ರೊಬರ್ಟ್ ಫೆರ್ನಾಂಡಿಸಾಚ್ಯಾ ಅಧ್ಯಕ್ಷಪಣಾರ್ ದಾಯ್ಜಿ ದುಬಾಯ್ ತರ್ಫೆನ್ ಕವಿಗೋಷ್ಟಿ

ರೊಬರ್ಟ್ ಫೆರ್ನಾಂಡಿಸಾಚ್ಯಾ ಅಧ್ಯಕ್ಷಪಣಾರ್ ದಾಯ್ಜಿ ದುಬಾಯ್ ತರ್ಫೆನ್ ದುಬಾಯಾಂತ್ ಕವಿ ಗೋಶ್ಠಿ

ದಾಯ್ಜಿ ದುಬಾಯ್ ಆನಿ ದಾಯ್ಜಿ ರಂಗ್‌ಮಂದಿರ್ ಹಾಂಣಿ ಸಾಂಗಾತಾ ಮೆಳುನ್ ದಶೆಂಬರ್ 19, 2014 ತಾರಿಕೆರ್ ಕರಾಮಾ ವಿನ್ನೀಸ್ ರೆಸ್ಟೋರೆಂಟ್ ಸಾಲಾಂತ್  “ದಾಮೋದರ್ ಮೌಜೊ ಸಂಗಿಂ ಏಕ್ ಸಾಂಜ್” ಮ್ಹಳ್ಳೆಂ ಸಾಹಿತಿಕ್ ಕಾರ್ಯೆಂ ಮಾಂಡುನ್ ಹಾಡಲ್ಲೆಂ. ಯುಎಇ ಭೆಟೆಕ್ ಆಯಿಲ್ಲ್ಯಾ ಕೊಂಕ್ಣಿ ಸಾಹಿತಿ ತಶೆಂ ವಾವ್ರಾಡಿ ಜಾವ್ನಾಸ್ಚ್ಯಾ ಶ್ರೀ ದಾಮೋದರ್ ಮೌಜೊಕ್ ಸನ್ಮಾನ್, ತಾಚೆಸಂಗಿಂ ಸಾಹಿತಿಕ್ ವಿಚಾರ್ ವಿನಿಮಯ್ ಆನಿ ಕವಿಗೋಶ್ಠಿ ಹ್ಯಾ ಕಾರ್ಯಚೊ ಮುಖೆಲ್ ವಾಂಟೊ ಜಾವ್ನಾಸಲ್ಲೊ.

ಆಪ್ಲ್ಯಾ ಉಲೊವ್ಪಾಂತ್ ಅಪ್ಣಾ ಆನಿ ಮಂಗ್ಳುರಾಮಧ್ಲೊ ಭಾಂದ್ ಭೋವ್ ಪರ್ನೊ ಆನಿ ತಿತ್ಲೊಚ್ ಸುಧೃಢ್ ಮ್ಹಣುನ್ ಉಚಾರಲ್ಲ್ಯಾ ದಾಮೋದರ್ ಮೌಜೊನ್ ಚಾಫ್ರಾನ್ ಕಶೆಂ ಕೊಂಕ್ಣೆಂತ್ ಸಾಹಿತ್ಯಾಚೆಂ ಭಾಂಗರ್ ಪಿಕಯ್ಲೆಂ ಮ್ಹಳ್ಳೆವಿಶಿಂ ಆಪ್ಲೆ ಥೊಡೆ ವಿಚಾರ್ ಮಾಂಡ್ಲೆ. ದಾಯ್ಜಿ ದುಬಾಯ್ಚ್ಯಾ ಕೊಂಕ್ಣಿ ವಾವ್ರಾವಿಶಿಂ ವಿಶೇಸ್ ಶಾಭಾಸ್ಕಿ ಉಚಾರಲ್ಲ್ಯಾ ತಾಂಣಿ ಹೊ ವಾವ್ರ್ ಮುಕಾರುನ್ ವ್ಹರುಂಕ್ ಜಾಯ್ ಮ್ಹಣ್ ಉಲೊ ದಿಲೊ.

