ಕವಿತಾ ಫೆಸ್ತ್ - 2015 ಜನೆರ್ 11 ತಾರಿಕೆರ್ ಚೌಳಿಕೆರೆ ಬಾರ್ಕೂರಾಂತ್ - ಸಮೇಸ್ತಾಂಕ್ ವೊವ್ಳಿಗ್

ಕವಿತಾ ಫೆಸ್ತ್ - 2015 ಜನೆರ್ 11 ತಾರಿಕೆರ್ ಚೌಳಿಕೆರೆ ಬಾರ್ಕೂರಾಂತ್ - ಸಮೇಸ್ತಾಂಕ್ ವೊವ್ಳಿಗ್

ಕವಿತಾ ಟ್ರಸ್ಟ್ - ಕೊಂಕಣಿ ಕವಿತೆಚೆ ಸಮಗ್ರ್ ವಾಡಾವಳಿ ಖಾತೀರ್ ವಾವುರ್‍ಚೆಂ ಟ್ರಸ್ಟ್. ಕವಿಗೋಷ್ಟಿ, ಕವಿತಾ ಉಪನ್ಯಾಸ್, ಕವಿತಾ ಬರೊಂವ್ಚಿ ಸರ್ತ್, ಕವಿತಾ ವಾಚನ್ ಸರ್ತ್, ಕವಿತಾ ಪುರಸ್ಕಾರ್, ಪ್ರಕಾಶನ್ ಅಶೆಂ ಜಾಯ್ತ್ಯಾ ಕಾಮಾಂನಿ ಆಪ್ಣಾಕಚ್ ಸಮರ್ಪಿತ್ ಕೆಲ್ಲೊ ಸಂಸ್ಥೊ ಹೊ, ಪಾಟ್ಲ್ಯಾ ಧಾ ವರ್ಸಾಂನಿ ಆಪ್ಲೊಚ್ ಜಾಳಿ ಜಾಗೊ (ವೆಬ್‌ಸೈಟ್) ಚಲೊವ್ನ್ ಆಸಾ.

ಪಾಟ್ಲ್ಯಾ ಆಟ್ ವರ್ಸಾಂ ಥಾವ್ನ್ ಕವಿತಾ ಫೆಸ್ತ್ ಚಲೊವ್ನ್ ಆಯಿಲ್ಲೆಂ ಕವಿತಾ ಟ್ರಸ್ಟ್ ಹ್ಯಾಚ್ ಜನೆರಾಚೆ 11 ತಾರಿಕೆರ್ ಉಡುಪಿ ಜಿಲ್ಲ್ಯಾಚ್ಯಾ ಬಾರ್ಕೂರ್‍ಚ್ಯಾ ಚೌಳಿಕೆರೆ ಲಾಗಿಂ ಶ್ರೀ ಸ್ಟೇನಿ ಆನಿ ಗ್ರೆಟ್ಟಾ ಲುವಿಸ್ ಹಾಂಚ್ಯಾ ಘರ್‍ಚ್ಯಾ ಆಂಗ್ಣಾಂತ್ ನೊವೆಂ ಕವಿತಾ ಫೆಸ್ತ್ ಮಾಂಡುನ್ ಹಾಡ್ತಾ.

ಚೌಳಿಕೆರೆ ತಳೆಂ




ಕವಿತಾ ಫೆಸ್ತಾಚೊ ಜಾಗೊ

ಭಾರತಾಚೊ ನಿವೃತ್ತ್ ರಾಯ್‍ಭಾರಿ ಪಾಸ್ಕಲ್ ಆಲೆನ್ ನಜರೆತ್ ಹಾಂಣಿ ಉಗ್ತಾವಣ್ ಕರ್‍ಚ್ಯಾ ಹ್ಯಾ ಫೆಸ್ತಾಕ್, ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಟಾನಾಚೊ ಅಧ್ಯಕ್ಷ್ ಬಸ್ತಿ ವಾಮನ್ ಶೆಣೈ, ದಿ ಎಕ್ಸಪ್ರೆಶನ್ಸ್ ಹಾಚೊ ಅಧ್ಯಕ್ಷ್ ನವೀನ್ ಡಾಯಸ್ ಮಾನಾಚೆ ಸೈರೆ ಮ್ಹಣುನ್ ಯೆತಲೆ. ಸಾಂಜೆಚ್ಯಾ ಸಮಾರೋಪ್ ಕಾರ್ಯಾಕ್ ಗೊಂಯ್ಚೊ ಕೊಂಕಣಿ ಕವಿ ಮಾಧವ್ ಬೋರ್ಕರ್ ಯೆಂವ್ಚೊ ಆಸುನ್, ಮಾನಾಚೆ ಸೈರೆ ಜಾವ್ನ್ ಎಮ್. ಎ. ರೆಹಮಾನ್ ಆನಿ ಬಾರ್ಕೂರ್ ಇಗರ್ಜೆಚೊ ವಿಗಾರ್ ಫಾ. ವಲೇರಿಯನ್ ಮೆಂಡೊನ್ಸಾ ಯೆತಲೆ.

ಗೊಂಯ್ಚೊ ಕವಿ ಪೂರ್ಣನಂದಾ ಚಾರಿಚ್ಯಾ ಮುಕೆಲ್ಪಣಾಖಾಲ್ ಕವಿಗೋಷ್ಟಿ ಚಲ್ಚಿ ಆಸುನ್ ಸಿಜ್ಯೆಸ್ ತಾಕೊಡೆ, ಫೆಲ್ಸಿ ಲೋಬೊ, ಜ್ಞಾನದೇವ್ ಮಲ್ಯ, ನೀಲ್ಬಾ ಖಾಂಡೇಕಾರ್, ಯೋಗಿನಿ ಆಚಾರ್ಯ, ಎರಿಕ್ ಸೋನ್ಸ್ - ಕೊಂಕಣಿ ಕವಿತಾ ವಾಚ್ತಲಿಂ ಜಾಲ್ಯಾರ್, ಚೆನ್ನೈಚಿ ಕವಯಿತ್ರಿ ಸಲ್ಮಾ ತಮಿಳ್ ಕವಿತಾ, ನಮಿತಾ ವರ್ಮಾ ಇಂಗ್ಲಿಷ್ ಕವಿತಾ ಆನಿ ವಿ. ಕೆ. ಯಾದವ್ ತುಳು ಕವಿತಾ ವಾಚನ್ ಕರ್‍ತಲಿಂ.

ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ವಿಜೇತ್ ಕವಿ ರಮೇಶ್ ವೆಳುಸ್ಕಾರಾಲಾಗಿಂ ಆನ್ಯೇಕ್ಲೊ ಕವಿ ಡೊ. ರಾಜಯ್ ಪವಾರ್ ಸಂವಾದ್ ಚಲಂವ್ಚೊ ಆಸುನ್, ಭುರ್ಗ್ಯಾಂಚ್ಯಾ ಆನಿ ಯುವಜಣಾಂಚ್ಯಾ ಕವಿತಾ ವಾಚನ್ ಸರ್ತೆಚೊ ನಿಮಾಣೊ ಪಾಂವ್ಡೊ ಹ್ಯಾಚ್ ಸಂದರ್ಭಾರ್ ಚಲ್ತಲೊ. ಭಟ್ಕಳ್ಚೊ ಕೊಂಕಣಿ ಕವಿ ಇಕ್ಬಾಲ್ ಸಯೀದಿ ಹಾಂಕಾಂ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಹಾತಾಂತರ್ ಜಾತಲೊ ಆನಿ ಕೊಂಕಣಿ ಕವಿತಾ ಬರೊಂವ್ಚೆ ಸರ್ತೆಂತ್ ಜಿಕ್ಲಲ್ಯಾಂಕ್ ಇನಾಮಾಂಯ್ ಹ್ಯಾಚ್ ಸಂದರ್ಭಾರ್ ವಾಂಟ್ತಲೆ.

