ಸಿಮಿಸ್ತ್ರಿಂತ್ ಕವಿತಾ ವಾಚನ್. 'ಎ.ಟಿ. ಲೋಬೊ - ಕಾವ್ಯಾಳ್ ಜಿವಿತ್' ಏಕ್ ಅಪ್ರೂಪಾಚೆಂ ಘಡಿತ್

ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲೆಂ 'ಎ. ಟಿ. ಲೋಬೊ - ಕಾವ್ಯಾಳ್ ಜಿವಿತ್' ಕಾರ್ಯೆಂ, ಅಡೇಜ್ ವೊರಾಂನಿ, ತೀನ್ ಜಾಗ್ಯಾಂನಿ ಜಾಲ್ಲ್ಯಾ ಸಂವಾದಾಂ ಮಾರಿಫಾತ್, ಎ. ಟಿ. ಲೋಬೊನ್ ಬರಯಿಲ್ಲ್ಯಾ ಕವಿತಾಂಚ್ಯಾ ವಾಚನಾ ಮಾರಿಫಾತ್, ತಶೆಂಚ್ ಇಜಯ್ ಸಿಮಿಸ್ತ್ರಿಂತ್ ಆಸ್ಚೆ ತಾಚೆ ಸಮಾಧಿಲಾಗಿಂ ಎ. ಟಿ. ಲೋಬೊಕ್ ಮುಖಾರ್ ದವರುನ್ 'ಮರ್ಣಾ ಉಪ್ರಾಂತ್ ಮನ್ಶಾಚೆಂ ಜಿವಿತ್' ಮ್ಹಳ್ಳೆ ಸಂಗ್ತಿಚೆರ್ ನಿಯಾಳ್ ಕರುನ್, ಕೊಂಕಣಿಂತಚ್ ಏಕ್ ಅಪ್ರೂಪ್ ಕಾರ್ಯೆಂ ಮ್ಹಳ್ಳಿ ಹೊಗ್ಳಿಕ್ ಆಪ್ಣಾಂವ್ಕ್ ಸಕ್ಲೆಂ. ಎ. ಟಿ. ಲೋಬೊ ಫೌಂಡೇಶನಾಚ್ಯಾ ಜೋಡ್ ಆಶ್ರಯಾಖಾಲ್ ಮಾಂಡುನ್ ಹಾಡಲ್ಲೆಂ ಹೆಂ ಕಾರ್ಯೆಂ ಹ್ಯಾಚ್ ಮಾರ್ಚ್ 1 ತಾರಿಕೆರ್ ಆಯ್ತಾರಾ ಸಾಂಜೆರ್ ಸಾಡೆ-ಚ್ಯಾರ್ ಥಾವ್ನ್ ಸಾತ್ ವೊರಾಂ ಪರ್‍ಯಾಂತ್ ಚಲ್ಲೆಂ.

ಹ್ಯಾ ಯಾದಗಾರ್‍ ಪಯ್ಣಾಚೆಂ ಪಯ್ಲೆಂ ಸ್ತೆಸಾಂವ್ ಎ. ಟಿ. ಲೋಬೊಚೊ ಭಾವ್ ಲೊರೆನ್ಸ್ ಲೋಬೊ ಆನಿ ಭಾವೊಜ್ ಆಲಿಸ್ ಲೋಬೊಚ್ಯಾ ಬಿಜೈ ಕಾಪಿಕಾಡ್ ಆಸ್ಚ್ಯಾ ಘರ್‍ಚ್ಯಾ ಆಂಗ್ಣಾಂತ್ ಚಲ್ಲೆಂ. ಸುರ್ವೆರ್ ಕವಿತಾ ಟ್ರಸ್ಟಾಚೊ ಟ್ರಸ್ಟಿ ವಿತೊರಿ ಕಾರ್ಕಳಾನ್ ಎ. ಟಿ. ಲೋಬೊಚಿ ಕೊಂಕಣಿಚೆಂ ಗುಣ್‌ಗಾನ್ ಗಾಂವ್ಚಿ 'ಮಾಣ್ಕುಲೆಂ ಮ್ಹಜೆಂ ಕೊಂಕಣ್, ಚಂದನಾಚಿ ಬಾವ್ಲಿ' ಕವಿತಾ ವಾಚುನ್ ಮೆಳಾವ್ಯಾಕ್ ಭರಮ್ ಹಾಡ್ಲೊ. ಕಾರ್ಯಾಚ್ಯಾ ಪಯ್ಲೆಂ ಹ್ಯಾ ಮಾರ್ಚ್ ಮ್ಹಯ್ನ್ಯಾಕ್ ಅಪ್ರೂಪ್ ಸೈರೊ ಮ್ಹಳ್ಳೆಬರಿ ಪಾವ್ಸ್ ಶಿಂವ್ರಾಲ್ಲೊ ತರೀ ರಚ್ನಾರಾಚಿಂ ಬೆಸಾಂವಾಂ ಚಡ್ತಿಕ್ ಆಪ್ಣಾಂವ್ಕ್ ಮೌನ್ ಪ್ರಾರ್ಥನ್ ಸರ್ವಾಂನಿ ಕೆಲೆಂ. ಅನಿಲ್ ಪತ್ರಾವೊ ತಶೆಂ ಸಾಂಗಾತ್ಯಾಂನಿ ಎ. ಟಿ. ಲೋಬೊಚಿ ಖವಾಲಿ 'ಆಮ್ಕಾಂ ಭೇದ್ ಕಿತ್ಯಾಕ್? ಜಾತ್ ಆನಿ ಕುಳಿ ಕಿತ್ಯಾಕ್? ಆಮ್ಕಾಂ ಹಗೆಂ ಜಾಯ್ ಕಿತ್ಯಾಕ್? ಆಮಿ ದುಸ್ಮಾನ್ ಜಾಯ್ಜಾಯ್ ಕಿತ್ಯಾಕ್?' ಗಾಯ್ಲಿ. ಬೋವ್ ಸುಂದರ್ ರಿತಿನ್ ಹಾರ್ಮೋನಿಯಮ್, ಧೋಲಕ್ ತಶೆಂ ಗಿತಾರ್ ವ್ಹಾಜಂತ್ರಾಂ ಸಂಗಿಂ ಗಾಯ್ಲೆಲಿ ಹಿ ಖವಾಲಿ ಜಾತಾಂ ಜಾತಾನಾ ಸರ್ವಾಂನಿ ತಾಳಿಯಾಂಚ್ಯಾ ಶಿಂವರಾ ಸಾಂಗಾತಾ ಪೊಟ್ಲುನ್ ಧರ್‍ಲಿ.

ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಆಪ್ಲ್ಯಾ ಯೆವ್ಕಾರ್ ಉಲೊವ್ಪಾಂತ್ 'ಹೆ ಭುಂಯ್ಚೆ ಮಾತ್ಯೆಂತ್ ಜಾಯ್ತೆ ಮ್ಹಾಪುರುಷ್, ಮ್ಹಾ ಸ್ತ್ರೀಯೊ ಯೇವ್ನ್ ಗೆಲ್ಯಾತ್. ತಾಂಣಿ ತಾಂಚೆ ಸಮಾಜ್ ಸೆವೆದ್ವಾರಿಂ, ಸಾಹಿತ್ಯಾದ್ವಾರಿಂ ಆಮ್ಚ್ಯಾ ಗಾಂವ್ಚೆ ಸಮತೂಕ್ ಸಾಂಬಾಳುನ್ ವೆಲಾಂ. ಆಮ್ಚ್ಯಾ ಗಾಂವ್ಚೆಂ ಸಮತೋಲನ್ ರಾಕುನ್ ವೆಲಾಂ. ತಸಲ್ಯಾ ಮ್ಹಾಪುರುಷಾಂ ಪಯ್ಕಿ ಎ. ಟಿ. ಲೋಬೊ ಎಕ್ಲೊ.  