ಉಲೊವ್ಪಾ ಉಪ್ರಾಂತ್ ಚಲಲ್ಲೆ ಕವಿಗೋಶ್ಟಿಚೆಂ ಅಧ್ಯಕ್ಷಪಣ ಕೊಂಕ್ಣಿ ಸಂಘಟಕ್, ಕವಿ, “ಲ್ಹಾರಾಂ ಲಜೆಲಿಂ” ಕವಿತಾ ಪುಸ್ತಕಾಚೊ ಕವಿ ರೊಬರ್ಟ್ ಉದ್ಯಾವರ್ ಹಾಂಣಿ ಘೆತಲ್ಲೆಂ. ಹಿಂವಾಳೆ ದೀಸ್ ತರೀ ಸಭೆಂತ್ ಸಾದರ್ ಜಾಲ್ಲ್ಯಾ ಕವಿತೆಂನಿ ಚಿಂತ್ಪಾಂಕ್ ಊಬ್ ಲಾಗಯ್ಲಿ ಆನಿ ಹಾಸ್ಯ್, ಗಂಭೀರ್, ತಾತ್ವಿಕ್ ಮ್ಹಳ್ಳ್ಯಾ ವಿವಿಧತಾಯೆಂನಿ ಭರುನ್ ಸಭಿಕಾಂಕ್ ದಾಧೊಸ್ಕಾಯ್ ದಿಲಿ.

ಆರ್ಥರ್ ಒಮ್ಜೂರ್ ಹಾಣೆಂ “ಘಾಲ್ ನದರ್” ಮ್ಹಳ್ಳಿ ಕವಿತಾ ವಾಚುನ್ ಕವಿಗೋಶ್ಟಿಕ್ ಅಧಿಕೃತ್ ಸುರ್ವಾತ್ ದಿಲಿ. ಉತ್ರಾಂ ಗುಂತ್ಚ್ಯಾ ಅಪ್ಲ್ಯಾ ವಿಶೇಸ್ ತಾಲೆಂತಾನ್ ನೆಟಯಿಲ್ಲಿ ಹಿ ಕವಿತಾ ಆರ್ಥರಾನ್ ಆಪ್ಲ್ಯಾಚ್ ಖಾಸ್ ಶೈಲೆನ್ ವಾಚನ್ ಸಭಿಕಾಂಚಿ ಶಾಭಾಸ್ಕಿ ಜೊಡ್ಲಿ. ದಾಯ್ಜಿ ದುಬಾಯ್ ಕವಿಗೋಶ್ಟಿಕ್ ಪಯ್ಲೆಂ ಪಾವ್ಟಿಂ ಹಾಜರ್ ಜಾಲ್ಲ್ಯಾ ಕವಿತಾ ಟ್ರಸ್ಟ್ ಕವಿತಾ ವಾಚನ್ ಸರ್ತೆಚೆಂ ವಿಜೇತ್ ಕವಯತ್ರಿ ಸಿದ್ಧಿ ಶೇಟ್ ರಾಯ್ಕರಾನ್  “ಭುರ್ಗೆಪಣ್” ಆನಿ “ಯಾದ್” ಮ್ಹಳ್ಳ್ಯೊ ಕವಿತಾ ಪೇಶ್ ಕರ್ನ್ ಹಾಜರ್ ಅಸ್ಲೆಲ್ಯಾಂಚ್ಯಾ ಬಾಳ್ಪಣಾಚ್ಯಾ ಯಾದಿಂಕ್ ಜಾಗಯ್ಲೆಂ. ಯುವ ಕವಿ ಸ್ಟ್ಯಾನಿ ಬೆಳಾನ್ “ದೊರೊ” ಆನಿ “ಎಕೆ ಸ್ತ್ರೀಯೆಚಿ ಕಥಾ” ಮ್ಹಳ್ಳ್ಯೊ ಕವಿತಾ ಪೇಶ್ ಕಲ್ಯೊ ತರ್ “ನಿಮಾಣಿ ಸಯ್ರಿಕ್” ನಾಮ್ಣೆಚ್ಯಾ ಪಿ.ಜೆ ಕರುಗಳ್ನಡೆನ್ (ಪಿಯುಸ್ ಜೇಮ್ಸ್) "ಕಾಳ್ ಬದಲ್ಲಾ"  ಆನಿ “ಮಾನ್” ಕವಿತಾ ವಾಚುನ್ ಸಭಿಕಾಂಚಿ ಚಿಂತ್ಪಾ ಊಬ್ ಚಡಯ್ಲಿ. ಸಯ್ರಿ ಕವಯತ್ರಿ ಜಾವ್ನ್ ಹಾಜರ್ ಜಾಲ್ಲ್ಯಾ ಶ್ರೀಮತಿ ರೂಪಲಿ ಮೌಜೊ ಕೀರ್ತನಿನ್ ಆಪ್ಲಿ ಫಾಮಾದ್ ಕವಿತಾ “ಬಾವ್ಲೆ ತುಂ ಅಶಿಚ್ ರಾವ್” ಆನಿ ಆಪ್ಲ್ಯಾ ಕವಿತಾ ಪುಂಜ್ಯಾಂತ್ಲ್ಯೊ ಹೆರ್ ಮಟ್ವ್ಯೊ ಕವಿತಾ ಪೇಶ್ ಕೆಲ್ಯೊ. ಕವಿ ದಿನೇಶ್ ಕೊರೆಯಾನ್ ಪಾಕಿಸ್ಥಾನಾಂತ್ಲ್ಯಾ ಪೇಶಾವರ್ ಸೈನಿಕ್ ಇಸ್ಕೊಲಾವಯ್ರ್ ಜಾಲ್ಲ್ಯಾ ಆತಂಕಿ ಹಲ್ಲ್ಯಾಚ್ಯಾ ಪಾಠ್‌ಥಳಾರ್ ಬರಯಿಲ್ಲಿ “ತುಮ್ಕಾಂ ಕಿತೆಂ ಉರ್‍ಚೆಂ” ಮ್ಹಳ್ಳಿ ಕವಿತಾ ಪೇಶ್ ಕೆಲಿ.

