಕಾಂಕ್ ಸಾಂಗೊನ್ ದವರಲ್ಲೊ ಜಾಗೊ ಆಸಲ್ಲೊ. ಅಸಲ್ಯಾ ಎಕಾ ಸಂಸಾರಾವಿಣೆಂ ದುಸ್ರೊ ಬರೊ ಏಕ್ ಜಾಗೊ ವಿಂಚುಂಕ್ ಸಾಧ್ಯ್ ನಾತಲ್ಲೆಂ ಕೊಣ್ಣಾ.  ಇತ್ಲೆಂಚ್ ನ್ಹಯ್, ಹರ‍್ಯೆಕೆ ಪ್ರಾಯೆಚ್ಯಾ ಲೊಕಾನ್ ಹ್ಯಾ ಫೆಸ್ತಾಂತ್ ಸಕ್ರಿಯ್ ಪಾತ್ರ್ ಘೆವ್ನ್ ಸಕಾಳಿಂ ಥಾವ್ನ್ ರಾತಿಂ ವಿಶೇಸ್ ಉರ್ಬಾ, ಹುಮೆದ್ ದಾಕೊವ್ನ್ ಫೆಸ್ತ್ ಉಬಾಳ್ ದವರ‍್ಲೆಂ.

ಭೋವ್ಶಾ ಹ್ಯಾಚ್ ಖಾತೀರ್ ಕೊಣ್ಣಾ ಜಯಂತ ಕಾಯ್ಕಿಣಿನ್ ಆಪ್ಲ್ಯಾ ಉಲೊವ್ಪಾಂತ್ ಕವಿತೆಕ್, ಮ್ಹೊಂವಾಮುಸಾಂನಿ ಜಮೊ ಕೆಲ್ಲ್ಯಾ ಮ್ಹೊಂವಾಕ್ ಸರಿ ಕೆಲೆಂ.  ‘ಫುಲಾಂಚ್ಯಾ ಪಾಕ್ಳ್ಯಾಂತ್ಲೆಂ ಮ್ಹೊಂವ್ ಆಮಿ ಮನ್ಶಾಂನಿ ಜಮಯ್ಲ್ಯಾರ್ ತಾಕಾ ಮ್ಹೊಂವ್ ಮ್ಹಣನಾಂತ್. ತೆಂ ಮ್ಹೊಂವಾಮುಸಾಂನಿ ಚಿಂವೊನ್ ಉಪ್ರಾಂತಚ್ ಫೊಳಿಯೆಂತ್ ಜಮಯ್ಜೆ. ತವಳ್ ಮಾತ್ರ್ ತೆಂ ಮ್ಹೊಂವ್ ಜಾತಾ.  ತಶೆಂ ಕವಿತಾ. ಫಕತ್ ಖಬರ್ ಕವಿತಾ ಜಾಂವ್ಕ್ ಸಾಧ್ಯ್ ನಾ. ತಿ ಖಬರ್ ಆಮ್ಚ್ಯಾ ಜಿವಿತಾಚೊ ಏಕ್ ವಾಂಟೊ ಜಾವ್ನ್ ಬದ್ಲತಾನಾ ಆನಿ ಆಮಿ ತೆ ಖಬ್ರೆಕ್ ಪ್ರತಿಸ್ಪಂದನ್ ಕರ‍್ತಾನಾ ಕವಿತಾ ಜಲ್ಮತಾ.  ಮನ್ಶಾಕುಳಾಚೊ ಏಕ್ ಮಾತ್ರ್ ಧರ್ಮ್ ಮ್ಹಳ್ಯಾರ್ ಕವಿತಾ.  ಆಮಿ ಕರ‍್ಚ್ಯಾ ಹರ‍್ಯೆಕೆ ಸಂಗ್ತಿಂಕ್ ಕಾರಣಾಂ ಸೊಧುನ್ ಗೆಲ್ಯಾಂವ್ ತರ್ ಕವಿತೆಕ್ ಆಮಿ ಹೊಗ್ಡಾಯ್ತಾಂವ್. ಆಮಿ ಖರೆ ಮನೀಸ್ ಜಾಲ್ಯಾಂವ್ ತರ್, ತ್ಯಾ ಮನ್ಶಾಪಣಾಂತ್ ಕವಿತಾ ಜಲ್ಮತಾ’ ಆಶೆಂ ತಾಂಣಿ ಸಾಂಗ್ಲೆಂ.

