‘ದೇವ್, ಕವಿತೆಂತ್ ಘುಂಗ್ರಾಂ ಬಾಂಧುನ್ ನಾಚ್ತಾ’ ಡೊ. ಟಿ ಎಮ್ ಎ ಪೈ ಪುರಸ್ಕಾರ್ ಸ್ವೀಕಾರ್ ಕರ್ತಾನಾ ಮೆಲ್ವಿನ್ ರೊಡ್ರಿಗಸ್

ಡೊ. ಟಿ. ಎಮ್.ಎ. ಪ್ರತಿಷ್ಠಾನ್ ಹಾಂಣಿ ನಾಮ್ಣೆಚ್ಯಾ ಕೊಂಕಣಿ ಮನ್ಶಾಂಕ್ ದಿಂವ್ಚ್ಯಾ ಗೌರವಾಚೆಂ ಸಂಭ್ರಮ್ ಕಾರ್ಯೆಂ ಹ್ಯಾಚ್ ಮಾರ್ಚ್ 26, 2011 ತಾರಿಕೆರ್, ಮಣಿಪಾಲ್ ಫೊರ್ಚುನ್ ಇನ್ನ್ ವ್ಯಾಲಿವೀವ್ ಹೊಟೆಲಾಂತ್ಲ್ಯಾ ಚೈತ್ಯ ಸಭಾಸಾಲಾಂತ್ ಚಲ್ಲೆಂ. ಹ್ಯಾ ಸಂದರ್ಭಾರ್ ‘ಶ್ರೇಷ್ಟ್ ಕೊಂಕಣಿ ಮನೀಸ್’ ಪ್ರಶಸ್ತಿ ತಶೆಂ ಡೊ ಟಿ.ಎಮ್.ಎ. ಅತ್ಯುತ್ತಮ್ ಕೊಂಕಣಿ ಪುಸ್ತಕ್ ಪುರಸ್ಕಾರ್ ದಿಲೆ.

ಶ್ರೇಷ್ಟ್ ಕೊಂಕಣಿ ಮನೀಸ್ ಪ್ರಶಸ್ತ್ಯೊ ಪತ್ರಕರ್ತ್ ತಶೆಂ ಪ್ರಸಾರ್ ಭಾರತಿಚೊ ಅದ್ಲೊ ಚೇರ್‌ಮೆನ್ ಶ್ರೀ ಎಮ್. ವಿ. ಕಾಮತ್; ಭಾರತ್ ಅಣುಸಕತ್ ಆಯೋಗಾಚೊ ಆದ್ಲೊ ಅಧ್ಯಕ್ಷ್ ಶ್ರೀ ಅನಿಲ್ ಕಾಕೋಡ್ಕರ್; ಮುಂಬಯಿ ಐಐಟಿಚೊ ಆದ್ಲೊ ಡೀನ್ ಪ್ರೊ. ಅರವಿಂದ್ ಕುಡ್ಚಡ್ಕಾರ್; ದೆವಾಧೀನ್ ಎಚ್.ವಿ.ಕಾಮತ್ ಹಾಂಕಾಂ ಫಾವೊ ಕೆಲ್ಯೊ. ದೆ. ಎಚ್. ವಿ. ಕಾಮತ್ ತರ್ಫೆನ್ ತಾಂಚಿ ಧುವ್ ಪೂರ್ಣಿಮಾ ವಿ. ಶೆಣೈ ಹಿಣೆ ಪ್ರಶಸ್ತಿ ಸ್ವೀಕಾರ್ ಕೆಲಿ. ಪ್ರತಿಷ್ಟಾನಾಚೊ ಅಧ್ಯಕ್ಷ್ ಟಿ. ಮೋಹನದಾಸ್ ಪೈ, ಮಣಿಪಾಲ್ ವಿಶ್ವವಿದ್ಯಾನಿಲಯಾಚೊ ಕುಲಪತಿ ರಾಮದಾಸ್ ಪೈ, ಡೊ. ವಿ. ಎ. ಪೈ ಪಣಂದಿಕರ್ ಹಾಂಣಿ ಹ್ಯಾ ಮ್ಹಾನ್ ಮನ್ಶಾಂಕ್ ಪ್ರಶಸ್ತ್ಯೊ ವಾಂಟ್ಲ್ಯೊ. ಹೆ ಪ್ರಶಸ್ತೆ ಸಾಂಗಾತಾ ರುಪಯ್ 1 ಲಾಕ್, ಗಂಧಾಚೆಂ ಪೆಟುಲ್, ಪ್ರಸಸ್ತಿ ಪತ್ರ್, ಶೊಲ್ ತಶೆಂ ಫುಲಾಂ ಆಸಲ್ಲಿಂ.

