ಪ್ರಕಾಶ್ ಪರಿಯೆಂಕಾರ್ ಹಾಂಚೆ ಕವಿತಾ ಪುಸ್ತಕ್ ‘ಆಮ್ಚೆ ಆಮಿ’ ಮೊಕ್ಳೀಕ್

‘ಆಮ್ಚೆ ಆಮಿ’ ಹ್ಯಾ ಕಾವ್ಯ್ ಸಂಗ್ರಹಾಚ್ಯಾ ರುಪಾಂತ್ ಪ್ರಕಾಶ್ ಪರ್ಯೆಂಕಾರ್ ಹಾಣಿ ಗ್ರಾಮೀಣ್ ಸಂವೇದನಾ ಆಶಿಲ್ಲಿ, ಆಶಯ್ ಆನಿ ವಿಶಯಾಂಚೆ ನದ್ರೆನ್ ಕೊಂಕ್ಣಿ ಸಾಹಿತ್ಯಾಂತ್ ವೆಗ್ಳಿ ಕವಿತಾ ದಿಲ್ಯಾ. ಸತ್ತರಿ ವಠಾರಾತ್ಲ್ಯಾ ಹ್ಯಾ ಕವೀನ್ ಮನೀಸ್ ಆನಿ ಸೈಮ್ ಸಂವೇದನಾ ಆಪ್ಲೆ ಬೊಲಿ ಭಾಶೆಂತ್ ಮಾಂಡುನ್ ಭಾಶೀಕ್ ಗಿರೆಸ್ತಕಾಯ್ ಕೊಂಕಣಿಚ್ಯಾ ಮೂಳ್ ಪ್ರವಾಹಾಂತ್ ಹಾಡುನ್ ಸೊಡ್ಲ್ಯಾ ಅಶೆಂ ಸಾಂಗುನ್ ತಾಂಚ್ಯಾ ‘ಮ್ಹಾದಯ್ ಕಾಳ್ಜಾಂತ್ಲ್ಯಾನ್ ಕಾಗ್ದಾರ್...’ ಹ್ಯಾ ಪುಸ್ತಕಾಚಿ ಫಾವ್ ತಿ ದಾಖಲ್ ಕೊಂಕ್ಣಿ ಸಾಹಿತ್ಯ್ ಮಳಾರ್ ಜಾಂವ್ಕ್ ನಾ ಮ್ಹಣ್ಪಾಚಿ ಖಂತ್ ಕೊಂಕ್ಣಿಚೆ ಜ್ಯೇಶ್ಟ್ ಕವಿ ನಾಗೇಶ್ ಕರ್ಮಲಿ ಹಾಂಣಿ ವ್ಯಕ್ತ್ ಕೆಲ್ಯಾ.

‘ಶಾಲ್ಮಲಿ ಕ್ರಿಯೇಶನ್ಸ್’ ಹೆ ಪ್ರಕಾಶನ್ ಸಂಸ್ಥೆನ್, ಹ್ಯಾಚ್ ಸಪ್ಟೆಂಬರ್ 22 ತಾರಿಕೆರ್, ಗೊಂಯ್ಚ್ಯಾ ಸತ್ತರಿಂತ್, ಆಯೊಜೀತ್ ಕೆಲ್ಲ್ಯಾ ಪುಸ್ತಕ್ ಲೊಕಾರ್ಪಣ್ ಸುವಾಳ್ಯಾಕ್ ತೆ ಅಧ್ಯಕ್ಷ್ ಹ್ಯಾ ನಾತ್ಯಾನ್ ಉಲಯ್ತಾಲೆ. ಪ್ರಕಾಶ್ ಪರ್ಯೆಂಕಾರ್ ಹಾಂಚೆಂ ‘ಆಮ್ಚೆ ಆಮಿ’ ಆನಿ ಡೊ. ಅರ್ಚನಾ ಗಾಂವ್ಕಾರ್ ಹಾಂಚೆಂ ‘ದುಯೆಂಸಾಂ ಆನಿ ಆಯುರ್ವೆದೀಕ್ ಉಪಚಾರ್’ ತಶೆಂಚ್ ‘110 ವಖ್ದಿ ವನಸ್ಪತಿ’ ಹ್ಯಾ ಪುಸ್ತಕಾಚ್ಯಾ ದುಸ್ರ್ಯಾ ಆವೃತ್ತೀಚೆಂ ಹ್ಯಾ ವೆಳಾರ್ ಉಜ್ವಾಡಾವಣಿ ಜಾಲಿ. ವನ್‌ಪ್ರಶಿಕ್ಷಣ್ ವಿದ್ಯಾಲಯ್, ವಾಳ್ಪಯ್, ಸತ್ತರಿ ಹಾಂಗಾ ಘಡೊವ್ನ್ ಹಾಡಿಲ್ಲೆ ಹೆ ಕಾರ್ಯಾವಳೀಕ್ ಮುಖೆಲ್ ಸೊಯ್ರೆ ಮ್ಹಣ್ ದಾಮೋದರ್ ಮಾವ್ಜೊ, ಮಾನಾಚಿ ಸೊಯ್ರಿ ಹ್ಯಾ ನಾತ್ಯಾನ್ ಪ್ರಿಯದರ್ಷಿನಿ ತಡ್ಕೊಡಕಾರ್ ತಶೆಂಚ್ ಪುಸ್ತಕಾಚೆರ್ ಉಲೊವ್ಪಿ ಡೊ. ರಾಜಯ್ ಪವಾರ್ ಆನಿ ಅಮಿತಾ ನಾಯ್ಕ್ ಸಲ್ತ್ರಿ ಉಪಸ್ಥಿತ್ ಆಶಿಲ್ಲಿ.

