ಇಕ್ಬಾಲ್ ಸಯೀದಿ ಹಾಂಕಾಂ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್

ಇಕ್ಬಾಲ್ ಸಯೀದಿ ಹಾಂಕಾಂ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್

ಕವಿತಾ ಟ್ರಸ್ಟ್ ಹಾಂಣಿ ದಿಂವ್ಚೊ 2014 ವರ್ಸಾಚೊ 'ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್' ಭಟ್ಕಳ್ಚೊ ಕೊಂಕಣಿ ಕವಿ ಇಕ್ಬಾಲ್ ಸಯೀದಿ ಹಾಕಾ ಫಾವೊ ಜಾಲಾ. ದುಬಾಯ್ಚ್ಯಾ ಮೆರಿಟ್ ಫ್ರೈಟ್ ಸಿಸ್ಟಮ್ಸ್ ಹಾಚೊ ಮ್ಯಾನೇಜಿಂಗ್ ಡೈರೆಕ್ಟರ್ ಜೋಸೆಫ್ ಮಥಾಯಸ್ ಹಾಂಣಿ ಆಪ್ಲ್ಯಾ ಕುಟ್ಮಾಚ್ಯಾ ನಾಂವಾರ್ ದಿಂವ್ಚೊ ಹೊ ಪುರಸ್ಕಾರ್ ರುಪಯ್ 10,000, ಮಾನ್‍ಪತ್ರ್ ತಶೆಂ ಯಾದಸ್ತಿಕಾ ಆಟಾಪ್ತಾ. ಹೊ ಪುರಸ್ಕಾರ್ 2015 ಜನೆರ್ 11  ತಾರಿಕೆರ್ ಬಾರ್ಕೂರ್ ಚೌಳಿಕೆರೆ ಹಾಂಗಾಸರ್, ಮಾನೆಸ್ತ್ ಸ್ಟೇನಿ ತಶೆಂ ಮಾನೆಸ್ತಿಣ್ ಗ್ರೆಟ್ಟಾ ಲುವಿಸ್ ಹಾಂಚ್ಯಾ ಘರ್‍ಚ್ಯಾ ಆಂಗ್ಣಾಂತ್ ಚಲ್ಚ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ಹಾತಾಂತರ್ ಕರ್‍ತಲೆ ಮ್ಹಣುನ್ ಕವಿತಾ ಟ್ರಸ್ಟಾಚ್ಯಾ ಕಾರ್ಭಾರ್‍ಯಾಂನಿ ಕಳಯ್ಲಾಂ.

