ಪಿ. ಜಿ. ಕಾಮ್ತಿಚಿ ಕವಿತಾ ಮನ್ಶಾಜಾತಿಚಿ ಆತ್ಮನಿಂದಾ ಕರ್‍ತಾ - ಉದಯ್ ಭೆಂಬ್ರೆ
 
ನಾಮ್ಣೆಚೊ ಕೊಂಕಣಿ ಕವಿ ತಶೆಂ ಪಂಡಿತ್ ಪಿ. ಜಿ. ಕಾಮತ್ ಹಾಂಚೊ ಉಡಾಸ್ ಕಾಡುನ್ ಪಯ್ಲೆಂಚೆಂ ಅನುಸ್ಮರಣ್ ಸಮ್ಮೇಳನ್ ಎರ್ನಾಕುಳಮ್ ಗಾಂಧಿ ಭವನಾಂತ್ ಮಾರ್ಚ್ 13, 2011 ತಾರಿಕೆರ್ ಆಯ್ತಾರಾ ಚಲ್ಲೆಂ. 
 
ಸಕಾಳಿಂ ಸಾಡೆ ಧಾ ವೊರಾಂಚೆರ್ ಜನಾರ್ದನ ಅತ್ರಿಲ್ಯಾ ಪ್ರಾರ್ಥನ್ ಗೀತಾದ್ವಾರಿಂ ಹೊ ಸುವಾಳೊ ಸುರು ಜಾಲೊ. ಡೊ ಸ್ವರ್ಣಲತಾ ಶೆಣೈನ್ ಯೆವ್ಕಾರ್ ಮಾಗೊನ್ `ಪಿ. ಜಿ. ಕಾಮತಾಕ್ ಅಕ್ಷರಾಂಚೆರ್ ಪ್ರೇಮ್ ಆಸಲ್ಲೊ. ತೊ ಮನ್ಶಾಸ್ನೇಹಿ, ಪರೋಪಕಾರಿ ಆಸಲ್ಲೊ' ಮ್ಹಳೆಂ.
 
ತಿರುಮಲ ದೇವಸ್ವಮಾಚೆ ಅಧಿಕಾರಿ ಪಿ. ರಂಗದಾಸ ಪ್ರಭುನ್ ದಿವೊ ಜಳೊವ್ನ್ ತಶೆಂ ಪಿ ಜಿ ಕಾಮ್ತಿಚೆ ತಸ್ವಿರೆಕ್ ಫುಲಾಂರ್ಪಣ್ ಕರುನ್ ಕಾರ್ಯಾಚೆಂ ಉಗ್ತಾವಣ್ ಕೆಲೆಂ.  ಅಧ್ಯಕ್ಷ್ ಜಾವ್ನ್ ಆಯಿಲ್ಲ್ಯಾ ಡೊ. ಗೋವಿಂದ ಶೆಣೈನ್ "ಮನ್ಶಾನ್ ಆಪ್ಲ್ಯಾ ಜಿವಿತಾಂತ್ ಸಂತೊಸ್‌ಭರಿತ್ ಆಸಾಜಯ್ ಜಾಲ್ಯಾರ್, ತಾಣೆ ಹೆರಾಂಚಿ ಸೆವಾ ಕರುಂಕ್ ಪಯ್ಲ್ಯಾನ್ ಪಯ್ಲೆಂ ಶಿಕೊಂಕ್ ಜಾಯ್.  ಹೊ ಘುಟ್ ಪಿ.ಜಿ. ಕಾಮತಾಕ್ ಬೋವ್ ಲ್ಹಾನ್‌ಪಣಾರಚ್ ಕಳಿತ್ ಜಾಲ್ಲೊ.  ಹೆರಾಂಚಿ ಸೆವಾ ಕರ್‍ಚಿ ಮ್ಹಳ್ಯಾರ್ ದೆವಾಕ್ ಭೊಗ್ಚೆಂ ಮ್ಹಳ್ಳೊ ಅರ್ಥ್ ಜಾತಾ" ಅಶೆಂ ತಾಂಣಿ ಸಾಂಗ್ಲೆಂ.

 
"ಪಿ.  ಜಿ. ಕಾಮತಾಚ್ಯಾ ಕಾವ್ಯಾಚಿ ಪ್ರಮುಕ್ ಠರಾವಣ್ ಮನೀಸ್.  ತೊ ಮನ್ಶಾಕ್ ಆರ್‍ತಿ ಕರಿನಾ. ಹಾರ್ ಘಾಲಿನಾ. ತೊ ಖರ್‍ಯಾನ್ ಮನ್ಶಾಚಿ ಠೀಕಾ ಕರ್‍ತಾ. ಆತ್ಮಠೀಕಾ ಕರ್‍ಚೆಂ ಕಠಿಣ್. ತರೀ ತೊ ಮಾನವ್ ಜಾತಿಚಿ ಆತ್ಮನಿಂದಾ ಕರ್‍ತಾ.
 