ಸಮೀರ್ ಪ್ರಭು ಹಾಂಚ್ಯಾ ಬಾಂಸುರಿ ವಾದನಾನ್ ಹೆ ಕಾರ್ಯಾವಳೀಕ್ ಸುರ್ವಾತ್ ಜಾಲೆ ಉಪ್ರಾಂತ್ ದೀಪ್ ಪ್ರಜ್ವಲನ್ ಜಾಲೆಂ. ಗೊಪೀನಾಥ್ ಗಾಂವಸ್ ಹಾಣೆಂ ಯೆವ್ಕಾರ್ ಆನಿ ಪ್ರಾಸ್ತಾವೀಕ್ ಉಲೊವ್ಪ್ ಕೆಲೆಂ. ಕು. ಶಾಲ್ಮಲಿ ಪರ್ಯೆಂಕಾರ್, ವೃಂದಾ ಗಾವ್ಡೆ, ಅಂಬಾಇ ಪರ್ಯೆಂಕಾರ್ ಆನಿ ವಿಜೆಶ್ ಗಾವ್ಡೆ ಹಾಂಚ್ಯಾಂನಿ ಮಾನೆಸ್ತಾಂಕ್ ಕಾಂಟೆಕುವರ್ ಭೆಟೊವ್ನ್ ಯೆವ್ಕಾರ್ ದಿಲೊ ಜಾಲ್ಯಾರ್ ಮಾನೆಸ್ತಾಂಚಿ ವಳಖ್ ನಮನ್ ಸಾವಂತ್ ಧಾವಸ್ಕಾರ್ ಹಾಂಣಿ ಕೆಲಿ.

‘ಆಮ್ಚೆ ಆಮಿ’ ಹ್ಯಾ ಪುಸ್ತಕಾಂತ್ ಕವೀನ್ ಮನೀಸ್, ಸಮಾಜ್ ಆನಿ ಸೈಮಾಚಿಂ ವಿವಿಧ್ ರುಪಾಂ ಚಿತ್ರಾಯಿಲ್ಲ್ಯಾನ್ ಕೊಂಕ್ಣಿ ಕವಿತಾ ಆತಾಂ ಸಮಾಜಾಭಿಮುಖ್ ಜಾವಪಾಕ್ ಲಾಗ್ಲ್ಯಾ ಅಶೆಂ ಮತ್ ಡೊ. ರಾಜಯ್ ಪವಾರ್ ಹಾಣೆಂ ಮಾಂಡ್ಲೆಂ. ‘ದುಯೆಂಸಾಂ ಆನಿ ಆಯುರ್ವೆದೀಕ್ ಉಪಚಾರ್’ ಹ್ಯಾ ಪುಸ್ತಕಾಂಕ್ 55 ವೆವೆಗ್ಳ್ಯಾ ದುಯೆಂಸಾಂಚೆರ್ ಲೆಖೀಕೆನ್ ಭಾಶ್ಯ್ ಕೆಲ್ಲ್ಯಾನ್ ತೆಂ ಪುಸ್ತಕ್ ಸರ್ವಸಾಮಾನ್ಯ್ ಲೊಕಾಂಚ್ಯಾ ಹಾತಾಂತ್ ಪಾವ್ಲೆಂ ಜಾಲ್ಯಾರ್ ಜಣ್ ಎಕ್ಲ್ಯಾಕ್ ನಿರೋಗಿ ಜಾವ್ನ್ ಜಿಯೆವ್ಪಾಚೊ ಮಂತ್ರ್ ಫಾವ್ ಜಾತ್ಲೊ ಅಶೆಂ ಅಮಿತಾ ಸಲ್ತ್ರೀನ್ ಸಾಂಗ್ಲೆಂ.

ಸಮೀರ್ ಪ್ರಭು ಆನಿ ತಾಚ್ಯಾ ಸಾಂಗಾತ್ಯಾನಿ ‘ಆಮ್ಚೆ ಆಮಿ’ ಹೆಂ ಗೀತ್ ಸಾದರ್ ಕೆಲೆಂ. ಗಣೇಶ್ ಪರ್ಯೆಂಕಾರ್ ಹಾಂಣಿ ಮಾನೆಸ್ತಾಂಕ್ ಕೆಳ್ಯಾಂಚೆ ಘಡ್ ಭೆಟಯ್ಲೆ ಜಾಲ್ಯಾರ್ ಅವಿತಾ ಗಾಂವಸ್ ಹಾಂಣಿ ಸಗ್ಳ್ಯಾಂಚೆ ಉಪ್ಕಾರ್ ಮಾನ್ಲೆ. ಪುರಾಯ್ ಕಾರ್ಯಾವಳಿಚೆಂ ಸೂತ್ರನಿವೇದನ್ ಕಾಶಿನಾಥ್ ನಾಯ್ಕ್ ಹಾಂಣಿ ಕೆಲೆಂ. ಹಿ ಕಾರ್ಯಾವಳ್ ಯಶಸ್ವಿ ಕರ್ಚೆಖಾತೀರ್ ಪ್ರದೀಪ್ ಗಂವ್ಡಳಕಾರ್, ಚಂದನ್ ಗಾಂವಸ ಆನಿ ಹೆರಾಂನಿ ಬರೆಚ್ ಕಶ್ಟ್ ಘೆತ್ಲೆ.