ಕುವೈಟಾಂತ್ 37 ವರ್ಸಾಂ ಜಿಯೆವ್ನ್ ಹ್ಯಾಚ್ ವರ್ಸಾ ಭಾರತಾಕ್ ಪರ್‍ತಲ್ಲ್ಯಾ ಇಕ್ಬಾಲ್ ಸಯೀದಿಕ್ ವೆವೆಗ್ಳ್ಯಾ ಸಮಾಜಾಂನಿ ತಶೆಂ ಸಂಸ್ಕೃತೆಂನಿ ಬದ್ಲುನ್ ಆಸ್ಚ್ಯಾ ಕಲಾ ಆನಿ ಸಾಹಿತ್ಯಾಚೆಂ ದರ್ಶನ್ ಸ್ವತಾ ಲಾಭ್ಲಾಂ. ಸಂಸ್ಕೃತೆಂತ್ ಫುಲುನ್ ಆಸ್ಚ್ಯಾ ಭಟ್ಕಳ್ ಶೆರಾಂತ್ 1950 ವರ್ಸಾ ಜಲ್ಮಲ್ಲೊ ಇಕ್ಬಾಲ್ ಸಯೀದಿ, ಫುಡಾರಾಂತ್ ಸದಾಂಚ್ ನವ್ಯಾಚಿಂ ಸೊಧ್ನಾಂ ಕರ್‍ಚೊ ಕವಿ ಜಾವ್ನ್ ನವಾಯಿತಿ ಸಂಸ್ಕೃತಿ, ಪರಂಪರಾ, ಮೊಲಾಂ ಆನಿ ಭಾಶೆಚ್ಯಾ ಅಭಿವೃದ್ಧಿ ಖಾತೀರ್ ವಾವುರ್‍ಲೊ. ತಾಚೊ ಭಾವ್ ಪಯಾಮ್ ಸಯೀದಿನ್, ಹಿಂದಿ ಫಿಲ್ಮ್ ಸಂಸಾರಾಂತ್ ಉತ್ತೀಮ್ ಗೀತ್‌ಕಾರ್ ಜಾವ್ನ್ ನಾಂವ್ ಜೊಡ್ಚ್ಯಾ ಆದಿಂಚ್, ಇಕ್ಬಾಲಾ ಥಂಯ್ ಭಾಶೆಚೊ ಆನಿ ಕವಿತೆಚೊ ಮೋಗ್ ಕಿರ್‍ಲಶೆಂ ಕೆಲ್ಲೊ. ಕವಿ ಅಲ್ಲಾಮಾ ಇಕ್ಬಾಲ್, ಮೀರ್, ಗಾಲೀಬ್ ಆನಿ ಜಿಗರ್ ಮುರದಾಬಾದಿ ಹಾಂಚ್ಯೊ ಕೃತಿಯೊ ಇಕ್ಬಾಲಾ ಥಂಯ್ ಕವಿತೆಚೆಂ ನವೆಂ ಕೀಟ್ ಪೆಟೊಂವ್ಚ್ಯಾಂತ್ ಮಜತೆಕ್ ಆಯ್ಲೆಂ. ಭಾಶೆಚೆ ಆನಿ ಸಾಹಿತ್ಯಾಚೆ ಜಾಣ್ವಾಯೆನ್ ಭರುನ್, ಹ್ಯಾ ಶೆತಾಂತ್ ಕಿತೆಂ ತರೀ ಕರುನ್ ದಾಕಯ್ಜಾಯ್ ಮ್ಹಳ್ಳೊ ಶೆವೊಟ್ ಘೆವ್ನ್, ಇಕ್ಬಾಲಾನ್ ಕವಿತಾ ಮಾತ್ರ್ ನ್ಹಯ್, ಹೆರ್ ಸಾಹಿತ್ಯ್ ರಚ್ಲೆಂ. ಹ್ಯಾ ಪಯ್ಕಿ ಕೊಂಕಣಿ ನವಾಯತಿ ಬೋಲಿಂತ್ ರಚಲ್ಲೆಂ ಪುಸ್ತಕ್ 'ಮೊತಿಯಾ ದಾನೇ' ಲೊಕಾಮೊಗಾಳ್ ಜಾಲೆಂ.

ಆಧುನಿಕ್ ನವಾಯತಿ ಸಮಾಜಾಂತ್ ಇಕ್ಬಾಲಾಚೊ ಜಾಯ್ತೊ ಪ್ರಭಾವ್ ಪಡ್ಲಾ. ತಾಚ್ಯೊ ಕವಿತಾ ಆನಿ ಪ್ರಬಂಧ್ ಸಾಲರ್, ಇಂಕಾಲಾಬ್, ನಕ್ಷ-ಎ-ನವಾಯತ್ ಜಾಳಿಜಾಗ್ಯಾಂನಿ ಪರ್ಗಟ್ ಜಾತೇ ಆಸ್ತಾತ್. ಆಯ್ಚ್ಯಾ ಕಾಳಾಚ್ಯಾ ನವಾಯತಿ ಸಮಾಜಾಂತ್ಲ್ಯಾ ಕೊಂಕಣಿ ಕವಿಂ ಪಯ್ಕಿ ಇಕ್ಬಾಲ್ ಉಂಚ್ಲ್ಯಾ ಸ್ಥಾನಾರ್ ಆಸಾ.