ಚೆನ್ನ, ಎಟ್ಯೆಲ್ ನಾಂವಾಖಾಲ್ ಬರೊವ್ನ್ ಆಸಲ್ಲ್ಯಾ ಆಪೊಲ್ಲೊ ತೊಮಾಸ್ ಲೋಬೊನ್ ಆಪ್ಲ್ಯಾ ಕಾದಂಬರಿಂನಿ ತಶೆಂ ನಾಟಕಾಂನಿ ಕೊಂಕಣಿಕಚ್ ಅಪ್ರೂಪಾಚ್ಯೊ ಥೊಡ್ಯೊ ಖವಾಲಿ, ಶಾಯರಿ, ಕವಿತಾ, ಗಿತಾಂ ಬರೊವ್ನ್ ದವರ್‍ಲ್ಯಾಂತ್. ಹಾಂಚೆಂ ಪುಸ್ತಕ್ ಛಾಪುನ್ ಆಯಿಲ್ಲೆಂ ನಾ ದೆಕುನ್ ಕೊಣಯ್ ಎ. ಟಿ. ಲೋಬೊಕ್ ಕವಿ ಮ್ಹಣುನ್ ಆಪಯಿಲ್ಲೆಂ ನಾ. ತ್ಯಾ ದೆಕುನ್ ತಾಚ್ಯಾ ಶಾಯರಿಂಚೊ ಸಂಗ್ರಹ್ ಪರ್ಗಟ್ ಕರುನ್, ತಾಕಾ ಕವಿಂಚೆ ವಳೆರಿಂತ್ ಭರ್ತಿ ಕರ್‍ಚೆಂ ಕಾಮ್ ಆಜ್ ಕವಿತಾ ಟ್ರಸ್ಟ್ ಕರೀತ್ ಆಸಾ' ಮ್ಹಣುನ್ ಸಾಂಗ್ಲೆಂ.

ಕವಿತಾ ಟ್ರಸ್ಟಾಚ್ಯಾ ವಾವ್ರಾಚೊ ಉಲ್ಲೇಕ್ ಕೆಲ್ಲ್ಯಾ ತಾಣೆ, ಹೆಂ ಕಾರ್ಯೆಂ ಮಾಂಡುನ್ ಹಾಡುಂಕ್ ಪ್ರೇರಣ್ ದಿಲ್ಲ್ಯಾ ಎ.ಟಿ ಲೋಬೊ ಫೌಂಡೇಶನಾಚಿ ತೊಖ್ಣಾಯ್ ಕೆಲಿ. ಪ್ರತ್ಯೇಕ್ ಕರುನ್ ಎ. ಟಿ. ಲೋಬೊಚೊ ಪುತ್ನ್ಯೊ ಸೈಮನ್ ಲೋಬೊಚ್ಯಾ ಉತ್ತೇಜನಾ ವರ್ವಿಂ ಹೆಂ ಕಾರ್ಯೆಂ ಘಡೊವ್ನ್ ಹಾಡುಂಕ್ ಸಾಧ್ಯ್ ಜಾಲಾಂ ಮ್ಹಣ್ ತಾಣೆ ಸಾಂಗ್ಲೆಂ.

ಕನ್ಸೆಪ್ಟಾ ಫೆರ್ನಾಂಡಿಸಾನ್ ಎ. ಟಿ. ಲೋಬೊಚ್ಯೊ ತೀನ್ ಶಾಯರಿ 'ರಡ್ತಾ ತಾಕಾ ಹಾಸಯ್', 'ಪರ್ಜಳ್ ತ್ಯಾ ನೆಕೆತ್ರಾಂಚೊ' ಆನಿ 'ಖಾಂದಾರ್ ಪಾಲಂವ್ ಪಡ್ತಾವರೇಗ್' ವಾಚುನ್ ಸಾಂಗ್ತಚ್ ದೆವಾಧಿನ್ ಲೇಖಕಾಚೊ ಭಾವ್ ಲೊರೆನ್ಸ್ ಲೋಬೊ ತಶೆಂ ಭಯ್ಣ್ ಮೊಂತಿ ಮೊಂತೇರೊ ಹಾಂಣಿ ಮೆಲ್ವಿನ್ ರೊಡ್ರಿಗಸ್ ಹಾಚೆ ಸಾಂಗಾತಾ 'ಎ.ಟಿ. ಲೋಬೊ - ಏಕ್ ಕಾವ್ಯಾಳ್ ಪಯ್ಣ್' ಪುಸ್ತಕ್ ಲೋಕಾರ್ಪಣ್ ಕೆಲೆಂ. ಭಾಚಿ ಸೆಲಿನ್ ಸಿಕ್ವೇರಾನ್ ಹಾಜರ್ ಆಸಲ್ಲ್ಯಾ ಸಗ್ಳ್ಯಾ ಕುಟ್ಮಾದಾರಾಂಚಿ ವೊಳಕ್ ಕರುನ್ ದಿಲಿ.

