ವಚನ ಸಾಹಿತ್ಯಾಂತ್ ಮನ್ಶಾಚೆಂ ಖಾಶೆಲೆಂಪಣ್ ಆಸಾ - ಬಾ. ಪ್ರಶಾಂತ್ ಮಾಡ್ತಾ.

"ರಾಯ್ ಮೆಲೊ - ಮ್ಹಳ್ಯಾರ್ ಏಕ್ ಘಡಿತ್ ಜಾಲೆಂ. ರಾಯ್ ಮೆಲೊ ಆನಿ ರಾಣೀಯಿ ಮೆಲಿ ಮ್ಹಳ್ಯಾರ್ ಏಕ್ ಫ್ಲೊಟ್ ಜಾಲೊ. ಫ್ಲೊಟ್ ನಾಸ್ತಾನಾ ಚಡ್ ಕರುನ್ ಹಿಂದೀ ಫಿಲ್ಮ್ ನಾ.  ನಾಯಕ್,  ನಾಯಕಿ, ಖಳ್ ನಾಯಕ್ ಆನಿ ತಾಂಚೆ ಮಧ್ಲೊ ಮೋಗ್, ರಾಗ್ ಆನಿ ಪ್ರತೀಕಾರ್ ಅಶೆಂ  ಫ್ಲೊಟಾಚ್ಯಾ ಪಾಟ್ಲ್ಯಾನ್ ಪಡೊನ್ ಅಕೇರಿಕ್ ಮೊರ್ಚೆಂ ದೊಗಾಂನಿ ಮಾತ್ರ್. ಆನಿ ತೆ ದೋಗ್ ಮ್ಹಳ್ಯಾರ್ ಏಕ್ ನಿರ್ದೇಶಕ್ ಆನಿ ದುಸ್ರೊ ಪ್ರೇಕ್ಶಕ್ . . ." ಸಮಕಾಲೀನ್ ಕೊಂಕ್ಣಿ ಸಾಹಿತ್ಯಾ ಬಾಬ್ತಿನ್ ಹಿ ಆಪುರ್ಬಾಯೆಚಿ ಸರ್ ದಿತಾನಾ ಬಾ. ಪ್ರಶಾಂತ್ ಮಾಡ್ತಾ  ಸ್ಪಶ್ಟ್  ಮ್ಹಣಾಲೊ " ... ಫ್ಲೊಟ್ ನಾತುಲ್ಲೆಂ ಸಾಹಿತ್ ಚಿಂತೂಂಕ್ ಲಾಯ್ತಾ ಆನಿ ಅಸಲೆಂ ಸಾಹಿತ್ ಕೊಂಕ್ಣೆಂತ್ ಚಡ್ ಕರುನ್ ಯೇಜೆ."

ತೊ ರೊಯ್ ಕಾಸ್ತೆಲಿನೊ ಪುಡಾರ್ಪಣಾಚ್ಯಾ, ಶಾಳಾಂನಿ ಆಯಿಲ್ಲಿ ಕೊಂಕ್ಣಿ ಉರೊನ್ ಘೆಂವ್ಚ್ಯಾ ನಿರ್ಣಾಯಕ್ ಝುಜಾಕ್ ಲಾಗಲ್ಲ್ಯಾ ಕೊಂಕ್ಣಿ ಪ್ರಚಾರ್ ಸಂಚಾಲನಾನ್ ಆಪ್ಲ್ಯಾ ಮಾಂತಾಖಾಲ್ ಪರ್ಗಟ್ ಕೆಲ್ಲೊ ಪಯ್ಲೊ ಬೂಕ್ ಪ್ರಾದ್ಯಾಪಕ್ ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ ಹಾಚೊ ‘ಸರ್ಣಾಯಿಲ್ಲ್ಯಾಂಚೆಂ ಉತ್ರಾಂ ಸಾಹಿತ್ಯ್’  ಲೊಕಾರ್ಪಣ್ ಕರುನ್ ಉಲಯ್ತಾಲೊ.

