ಉಂಚ್ಲ್ಯಾ ಸಮಾಜಾ ಭಾಯ್ಲೆ ವಿಷಯ್ ಆಯ್ಚೆ ಕವಿತೆಂತ್ ಯೇಂವ್ಕ್ ಲಾಗ್ಲ್ಯಾತ್: ಮ್ಹಾಂಬ್ರೊ

ಉಂಚ್ಲ್ಯಾ ವರ್ಗಾಚ್ಯಾ ಸಮಾಜಾ ಭಾಯ್ಲೆ ವಿಷಯ್ ಆಯ್ಚೆ ಕವಿತೆಂತ್ ಯೇಂವ್ಕ್ ಲಾಗ್ಲ್ಯಾತ್: ಉದಯ್ ಮ್ಹಾಂಬ್ರೊ

ಗೋಪಿನಾಥ್ ಗಾಂವಸ್ ಹಾಂಚ್ಯಾ ‘ಘೊಲೆ ಘೊಲೆ’ ಹ್ಯಾ ಕವಿತಾ ಸಂಗ್ರಹಾಂತ್ಲ್ಯಾ ಕವಿತಾಂನಿ ಆಯಿಲ್ಲೊ ವಿದ್ರೋಹ್ ಹೊ ಸಮಾಜಾಂತ್ಲ್ಯಾ ವಿಶಮತಾಯೆಚೆರ್ ಆಪ್ಲೆಂ ಭಾಶ್ಯ್ ಕರ‍್ತಾ, ಜಾಲ್ಯಾರ್ ‘ಗಾರಾಣೆಂ’ ಹ್ಯಾ ಕಾಶಿನಾಥ್ ನಾಯ್ಕ್ ಹಾಚ್ಯಾ ಕವಿತೆಂತಲೊ ವಿದ್ರೋಹ್ ಜಿಣ್ಯೆಂತ್ ಭೊಗಿಲ್ಲ್ಯಾ ಉತ್ಳತಾಪಾಂಚೊ ಪರಾಮರ್ಶ್ ಘೆತಾ ತಶೆಂಚ್ ‘ಆಮ್ಚೆ ಆಮಿ’ ಹ್ಯಾ ಪ್ರಕಾಶ್ ಪರಿಯೆಂಕಾರ್ ಹಾಚ್ಯೊ ಕವಿತಾ ಆಪ್ಲ್ಯಾ ಮನಾಂತ್ಲ್ಯಾ ಘುಸ್ಮಟಮಾರಾಕ್ ವಾಟ್ ಕರೂನ್ ದಿತಾ ಅಶೆಂ ಮತ್ ಕೊಂಕ್ಣಿ ಕವಿ ಉದಯ್ ಮ್ಹಾಂಬ್ರೆ ಹಾಣೆಂ ಮಾಂಡ್ಲೆಂ.

