ಕವಿತಾ ಮ್ಹಳ್ಯಾರ್ ಸೊಧ್: ಕವಿಸಂಧಿ ಕಾರ್ಯಾವಳಿಂತ್ ನೂತನ್ ಸಾಖರ್‌ದಾಂಡೆ

ಕವಿತಾ ಮ್ಹಳ್ಯಾರ್ ಸೊಧ್: ಕವಿಸಂಧಿ ಕಾರ್ಯಾವಳಿಂತ್ ನೂತನ್ ಸಾಖರ್‌ದಾಂಡೆ

ಕವಿತಾ ಮ್ಹಳ್ಯಾರ್ ಸೊಧ್. ಹೊ ಸೊಧ್ ಆಪ್ಲೊ ವ ದುಸ್ರ್ಯಾಚೊ ಆಸುಂಯೆತಾ. ಹಾಂವೆಂ ಜಿಣ್ಯೆಂತ್ ಜೆ ಅನ್ಭೋಗ್ ಆಯ್ಲೆ, ತಾಚೆ ಸ್ವತಾಕಡೆನ್ ಸಂವಾದ್ ಚಲೊಂವ್ಚಿ ಕಲಾ ಶಿಕ್ಲಿ ಆನಿ ತಾಂತುಂತ್ಲ್ಯಾನ್ ಸೃಜನ್‌ಶೀಳ್ ಕವಿತಾ ತಯಾರ್ ಜಾವ್ಪಾಕ್ ಲಾಗ್ಲ್ಯೊ ಅಶೆಂ ನಾಮ್ಣೆಚಿ ಕೊಂಕಣಿ ಕವಯಿತ್ರಿ ನೂತನ್ ಸಾಖರ್‌ದಾಂಡೆ ಹಾಂಣಿ ಹ್ಯಾಚ್ ಒಕ್ಟೋಬರ್ 18 ತಾರಿಕೆರ್ ಸಾಂಗ್ಲೆಂ.

ಸಾಹಿತ್ಯ್ ಅಕಾಡೆಮಿನ್ ಗೊಂಯ್ ಸರ್ಕಾರಾಚ್ಯಾ ಕಲಾ ಆನಿ ಸಂಸ್ಕೃತಿ ಸಂಚಾಲನಯಾಚ್ಯಾ ಪಾಲ್ವಾನ್ ಆಯೋಜಿತ್ ಕೆಲ್ಲೆ ‘ಕವಿಸಂಧಿ’ ಹೆ ಕಾರ್ಯಾವಳಿಂತ್ ಶ್ರೀಮತಿ ಸಾಖರ್‌ದಾಂಡೆ ಆಪ್ಲ್ಯಾ ಕವಿತಾ ವಾಚನಾ ಸಾಂಗಾತಾ ಕವಿತಾ ರಚ್ಪಾಚೆ ಪ್ರಕ್ರಿಯೆಚೆರ್ ವಿಚಾರ್ ಮಾಂಡ್ತಾಲಿ. ಸಂಸ್ಕೃತಿ ಭವನಾಂತ್ ಹಿ ಕಾರ್ಯಾವಳ್ ಜಾಲಿ.

ಲ್ಹಾನ್‌ಪಣಾ ಥಾವ್ನ್ ಆತಾಂ ಪಾಸುನ್ ಜಿಣ್ಯೆಂತ್ ಜೆ ಅನ್ಭೋಗ್ ಆಯ್ಲ್ಯಾತ್ ತಾಂತುಂತ್ಲ್ಯಾನ್ ಕವಿತಾ ಕಶ್ಯೊ ತಯಾರ್ ಜಾಲ್ಯೊ ಹಾಚೆರ್ ನೂತನ್ ಸಾಖರ್‌ದಾಂಡೆ ಹಾಂಣಿ ಆಪ್ಲೆಂ ಮನ್ ಉಗ್ತೆಂ ಕೆಲೆಂ.