ರೊನಿ ಕ್ರಾಸ್ತಾಚ್ಯಾ ಪ್ರಾರ್ಥನ್ ಗಿತಾಸವೆಂ ಕಾರ್ಯೆಂ ಸುರು ಜಾಲೆಂ ಅನಿ ಮಾಂಡ್ ಸೊಭಾಣ್ ಗುರ್ಕಾರ್  ಎರಿಕ್ ಒಝೆರಾನ್ ಯೆವ್ಕಾರ್ ಮಾಗ್ಲೊ. ಮಾನೇಸ್ತ್ ಸ್ಟೀವನ್ ಕ್ವಾಡ್ರಸಾನ್ ಉಗ್ತಾವ್ಣೆ ಆದಿಂ ಮಾಧ್ಯಮಾಂಕ್ ದಿಲ್ಲ್ಯಾ ಬುಕಾಚೆ ಒಳ್ಕೆಉತ್ರಾಂತ್ಲ್ಯೊ ಥೊಡ್ಯೊ ವೊಳಿ ವಿಂಚುನ್ ವಾಚಲ್ಲ್ಯಾ ಎರಿಕ್ ಒಝೆರಾನ್ ವಚನಾಂಚಿ ಚಳ್ವಳ್ ಇತಿಹಾಸಾಂತ್ ಏಕ್ ಪ್ರಜಾತಾಂತ್ರಿಕ್ ಚಳ್ವಳ್ ಆನಿ ಆಜ್ ಕಾಲ್ ಕೊಂಕ್ಣೆಂತ್ ಚಲೊನ್ ಆಸ್ಚ್ಯಾ ಬಾಮುಣ್‌ವಾದಾ ವಿರೋಧ್ ಝುಜೊಂಕ್ ಅಸಲೀಚ್ ಚಳ್ವಳ್ ಬೋವ್ ಗರ್ಜ್ ಆಸಾ ಮ್ಹಳೆಂ.

ಹೊನ್ನಾವರ್ಚ್ಯಾ ಸರ್ಕಾರಿ ಕೊಲೆಜಿಂತ್ ಇತಿಹಾಸಾಚೊ ಪ್ರಾಧ್ಯಾಪಕ್ ಜಾವ್ನ್ ವಾವುರ್ಚ್ಯಾ ಸ್ಟೀವನ್ ಕ್ವಾಡ್ರಸಾಚೊ ಸರ್ಜನ್ ಶೀಳ್ ಸಾಹಿತ್ಯಾಚ್ಯಾ  ತರ್ಜುಮ್ಯಾಚೊ ಹೊ ಚವ್ತೊ ಬೂಕ್.  ಪಯ್ಲೆಂ ತಾಣೆಂ ಎಡ್ವರ್ಡ್ ನಜ್ರೆತಾಚೆ ಅಡ್ವಾರ್ಲೆಲೆಂ ಫಳ್  ಕಾಣಿಯೊಂ ‘ನಿರ್ಬಂಧಿತ ಫಲ’ ಮ್ಹಳ್ಳ್ಯಾ ನಾಂವಾನ್ ಕನ್ನಡಾಕ್ ವೆಲೆ  ಮಾಗಿರ್, ವಿ ಜೆ ಪಿ ಸಲ್ಡಾನ್ಹಾಚೊ ನಾಟಕ್ ‘ಸರ್ದಾರಾಚೆಂ ಸಿನೊಲ್’ ‘ಸಿಗ್ನೆಟ್ಸ್ ಒಫ್ ಸರ್ದಾರ್’ ಮ್ಹಳ್ಳ್ಯಾ ನಾಂವಾನ್ ಇಂಗ್ಲಿಶಾಕ್ ವೆಲೊ. ಪಾಟ್ಲ್ಯಾ ವರ್ಸಾ ‘ಜನ್ನ ಮ್ಹಾಕವಿಚೊ ಯಶೋಧರ ಚರಿತ’  ಕನ್ನಡಾಕ್ ಹಾಡ್ಲೊ ಆನಿ ಕವಿತಾ ಪಬ್ಲಿಕೇಶನ್ಸ್ ಹಾಂಣಿ ಪರ್ಗಟ್ ಲ್ಲ್ಯಾ ಹ್ಯಾ ಬುಕಾಕ್ ಹ್ಯಾ ವರ್ಸಾ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚಿ ಉತ್ತೀಮ್ ಅನುವಾದಿತ್ ಕೃತಿ ಮ್ಹಣ್ ಪುರಸ್ಕಾರ್ ಫಾವೊ ಜಾಲಾ. ಹ್ಯಾ ಭಾಯ್ರ್ ಶಾಳಾಂನಿ ಕೊಂಕ್ಣಿ ಸುರು ಜಾಲ್ಲ್ಯಾ ದಿಸಾ ಥಾವ್ನ್ ಆಜ್ ಪರ್ಯಾಂತ್ ಜಾಲ್ಲ್ಯಾ ಸರ್ವ್ ಪಾಠ್ ಪುಸ್ತಕಾಂ ತಯಾರ್ ಕರ್ಚ್ಯಾಂತ್ ತಾಚಿ ಮೊಟಿ ವಾಂವ್ಟ್ ಆಸಾ.