ಅತ್ಯುತ್ತಮ್ ಕೊಂಕಣಿ ಪುಸ್ತಕ್ ಪುರಸ್ಕಾರ್ 2009, ಮೆಲ್ವಿನ್ ರೊಡ್ರಿಗಸಾಚ್ಯಾ ‘ಪ್ರಕೃತಿಚೊ ಪಾಸ್’ ಕವಿತಾಪುಂಜ್ಯಾಕ್ ಪಾವೊ ಜಾಲೊ ತರ್ ಮೆಚ್ವಣೆಚೊ ಪುರಸ್ಕಾರ್ ಜೆರಿ ಡಿಮೆಲ್ಲೊಚ್ಯಾ ‘ದೊರೆಮಿಫಾ ವೊಳ್ಕೆ ಗೃಂಥ್’ ಪುಸ್ತಕಾ ಖಾತೀರ್ ತಶೆಂ ರಮೇಶ್ ಲಾಡ್ ಹಾಂಣಿ ಕನ್ನಡ ಥಾವ್ನ್ ಕೊಂಕಣಿಕ್ ತರ್ಜಣ್ ಕೆಲ್ಲ್ಯಾ ಡೊ ಕಸ್ತೂರಿ ಮೋಹನ್ ಪೈ ಹಾಚ್ಯಾ ‘ಧೃವತಾರೆ’ ಪುಸ್ತಕಾಕ್ ಫಾವೊ ಜಾಲೊ. ಅತ್ಯುತ್ತಮ್ ಪುಸ್ತಕಾಕ್ ರುಪಯ್ 25,000, ಗಂಧಾಚೆಂ ಪೆಟುಲ್, ಶೊಲ್, ಫುಲಾಂ ಆನಿ ಪ್ರಶಸ್ತೆ ಪತ್ರ್ ದಿಲೆಂ ತರ್, ಮೆಚ್ವಣೆಚ್ಯಾ ಪುಸ್ತಕಾಂ ಖಾತೀರ್ ರುಪಯ್ 5,000 ತಶೆಂ ಹೆರ್ ಮಾನಾಚ್ಯೊ ವಸ್ತು ಹಾತಾಂತರ್ ಕೆಲ್ಯೊ. ಜೆರಿ ಡಿಮೆಲ್ಲೊ ಕೆನಡಾಂತ್ ವಸ್ತಿ ಕರ್ನ್ ಆಸೊನ್ ಕಾರ್ಯಾಕ್ ಆಯ್ಲೊನಾ ಜಾಲ್ಲ್ಯಾನ್ ತಾಚೆ ತರ್ಫೆನ್ ಕೊಂಕಣಿ ಲೇಖಕ್ ಡೊ ಜೆರಿ ನಿಡ್ಡೋಡಿನ್ ಹಿ ಪ್ರಶಸ್ತಿ ಸ್ವೀಕಾರ್ ಕೆಲಿ.

‘ಆಮಿ ಸರ್ವ್ ಮನೀಸ್ ನಿಮಿತ್ತಾಕ್ ಮಾತ್ರ್ ಆಸ್ಚಿಂ ಆಯ್ದಾಂ. ಆಮಿ ಆಮ್ಚೆಂ ಜಿವಿತ್ ಚಲಯ್ತಾಂವ್ ಮ್ಹಣೊನ್ ಚಿಂತಾಂವ್. ಪುಣ್ ತಶೆಂ ಕಾಂಯ್ ನಾ. ಆಮ್ಚ್ಯಾ ಹಣ್ಯಾಂತ್ ಬರಯಿಲ್ಲೆಂ ಆಪ್ಶೆಂಚ್ ಜಾತಾ. ಹಾಕಾ ರುಜ್ವಾತ್ ಮ್ಹಜೆಲಾಗಿಂ ನಾ. ಮ್ಹಜೆಂ ಉತರ್ ತುಮಿ ಮಾಂದಿಜೆ ಮ್ಹಣೊನ್ ಕಾಂಯ್ ನಾ. ಪುಣ್ ಹಾಂವ್ ಕಿತೆಂ ಸಾಂಗ್ತಾಂ ತಾಂತುಂಚ್ ಮ್ಹಾಕಾ ಸತ್ ದಿಸ್ತಾ’ ಅಶೆಂ ಎಮ್. ವಿ. ಕಾಮತ್ ಮ್ಹಣಾಲೊ.

‘ಸಾಂಸ್ಕ್ರುತಿಕ್, ಕೈಗಾರಿಕ್, ಸಾಮಾಜಿಕ್, ಧಾರ್ಮಿಕ್ ಆನಿ ಖಂಯ್ಚ್ಯಾಯ್ ಶೆತಾಂನಿ ಜಾಂವ್ ಕೊಂಕಣ್ಯಾಂಚಿ ದೇಣ್ಗಿ ತಶೆಂ ಪ್ರಭಾವ್ ಚಡ್ ಆಸಾ. ಹೆರ್ ಸಮುದಾಯಾಂ ಸರ್ ಕೆಲ್ಯಾರ್, ಆನಿ ಆಮ್ಚೊ ಸಂಕೊ ಲೆಕಾಕ್ ಧರ್ಲ್ಯಾರ್ ಕೊಂಕ್ಣ್ಯಾಂ ಮಧೆಂ ಉಂಚಾಯೆಕ್ ಪಾವಲ್ಲೆ ಚಡ್ ಲೋಕ್ ಆಸಾತ್’ ಅಶೆಂ ಮ್ಹಣಾಲೊ ಡೊ. ಅನಿಲ್ ಕಾಕೋಡ್ಕಾರ್.