ಸಮಾಜಾಚಿ ಆಯ್ಚಿ ಗತ್ ದೊಳ್ಯಾಂ ಮುಕಾರ್ ದವರಲ್ಲ್ಯಾ ಕಾಯ್ಕಿಣಿನ್ ಪಂಚ್ವೀಸ್ ವರ್ಸಾಂ ಆದಿಂ ಆಮ್ಚೊ ದೇಸ್ ಭೃಷ್ಟ್ ಯುವಕಾಂನಿ ಭರಲ್ಲೊ. ಆಜ್ ಆಮ್ಚ್ಯಾ ದೇಸಾಂತ್ ಭೃಷ್ಟ್ ಆವಯ್ ಬಾಪಯ್ ಭರ‍್ಲ್ಯಾಂತ್. ಕಿತ್ಯಾಕ್ ಮ್ಹಳ್ಯಾರ್ ತವಳ್ಚಿಂ ಯುವಕಾಂ ಆಜ್ ಆವಯ್ ಬಾಪಯ್ ಜಾಲ್ಯಾಂತ್.  ಆಮ್ಚೆ ಮಧೆಂ ದೋನ್ ನಮುನ್ಯಾಂಚೆ ಬರೊವ್ಪಿ ಆಸಾತ್. ಏಕ್ ವರ್ಗ್ ಸಾಹಿತಿಕ್ ಚರಿತ್ರೆಚೊ ವಾಂಟೊ ಜಾಂವ್ಕ್ ಆಶೆತಾತ್ ತರ್ ಆನ್ಯೇಕ್ ವಾಂಟೊ ಮನ್ಶಾ ಚರಿತ್ರೆಚೊ ವಾಂಟೊ ಜಾಂವ್ಕ್ ಆಶೆತಾ.  ‘ಆಪುಣ್ ಮನ್ಶಾ ಚರಿತ್ರೆಚೊ ವಾಂಟೊ ಜಾಂವ್ಕ್ ಆಶೆತಾಂ, ಮನ್ಶಾಂಲಾಗಿಂ ಸಂಬಂಧ್ ದವ್ರುಂಕ್ ಆಶೆತಾಂ’ ಅಶೆಂ ತೊ ಮ್ಹಣಾಲೊ.

ಕನ್ನಡ ಕವಿ ದ.ರಾ. ಬೇಂದ್ರೆಚೊ ಉಲ್ಲೇಕ್ ಕೆಲ್ಲ್ಯಾ ಕಾಯ್ಕಿಣಿನ್, ಬೇಂದ್ರೆ ವ್ಯಸ್ತ್ ಜಿವಿತಾಂತ್ಲೆಂ ಸುಟ್ಕಾ ಜೊಡ್ಚ್ಯಾ ಖಾತೀರ್ ಕವಿತಾ ಬರಯ್ತಾಲೊ ಮ್ಹಣೊನ್ ಸಾಂಗ್ಲೆಂ. ಹ್ಯಾ ಸಂದರ್ಭಾಂನಿ ಬರಯಿಲ್ಲಿ ಕವಿತಾ ಜಿವಿತಾಂತ್ಲ್ಯಾ ಕಸಲ್ಯಾಯ್ ಸಂಕಷ್ಟಾ ಥಾವ್ನ್ ಸುಟ್ಕ ಜೊಡುಂಕ್ ತಾಕಾ ತಾಕತ್ ಜೊಡುನ್ ದಿತಾಲಿ. ‘ಬರಯ್ತಾನಾ ಕವಿ ಖಂಯ್ಚೆ ಪರಿಸ್ಥಿತಿಂತ್ಲ್ಯಾನ್ ಪಾಶಾರ್ ಜಾತಾ, ತಿಚ್ ಕವಿತಾ.  ಕವಿತಾ ಬರೊಂವ್ಚ್ಯಾ ಸಂದರ್ಭಾರ್ ಮಾತ್ರ್ ಎಕ್ಲೊ ಕವಿ, ಹೆರೆವೆಳಾರ್ ನ್ಹಯ್’ ಅಶೆಂ ಸಾಂಗಲ್ಲ್ಯಾ ತಾಣೆಂ ಕವಿತಾ ಫೆಸ್ತಾಚ್ಯಾ ಕಾರ್ಭಾರ‍್ಯಾಂಕ್ ಪ್ರತ್ಯೇಕ್ ಕರುನ್ ಕವಿತಾ ಟ್ರಸ್ಟಾಚಿ ತೋಖ್ಣಾಯ್ ಕೆಲಿ.  ವ್ಹಡಾ ಸಂಖ್ಯಾನ್ ಕವಿತಾ ಮೋಗಿಂಕ್ ಲಾಗಿಂ ಹಾಡಲ್ಲ್ಯಾ ಕವಿತಾ ಟ್ರಸ್ಟಾಚೆಂ ತಾಣೆಂ ಗುಣ್‌ಗಾನ್ ಕೆಲೆಂ.  ‘ಕವಿತೆಚೆಂ ಹೆಂ ಏಕ್ ಅಪ್ರೂಪ್ ಜೈತ್’ ಅಶೆಂ ತೊ ಮ್ಹಣಾಲೊ.