ಆಕ್ರೇಕ್ ಕವಿಗೋಶ್ಟಿಚೊ ತಾಂಡೆಲಿ ಜಾವ್ನಾಸಲ್ಲ್ಯಾ ರೋಬರ್ಟ್ ಉದ್ಯಾವರಾನ್ “ಏಕ್ ಪೆಕೆಟ್ ಬಿಸ್ಕೆಟ್” ಮ್ಹಳ್ಳಿ ಗಂಭೀರ್ ಕವಿತಾ ಸವೆಂ ಆನಿ ”ಬೈಕಾರ್ ಸವಾರಿ” ಮ್ಹಳ್ಳಿ ಹಾಸ್ಯ್ ಕವಿತಾ ಪೇಶ್ ಕೆಲಿ ಆನಿ ಕವಿಗೋಷ್ಟಿಂತ್ ಭಾಗ್ ಘೆತಲ್ಲ್ಯಾ ಕವಿಂಚೊ ಆನಿ ಸಭಿಕಾಂಚೊ ಉಪ್ಕಾರ್ ಆಟಯ್ಲೊ.

ಸಯ್ರಿ ಕವಯತ್ರಿ ರೂಪಲಿ ಕೀರ್ತನಿಕ್ ಕೊಂಕ್ಣಿ ಸಾಹಿತಿ ಸ್ಟೇನ್ ಅಗೇರಾನ್ ಸ್ಮರಣಿಕಾ ದೀವ್ನ್ ಮಾನ್ ಕೆಲೊ ಆನಿ ಪಯ್ಲೆಂ ಪಾವ್ಟಿಂ ದಾಯ್ಜಿ ಮಾಂಚಿಯೆರ್ ಆಯಿಲ್ಲ್ಲಿ ಕವಯತ್ರಿ ಸಿದ್ಧಿ ಶೇಟ್ ರಾಯ್ಕರಾಕ್ ದಾಯ್ಜಿ ಸಂಚಾಲಕ್ ರೊನಿ ಬೈಂದೂರಾನ್ ಸ್ಮರಣಿಕಾ ದೀವ್ನ್ ಮಾನ್ ಕೆಲೊ.

ಸಂಪವ್ಣೆ ಕಾರ್ಯಕ್ ಕೊಂಕ್ಣಿ ವಾವ್ರಾಡಿ ಆನಿ ಮೆರಿಟ್ ಫ್ರೈಟ್ ಸಿಸ್ಟಮ್ಸ್ ಹಾಚೊ ಮ್ಹಾಲಕ್ ಶ್ರೀ ಜೋಸೆಫ್ ಮಥಾಯಸ್, ದಾಯ್ಜಿ ದುಬಾಯ್ ಸ್ಥಾಪಕ್ ಸಂಚಾಲಕ್ ಶ್ರೀ ಡಯಾನ್ ಡಿ ಸೋಜ್ ಮುಖಮಾರ್ ವೆದಿರ್ ಹಾಜರ್ ಅಸಲ್ಲೆ.