‘ಆಮ್ಚೆ ಆತಾಂಚೆ ಶಿಕ್ಪಾ ರಿತಿಂತ್ ತಶೆಂ ಚಿಂತ್ಪಾಂತ್ ಬದ್ಲಾವಣ್ ಯೇಜಾಯ್. ಆಮಿ ಆಜೂನಯ್ ಚಾಳೀಸ್ ವರ್ಸಾಂ ಆದಿಂ ಕಶೆ ಆಸಲ್ಲ್ಯಾಂವ್ ತಶೇಚ್ ಆಸಾಂವ್’ ಅಶೆಂ ಉಲೊ ದಿಲೊ ಪ್ರೊ ಅರವಿಂದ್ ಕುಡ್ಚಡೆಕಾರಾನ್.

ಡೊ. ಟಿ. ಎಮ್ ಪೈ ಫೌಂಡೇಶನಾನ್ ಹೊ ಪ್ರತಿಷ್ಟೆಚೊ ಪುರಸ್ಕಾರ್ ಎಕ್ವೀಸ್ ವರ್ಸಾಂ ಆದಿಂ ದೀಂವ್ಕ್ ಸುರು ಕೆಲ್ಲೊ ಆಸೊನ್ ಯೆದೊಳ್ ಪಾಸುನ್ ೮೪ ಜಣಾಂಕ್ ತೊ ಫಾವೊ ಜಾಲಾ.

ಶ್ರೇಷ್ಥ್ ಕೊಂಕಣಿ ಪುಸ್ತಕ್ ಪುರಸ್ಕರ್ ಸ್ವೀಕಾರ್ ಕೆಲ್ಲ್ಯಾ ಮೆಲ್ವಿನ್ ರೊಡಿಗಸಾನ್ ‘ಆಪುಣ್ ಕವಿತೆಂತ್ ದೆವಾಕ್ ಮೆಳ್ತಾಂ ಆನಿ ತಾಂತುಂಚ್ ನಶಾ ಸೊಧ್ತಾಂ’ ಮ್ಹಳೆಂ. (ಮೆಲ್ವಿನ್ ರೊಡ್ರಿಗಸಾಚೊ ಸಂದೇಶ್ ವಾಚುಂಕ್ ಹಾಂಗಾಸರ್ ಚಿಚಾಯಾ)

ರಮೇಶ್ ಲಾಡಾನ್ ‘ಆಪ್ಣಾಕ್ ಜಿ ಪ್ರಶಸ್ತಿ ಮೆಳ್ಳ್ಯಾ ತಾಚಿ ಸಂಪೂರ್ಣ್ ಮರ್ಯಾದ್ ಮೂಳ್ ಲೇಖಕಾಕ್ ಫಾವೊ ಜಾಯ್ಜಾಯ್’ ಅಶೆಂ ಮ್ಹಳೆಂ.

ಸುರ್ವೆರ್ ತೇಜಸ್ವಿನಿ ಆನಿ ಯಶಸ್ವಿನಿ ಹಾಂಚ್ಯಾ ಮಾಗ್ಣ್ಯಾ ಗಿತಾ ಉಪ್ರಾಂತ್ ಟಿ ಮೋಹನದಾಸ್ ಪೈ ಹಾಂಣಿ ಯೆವ್ಕಾರ್ ದಿಲೊ. ಡೊ. ಎಚ್ ಶಾಂತಾರಾಮಾನ್ ಕಾರ್ಯೆಂ ಚಲೊವ್ನ್ ವೆಲೆಂ.

ಡೊ. ಪುಷ್ಪಾ ಕಿಣಿ, ಡೊ ರಘುವೀರ್ ಪೈ, ಡೊ ಮುರಲೀಧರ್ ಪೈ, ಡೊ ಶ್ರೀಕಾಂತ್ ರಾವ್, ಲೆಫ್ಟಿನೆಂತ್ ಕರ್ನಲ್ ವಿಕ್ಟರ್ ಎಫ್ ಡಿಸೋಜಾ, ಯು. ವಿದ್ಯಾವಂತ ಆಚಾರ್ಯ ಆನಿ ಬಿ ಶಾಂತಾರಾಮ ಬಾಳಿಗಾ ಹಾಂಣಿ ಮ್ಹಾನ್ ಮನ್ಶಾಂಚಿ ವೊಳಕ್ ಕರುನ್ ದಿಲ್ಲಿ.

• ಮೆಲ್ವಿನ್ ರೊಡ್ರಿಗಸಾಚ್ಯಾ `ಪ್ರಕೃತಿಚೊ ಪಾಸ್' ಪುಸ್ತಕಾಕ್ ಡೊ ಟಿಎಮ್‍ಎ ಪೈ ಪ್ರಶಸ್ತಿ.