ಬಾ. ಪ್ರಶಾಂತ್ ಮಾಡ್ತಾ ಹಾಂಚೆ ಥಾವ್ನಚ್  ಕನ್ನಡಾಂತ್ಲೆಂ ವಚನ್ ಸಾಹಿತ್ ಕೊಂಕ್ಣೆಕ್ ಹಾಡುಂಕ್ ಆಪ್ಣಾಕ್ ಪ್ರೇರಣ್ ಮೆಳ್ಳೆಂ ಮ್ಹಳ್ಳ್ಯಾ ಸ್ಟೀವನಾನ್ ಹ್ಯಾಚ್ ವರ್ಸಾ ಜನೆರಾಂತ್ ಕಾರ್ಕೊಳಾಂತ್ ಚಲ್ಲೆಲ್ಯಾ  ಕವಿತಾ ಫೆಸ್ತಾಂತ್ ‘ಯಶೋಧರ ಚರಿತ’ ಬೂಕ್ ಉಗ್ತಾಂವ್ಕ್ ಆಯಿಲ್ಲ್ಯಾ ರೊಯ್ ಕಾಸ್ತೆಲೀನೊಚೆರ್ ಹೊ ಬೂಕ್ ಪರ್ಗಟ್ಚ್ಯಾ ಬಾಬ್ತಿನ್  ಮಾಯ್ಫಾಸಾಚೆಂ  ಬ್ಲ್ಯಾಕ್ ಮೇಲ್ ಕೆಲೆಂ ಮ್ಹಣ್ ಸಾಂಗ್ಲೆಂ ಮಾತ್ ನ್ಹಯ್ , ಕವಿತಾ ಫೆಸ್ತಾಚ್ಯಾ ಮಾಂಡಾರ್  ಕೊಂಕ್ಣೆಂತ್ ವಿಮರ್ಸೊ ನಾ, ಆಸ್ಚೆಂ ಫಕತ್ ವಿಡಂಬನ್ ಮಾತ್ ಮ್ಹಳ್ಳೆಂ ತೆಂ ಹಾಂಗಾ ಸಾರ್ಕೆಂ ಕರ್ನ್, ಕೊಂಕ್ಣೆಂತ್ ವಿಮರ್ಸೊ ಜಾಯ್, ಪೂಣ್ ತೊ ವಯಜ್ನಾನಿಕ್ ಆಸೊಂಕ್ ಜಾಯ್ ಮ್ಹಳೆಂ. ವಚನ್ ಸಾಹಿತ್ಯ್ ಚಳ್ವಳ್ ಸಮಾಜೆಂತ್ಲ್ಯಾ ಬೋವ್ ನಿಕೃಶ್ಟ್ ಲೊಕಾಚಿ ಚಳ್ವಳ್ ಮ್ಹಳ್ಳ್ಯಾ ಸ್ಟೀವನಾನ್ ಬಸವಣ್ಣ ಹೆ ಚಳ್ವಳೆಚೊ ಪ್ರಮುಖ್ ಗಾಂಚ್ ಮ್ಹಳೆಂ. ಆನಿ ತಾಚೆ ಥಾವ್ನ್ ಬಳ್ವಂತ್ ಸಮಾಜಿಕ್ ಕ್ರಾಂತಿ ಜಾಲಿ ಮ್ಹಳೆಂ. ವಚನ್ ಸಾಹಿತ್ಯ್ ಶೀದಾ ಜಿಣ್ಯೆ ಅನ್ಭೋಗಾ ಥಾವ್ನ್ ಆಯಿಲ್ಲೆಂ ಸಾಹಿತ್, ವಿರಾರಾಯೆನ್, ತಡ್ವುಂಕ್ ತಾಂಕಾನಾಸ್ತಾನಾ ಬರಯಿಲ್ಲೆಂ ಸಾಹಿತ್ ದೆಕುನ್ ತೆಂ ಜಿಣ್ಯೆಕ್ ಅರ್ಸೊ ಧರ್ತಾ ಮ್ಹಣ್ ಯೀ ಸ್ಟೀವನ್ ಮ್ಹಣಾಲೊ.