"ಬಾಯ್ಲಾಂವಿಶಿಂ ಆಸ್ಚಿ ದಾದ್ಲ್ಯಾಚಿ ಪ್ರವೃತ್ತಿ - ಹ್ಯಾ ದೋಷಾವಿಶಿಂ ತೊ ಆಪ್ಲ್ಯಾ ಕಾವ್ಯಾಂತ್ ಸಾಂಗ್ತಾ. ಭೃಷ್ಟಾಚಾರಾವಿಶೀಂಯ್ ತೊ ಬೋಟ್ ಜೊಕ್ತಾ. ಸ್ವಾರ್ಥ್, ಡೋಂಗಿಪಣ್ ಹಾಚೆರ್ ಬಡಿ ಮಾರ್‍ತಾ.
 
"ಅನುಭವಾಚೊ ಅರ್ಥ್, ಮನ್ಶಾನ್ ಜೊಡಿಲ್ಲೆಂ ಶಾಣೆಪಣ್ ಆನಿ ತಿ ಸಾಂಗ್ಚಿ ಕಲಾ ಥೊಡ್ಯಾಂಚ್ ಉತ್ರಾಂನಿ `ಪಂವ್ಳಿ' ಪುಸ್ತಕಾಂತ್ ಆಮ್ಕಾಂ ವಾಚುಂಕ್ ಮೆಳ್ತಾ" ಅಶೆಂ ಉದಯ್ ಭೆಂಬ್ರೆನ್ ಪಿ. ಜಿ. ಕಾಮ್ತಿಚ್ಯಾ ಕಾವ್ಯಾಚಿ ವಿಸ್ಕಳಾವ್ಣಿ ಕೆಲಿ.
 
ಹ್ಯಾಚ್ ಸಂದರ್ಭಾರ್ ಗೊಂಯ್ ಸರ್ಕಾರ್ ವೆಗಿಂಚ್ ಮುಂಬಯ್, ಮಂಗ್ಳುರ್ ತಶೆಂ ಕೊಚಿಂತ್ `ಗೋವಾ ಕಲ್ಛರಲ್ ಸೆಂಟರ್' ಘಡ್ತಲೊ ಅಶೆಂ ತಾಣೆ ಜಾಹೀರ್ ಕೆಲೆಂ.  ಹ್ಯಾ ಸಂದರ್ಭಾರ್ ಉಲೊವ್ನ್ ಭಟ್ ಮ್ಹಣಾಲೊಕಿ "ಪಿ. ಜಿ. ಕಾಮ್ತಿಚ್ಯೊ ಕವಿತಾ ವಿಡಂಬನಾತ್ಮಕ್ ತಶೆಂ ವ್ಯಂಗ್ಯ್ ಆಸಾತ್. ಹಾಂಚೊ ಶೆವೊಟ್ ಸಮಾಜ್ ಸುಧಾರಣ್ ಶಿವಾಯ್ ದುಸ್ರೆಂ ಕಾಂಯ್ ನ್ಹಯ್".
 
ಆನಂದ ಜಿ ಕಾಮ್ತಿನ್ ಧನ್ಯವಾದ್ ಅರ್ಪಣ್ ಕೆಲೆಂ.
 
ದೊನ್ಪಾರಾಂ ಅಡೇಜ್ ವೊರಾಂಚೆರ್ ಚಲ್ಲಲ್ಯಾ ಬಹುಭಾಷಾ ಕವಿಗೋಷ್ಟಿಚೆಂ ಅಧ್ಯಕ್ಷ್‌ಪಣ್ ಪ್ರೊ. ಎನ್ ಎನ್ ಆನಂದನ್ ಹಾಂಣಿ ಘೆತಲ್ಲೆಂ.  ಹೆ ಕವಿಗೋಷ್ಟಿಂತ್ ಮಲಯಾಳಮ್ ಕವಿ ಪ್ರೊ. ಚೆಮ್ಮನಮ್ ಚಾಕೊ, ಹಿಂದಿ ಕವಿ ಪ್ರೊ. ಪಿ. ವಿ ವಿಜಯನ್, ತುಳು ಕವಿ ಪ್ರೊ. ಕೃಷ್ಣಮೂರ್ತಿ, ಕನ್ನಡ ಕವಿ ಮಹೇಶ್ ನಾಯಕ್, ಕೊಂಕಣಿ ಕವಿ ಮೆಲ್ವಿನ್ ರೊಡ್ರಿಗಸ್, ಶರತ್ ಚಂದ್ರ ಶೆಣೈ, ಎನ್ ಶಿವಾನಂದ ಶೆಣೈ, ಕೆ ಅನಂತ್ ಭಟ್ ಆನಿ ಆರ್ ಭಾಸ್ಕರನ್ ಹಾಂಣಿ ಆಪಾಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ.
 
ಕು. ನಿವೇದಿತಾ ಹಿಣೆಂ ಧನ್ಯವಾದ್ ಭೆಟಯ್ಲೆ.  ಪಿ. ಜಿ. ಕಾಮತ್ ಫೌಂಡೇಶನಾಚೆ ವತಿನ್ ಘಡೊವ್ನ್ ಹಾಡ್ಲಲ್ಲ್ಯಾ ಹ್ಯಾ ಕಾರ್ಯಕ್ರಮಾಚೆಂ ಸೂತ್ರ್ ಸಂಚಾಲನ್ ರಮೇಶ್ ಪೈನ್ ಭೋವಚ್ ಆಪುರ್ಬಾಯೆನ್ ಕೆಲ್ಲೆಂ.