ಧಾ ಮ್ಹಯ್ನ್ಯಾಂಚೆಂ ಆಸ್ತಾನಾ ಆವಯ್ ಸಂವ್ಸಾರಾಕ್ ಅಂತರ‍್ಲಿ ಆನಿ ಆಟ್ ವರ್ಸಾಂಚೆಂ ಆಸ್ತಾನಾ ಬಾಪುಯ್ ಭಾಯ್ರ್ ಪಡ್ಲೊ. ತಾಕಾ ಲಾಗುನ್ ಜಶೆಂ ವಾಡತ್ ಗೆಲೆಂ ತಶೆಂ ಜಿಣ್ಯೆಂತ್ ರಿತೆಂಪಣ್ ದಿಸೊಂಕ್ ಲಾಗ್ಲೆಂ. ಲ್ಹಾನ್ ಪಿರಾಯೆರ್ ಹೆ ಆಘಾತ್ ಜಾಲ್ಲ್ಯಾನ್ ಮನಾಂತ್ ಖರ್ ಭಾವನಾ ತಯಾರ್ ಜಾಲಿ. ತಾಂತುಂತ್ಲ್ಯಾನ್ ಆವಯ್-ಬಾಪಾಯ್ಚೆಂ ನಾಂವ್ ವ್ಹಡ್ ಕರುಂಕ್ ದೊತೊರ್ ಜಾವ್ಪಾಚೆಂ ಥಾರಾಯ್ಲೆಂ. ಮಾತ್ ವಾಡತ್ ಗೆಲೆಂ ತೆಂ ಪ್ರಮಾಣ್ ವಿಚಾರ್ ಬದಲ್ಲೊ. ವಾಟ್ ಬದಲ್ಲಿ. ಪ್ರತಿಭೆಚಿ ಕೀಟ್ ಪೆಟುಂಕ್ ಲಾಗ್ಲಿ. ವಾಚನಾಚೆಂ ಲ್ಹಾನ್‌ಪಣಾಥಾವ್ನ್ ಪಿಶೆಂ ಆಶಿಲ್ಲೆಂ. ತಾಂತುಂತ್ಲ್ಯಾನ್ ಕವಿತೆಚೊ ಪ್ರವಾಸ್ ಸುರು ಜಾಲೊ. ದೊತೊರ್ ಮನೋಹರ್‌ರಾಯ್ ಸರ್ದೇಸಾಯ್ ಹಾಂಚೆಂ ‘ಜಾಯಾತ್ ಜಾಗೆ’ ಹೆಂ ಪಯ್ಲೆಂ ಕೊಂಕಣಿ ಪುಸ್ತಕ್ ವಾಚ್ಲೆಂ. ಏಕ್ ದೀಸ್ ‘ಮ್ಹಣ್ಟಾ ಮ್ಹಾಕಾ’ ಹಿ ಪಯ್ಲಿ ಕವಿತಾ ತ್ಯಾ ವೆಳಾರ್ ಆಯ್ತಾರ್ ಕೊಂಕಣಿಂತ್ಲ್ಯಾನ್ ಉಜ್ವಾಡಾಕ್ ಯೆವ್ಪಿ ‘ರಾಷ್ಟ್ರಮತ್’ಚೆರ್ ಛಾಪುನ್ ಆಯ್ಲಿ. ಫುಡೆಂ ಪುಂಡಲೀಕ್ ನಾಯ್ಕ್ ಆನಿ ಹೇಮಾ ನಾಯ್ಕ್ ಹಾಂಚೆ ಕಡೆನ್ ನಾತೆಂ ಜುಳ್ಳೆಂ ಆನಿ ತಾಂಣಿ ಮ್ಹಜ್ಯಾ ಆತ್ಮವಿಸ್ವಾಸಾಕ್ ಉರ್ಬಾ ದಿಲಿ ಅಶೆಂ ಶ್ರೀಮತಿ ಸಾಖರ್‌ದಾಂಡೆ ಹಾಂಣಿ ಸಾಂಗ್ಲೆಂ.

