ಸ್ಟೀವನ್ ಕ್ವಾಡ್ರಸ್ ಆನಿ ಎಂಟನಿ ಬಾರ್ಕೂರಾಕ್ ಕರ್ನಾಟಕ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ

ಕವಿತಾ ಪಬ್ಲಿಕೇಶನ್ಸಾನ್ ಪರ್ಗಟ್ ಕೆಲ್ಲ್ಯಾ ದೋನ್ ಪುಸ್ತಕಾಂಕ್ 2010 ವರ್ಸಾಚ್ಯೊ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚ್ಯೊ ಪುಸ್ತಕ್ ಪ್ರಶಸ್ತ್ಯೊ ಲಾಬ್ಲ್ಯಾತ್.  ಹ್ಯಾಚ್ ಮಾರ್ಚ್ 17 ತಾರಿಕೆರ್ ಉಡುಪಿಂತ್ ಚಲ್ಲಲ್ಲ್ಯಾ ಎಕೆ ಪತ್ರಿಕಾಗೋಷ್ಠಿಂತ್ ಅಕಾಡೆಮಿಚೊ ಅಧ್ಯಕ್ಷ್ ಕುಂದಾಪುರ ನಾರಾಯಣ ಖಾರ್ವಿನ್ ಹ್ಯೊ ಪ್ರಶಸ್ತ್ಯೊ ಜಾಹೀರ್ ಕೆಲ್ಯೊ.

ಸ್ಟೀವನ್ ಕ್ವಾಡ್ರಸಾನ್ ಕನ್ನಡಾ ಥಾವ್ನ್ ಜನ್ನ ಮಹಾಕವಿಚೆಂ `ಯಶೋಧರ ಚರಿತ' ಕಾವ್ಯಪುಸ್ತಕ್ ಕೊಂಕಣಿಕ್ ತರ್ಜಣ್ ಕೆಲ್ಲೆಂ. ಹ್ಯಾ ತರ್ಜಣಾಚ್ಯಾ ಪುಸ್ತಕಾಕ್ ಹಿ ಪ್ರಶಸ್ತಿ ಲಾಭ್ಲ್ಯಾ ತರ್, ಎಂಟನಿ ಬಾರ್ಕೂರಾಚ್ಯಾ `ಕಾಟ್ ತುಟ್ಚೊ ವೇಳ್' ಕವಿತಾ ಪುಸ್ತಕಾಕ್ ಹಿ ಪ್ರಶಸ್ತಿ ಫಾವೊ ಜಾಲ್ಯಾ. ಹಾಂಚ್ಯಾ ಸಾಂಗಾತಾ ಕ್ಯಾಥರಿನ್ ರೊಡ್ರಿಗಸ್ ಹಿಚ್ಯಾ `ಸಾತೆಂ' ಮಟ್ವ್ಯಾ ಕಾಣಿಯಾಂಚ್ಯಾ ಪುಸ್ತಕಾಕಯ್ ಪ್ರಶಸ್ತಿ ಫಾವೊ ಜಾಲ್ಯಾ. ಪ್ರಶಸ್ತಿ ರುಪಯ್ 5,000 ನಗ್ದಿ, ಯಾದಸ್ತಿಕಾ ತಶೆಂ ಮಾನ್-ಪತ್ರ್ ಆಟಾಪ್ತಾ.  ವಿಶೇಸ್ ಇನಾಮ್ ವಕೀಲ್ ಸ್ಟ್ಯಾನ್ಲಿ ಡಿಕೊಸ್ತಾಚೆಂ `ಕಾನೂನ್ ಮಾಹೆತ್' ಪುಸ್ತಕ್ ವಿಂಚುನ್ ಆಯ್ಲಾಂ.