ಪೆಟುಲಾಂತ್ಲೆಂ ಬೂಕ್ ಕಾಡ್ನ್ ಬಾ. ಪ್ರಶಾಂತ್ ಮಾಡ್ತಾನ್ ಬೂಕ್ ಲೊಕಾರ್ಪಣ್ ಕೆಲೆ.  ಬೂಕ್ ಮೊಕ್ಳೀಕ್ ಜಾಲ್ಲೆಂಚ್ ರಾಘವೇಂದ್ರ ರಾವ್ ಹಾಂಣಿ ಬಿ. ಸರೋಜಾದೇವಿಚೊ ಉಡಾಸ್ ಕಾಡ್ನ್ ದೋನ್ ವಚನಾಂ ಗಾಯ್ಲಿಂ.

ಉಪ್ರಾಂತ್ ಬಾ. ಪ್ರಶಾಂತ್ ಮಾಡ್ತಾ ಉಲಯ್ಲೆ. "1994 -ತ್  ಹಾಂವ್  ಸಾಂ. ಲುವಿಸ್ ಕೊಲೆಜಿಂತ್ ಆಸ್ತಾನಾ ಶಾಳೆಂತ್ ಕೊಂಕ್ಣಿ ಹಾಡ್ಚೆಂ ಕಾಮ್ ಕೆಲ್ಲೆಂ. ಯುನಿನರ್ಸಿಟಿಕ್ ಬರವ್ನ್ ತಾಂಚಿ ಪರ್ವಣ್ಗಿ ಘೆವ್ನ್ ಡಿಗ್ರಿ ಶಿಕ್ಪಾಂತ್  ಕೊಂಕ್ಣಿ ಹಾಡಲ್ಲಿ. ಆನಿ ತವಳಚ್ ವಚನಾಂ ತಸಲೆಂ ಸಾಹಿತ್ ಕೊಂಕ್ಣೆಕ್ ಯೇಜೆ ಮ್ಹಣ್ ಮ್ಹಾಕಾ ಆಶಾ ಆಸ್ಲಿ ಆನಿ ಆತಾಂ ಮ್ಹಜೊ ಈಶ್ಟ್ ಆನಿ ವಿದ್ಯಾರ್ಥಿ ಸ್ಟೀವನಾನ್ ತೆಂ ಕಾಮ್ ಕೆಲಾಂ. ಫಕತ್ ಸಾತ್ ಮ್ಹಯ್ನ್ಯಾಂನಿ ತಾಣೆಂ ಕೆಲ್ಲೆಂ ಕಾಮ್ ಹೊಗ್ಳಿಕೆಚೆಂ ವ್ಹಯ್ ತರೀ ಖಂಯಗೀ ‘ದಡ ಬಡ’ ಆಮ್ಸೊರಾಚೆಂ ದಿಸ್ತಾ. ತರ್ಜಣ್ ಮ್ಹಳ್ಯಾರ್ ತೆಂ ಡಿಕ್ಶನರಿ ಬಗ್ಲೆಕ್ ಘೆವ್ನ್ ಬಸೊನ್ ಇನ್ ಸ್ಟಂಟ್ ಕರ್ಚೆಂ ಕಾಮ್ ನ್ಹಯ್. ಉಣ್ಯಾರ್ ಉಣೆಂ ಏಕ್ ವಚನ ಘೆವ್ನ್ ಹಫ್ತೊ, ಪಂದ್ರಾ ದೀಸ್ ತರೀ ತಪಸ್ಸಾಕ್ ಬಸಜೆ.  ಎಕಾ ಸಬ್ದಾಕ್ ಮೊಸ್ತು ಅರ್ಥ್ ಆಸ್ತಾತ್ ಆನಿ ಖಂಯ್ಚ್ಯಾ ಸಮಾಜಿಕ್ ಸಂದರ್ಭಾರ್ ಅಮ್ಕೊ ಸಬ್ದ್ ವಾಪರ್ಲಾ ತೆಂ ಸಮ್ಜಾಜೆ. ತರ್ಜಣಾಂತ್ ಸಬ್ದಾಂಚೊ ಉಪೆಗ್ ಕರ್ತಾನಾ ಮೊಸ್ತು ಜಾಗ್ರುತ್ ಕಾಯ್ ಸಾಂಬಾಳಿಜೆ. ತರ್ಜಣ್ ಕೆದಾಳಾಯೀ ಇಡಿಯೊಮ್ಯಾಟಿಕ್ ( ನುಡಿಗಟ್ಟು )   ಜಾಯ್ಜೆ ಶಿವಾಯ್ ಡಿಕ್ಶನರಿಂತ್ ಸಬ್ದ್ ಪಳೆವ್ನ್ ಜಾಂವ್ಕ್ ನಜೊ. ತರ್ಜಣ್ ಕನ್ನಡಾಚ್ಯಾ ನುಡಿಗಟ್ಟು ಥಾವ್ನ್ ಕೊಂಕ್ಣಿ ನುಡಿಗಟ್ಟು ಕ್ ಯೇಜೆ."