ಜೋಸೆಫ್ ಆನಿ ಫ್ಲಾವಿಯಾ ಮಥಾಯಸ್ ತಶೆಂ ಕುಟಮ್

ಕುವೈಟಾಂತ್ ಆಸ್ತಾನಾ ಭಟ್ಕಳ್ ಮುಸ್ಲಿಮ್ ಎಸೋಸಿಯೇಶನಾಚೊ ಕಾರ್ಯದರ್ಶಿ ಮ್ಹಣುನ್ ತಾಣೆ ವಾವ್ರ್ ದಿಲಾ. ಕುವೈಟ್ಚ್ಯಾ ರೇಡಿಯೊಚೆರ್ ಇಕ್ಬಾಲಾಚೆಂ ಸಂದರ್ಶನ್ ಪ್ರಸಾರ್ ಜಾಲಾಂ. ಕುವೈಟಾಂತ್ ಚಲಲ್ಲ್ಯಾ ಜಾಯ್ತ್ಯಾ ಅಂತರಾಷ್ಟ್ರೀಯ್ ಮುಶೈರಾಂನಿ ಇಕ್ಬಾಲಾನ್ ವಾಂಟೊ ಘೆತ್ಲಾ. ಭಟ್ಕಳ್ಚ್ಯಾ ನವಾಯತಿ ಮುಶೈರಾಚೊ ತೊ ಪ್ರಮುಖ್ ಸಾಂದೊ. ನವಾಯತಿ ಮೆಹೆಫಿಲ್ ಲೊಕಾಮೊಗಾಳ್ ಕರುಂಕ್ ತೊ ವಾವ್ರುನ್ ಆಸಾ.

ಕವಿತಾ ಟ್ರಸ್ಟಾಚೊ ಹೊ ಪುರಸ್ಕಾರ್ ಹ್ಯಾ ಪಯ್ಲೆಂ ಮುಂಬಯ್ಚಿ ಕವಯಿತ್ರಿ ಅರುಣಾ ರಾವ್, ಮಂಗ್ಳುರ್‍ಚೊ ದಿ. ಲಿಯೊ ಡಿಸೋಜಾ (ಕಾವ್ಯದಾಸ್), ಗೊಂಯ್ಚೊ ಕಾಶಿನಾಥ ಶಾಂಭಾ ಲೊಳಿಯೆಂಕಾರ್, ಕೊಚ್ಚಿನ್ಚೊ ದಿ. ಶಿವಾನಂದ ಶೆಣೈ, ಗೊಂಯ್ಚೊ ಡೊ. ರಾಜಯ್ ಪವಾರ್ ಆನಿ ಯೂಸುಫ್ ಅಬ್ದುಲ್ಲಾ ಶೇಖ್ ಹಾಂಕಾಂ ಯೆದೊಳ್ ಪಾಸುನ್ ಫಾವೊ ಜಾಲಾ.

ಇಕ್ಬಾಲ್ ಸಯೀದಿನ್ ಆಪ್ಲೆಂ ಪುಸ್ತಕ್ ಪರ್ಸೊ ಆರೇಬಿಕ್ ಲಿಪಿಂತ್ ಬರಯಿಲ್ಲೆಂ ಆಸುನ್, ಕವಿತಾ ಟ್ರಸ್ಟಾಚ್ಯಾ ಪುರಸ್ಕಾರ್ ಸಮಿತಿನ್ ತೆಂ ರೋಮಿಕ್ ಲಿಪ್ಯಾಂತರ್ ಕರುನ್ ವಾಚ್ಲ್ಯಾ ಉಪ್ರಾಂತ್ ಹ್ಯಾ ಪುರಸ್ಕಾರಾ ಖಾತೀರ್ ತಾಚಿ ವಿಂಚವ್ಣಿ ಕೆಲ್ಯಾ.

