ಕವಿ ಆಂಡ್ರ್ಯೂಚೊ ಕವಿತಾ ಪುಂಜೊ 'ಆಯೆರಾಚೊ ಬೂಕ್' ಲೋಕಾರ್ಪಣ್ ಆನಿ ಕವಿಗೋಷ್ಟಿ

ಕವಿ ಆಂಡ್ರ್ಯೂಚೊ ಕವಿತಾ ಪುಂಜೊ 'ಆಯೆರಾಚೊ ಬೂಕ್' ಲೋಕಾರ್ಪಣ್ ಆನಿ ಕವಿಗೋಷ್ಟಿ

ಕವಿತಾ ಟ್ರಸ್ಟಾಚೊ ಟ್ರಸ್ಟಿ ತಶೆಂ ಕವಿ ಆಂಡ್ರ್ಯೂ ಎಲ್ ಡಿಕೂನ್ಹಾ ಹಾಚೊ ತಿಸ್ರೊ ಕವಿತಾ ಪುಂಜೊ 'ಆಯೆರಾಚೊ ಬೂಕ್' ಹ್ಯಾಚ್ ದಶೆಂಬರ್ 20 ತಾರಿಕೆರ್ ಮಂಗ್ಳುರಾಂತ್ಲ್ಯಾ ಸ್ಕೌಟ್ಸ್ ಆನಿ ಗೈಡ್ಸ್ ಸಭಾಭವನಾಂತ್ ಚಲಲ್ಲ್ಯಾ  ಕೊಂಕ್ಣಿ ಸಾಹಿತ್ಯ್ ಸಮ್ಮೇಳನಾವೆಳಾರ್ ಕರ್ನಾಟಕ ವಿಶ್ವವಿದ್ಯಾಲಯ ಧಾರವಾಡ್ ಹಾಚಿ ಪ್ರಾಧ್ಯಾಪಕಿ ಡೊ. ಶೋಭಾ ಎಸ್. ನೀಲಾವರ್ ಹಿಣೆಂ ಲೋಕಾರ್ಪಣ್ ಕೆಲೊ.

ಕೊಂಕ್ಣಿ ಸಾಹಿತಿ ಎಡಿ ನೆಟ್ಟೊ ಸಮ್ಮೇಳನಾಚೊ ಅಧ್ಯಕ್ಶ್ ಆಸಲ್ಲೊ.  ಹೆಂ ಪುಸ್ತಕ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿನ್ ಪರ್ಗಟ್ ಕೆಲಾಂ. ಕೊಂಕ್ಣಿ ಕಲಾಕಾರ್ ಆನಿ ಕವಿ ಎಡ್ಡಿ ಸಿಕೇರಿನ್ ಹ್ಯಾ ಪುಸ್ತಕಾಕ್ ಪ್ರಸ್ತಾವನ್ ಬರಯ್ಲಾಂ.  'ಆಯೆರಾಚೊ ಬೂಕ್' ಪುಸ್ತಕಾಂತ್ ಆಂಡ್ರ್ಯೂನ್ ಪಾಟ್ಲ್ಯಾ ದೋನ್ ವರ್ಸಾಂನಿ ಬರಯಿಲ್ಲಿಂ 56 ಕವಿತಾಂ ಆನಿ 54 ಚುಟುಕಾಂ ಆಸಾತ್. 
 

ಆಪ್ಲ್ಯಾ ಪುಸ್ತಕಾವಿಶಿಂ ಉಲಯ್ತಾನಾ ಕವಿ ಆಂಡ್ರ್ಯೂನ್ ತೀಸ್ ವರ್ಸಾಂ ಪಯ್ಲೆಂ ಬರಯಲ್ಲ್ಯಾ ಕವಿತೆಚೊ ಉಲ್ಲೇಖ್ ಕರುನ್ ಸಂಭ್ರಮಿಕ್ ಭಾವ್ ಗಿತಾಂ ಸಾಂಡುನ್ ಆಜ್ ಆಪ್ಲಿ ಕವಿತಾ ವಾಸ್ತವಿಕತೆಕ್ ಫುಡ್ ಕರ್‍ನ್ ರಾವ್ಲ್ಯಾ. ಆಮ್ಚ್ಯಾ ಮ್ಹಾಲ್ಘಡ್ಯಾಂನಿ ಆಮ್ಚಿ ಅಸ್ಮಿತಾಯ್ ಉಬಾರ್‍ನ್ ಧರ್‍ಚಿ ಕೊಂಕ್ಣಿ ಭಾಸ್ ಆನಿ ಗ್ರೇಸ್ತ್ ಸಂಸ್ಕೃತಿ ವ್ಹರ್‍ತೆಂ ದಾಯ್ಜ್ ಮ್ಹಣ್ ಆಮ್ಕಾಂ ಪಾಶಾರ್ ಕೆಲಾಂ. ಪುಣ್ ಆತಾಂ ಸರ್ವ್ ಕುಡ್ಕೆ ಕುಡ್ಕೆ ಜಾವ್ನ್ ಯೆತಾನಾ ಆಯ್ಚಿ ಪಿಳ್ಗಿ ಮುಖ್ಲೆ ಪಿಳ್ಗೆಕ್ ಕಿತೆಂ ಪಾಶಾರ್ ಕರಿತ್? ಅಸಲ್ಯಾ ಚಿಂತ್ಪಾಕ್ ಈಟ್ ಜಾವ್ನ್ ಆಪ್ಲ್ಯಾ ಪುಸ್ತಕಾಕ್ ಆಯೆರಾಚೊ ಬೂಕ್ ಮ್ಹಣ್ ವೊಲಾಯ್ಲಾಂ ಮ್ಹಣ್ ಸಾಂಗಲಾಗ್ಲೊ.