12 ವ್ಯಾ ಶೆಕ್ಡ್ಯಾಂತ್ ಕಸಲಿ ಸಮಾಜಿಕ್ ಪರಿಗತ್ ಆಸ್ಲಿ ಮ್ಹಣ್  ಪಾರ್ಕಿಲ್ಯಾರ್, ತವಳ್ ಆಸಲ್ಲೆಂ ಫಕತ್ ರಾಯ್ ಸಾಹಿತ್ಯ್. ಆನಿ ತಾಚೊ ಹೇತು ಮ್ಹಳ್ಯಾರ್ ಜಾಯ್ರಾತ್.  ಜಾಯ್ರಾತ್ ಕೊಣಾಚೆಂ? ಆನಿ ಕಿತ್ಯಾಕ್? ಮ್ಹಳ್ಯಾರ್, ರಾಯಾಕ್ ಸಯ್ನಾಕ್ ಸೊಜೆರ್ ಜಾಯ್ ಪಡ್ಟಾಲೆ ದೆಕುನ್ ಕವಿಂಚ್ಯಾ ಹರ್ ಮ್ಹಾಕಾವ್ಯಾಂನಿ ರಾಯ್ ಶೂರ್ ಅರ್ಜುನ ಜಾತಾಲೊ. ಆನಿ ಹೆಂ ಜಾಯ್ರಾತ್ ಕಾವ್ಯೆಂ ವಾಚುನ್ ತರ್ನಾಟೆ ಸಯ್ನಾಂತ್ ಭರ್ತಿ ಜಾತಾಲೆ ಆನಿ ರಾಯಾಚಿ ರಾಜ್ವಟ್ಕಿ ಉರ್ತಾಲಿ. ಉಪ್ರಾಂತ್ ಜಾಲೆಂ ಕಿತೆಂಗೀ ಮ್ಹಳ್ಯಾರ್ ರಾಯ್ ಭಕ್ತೆ ಥಾವ್ನ್ ಶಿವಭಕ್ತಿ ಅಯ್ಲಿ.  ಜನಪದ ಸಾಹಿತ್ಯಾಂತ್ ಸಯ್ತ್ "ಶಿವನು ಭಿಕ್ಶೆಗೆ ಬಂದ , ನೀಡು ಬಾರೆ ತಾಯೆ"  ತಸಲ್ಯೊ ಅದ್ಭುತ್ ವೊಳಿ ಆಯ್ಲ್ಯೊ. ವಚನ ಸಾಹಿತ್ಯಾಂತ್ ಹೆಂ ಅನಿಕೀ ಮುಕಾರ್ ವಚೊನ್ ಸ್ಥಾವರ ಥಾವ್ನ್ ಜಂಗಮಾಕ್ ಆಯ್ಲೆಂ. ಮ್ಹಳ್ಯಾರ್ ಸಮಾಜೆಂತ್ ಜಿ ಏಕ್ ಕೃತಕ್ ಅಸ್ಮಿತಾಯ್ ಆಸ್ಲಿ ತಿ ಸಯ್ತ್ ‘ಡಿಕನ್‌ಸ್ಟ್ರಕ್ಟ್’ ಜಾಂವ್ಚಿ ದಿಸೊನ್ ಯೆತಾ. "