ಮಾನಾಚೊ ಸೈರೊ ಜಾವ್ನ್ ಆಯಿಲ್ಲ್ಯಾ ಮರಾಠಿ ಫಿಲ್ಮ್ ಸಂಗೀತ್ ನಿರ್ದೇಶಕ್ ಅನಂತ ಅಮ್ಮೆಂಬಳಾನ್ ಹಾಜರ್ ಆಸಲ್ಲ್ಯಾ ಲೊಕಾಚ್ಯಾ ಮುಖಮಳಾ ವಯ್ಲೊ ಪರ್ಜಳ್ ಪಾರ್ಕುನ್ ‘ಕವಿತಾ ಜಾಗ್ ಹಾಡಯ್ತಾ ಆನಿ ಜಾಯ್ತೆ ಪಾವ್ಟಿಂ ಮೊನೆಪಣಿಂ ಉಲಯ್ತಾ’ ಮ್ಹಣಾಲೊ.  1940 ವರ್ಸಾ ಇಂಗ್ಲೆಂಡಾಂತ್ ವಯ್ಜಕೀಯ್ ಶಿಕಪ್ ಶಿಕ್ತಲ್ಯಾಂಕ್ ಕವಿತಾ ಶಿಕೊಂಕ್ ಆಸಲ್ಲೆಂ ಮ್ಹಣ್ ಸಾಂಗಲ್ಲ್ಯಾ ತಾಣೆಂ, ಖಂಯ್ಚೀಯ್ ಕವಿತೆಚೊ ತೀರ್ಲ್ ಜಾಣಾ ಜಾಂವ್ಕ್ ಭಾಸ್ ಆಡ್ಕಳ್ ಯೇನಾ ಮ್ಹಣೊನಯ್ ಸಾಂಗ್ಲೆಂ.  ‘ಕವಿತಾ ವ್ಯಕ್ತಿಂಚಿಂ ಸುಪ್ತ್ ಭೊಗ್ಣಾಂ ಆಪ್ಡೊಂಕ್ ಸಕ್ತಾ, ಹಾಂಗಾಸರ್ ಭಾಸ್ ಮಧೆಂ ಯೇನಾ’ ಅಶೆಂ ತೊ ಮ್ಹಣಾಲೊ.

ಆನ್ಯೇಕ್ಲೊ ಮಾನಾಚೊ ಸೈರೊ ದುಬಾಯ್ಚ್ಯಾ ಮೆರಿಟ್ ಫೈಟ್ ಸಿಸ್ಟಮ್ಸಾಚೊ ಮ್ಹಾಲಕ್ ಜೋಸೆಫೆ ಮಥಾಯಸ್ ಉಲೊವ್ನ್ ತರ‍್ನೆ ಪಿಳ್ಗೆಚ್ಯಾ ಹಾತಾಂತ್ ಕೊಂಕಣಿಚೊ ಫುಡಾರ್ ಆಸಾ. ತಾಂಣಿ ತಾಂಚ್ಯಾ ದಿಸ್ಪಡ್ತ್ಯಾ ಜಿವಿತಾಂತ್ ಕೊಂಕಣಿಚೊ ಧಾರಾಳ್ ಉಪೇಗ್ ಕರಿಜಾಯ್ ಅಶೆಂ ಉಲೊ ದಿಲೊ.

ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಆಪ್ಲ್ಯಾ ಪ್ರಾಸ್ತಾವಿಕ್ ಉಲೊವ್ಪಾಂತ್ ಬರಯ್ತಲೊ ಕಿತ್ಯಾಕ್ ಕವಿತಾ ಬರಯ್ತಾ ಆನಿ ಆಯ್ಕತಲೊ ಕಿತ್ಯಾಕ್ ಆಯ್ಕತಾ ಮ್ಹಳ್ಳೆವಿಶಿಂ ದಾಕ್ಲ್ಯಾಂ ಮಾರಿಫಾತ್ ಸಾಂಗ್ಲೆಂ.  ಅಸಲ್ಯಾ ಎಕಾ ಅನ್ಭೋಗಾಚಿ ಸಕತ್ ಆನಿ ತಾಂತುಂ ಜಾಂವ್ಚೆಂ ಬರೆಪಣ್ ಸಗ್ಳ್ಯಾ ಸಮಾಜಾಕ್ ಪಾವಯ್ಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ಕವಿತಾ ಟ್ರಸ್ಟ್ ವಾವ್ರ್ ಕರೀತ್ ಆಯ್ಲಾಂ ಮ್ಹಣೊನ್ ಸಾಂಗಲ್ಲ್ಯಾ ತಾಣೆಂ ಹಾಜರ್ ಆಸಲ್ಲ್ಯಾ ಸೈರ‍್ಯಾಂಚಿ ವೊಳಕ್ ಕರುನ್ ದಿಲಿ.

ಆಖ್ಖ್ಯಾ ದಿಸಾ ಕವಿತೆಕ್ ಸಂಬಂಧಿತ್ ಚಟುವಟಿಕೊ ಮಾಂಡುನ್ ಹಾಡಲ್ಲ್ಯೊ.  ಸಕಾಳಿಂಚ್ಯಾ ಆದೆಸಾಂತ್ ಮಣಿಪಾಲ್ ಅಕಾಡೆಮಿ ಫೊರ್ ಜನರಲ್ ಎಡ್ಯುಕೇಶನಾಚೊ ಆಡಳ್ತೆದಾರ್ ತಶೆಂ ಅಖಿಲ್ ಭಾರತ್ ಕೊಂಕಣಿ ಸಾಹಿತ್ಯ ಪರಿಷದೆಚೊ ಅಧ್ಯಕ್ಷ್ ಎಚ್. ಶಾಂತಾರಾಮ್ ತಶೆಂಚ್ ದಾಯ್ಜಿವರ್ಲ್ಡ್ ಇಂಗ್ಲಿಷ್ ಹಫ್ತ್ಯಾಳ್ಯಾಚೊ ಸಂಪಾದಕ್ ಹೇಮಾಚಾರ್ಯ ಹಾಂಣಿ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್, ಕಾರ್ಯದರ್ಶಿ ಕಿಶೂ ಬಾರ್ಕೂರ್, ‘ದಿ ಎಕ್ಸಪ್ರೆಶನ್ಸ್’ ಅಧ್ಯಕ್ಷ್ ಆಲ್ವಿನ್ ಆಂದ್ರಾದೆ ಆನಿ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಸಾಂದೊ ದೇವಪ್ಪ ಎಚ್. ಹಾಂಣಿ ಸಾಂಗಾತಾ ಮೆಳೊನ್ ಗುಲೊಬಾಚ್ಯೊ ಪಾಕ್ಳ್ಯೊ ವಾರ‍್ಯಾರ್ ಉಪ್ಯೆಂವ್ಕ್ ಸೊಡುನ್ ಕವಿತಾ ಫೆಸ್ತಾಚೆಂ ಉಗ್ತಾವಣ್ ಕೆಲ್ಲೆಂ.  ಉಪ್ರಾಂತ್ ಬಸ್ತಿ ವಾಮನ ಶೆಣೈ, ವಲ್ಲಿ ವಗ್ಗ, ಲ್ಯಾನ್ಸಿ ಪಿಂಟೊ ನಾಯಕ್, ಮಾನೆಸ್ತಿಣ್ ಫ್ಲೋರಿನ್ ಗೊನ್ಸಾಲ್ವಿಸ್, ಆಂದ್ರು ಎಲ್ ಡಿಕುನ್ಹಾ, ರಿಚರ್ಡ್ ಸೊಜ್, ವಿಕ್ಟರ್ ಮಥಾಯಸ್, ವಿಲ್ಲಿಯಮ ಪಾಯ್ಸ್ ಆನಿ ಜೆಸ್ ಫೆರ್ನಾಂಡಿಸ್ ಹಾಂಣಿ ಕಡಾಯಾಂತ್ಲ್ಯಾ ಉದ್ಕಾಂತ್ ಪಾಕ್ಳ್ಯೊ ಉಪ್ಯೆಂವ್ಕ್ ಸೊಡ್ಲ್ಯೊ. 