ಕೊಂಕಣಿ ಕವಯಿತ್ರಿಂಚೆಂ ಸಂಘಟನ್; ಕೊಂಕಣಿ ಚಳುವಳ್ ಆನಿ ಹೆರ್ ಸಬಾರ್ ಸಾಹಿತ್ಯಿಕ್ ಕಾರ್ಯಾವಳಿಂನಿ ಉಪ್ರಾಂತ್ ವಾಂಟೆಕಾರ್ ಜಾವ್ಪಾಚಿ ಸಂಧ್ ಮೆಳ್ಳಿ. ಅರುಣ್ ಸಾಖರ್‌ದಾಂಡೆಚ್ಯಾ ರುಪಾಂತ್ ಕೊಂಕಣಿಚೊ ಮೋಗ್ ಆನಿ ಸಾಹಿತ್ಯಾಚಿ ಆವಡ್ ಆಶಿಲ್ಲೊ ಜಿಣ್ಯೆಚೊ ಸಾಥಿದಾರ್ ಮೆಳ್ಳೊ. ಜಿಣ್ಯೆಚ್ಯಾ ದರೆಕಾ ಪಾಂವ್ಡ್ಯಾರ್ ಜೆ ಜೆ ಅನ್ಭೋಗ್ ಆಯ್ಲೆ ತ್ಯಾ ವಿಶಯಾಚೆರ್ ಕವಿತಾ ಬರೊವ್ಪ್ ಜಾಲೆಂ. ಲಗ್ನ್ ಥಾರ‍್ಲೆಂ. ಉಪ್ರಾಂತ್ ಲಗ್ನ್ ಜಾಲೆಂ. ಭುರ್ಗಿಂ ಜಾಲಿಂ. ಭುರ್ಗೆ ನೋಕ್ರೆಕ್ ಭಾಯ್ಲ್ಯಾ ರಾಜ್ಯಾಂನಿ ಗೆಲ್ ಅಶಾ ಪ್ರಸಂಗಾಚೆರ್ ಕವಿತಾ ಕಶ್ಯೊ ತಯಾರೊ ಜಾಲ್ಯೊ ತೆಂ ಸಾಂಗ್ತಾನಾ ತಾಂಣಿ ತ್ಯೊ ತ್ಯೊ ಕವಿತಾ ಸಾದರ್ ಕೆಲ್ಯೊ.

ತ್ಯಾ ಸಮಾಜಾಂತ್ ವಾವುರ‍್ತಾ ತಾಚೆಂ ಆಪೂಣ್ ದೆಣೆಂ ಲಾಗ್ತಾ ಹಿ ಭಾವನಾ ಸದಾಂಚ್ ಮನಾಂತ್ ಆಸಾ. ತಾಕಾ ಲಾಗುನ್ ಸಮಾಜಾಂತ್ ಜ್ಯೊ ವಾಯ್ಟ್ ಪ್ರವೃತ್ತಿ ಯೆತಾಲ್ಯೊ ತ್ಯೊ ಆಡಾವ್ಪ್ ಹಿ ಮ್ಹಜಿ ಲಾಗ್ಣೂಕ್ ಆನಿ ಸಾಮಾಜಿಕ್ ಜವಾಬ್ದಾರಿ, ನಿತಿ-ಮುಲ್ಯಾಂಚೊ ಹ್ರಾಸ್ ಜಾತಾ ತೆನ್ನಾಂ ತಾಚೆ ಆಡ್ ಪೆನ್ ಪೆಟುನ್ ಉಟೊಂಕ್ ಜಾಯ್ ಅಶೆ ವಿಚಾರ್ ಘೆವ್ನ್ ಫುಡೆಂ ವಚತ್ ರಾವ್ಲೆಂ ಅಶೆಂ ನೂತನ್ ಸಾಖರ್‌ದಾಂಡೆ ಹಾಂಣಿ ಸಾಂಗ್ಲೆಂ.