इकबाल सयीदी हांकां कविता ट्रस्टाचो मथायस कुटम कविता पुरस्कार

कविता ट्रस्ट हांणी दिंवचो २०१४ वर्साचो मथायस कुटम कविता पुरस्कार भटकळचो कोंकणी कवी इकबाल सयीदी हांका फावो जाला. दुबायच्या मेरिट फ्रैट सिस्टम्स हाचो मॅनॅजींग डैरेकटर जोसेफ मथायस हांणी आपल्या कुटमाच्या नांवार दिंवचो हो पुरस्कार रुपय १०,०००, मानपत्र तशें यादस्तिका आटापता. हो पुरस्कार २०१५ जनेर ११ तारिकेर बारकूर चौळिकेरे हांगासर, मानेस्त स्टेनी तशें मानेस्तिण ग्रेट्टा लुविस हांच्या घरच्या आंगणांत चलच्या कविता फेस्त संदर्भार हातांतर करतले म्हणून कविता ट्रस्ताच्या कारभार्यांनी कळयलां.

कुवैटांत ३७ वर्सां जियेवन ह्याच वर्सा भारताक परतल्ल्या इकबाल सयीदीक वेवेगळ्या समाजांनी तशें संस्कृतेंनी बदलून आसच्या कला आनी साहित्याचें दर्शन स्वता लाभलां. संस्कृतेंत फुलून आसच्या भटकळ शेरांत १९५० वर्सा जल्मल्लो इकबाल सयीदी, फुडारांत सदांच नव्याचीं सोधनां करचो कवी जावन नवायिती संसकृती, परंपरा, मोलां आनी भाशेच्या अभिवृद्धी खातीर वावुरलो. ताचो भाव पयाम सयीदीन, हिंदी फिल्म संसारांत उत्तीम गीतकार जावन नांव जोडच्या आदींच, इकबाला थंय भाशेचो आनी कवितेचो मोग किरलशें केल्लो. कवी अल्लामा इकबाल, मीर, गालीब आनी जिगर मुरदाबादी हांच्यो कृतियो इकबाला थंय कवितेचें नवें कीट पेटोंवच्यांत मजतेक आयलें. भाशेचे आनी साहित्याचे जाणवायेन भरून, ह्या शेतांत कितें तरी करून दाकयजाय म्हळ्ळो शेवोट घेवन, इकबालान कविता मात्र न्हय, हेर साहित्य रचलें. ह्या पयकी कोंकणी नवायती बोलींत रचल्लें पुस्तक 'मोतिया दाने' लोकामोगाळ जालें.

आधुनिक नवायती समाजांत इकबालाचो जायतो प्रभाव पडला. ताच्यो कविता आनी प्रबंध सालर, इंकालाब, नक्ष-ए-नवायत जाळिजाग्यांनी परगट जाते आसतात. आयच्या काळाच्या नवायती समाजांतल्या कोंकणी कवीं पयकी इकबाल उंचल्या स्थानार आसा.

कुवैटांत आसताना भटकळ मुसलीम एसोसियेशनाचो कार्यदर्शी म्हणून ताणे वावर दिला. कुवैटच्या रेडियोचेर इकबालाचें संदर्शन प्रसार जालां. कुवैटांत चलल्ल्या जायत्या अंतराष्ट्रीय मुशैरांनी इकबालान वांटो घेतला. भटकळच्या नवायती मुशैराचो तो प्रमुख सांदो. नवायती मेहेफिल लोकामोगाळ करूंक तो वावरून आसा.

कविता ट्रस्टाचो हो पुरस्कार ह्या पयलें मुंबयची कवयित्री अरुणा राव, मंगळुरचो देवाधीन कवी लियो डिसोजा (काव्यदास), गोंयचो काशिनाथ शांभा लोळियेंकार, कोच्चिनचो देवाधीन शिवानंद शेणै, गोंयचो डो. राजय पवार आनी यूसुफ अब्दुल्ला शेख हांकां येदोळ पासून फावो जाला.

इकबाल सयीदिन आपलें पुस्तक परसो आरेबीक लिपींत बरयिल्लें आसून, कविता ट्रस्टाच्या पुरस्कार समितीन तें रोमीक लिप्यांतर करून वाचल्या उपरांत ह्या पुरस्कारा खातीर ताची विंचवणी केल्या.