ಪೂಣ್ ಬೆಜಾರಾಯೆಜಿ ಗಜಾಲ್ ಮ್ಹಳ್ಯಾರ್ ಕೊಂಕಣಿ ಕಿರಿಸ್ತಾಂವ್ ಮಾತ್ ತ್ಯಾಚ್ ವಸಾಹತು ಶಾಹಿ ಮ್ಹಳ್ಳ್ಯಾ ರಾಯ್ ಭಕ್ತೆಚ್ಯಾ ಕಾಳಾಂತ್ ಆಸಾತ್.  ಕಿತ್ಯಾಕ್ ಮ್ಹಳ್ಯಾರ್ ಆತಾಂಯೀ ತಾಂಚೊ ಹರ್ ದೀಸ್ "ಪಾತ್ಕಿ ಕುಳಿ ದಿಂಬಿ ಮಾರುನ್ ...."  ಹಾಂಗಾ ಥಾವ್ನ್ ಸುರು ಜಾತಾ. ಅಸಲ್ಯಾ ಗುಲಾಮಿ ಚಿಂತ್ಪಾ ಥಾವ್ನ್ ತೆ ಭಾಯ್ರ್ ಯೇನಾಂತ್ ದೆಕುನ್ ತೆ ಧಯ್ರಾನ್ ಏಕ್ ಬಿಜ್ನೆಸ್ ಕರುಂಕ್ ಸಕನಾಂತ್. ಪೂಣ್ ತೊಚ್ ಹಿಂದೂ ಲೋಕ್ ಸದಾಂ ಸಕಾಳಿಂ ಉಟುನ್ ಗಾಯತ್ರಿ ಮಂತ್ರ ಮ್ಹಣ್ಟಾನಾ ಸುರ್ಯಾ ದೆವಾಕಡೆ ಸಕತ್ ಮಾಗ್ತಾ. ಕಿರಿಸ್ತಾಂವಾಂಕ್ ಸಾಂತ್, ಸಾಂಗಾತಿ ನ್ಹಯ್, ತಾಂಚ್ಯಾಯೀ ಚರಣಿ ತೆ ಸರ್ಪಡ್ಟಾತ್, ತೇಂಯಿ ಹಾಂಗಾಚ್ಯಾ ನ್ಹಯ್, ಇಟೆಲಿಚ್ಯಾ. "

ವಚನ ಸಾಹಿತ್ಯಾ ವರ್ವಿಂ ಜಾಲ್ಲೆಂ ಕಿತೆಂ ಮ್ಹಳ್ಯಾರ್ ರಾಯ್ ಆನಿ ತಾಚಿ ರಾಜ್ವಟ್ಕಿ ವಚೊನ್ ಮನ್ಶಾಚೆಂ ಖಾಶೆಲೆಂ ಪಣ್ ಆನಿ ಖಾಸ್ಗಿ ಐಡೆಂಟಿಟಿ ಆಯ್ಲಿ. ಸಾಹಿತ್ ಶೃತಿ ಥಾವ್ನ್ ಸ್ಮ್ರತಿ ಥಾವ್ನ್ ಮ್ಹಾಕಾ ಕಿತೆಂ ಭೊಗ್ತಾ ತೆಂ ಸಾಂಗ್ಚೆಂ ಜಾಲೆಂ. heard ಥಾವ್ನ್ remembered ಥಾವ್ನ್ what is said here and now."

ದೆಕುನ್ ವಚನ್ ಸಾಹಿತ್ಯ್ ಮ್ಹಳ್ಯಾರ್ ಭಜನೆ ಮಾತ್ ನ್ಹಯ್. ತಾಂತು ಕಿತ್ಲೆ ಭಕ್ತ್ ಆಸಾ ತಿತ್ಲಿಂಚ್ ಭೊಗ್ಣಾಂಯೀ ಆಸಾತ್. "