ಆಂಡ್ರ್ಯೂಚಿಂ ಹ್ಯಾ ಆದಿಂ ದೋನ್ ಕವಿತೆಚಿಂ ಪುಸ್ತಕಾಂ 'ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ' ಆನಿ 'ಆಂಜುರಾಚೆಂ ಪಾನ್' ಪರ್ಗಟ್ ಜಾಲ್ಯಾಂತ್
 
ಉಪ್ರಾಂತ್ ಚಲಲ್ಲಿ ಚಾ. ಫ್ರಾ ಡಿಕೋಸ್ತಾ ಸ್ಮಾರಕ್ ಕವಿಗೋಷ್ಟಿ ಕೊಂಕ್ಣಿ ಕವಿ ಜೆರಿ ರಾಸ್ಕಿನ್ಹಾನ್ ಚಲವ್ನ್ ವೆಲಿ.  ಹೆ ಕವಿಗೋಶ್ಟಿಂತ್ ಸಿಜ್ಯೆಸ್ ತಾಕೊಡೆ, ಡೊ. ನಾಗೇಶ್ ಕುಮಾರ್. ಜಿ. ರಾವ್, ವಿನ್ಸಿ ಪಿಂಟೊ, ಮಹೇಶ್ ನಾಯಕ್, ಗೀತಾ ಕಿಣಿ, ಎರಿಕ್ ಸೋನ್ಸ್, ಗುರು ಬಾಳಿಗಾ ಆನಿ ಫೆಲ್ಸಿಲೋಬೊನ್ ಕವಿತಾ ವಾಚುನ್ ಸಮ್ಮೇಳನಾಕ್ ಹಾಜರ್ ಅಸಲ್ಲ್ಯಾ ಕಾವ್ಯ ರಸಿಕಾಂಚೆಂ ಮನ್ ಧಾದೊಶಿ ಕೆಲೆಂ.

कवी आंडऱ्यूचो कविता पुंजो 'आयेराचो बूक' लोकार्पण आनी कवीगोष्टी

कविता ट्रस्टाचो ट्रस्टी तशें कवी आंडऱ्यू एल. डिकूनहा हाचो तिसरो कविता पुंजो 'आयेराचो बूक' ह्याच दशेंबर २० तारिकेर मंगळुरांतल्या स्कौटस आनी गैड्स सभाभवनांत चलल्ल्या कोंकणी साहित्य सम्मेळनावेळार कर्नाटक विश्वविद्यालय धारवाड हाची प्राध्यापकी डॉ. शोभा एस. नीलावर हिणें लोकार्पण केलो.

कोंकणी साहिती एडी नेट्टो सम्मेळनाचो अध्यक्ष आसल्लो. हें पुस्तक कर्नाटक कोंकणी साहित्य अकाडेमिन परगट केलां. कोंकणी कलाकार आनी कवी एड्डी सिकेरिन ह्या पुस्तकाक प्रस्तावन बरयलां. 'आयेराचो बूक' पुस्तकांत आंडऱ्यून पाटल्या दोन वर्सांनी बरयिल्लीं ५६ कवितां आनी ५४ चुटुकां आसात.

आपल्या पुस्तकाविशीं उलयताना कवी आंडऱ्यून तीस वर्सां पयलें बरयल्ल्या कवितेचो उल्लेख करून संभ्रमीक भाव गितां सांडून आज आपली कविता वास्तविकतेक फुड कर्न रावल्या. आमच्या म्हालघड्यांनी आमची अस्मिताय उबार्न धरची कोंकणी भास आनी ग्रेस्त संसकृती व्हरतें दायज म्हण आमकां पाशार केलां. पुण आतां सर्व कुडके कुडके जावन येताना आयची पिळगी मुखले पिळगेक कितें पाशार करीत? असल्या चिंतपाक ईट जावन आपल्या पुस्तकाक आयेराचो बूक म्हण वोलायलां म्हण सांगलागलो.

आंडऱ्यूचीं ह्या आदीं दोन कवितेचीं पुस्तकां 'व्हळू व्हळू व्हाळ व्हाळ्या' आनी 'आंजुराचें पान' परगट जाल्यांत

उपरांत चलल्ली चा. फ्रा डिकोसता स्मारक कविगोष्टी कोंकणी कवी जेरी रासकिन्हान चलवन वेली. हे कविगोश्टींत सिजयेस ताकोडे, डो. नागेश कुमार. जी. राव, विन्सी पिंटो, महेश नायक, गीता किणी, एरीक सोन्स, गुरू बाळिगा आनी फेलसिलोबोन कविता वाचून सममेळनाक हाजर असल्ल्या काव्य रसिकांचें मन धादोशी केलें.