ಯಶ್ ಚೋಪ್ರಾಚ್ಯಾ ನವ್ಯಾ ಪಿಂತುರಾಕ್ ಗುಲ್ಜಾರಾಚಿಂ ಕವಿತಾಂ

ನಾಂವಾಡ್ದಿಕ್ ಸಿನೆಮಾ ದಿಗ್ದರ್ಶಕ್ ಯಶ್ ಚೋಪ್ರಾನ್ ಸಂಗೀತ್ ವಸ್ತಾದ್ ಎ.ಆರ್.ರೆಹಮಾನಾ ಉಪ್ರಾಂತ್ ಆಪ್ಲ್ಯಾ ನವ್ಯಾ ಸಂಗೀತ್ ಪಿಂತುರಾಕ್ ಉಂಚ್ಲೊ ಕವಿ, ಸಾಹಿತಿ ಗುಲ್ಜಾರಾಕ್ ಕವಿತಾ ಬರೊಂವ್ಕ್ ವಿಂಚ್ಲಾ.

"ಹಾಚೆ ಆದಿಂ ಗುಲ್ಜಾರ್ ಭಾಯಿನ್ ‘ಯಶ್ ರಾಜ್ ಪಿಲ್ಮಾಂನಿ’ ಸಾಂಗಾತಿ ಜಾವ್ನ್ ಸಂಬಂದ್ ಜೊಡ್ಲ್ಯಾರೀ, ಹಾಂವೆಂ ಪಯ್ಲೆ ಪಾವ್ಟಿಂ ತಾಚೆ ಸಾಂಗಾತಾ ವಾವ್ರ್ ಕರ್ಚೊ" ಮ್ಹಣ್ ಜಾಣ್ತೊ ಫಿಲ್ಮ್ ನಿರ್ಮಾಪಕ್ ಯಶ್ ಚೋಪ್ರಾನ್ ಅಧಿಕೃತ್ ಘೋಶಣ್ ಕೆಲಾಂ.

"ಆಪುಣ್ ಗುಲ್ಜಾರಾಚ್ಯಾ ಕವಿತೆಂಚೊ ಪ್ರೇಮಿ. ತಾಂಚೆ ಥಾವ್ನ್ ಉಂಚ್ಲಿ ಕವಿತಾ ಹಾಂವ್ ಆಶೆತಾಂ. ಪ್ರಶಸ್ತಿ ವಿಜೇತ್ ಜೊಡಿ ಎ.ಆರ್.ರಹಮಾನ್ ಆನಿ ಗುಲ್ಜಾರಾ ಥಾವ್ನ್ ಸುಮಧುರ್, ಅರ್ಥಾಭರಿತ್ ಸಂಗೀತ್ ಉದೆತಾ ಜಾಲ್ಲ್ಯಾನ್, ತಾಂಚೆ ಸಂಗಿಂ ವಾವ್ರ್ ಕರ್ಚೆಂ ಮ್ಹಜೆ ಭಾಗ್" ಮ್ಹಣ್ ಸಾತ್ ವರ್ಸಾಂ ಉಪ್ರಾಂತ್ ಆತಾಂ ನವೆಂ ಪಿಂತುರ್ ದಿಗ್ದರ್ಶನಾಕ್ ಮುಕಾರ್ ಆಯಿಲ್ಲ್ಯಾ ಚೋಪ್ರಾನ್ ಸಾಂಗ್ಲೆಂ.

2009 ಇಸ್ವೆಂತ್ ಡ್ಯಾನಿ ಬೊಯ್ಲೆಚೆಂ ‘ಸ್ಲಮ್ ಡೊಗ್ ಮಿಲಿಯನೆರ್’ ಪಿಂತುರಾನ್ ರಹಮಾನ್ ಆನಿ ಗುಲ್ಜಾರಾಚ್ಯಾ ಸಂಗೀತ್ ಗೀತ್ ‘ಜೈ ಹೊ’ಕ್ ಓಸ್ಕರ್ ಪ್ರಶಸ್ತಿ ಲಾಭಯಿಲ್ಲಿ.

ಚೋಪ್ರಾಚ್ಯಾ ಪಿಂತುರಾಂನಿ ಕಾಮ್ ಕರ್ಚ್ಯಾಕ್ ಗುಲ್ಜಾರ್ ಉಮೆದಿನ್ ಭರ್ಲಾ. ‘ಸಿಲ್ ಸಿಲಾ’, ‘ಚಾಂದನಿ’, ‘ಲಮೆ’, ‘ದಿಲ್ ತೊ ಪಾಗಲ್ ಹೇ’ ಆನಿ ‘ವೀರ್ ಝಾರಾ’ ಪಿಂತುರಾಂ ಗುಲ್ಜಾರಾಚ್ಯಾ ಕಾವ್ಯಾಳ್ ಪದಾಂನಿ ಚೋಪ್ರಾಚ್ಯಾ ದಿಗ್ದರ್ಶನಾಂತ್ ಲೊಕಾಮೊಗಾಳ್ ಜಾಲ್ಯಾಂತ್.

"ಮ್ಹಜಿ ಕವಿತಾ ಯಶ್ ಜಿ ಸಮ್ಜೊನ್ ಕಾಣ್ಗೆವ್ನ್ ತಿಂ ಮೊಗಾ ಪದಾಂನಿ ಗಾಳುನ್ ಸಂಗೀತಾ ಮಾರಿಫಾತ್ ಆಪ್ಲ್ಯಾ ಪಿಂತುರಾಂನಿ ಜೀವ್ ಭರ್ತಾ. ಎಕಾ ಥರಾಚೊ ಉದ್ವೇಗ್ ಆನಿ ಅತುರಾಯ್ ತಾಂಚೆ ಸಂಗಿಂ ಕಾಮ್ ಕರ್ಚ್ಯಾಂತ್ " ಮ್ಹಣಾಲೊ ಗುಲ್ಜಾರ್.

ಗುಲ್ಜಾರಾಚಿ ಆದ್ಲಿಂ ಲೊಕಾಮೊಗಾಳ್ ಆನಿ ಅರ್ಥಾಭರಿತ್ ಕವಿತಾಂ/ಪದಾಂ ‘ತುಜ್ ಸೇ ನಾರಾಜ್ ನಹೀಂ ಜಿಂದಗಿ’ ‘ಆನೆವಾಲಾ ಪಲ್’ ನ್ಹಯ್ ಆಸ್ತಾಂ, ಆಯ್ಲೆವಾರ್‍ಚಿಂ ಜಿವಾಳ್ ಪದಾಂ ‘ದಿಲ್ ತೊ ಬಚ್ಚಾ ಹೆ ಜಿ’ ಆನಿ ‘ಡಾರ್ಲಿಂಗ್’ ಆಜೂನ್ ಲೊಕಾ ತೊಂಡಾರ್ ಘೊಳ್ತಾತ್.

-ವಿನ್ಸಿ ಪಿಂಟೊ, ಆಂಜೆಲೊರ್