ಉಪ್ರಾಂತ್ ಉಲಯಿಲ್ಲ್ಯಾ ಕೊಂಕ್ಣಿ ಪ್ರಚಾರ್ ಸಂಚಾಲನಾಚೊ ಅಧ್ಯಕ್ಶ್ ರೊಯ್ ಕಾಸ್ತೆಲಿನೋನ್ ಕೊಂಕ್ಣೆಚಿ ವಿಸ್ತಾರಾಯ್ ಮೆಜೂಂಕ್ ಘೆತ್ಲಿ ಆನಿ ಮ್ಹಳೆಂ " ಸಮಗ್ರ್ ಕೊಂಕ್ಣೆಚೊ ಪ್ರಚಾರ್, ಪ್ರಚಾರ್ ಸಂಚಾಲನಾಚೊ ಮುಕೆಲ್ ಧ್ಯೇಯ್. ಅಸಲ್ಯಾ ಕಾರ್ಯಾಂನಿ ಫಕತ್ ಏಕ್ ಪಂಗಡ್ ಮಾತ್ ದಿಸ್ತಾ ಸೊಡ್ಲ್ಯಾರ್ ಹೆರ್ ಪಂಗ್ಡಾಂಚೆ ದಿಸನಾಂತ್.  ಹಿ ಕೊಂಕ್ಣೆ ಬಾಬ್ತಿನ್ ಬೋವ್ ಬೆಜಾರಾಯಿಚಿ ಗಜಾಲ್.  ಕೊಂಕ್ಣಿ ಪಾಂಚ್ ಲಿಪಿಂನಿ ಬರಯ್ತಾತ್. ಕರ್ನಾಟಕಾಂತಚ್ ಕೊಂಕ್ಣೆಚೆ 42 ಸಮುದಾಯ್ ಆಸಾತ್. ಆಮಿ ಅನಿಕೀ ಕಿತ್ಯಾಕ್ ಬಾಂಯ್ತ್‌ಲೆ ಮಾಣ್ಕೆ ಜಾವ್ನ್ ಉರಜೆ. ಆತಾಂ ವಿಸ್ತಾರ್ ಚಿಂತಪ್ ಆಪ್ಣಾಂವ್ಚೊ ವೇಳ್ ಆಯ್ಲಾ. ಹಾಂವೆ ತರಿ ಠರಾಯ್ಲಾಂ ಕೊಂಕ್ಣೆ ಖಾತಿರ್ ಮ್ಹಾಕಾ ಕೊಣೆಂ ಆಪಯ್ಲ್ಯಾರೀ ವೆತಾಂ. ಪ್ರಚಾರ್ ಸಂಚಾಲನಾನ್ ಚಡ್ ಆನಿ ಚಡ್ ಸಾಹಿತಿಂಚ್ಯಾ  ಲಾಗಿಂ ವಚಜೆ ಮ್ಹಳ್ಯಾ ಉದ್ದೇಶಾನ್ ಹೊ ಬೂಕ್ ಪರ್ಗಟ್ಚೆಂ ಧಯ್ರ್ ಕೆಲೆಂ ಆನಿ ಇತ್ಲೆ ಸಾಹಿತಿ ಜಮ್‌ಲ್ಲೆ ಪಳಯ್ತಾನಾ ಖಂಡಿತೀ ಸಂತೊನ್ ಜಾಲಾ. ಪ್ರಚಾರ್ ಸಂಚಾಲನಾಕ್ ನವೊ ಜೀವ್ ಭರುಂಕ್ ಪನ್ನಾಸ್ ಜಣಾಂಚೆಂ ಏಕ್ ಟೀಮ್ ಜಾಯ್. ಆನಿ ತಾಂತು ಬಾರಾ ಜಣ್ ತರ್ನಾಟೆ, ಬಾರಾ ಜಣ್ ಶಿಕ್ಶಕ್ , ಬಾರಾ ಜಣ್ ಸಾಹಿತಿ ಆನಿ ಬಾರಾ ಜಣ್ ಬಿಜ್ನೆಸ್ ಮ್ಯಾನ್ ಮ್ಹಾಕಾ ಜಾಯ್ಜೆ ಆನಿ ವೆಗಿಂಚ್ ಪ್ರಚಾರ್ ಸಂಚಾಲನಾಚೆಂ ಎ ಜಿ ಎಂ ಆಪವ್ನ್ ಹೆಂ ಟೀಮ್ ಹಾಂವ್ ಬಾಂದ್ತಲೊಂ "

ಕಾರ್ಯೆಂ ಸಂಚಾಲಕ್ ಆನಿ ಕೊಂಕ್ಣಿ ಪ್ರಚಾರ್ ಸಂಚಾಲನಾಚೊ ಕಾರ್ಯಕಾರಿ ಕಾರ್ಯದರ್ಶಿ ವಿತೊರಿ ಕಾರ್ಕೊಳಾನ್ ಉಪ್ಕಾರ್ ಬಾವುಡ್ಲೊ ತರ್ ಶೆಲ್ಡನಾನ್ ಕಾರ್ಯೆಂ ಚಲಯ್ಲೆಂ.    

-ಭಾತ್ಮಿ: ಎಚ್ಚೆಮ್ ಪೆರ್ನಾಲ್ ; ತಸ್ವೀರ್ ಕುರ್ಪಾ: ದಾಯ್ಜಿವರ್ಲ್ಡ್