ಕಥೊಲಿಕಾಂನಿ ಕೊಂಕಣಿ ಭಾಸ್ ಆಜೂನ್ ಪರ‍್ಯಾಂತ್ ಜಿವಿ ದವರ‍್ಲ್ಯಾ. ಇಗರ್ಜಾಂನಿ, ಮಾಗ್ಣ್ಯಾಂನಿ ಆನಿ ಹೆರ್ ಕಾಮಾ ವೆಳಾರ್ ಕಥೊಲಿಕಾಂನಿ ಕೊಂಕಣಿ ಭಾಶೆಕ್ ಉಂಚಾಯೆಚೊ ಜಾಗೊ ದಿಲಾ ಮ್ಹಣ್ ಸಾಂಗಲ್ಲ್ಯಾ ಎಚ್. ಶಾಂತಾರಾಮ್ ಹಾಣೆಂ ಸಾಹಿತ್ಯ್, ಸಂಸ್ಕೃತಿ ಆನಿ ಕವಿತಾ ಸಾಂಗಾತಾ ಮೆಳ್ತಾನಾ ಸಮಾಜಾಂತ್ ಬರೆಪಣ್ ಜಾಂವ್ಕ್ ಸಾಧ್ಯ್ ಆಸಾ.  ಕವಿತಾ ಟ್ರಸ್ಟಾನ್ ಅಸಲ್ಯಾ ಬರೆಪಣಾಥಂಯ್ ಕರ‍್ಚೆಂ ಕಾಮ್ ಹೊಗ್ಳಿಕೆಕ್ ಫಾವೊ ಜಾಲ್ಲೆಂ ಮ್ಹಣ್ ತಾಂಣಿ ಸಾಂಗ್ಲೆಂ.  ಹೇಮಾಚಾರ್ಯಾನ್ ಎಕೆ ಕವಿತೆದ್ವಾರಿಂ ಆಪ್ಲೆಂ ಉಲೊವ್ಪ್ ಕೆಲೆಂ.  ಕಾರ್ಯದರ್ಶಿ ಕಿಶೂ ಬಾರ್ಕೂರಾನ್ ಸರ‍್ವಾಂಕ್ ಯೆವ್ಕಾರ್ ಮಾಗ್ಲೊ.