ಆಯ್ಜ್ ಸಮಾಜಾಂತ್ ಸಬಾರ್ ಪ್ರಸ್ನ್ ತಯಾರ್ ಜಾಲ್ಯಾತ್. ತ್ಯಾ ದರೆಕಾ ವಿಶಯಾಚೆರ್ ಕವಿತಾ ಆನಿ ಸಾಹಿತ್ಯ್ ಯೆವ್ಪಾಕ್ ಜಾಯ್ ಅಶೆಂ ಸಾಂಗ್ತಾನಾ ತಾಂಣಿ ಅಸ್ವಸ್ಥೆಂತ್ಲ್ಯಾನ್ ಕಶ್ಯೊ ಕವಿತಾ ತಯಾರ್ ಜಾಲ್ಯೊ, ಕವಿತೆನ್ ಮ್ಹಾಕಾ ನಾಂವಾಂ ರುಪಾಂತ್ ಹಾಡ್ಲೆಂ ಅಶೆಂ ಮ್ಹಳೆಂ.

ಆಪ್ಲ್ಯಾಕ್ ಸದಾಂಚೆ ಪ್ರೇಕ್ಷಕಾಂ ಕಡ್ಲ್ಯಾನ್ ಪ್ರೇರಣಾ ಮೆಳ್ಳ್ಯಾ. ‘ತ್ರಿವೇಣಿ’ ಕಾರ್ಯಾವಳಿಕ್ ಸದಾಂಚ್ ಬರೊ ಪ್ರತಿಸಾದ್ ಮೆಳ್ಳಾ ಅಶೆಂ ಸಾಂಗ್ತಾನಾ ಶ್ರೀಮತಿ ಸಾಖರ್‌ದಾಂಡೆ ಹಾಂಣಿ ಮ್ಹಜೆ ಕವಿತೆಚಿ ಆನಿ ಕೊಂಕಣಿ ಕಾವ್ಯಾಚಿ ಹೆರ್ ಭಾಸಾಂತ್ಲ್ಯಾನ್ ಸಾಹಿತ್ಯಾಕಡೆನ್ ತುಲನಾತ್ಮಕ್ ಸಮೀಕ್ಷಾ ಜಾಂವ್ಚಿ ಆನಿ ಆಮ್ಚೆಂ ಕೊಂಕಣಿ ಸಾಹಿತ್ಯ್ ವೈಶ್ವೀಕ್ ಜಾಂವ್ಚೆಂ ಅಸೊ ಮ್ಹಜೊ ಹಾವೆಸ್ ಆಸಾ ಅಶೆಂ ನಿಮ್ಣೆ ಕಡೆನ್ ಉಲಯ್ತಾನಾ ಸಾಂಗ್ಲೆಂ.

ಸುರ್ವೆಕ್ ಸಾಹಿತ್ಯ್ ಅಕಾಡೆಮಿಚ್ಯಾ ಕೊಂಕಣಿ ಭಾಷಾ ಸಲ್ಹಾಗಾರ್ ಮಂಡಳಾಚೆ ನಿಮಂತ್ರಕ್ ಡೊ. ತಾನಾಜಿ ಹರ್ಲಣಕಾರ್ ಹಾಂಣಿ ಯೆವ್ಕಾರ್ ದಿಲೊ. ಸಾಹಿತ್ಯ್ ಅಕಾಡೆಮಿಚ್ಯಾ ಮುಂಬಯ್ ವಿಭಾಗೀಯ್ ಕೇಂದ್ರಾಚೆ ಸಚಿವ್ ಕೃಷ್ಣ ಕಿಂಬಹೂನೆ ಹಾಂಣಿ ಸೂತ್ರ್ ಸಂಚಾಲನ್ ಕೆಲೆಂ.