ಅಕಾಡೆಮಿಚ್ಯೊ ಗೌರವ್ ಪ್ರಶಸ್ತ್ಯೊ ಡೊ ಎಡ್ವರ್ಡ್ ನಝರೆತ್ (ಸಾಹಿತ್ಯ್), ಆಗ್ನೆಲ್ ರೊಡ್ರಿಗಸ್ (ಕೊಂಕಣಿ ಭಾಸ್ - ಪ್ರಚಾರ್) ಆನಿ ಗೋಪಿನಾಥ ಭಟ್ (ಕಲಾ ಆನಿ ನಾಟಕ್) ಹೆ ವಿಂಚುನ್ ಆಯ್ಲ್ಯಾತ್. ತಾಂಕಾಂ ರುಪಯ್ 10,000 ನಗ್ದಿ, ಯಾದಸ್ತಿಕಾ ಆನಿ ಮಾನ್-ಪತ್ರ್ ಫಾವೊ ಜಾತಲೆಂ. ವಿಶೇಸ್ ಗೌರವ್ ಪ್ರಶಸ್ತಿ ಅಪಾಂಗ್ ಪೆಂವ್ಪಿ ಪ್ರಕಾಶ್ ಖಾರ್ವಿ ಹಾಕಾ ಫಾವೊ ಜಾಲ್ಯಾ.

ಮಾರ್ಚ್ 26 ತಾರಿಕೆರ್ ಬೆಂಗ್ಳುರ್ ಮಲ್ಲೇಶ್ವರಮಾಂತ್ ಆಸ್ಚ್ಯಾ ಕಾಶಿ ಮಠಾಂತ್ ಹೆಂ ಪ್ರಶಸ್ತಿ ವಾಂಟಪ್ ಕಾರ್ಯೆಂ ಚಲ್ತಲೆಂ.

ಆದ್ಲ್ಯಾ ವರ್ಸಾ ಕವಿತಾ ಪಬ್ಲಿಕೇಶನ್ಸಾನ್ ಪರ್ಗಟ್ ಕೆಲ್ಲ್ಯಾ ಎಮ್. ಪಿ. ರೊಡ್ರಿಗಸಾಚ್ಯಾ `ರುಮ್ಡಿ ಫುಲಾಂ' ಕವಿತಾ ಪುಸ್ತಕಾ ಖಾತೀರ್ ಆನಿ ತ್ಯಾ ಆದಿಂ ಒಲಿವೇರಾ ಫ್ಲೇವಿಯಾ ಹಿಚ್ಯಾ `ಸುಖಾ ದುಖಾಚಿಂ ಪಾನಾಂ, ಪುಣ್ ಮೊಗಾಚಿಂ' ಪುಸ್ತಕಾ ಖಾತೀರ್ ಅಕಾಡೆಮಿಚ್ಯೊ ಪ್ರಶಸ್ತ್ಯೊ ಫಾವೊ ಜಾಲ್ಯಾತ್. ಕವಿತಾ ಪಬ್ಲಿಕೇಶನ್ಸಾಚೆಂ ಆನ್ಯೇಕ್ ಪುಸ್ತಕ್ ಮೆಲ್ವಿನ್ ರೊಡ್ರಿಗಸಾಚೆಂ `ಪ್ರಕೃತಿಚೊ ಪಾಸ್' ಆದ್ಲ್ಯಾ ವರ್ಸಾಚಿ ಟಿ. ಎಮ್. ಎ.ಪೈ ಫೌಂಡೇಶನ್ ಪ್ರಶಸ್ತಿ ಜೊಡುಂಕ್ ಪಾವ್ಲಾಂ ಆಸ್ತಾಂ, ಹಿ ಪ್ರಶಸ್ತಿ ಹ್ಯಾಚ್ ಮಾರ್ಚ್ 26 ತಾರಿಕೆರ್ ಸನ್ವಾರಾ ಮಣಿಪಾಲ್ಚ್ಯಾ ವ್ಯಾಲಿವ್ಯೂ ಹೊಟೆಲಾಂತ್ ದಿತಲೆ.