-ಭಾತ್ಮಿ: ಸ್ಟೇನಿ ಬೆಳಾ

रोबर्ट फेरनांडिसाच्या अध्यक्षपणार दायजी दुबाय तर्फेन दुबायांत कवी गोश्ठी

दायजी दुबाय आनी दायजी रंगमंदीर हांणी सांगाता मेळून दशेंबर १९, २०१४ तारिकेर करामा विन्नीस रेस्टोरेंत सालांत "दामोदर मौजो संगीं एक सांज" म्हळ्ळें साहितीक कारयें मांडून हाडल्लें. युएइ भेटेक आयिल्ल्या कोंकणी साहिती तशें वावराडी जावनासच्या श्री दामोदर मौजोक सन्मान, ताचेसंगीं साहितीक विचार विनिमय आनी कविगोश्ठी ह्या कार्यचो मुखेल वांटो जावनासल्लो.

आपल्या उलोवपांत अपणा आनी मंगळुरामधलो भांद भोव परनो आनी तितलोच सुधृढ म्हणून उचारल्ल्या दामोदर मौजोन चाफ्रान कशें कोंकणेंत साहित्याचें भांगर पिकयलें म्हळ्ळेविशीं आपले थोडे विचार मांडले. दायजी दुबायच्या कोंकणी वावराविशीं विशेस शाभासकी उचारल्ल्या तांणी हो वावर मुकारून व्हरूंक जाय म्हण उलो दिलो.

उलोवपा उपरांत चलल्ले कविगोश्टिचें अध्यक्षपण कोंकणी संघटअक, कवी, "ल्हारां लजेलीं" कविता पुस्तकाचो कवी रोबर्ट उद्यावर हांणी घेतल्लें. हिंवाळे दीस तरी सभेंत सादर जाल्ल्या कवितेंनी चिंतपांक ऊब लागयली आनी हास्य, गंभीर, तात्वीक म्हळ्ळ्या विविधतायेंनी भरून सभिकांक दाधोसकाय दिली.

आर्थर ओमजूर हाणें "घाल नदर" म्हळ्ळी कविता वाचून कविगोश्टीक अधिकृत सुरवात दिली. उत्रां गुंतच्या अपल्या विशेस तालेंतान नेटयिल्ली ही कविता आर्थरान आपल्याच खास शैलेन वाचन सभिकांची शाभासकी जोडली. दायजी दुबाय कविगोश्टीक पयलें पावटीं हाजर जाल्ल्या कविता ट्रस्ट कविता वाचन सरतेचें विजेत कवयत्री सिद्धी शेट रायकरान "भुरगेपण" आनी "याद" म्हळ्ळ्यो कविता पेश कर्न हाजर असलेल्यांच्या बाळपणाच्या यादींक जागयलें. युव कवी स्ट्यानी बेळान "दोरो" आनी "एके स्त्रीयेची कथा" म्हळ्ळ्यो कविता पेश कल्यो तर "निमाणी सयरीक" नामणेच्या पी.जे करुगळनडेन (पियुस जेम्स) "काळ बदल्ला" आनी "मान" कविता वाचून सभिकांची चिंतपा ऊब चडयली. सयरी कवयत्री जावन हाजर जाल्ल्या श्रीमती रूपली मौजो कीरतनीन आपली फामाद कविता "बावले तूं अशीच राव" आनी आपल्या कविता पुंज्यांतल्यो हेर मटव्यो कविता पेश केल्यो. कवी दिनेश कोरेयान पाकिस्थानांतल्या पेशावर सैनिक इस्कोलावयर जाल्ल्या आतंकी हल्ल्याच्या पाठथळार बरयिल्ली "तुमकां कितें उरचें" म्हळ्ळी कविता पेश केली.

आकरेक कविगोश्टिचो तांडेली जावनासल्ल्या रोबर्ट उदयावरान "एक पेकेट बिसकेट" म्हळ्ळी गंभीर कविता सवें आनी "बैकार सवारी" म्हळ्ळी हास्य कविता पेश केली आनी कविगोष्टींत भाग घेतल्ल्या कविंचो आनी सभिकांचो उपकार आटयलो.

सयरी कवयत्री रूपली कीरतनीक कोंकणी साहिती स्टेन अगेरान स्मरणिका दीवन मान केलो आनी पयलें पावटीं दायजी मांचियेर आयिल्ल्ली कवयत्री सिद्धी शेट रायकराक दायजी संचालक रोनी बैंदूरान स्मरणिका दीवन मान केलो.

संपवणे कार्यक कोंकणी वावराडी आनी मेरिट फ्रैट सिसटम्स हाचो म्हालक श्री जोसेफ मथायस, दायजी दुबाय स्थापक संचालक श्री डयान डी सोज मुखमार वेदीर हाजर असल्ले.

-भातमी: स्टेनी बेळा