ಬಾಬಣ್ಣ ನಾಯ್ಕ ಆನಿ ಪಂಗ್ಡಾಥಾವ್ನ್ ಕುಡ್ಮಿ ನಾಚ್ ಜಾಲ್ಯಾ ಉಪ್ರಾಂತ್ ‘ಹಾಂವ್ ಕಿತ್ಯಾಕ್ ಕವಿತಾ ಬರಯ್ತಾಂ?’ ವಿಷಯಾಚೆರ್ ವಿಚಾರ್ ಸಾತೆಂ ಚಲ್ಲೆಂ. ಸಾತ್ಯಾಚೆಂ ಮುಕೆಲ್ಪಣ್ ಕವಿ ಆಂದ್ರು ಡಿಕುನ್ಹಾನ್ ಘೆತಲ್ಲೆಂ ತರ್ ಕವಿ ಎಚ್ಚೆಮ್ ಪೆರ್ನಾಲ್ ಆನಿ ಪ್ರಕಾಶ್ ಪರಿಯೆಂಕಾರ್ ಹಾಂಣಿ ಆಪಾಪ್ಲೆ ವಿಚಾರ್ ಮಾಂಡ್ಲೆ.  ಕವಿ ಜಲ್ಮಾಥಾವ್ನ್ ಯೆತಾ ಯಾ ಉಪ್ರಾಂತ್ ಜಾತಾ? ಕವಿತಾ ಕಾಳ್ಜಾಚಿ ಭಾಸ್ ವ್ಹಯ್ ಯಾ ನ್ಹಯ್, ಕವಿ ಸಾಮಾಜಿಕ್ ಪರಿವರ್ತನ್ ಹಾಡ್ಚೊ ಮನಿಸ್ ಯಾ ನ್ಹಯ್ -ಅಸಲ್ಯಾ ವಿಷಯಾಂಚೆರ್ ಚರ್ಚಾ ಚಲ್ಲಿ.

ದೊನ್ಪಾರಾಂಚ್ಯಾ ಆದೆಸಾಂತ್ ಕವಿ ಎಲ್ಯೆರ್ ತಾಕೊಡೆಚ್ಯಾ ಅಧ್ಯಕ್ಷಪಣಾರ್ ಯುವಕವಿಗೋಷ್ಠಿ ಚಲ್ಲಿ.  ಸೊಳಾ ಯುವ ಕವಿಂನಿ ಹಾಂತುಂ ಪಾತ್ರ್ ಘೆತ್ಲೊ. ಉಪ್ರಾಂತ್ ಚಲಲ್ಲ್ಯಾ ವೇದಿ ಕಾರ್ಯಾಂತ್ ಕವಿ ಆಂಟನಿ ಡಿಸೋಜಾ ಬಾರ್ಕೂರ್ ಹಾಚ್ಯಾ ‘ಕಾಟ್ ತುಟ್ಚೊ ವೇಳ್’ ಪುಸ್ತಕಾಚಿ ಮೊಕ್ಳೀಕ್ ಜಯುಂತ ಕಾಯ್ಕಿಣಿನ್ ಕೆಲಿ.  ಎಚ್ಚೆಮ್ ಪೆರ್ನಾಲಾನ್ ಕವಿಚ್ಯಾ ಕವಿತಾಂವಿಶಿಂ ಮ್ಹಾಯೆತ್ ದಿಲಿ ಜಾಲ್ಯಾರ್ ನವೀನ್ ಡಾಯಸಾನ್ ಕವಿಚಿ ವೊಳಕ್ ಕರುನ್ ದಿಲ್ಲಿ.

ದೆವಾಧಿನ್ ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್ ಅಖಿಲ್ ಭಾರತ್ ಭುರ್ಗ್ಯಾಂಚ್ಯಾ ಕವಿತಾ ಸ್ಪರ್ಧ್ಯಾಂತ್ ಜಿಕ್ಲಲ್ಯಾಂಕ್ ಹ್ಯಾಚ್ ಸಂದರ್ಭಾರ್ ಮುಕೆಲ್ ಸೈರಿಣ್ ಜಾವ್ನ್ ಆಯಿಲ್ಲ್ಯಾ ಫ್ಲೇವಿಯಾ ಮಥಾಯಸಾನ್ ಇನಾಮಾಂ ವಾಂಟ್ಲಿಂ. ಪಯ್ಲೆಂ ಇನಾಮ್ ಜಿಕ್ಪಿ ಪ್ರಾದ್ನ್ಯಾ ಕಾಮತ್ ತಶೆಂ ದುಸ್ರೆಂ ಇನಾಮ್ ಜಿಕ್ಪಿ ಕವಿತಾ ಫೊಂಡೆಕಾರ್ ಹಾಂಣಿ ಸ್ವತಾ ಹಾಜರ್ ಜಾವ್ನ್ ಇನಾಮಾಂ ಸ್ವೀಕಾರ್ ಕೆಲಿಂ ಜಾಲ್ಯಾರ್, ತಿಸ್ರೆಂ ಇನಾಮ್ ಜಿಕ್ಪಿ ಪುನೀತಾ ನಾಯ್ಕ್ ಹಿಚೆ ತರ್ಫೆನ್ ಆದ್ಲ್ಯಾ ವರ್ಸಾಚೆಂ ಪಯ್ಲೆಂ ಇನಾಮ್ ಜಿಕ್ಪಿ ಯುಗಾ ಆಡಾರ್ಕಾರಾನ್ ಇನಾಮ್ ಸ್ವೀಕಾರ್ ಕೆಲೆಂ.

ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಹ್ಯಾಚ್ ಸಂದರ್ಭಾರ್ ಕವಿ ಲಿಯೊ ಡಿಸೋಜಾಕ್ ಹಾತಾಂತರ್ ಕೆಲೊ. ಪ್ರವೀಣ್ ಕಾರ್ವಾಲೊನ್ ಮಾನಪತ್ರ್ ವಾಚ್ಲ್ಯಾ ನಂತರ್ ಜಯಂತ ಕಾಯ್ಕಿಣಿನ್ ಲಿಯಾಬಾಕ್ ತೆಂ ದಿಲೆಂ, ರುಪಯ್ ಧಾ ಹಜಾರಾಂಚಿ ಚೆಕ್ಕ್ ಅನಂತ ಅಮ್ಮೆಂಬಳಾನ್ ಲಿಯಾಬಾಕ್ ದಿಲಿ ಜಾಲ್ಯಾರ್ ಜೋಸೆಫ್ ಮಥಾಯಸಾನ್ ಯಾದಸ್ತಿಕಾ ದಿಲಿ. 

ಉಪ್ರಾಂತ್ ಚಲಲ್ಲ್ಯಾ ಬಹುಭಾಷಾ ಕವಿಗೋಷ್ಟಿಚೆಂ ಅಧ್ಯಕ್ಷಪಣ್ ಕವಿ ಹನುಮಂತ್ ಚೋಪ್ಡೆಕಾರಾನ್ ಯಶಸ್ವೆನ್ ಚಲಯ್ಲೆಂ.  ಕೊಂಕಣಿ ಧರುನ್ ಕನ್ನಡ, ತುಳು ಆನಿ ಬ್ಯಾರಿ ಭಾಷೆಚೆ ಎಕೆಕ್ ಕವಿಂನಿ ಹಾಂತುಂ ಆಸಲ್ಲೆ.  ವಸಂತಿ ಶೆಟ್ಟಿ ಬ್ರಹ್ಮಾವರ, ಡೊ. ನಿಕೇತನ, ಶಮೀಮ್ ಕುಟ್ಟಿಕಳಾ, ಆಂಟನಿ ಬಾರ್ಕೂರ್, ವೊಲ್ಟರ್ ದಾಂತಿಸ್, ಯುಗಾ ಆಡಾರ್ಕಾರ್, ಫಿಲೊಮಿನಾ ಸಾಂಫ್ರಾನ್ಸಿಸ್ಕೊ, ನೂತನ್ ಸಾಖರ್‌ದಾಂಡೆ, ಶಕುಂತಲಾ ಆರ್ ಕಿಣಿ ಹಾಂಣಿ ಹ್ಯಾ ಕವಿಗೋಶ್ಠಿಂತ್ ಭಾಗ್ ಘೆತ್ಲೊ.

ನಿಮಾಣೆಂ ‘ದಿ ಎಕ್ಸಪ್ರೆಶನ್ಸ್’ ಪಂಗ್ಡಾಥಾವ್ನ್ ಕೊಂಕಣಿ ಪದಾಂ ಸಾದರ್ ಜಾಲಿಂ. ಎರಿಕ್ ಸೋನ್ಸ್ ಸಗ್ಳ್ಯಾ ಕಾರ್ಯಾಚೊ ಸುತಾರಿ ಜಾವ್ನಾಸಲ್ಲೊ. 


ವೀಡಿಯೊ ಚಿತ್ರಣ್ ಪಳೆಂವ್ಕ್ ಹಾಂಗಾ ಚಿಚಾಯಾ