ಮಂಗ್ಳುರ್ ಥಾವ್ನ್ ಬಾರ್ಕೂರ್ ವಚುನ್ ಯೇಂವ್ಕ್ ಬಸ್ಸಾಂಚಿ ವೆವಸ್ಥಾ ವ್ಯವಸ್ಥಾಪಕಾಂನಿ ಕೆಲ್ಯಾ. ಕರ್ನಾಟಕ ಭಾಯ್ರ್ ಥಾವ್ನ್ ಯೆತಲ್ಯಾಂಕ್ ರಾವ್ಪಾಚಿ ತಶೆಂ ಜೆವ್ಣಾಚಿ ವೆವಸ್ಥಾಯ್ ಆಸಾ.

For Read More Details in English CLICK HERE

कविता फेस्त - 2015 जानेर 11 तारकेर चौळीकेरे बारकूरांत - समेस्तांक वोवळीग

कविता ट्रस्ट - कोंकणी कवितेचे समग्र वाडावळी खातीर वावुरचें ट्रस्ट. कविगोष्टी, कविता उपन्यास, कविता बरोंवची सर्त, कविता वाचन सर्त, कविता पुरस्कार, प्रकाशन अशें जायत्या कामांनी आपणाकच समर्पीत केल्लो संस्थो हो, फाटल्या धा वर्सांनी आपलोच जाळी जागो (वेबसैट) चलोवन आसा.

फाटल्या आट वर्सां थावन कविता फेस्त चलोवन आयिल्लें कविता ट्रस्ट ह्याच जानेराचे ११ तारिकेर उडुपी जिल्ल्याच्या बारकूरच्या चौळिकेरे लागीं श्री स्टेनी आनी ग्रेट्टा लुविस हांच्या घरच्या आंगणांत नोवें कविता फेस्त मांडून हाडता.

भारताचो निवृत्त रायभारी पास्कल एलॅन नजरेत हांणी उगतावण करच्या ह्या फेस्ताक, कोंकणी भास आनी संस्कृती प्रतिष्टानाचो अध्यक्ष बस्ती वामन शेणै, दी एक्सप्रेशन्स हाचो अध्यक्ष नवीन डायस मानाचे सैरे म्हणून येतले. सांजेच्या समारोप कार्याक गोंयचो कोंकणी कवी माधव बोरकर येंवचो आसून, मानाचे सैरे जावन एम. ए. रेहमान आनी बारकूर इगर्जेचो विगार फा. वलेरियन मेंडोन्सा येतले.

गोंयचो कवी पूर्णनंदा चारीच्या मुकेलपणाखाल कवीगोष्टी चलची आसून सिज्येस ताकोडे, फेल्सी लोबो, ज्ञानदेव मल्या, नीलबा खांडेकार, योगिनी आचार्य, एरीक सोन्स - कोंकणी कविता वाचतलीं जाल्यार, चेन्नैची कवयित्री सल्मा तमिळ कविता, नमिता वर्मा इंगलिष कविता आनी वी. के. यादव तुळू कविता वाचन करतलीं.

साहित्य अकाडेमी प्रशस्ती विजेत कवी रमेश वेळुस्कारालागीं आन्येकलो कवी डॉ. राजय पवार संवाद चलंवचो आसून, भुरग्यांच्या आनी युवजणांच्या कविता वाचन सर्तचो निमाणो पांवडो ह्याच संदरभार चलतलो. भटकळचो कोंकणी कवी इकबाल सयीदी हांकां मथायस कुटम कविता पुरस्कार हातांतर जातलो आनी कोंकणी कविता बरोंवचे सरतेंत जिकलल्यांक इनामांय ह्याच संदरभार वांटतले.

मंगळूर थावन बारकूर वचून येवंक बशींची वेवस्था व्यवस्थापकांनी केल्या. कर्नाटक भायर थावन येतल्यांक रावपाची तशें जेवणाची वेवस्थाय आसा.