‘ಸಾಹಿತ್ಯ್ ಮಂಥನ್ – ಸತ್ತರಿ’ ಹೆ ಸಂಸ್ಥೆಚೆ ವತೀನ್ ಆಯೊಜೀತ್ ಕೆಲ್ಲ್ಯಾ ದ್ವಿಮಾಸೀಕ್ ಸಾಹಿತ್ಯ್ ಕಾರ್ಯಾವಳೀಕ್ ತೆ ಮುಖೆಲ್ ಸೊಯ್ರೆ ಹ್ಯಾ ನಾತ್ಯಾನ್ ಕೊಂಕ್ಣಿ ಕವಿತೆಂತಲೊ ವಿದ್ರೋಹಿ ಸೂರ್ ಹ್ಯಾ ವಿಶಯಾಚೆರ್ ಉಲಯ್ತಾಲೆ. ಅನ್ಯಾಯ್ ಆನಿ ಅತ್ಯಾಚಾರಾಂಕ್ ಬಳಿ ಪಡಿಲ್ಲೊ ಗಾಂವ್‍ಗಿರ್ಯಾ ವಾಠಾರಾಂತಲೊ ಸಮಾಜ್ ಸದಾಂಚ್ ಮೊನೆಳ್ ಪಾಂಘ್ರೂನ್ ಅನ್ಯಾಯ್ ಸೊಶೀತ್ ರಾವ್ಲೊ. ಪೂಣ್ ಸ್ವತಾಚಿ ಜಾಣೀವ್ ಜಾಲ್ಲಿ ಪಿಳ್ಗಿ ಆಯ್ಜ್ ಕವಿತೆಂತ್ಲ್ಯಾನ್ ಉಲೊವ್ಪಾಕ್ ಲಾಗ್ಲ್ಯಾ ಹಿ ಬರಿ ಗಜಾಲ್ ಆಸೂನ್ ಉಚ್ಚವರ್ಗೀಯ್ ಸಮಾಜಾಂತ್ಲ್ಯಾ ಲೇಖಕಾಂಚ್ಯಾ ಅನ್ಭೋಗ್ ಪರಿಘಾ ಭಾಯ್ಲೆ ಹೆ ವಿಶಯ್ ಆಶಿಲ್ಲ್ಯಾನ್ - ಅಶೆ ತರೆಚಿ ವಿದ್ರೋಹಿ ಕವಿತಾ ತಾಂಚೆ ಕಡ್ಲ್ಯಾನ್ ಕೆನ್ನಾ ಬರೊವ್ನ್ ಜಾಲಿ ನಾ ಅಶೆಂ ತಾಣೆಂ ಮುಖಾರ್ ಸಾಂಗ್ಲೆಂ.

ಚರ್ಚೆ ವೆಳಾರ್ ವಯ್ಲ್ಯಾ ತಿನೂಯ್ ಕವಿಂನಿ ಆಪ್ಲೆಂ ಮನೊಗತ್ ವ್ಯಕ್ತ್ ಕರ್ತನಾ ಕವಿತಾ ಲೇಖನಾ ಫಾಟ್ಲಿ ಮನೊಭುಮೀಕಾ ಸಾಂಗ್ಲಿ. ವಿದ್ರೋಹಿ ಕವಿತಾ ಬರಯ್ತಲೊ ಜಾಲ್ಯಾರ್ ಕವೀನ್ ನಿರ್ಭಯ್ ಜಾವಪ ಗರ್ಜೆಚೆಂ ಆಸಾ. ಕವಿತಾ ಹಿ ಬಂಡಕೋರಿಚಿ ಭಾಸ್ ಉಲಯ್ತಾ ಆನಿ ಅನ್ಯಾಯಾಆಡ್ ಪೆಟೂನ್ ಉಠ್ಠಾ ಅಶಿಂ ಮತಾಂ ಉಪಸ್ಥಿತಾಂನಿ ಹ್ಯಾ ವೆಳಾರ್ ಮಾಂಡ್ಲಿ. ಪ್ರಿತಮ್ ಪಣ್ಜೀಕಾರ್, ಪಾಂಡುರಂಗ್ ಗಾವ್ಡೆ, ಮೋಹನರಾವ್ ಕುಲಕರ್ಣಿ, ಸಮೀರ್ ಪ್ರಭು ಆನಿ ಹೆರಾಂನಿ ಆಪ್ಲೆ ವಿಚಾರ್ ಮಾಂಡ್ಲೆ. ಗೋವಿಂದ ನಗರ್, ವಾಠಾದೆವ್ ಸರ್ವಣ್, ದಿವ್ಚಲ್ ಹಾಂಗಾ ಆಯೊಜೀತ್ ಕೆಲ್ಲೆ ಕಾರ್ಯಾವಳೀಚ್ಯೊ ಯೆಜ್ಮಾನ್ ಸೌ. ಸಾರೀಕಾ ನಾಯ್ಕ್ ಗಾಂವಸ ಹಾಂಣಿ ಸಗ್ಳ್ಯಾಂಕ್ ಯೆವ್ಕಾರ್ ದಿಲೊ. ಸಂಸ್ಥೆಚೆ ಜಾಳವ್ಣದಾರ್ ಪ್ರಕಾಶ್ ಪರಿಯೆಂಕಾರ್ ಹಾಂಣಿ ಪ್ರಾಸ್ತಾವೀಕ್ ಕೆಲೆ ಉಪ್ರಾಂತ್ ಮಾನೆಸ್ತಾಂಚ್ಯಾ ಹಸ್ತೆ, ದಿವ್ಳಿ ಪೆಟೊವ್ನ್ ಸಾಹಿತ್ಯ್- ಮಂಥನಾಚೆ ತೆರಾವೆ ಕಾರ್ಯಾವಳೀಚೆಂ ಉಕ್ತಾವಣ್ ಕೆಲೆಂ.

ನಿಮ್ಣೆಕಡೆನ್ ಜಾಲ್ಲ್ಯಾ ಭೊವ್‍ಭಾಶಿಕ್ ಕವಿಸಮ್ಮೇಳನಾಂತ್ ಪ್ರಿತಮ್ ಪಣ್ಜೀಕಾರ್, ರಿಚಾ ಘಾಣೆಕಾರ್, ಮನಿಷಾ ಸಾವಂತ್, ಅವಿತಾ ಗಾಂವ್ಕಾರ್, ಕಾಶಿನಾಥ್ ನಾಯ್ಕ್, ಗೊಪಿನಾಥ್ ಗಾಂವಸ, ಅಶೊಕ್ ನೆನೆ, ಮೋಹನರಾವ್ ಕುಲಕರ್ಣಿ, ಸಾರಿಕಾ ನಾಯ್ಕ್ ಗಾಂವಸ್, ಆಸ್ಥಾ ನಾಯ್ಕ್, ಗೌತಮಿ ಚೊರ್ಲೆಕಾರ್, ಪ್ರಕಾಶ್ ಪರಿಯೆಂಕಾರ್ ಆನಿ ಉದಯ್ ಮ್ಹಾಂಬ್ರೆ ಹಾಂಣಿ ಆಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ. ಕವಿತಾ ಸಮ್ಮೇಳನಾಚೆಂ ಸೂತ್ರಸಂಚಾಲನ್ ಗೌತಮಿ ಚೊರ್ಲೆಕಾರ್ ಹಾಂಣಿ ಕೆಲೆಂ ಜಾಲ್ಯಾರ್ ಪುರಾಯ್ ಕಾರ್ಯಾವಳೀಚೆಂ ಸುತ್ರನಿವೇದನ್ ಕಾಶಿನಾಥ್ ನಾಯ್ಕ್ ಹಾಂಣಿ ಕೆಲೆಂ. ನಿಮಾಣೆಂ ಗೋಪಿನಾಥ ಗಾಂವಸ್ ಹಾಂಣಿ ಉಪಸ್ಥಿತಾಂಚೆ ಉಪ್ಕಾರ್ ಮಾನ್ಲೆ.

ಹಿ ಕಾರ್ಯಾವಳ್ ಯಶಸ್ವಿ ಕರ್ಚೆ ಖಾತೀರ್ ಸರ್ವೆಶ್ ನಾಯ್ಕ್ ಹಾಂಣಿ ಬರೆಚ್ ಕಶ್ಟ್ ಘೆತ್ಲೆ. ಫುಡ್ಲಿ ಸಾಹಿತ್ಯ್ ಮಂಥನಾಚಿ ಕಾರ್ಯಾವಳ್ ಉದಯ್ ಮ್ಹಾಂಬ್ರೆ ಹಾಂಚ್ಯಾ ಘರಾ 22 ಡಿಸೆಂಬರ್ 2013 ಹೆ ದಿಸಾ ಸಾಂಜೆಚ್ಯಾ 3.30 ವರಾಂಚೆರ್ ವಳವಯ್ ಫೊಂಡೆಂ ಹಾಂಗಾ ಜಾತಲಿ.