ಮೆಲ್ವಿನ್ ರೊಡ್ರಿಗಸಾನ್ ಲೊರೆನ್ಸ್ ಲೋಬೊ ಆನಿ ಮೊಂತಿ ಮೊಂತೇರೊಲಾಗಿಂ ಚಲಯಿಲ್ಲ್ಯಾ ಸಂವಾದಾಂತ್ ಜಾಯ್ತ್ಯೊ ಸ್ವಾರಸ್ಯಭರಿತ್ ಗಜಾಲಿ ಹಾಜರ್ ಆಸಲ್ಲ್ಯಾಂಕ್ ಆಯ್ಕುಂಕ್ ಮೆಳ್ಳ್ಯೊ. "ಲೋಬೊಗೆಲೆಂ ಕುಟಮ್ ನೆಲ್ಲಿತೀರ್ಥಾಚೆಂ. ಮ್ಹಳ್ಯಾರ್ ನೀರುಡೆ, ಫೆರಾರ್ ಆನಿ ಬಜ್ಬ್ಯಾಂ ಮಧ್ಲೊ ಗಾಂವ್. ಎ. ಟಿ. ಲೋಬೊ ದೇಡ್ ವರ್ಸಾಂಚೊ ಆಸ್ತಾನಾ ತಾಚೆ ಆಜಿಯೆನ್ - ಆವಯ್ಚೆ ಆವಯ್ನ್ - ತಾಕಾ ಕೊಡಿಯಾಳ್ ಆಪ್ಣಾಸರ್‍ಶಿಂ ರಾವುಂಕ್ ಹಾಡ್ಲೆಂ. ಆಜಿ ಮೇರಿ ಕೊಸೆಸ್ ಕುತಿಞ್ ತವಳ್ ಹಂಪನ್‌ಕಾಟ್ಯಾರ್ ಆತಾಂ ಆಸ್ಚ್ಯಾ ಸೆಂಟ್ರಲ್ ಟೊಕಿಸಾಚ್ಯಾ ಜಾಗ್ಯಾಲಾಗಿಂ ಹೊಟೆಲ್ ಚಲಯ್ತಾಲಿ. ಎ. ಟಿ. ಲೋಬೊನ್ ರುಜಾಯ್ ತಶೆಂ ಸಾಂ. ಲುವಿಸ್ ಕೊಲೆಜಿಚ್ಯಾ ಶಾಳೆಂತ್ ಶಿಕಪ್ ಜೊಡ್ಲೆಂ. ಸೊಳಾ ವರ್ಸಾಂ ಪ್ರಾಯೆರ್ ತಾಕಾ ತಿಣೆಂ ಬೊಂಬಯ್ ಧಾಡ್ಲೆಂ. ಬೊಂಬಯ್ ಪಾವುನ್ ದೇಡ್ ವರ್ಸಾನ್ ಬಾಪುಯ್ ಸರ್ಲೊ. ಸಗ್ಳ್ಯಾ ಕುಟ್ಮಾಚೊ ಹಾರ್‌ಭಾರ್ ತಾಚ್ಯಾ ಮಾತ್ಯಾರ್ ಪಡ್ಲೊ" ಹ್ಯೊ ಆನಿ ಜಾಯ್ತ್ಯೊ ಹೆರ್ ಗಜಾಲಿ ಸಾಂಗಲ್ಲ್ಯಾ ಲೊರೆನ್ಸ್ ಲೋಬೊನ್ ಆಪ್ಣೆಂ ಬೀಡಿ ವೊಡುಂಕ್ ಧರಲ್ಲ್ಯಾ ವೆಳಾರ್ ಆನಿ ಸಟ್ಟ್ಯಾಂತ್ ದುಡು ಘಾಲುಂಕ್ ಲಾಗಲ್ಲ್ಯಾ ವೆಳಾರ್ ಎ. ಟಿ. ಲೋಬೊನ್ ಕಶೆಂ ಆಪ್ಣಾಕ್ ತಾಂತ್ಲೆಂ ನಿವ್ರಾಯ್ಲೆಂ ಮ್ಹಣುನ್ ಸೊಭಿತ್ ಕರುನ್ ಸಾಂಗ್ಲೆಂ. ಮುಕಾರಿಂ ಉಲೊವ್ನ್ ಆಪುಣ್ ಕುವೈಟಾಕ್ ಪಾವುಂಕ್ ಎ. ಟಿ. ಲೋಬೊ ಸಾಂಗಾತಾ ದುಸ್ರೊ ಭಾವ್ ಕಾರಣ್ ಆನಿ ಕುವೈಟಾಂತ್ ಆಪ್ಣಾಕ್ ಸರ್ಕಾರಿ ಕಾಮ್ ಮೆಳುಂಕಯ್ ಎ. ಟಿ. ಲೋಬೊಚ್ ಕಾರಣ್ ಮ್ಹಣುನ್ ಸಾಂಗ್ಲೆಂ.

ಭಯ್ಣ್ ಮೊಂತಿ ಮೊಂತೇರೊ ಉಲೊವ್ನ್, "ಜಿವಿತಾಂತ್ ಜಾಯ್ತೆ ಕಷ್ಟ್ ಆಸಲ್ಲೆ. ಮ್ಹಜ್ಯಾ ಕಾಜಾರಾ ವೆಳಾರ್ ದಾಟ್ಟುಕ್ (ಎ. ಟಿ. ಲೋಬೊಕ್) ಯೇಂವ್ಕ್ ಜಾಂವ್ಕ್ ನಾ. ತರೀ ತಾಣೆಂ ಬೊಂಬಯ್ ಥಾವ್ನ್ ವಸ್ತುರಾಚಿ ಪೊಟ್ಲಿ ಧಾಡಲ್ಲಿ. ಏಕ್ ಪಾವ್ಟಿಂ ಮ್ಹಜೆ ಲ್ಹಾನ್ ಪ್ರಾಯೆರ್ ಆವಯ್ ವಯ್ಲ್ಯಾ ರಾಗಾನ್ ವ್ಹಡ್ ಕೊಳ್ಸೊ ಘೆವ್ನ್ ಉದಕ್ ಹಾಡಲ್ಲ್ಯಾಕ್ ತಾಣೆ ಆಪ್ಣಾಕ್ ಜ್ಯೋರ್ ಕೆಲ್ಲೆಂ ಸೊಡ್ಲ್ಯಾರ್ ಕೆದಳಾಯ್ ದಾಟ್ಟುನ್ ಆಪ್ಣಾಕ್ ಜ್ಯೋರ್ ಕೆಲ್ಲೆಂ ನಾ. ತೇಂಯ್ ಜಾಲ್ಯಾರಿ, ವ್ಹಡ್ಲ್ಯಾ ಕೊಳ್ಶಾಂತ್ಲೆಂ ಉದಕ್ ವೊಡುಂಕ್ ಕಿತ್ಲೆಂ ಕಷ್ಟ್ ಜಾಲೆ ಕೊಣ್ಣಾ ಮ್ಹಳ್ಳೆ ಮ್ಹಜೆ ವಯ್ಲೆ ಭಿರ್ಮತೆನ್ ತಾಣೆ ಜ್ಯೋರ್ ಕೆಲ್ಲೆಂ" ಮ್ಹಣುನ್ ಎ. ಟಿ. ಲೋಬೊಚ್ಯಾ ಬರ್‍ಯಾ ಗುಣಾಂಚಿ ತಿಣೆ ವ್ಹಡ್ವಿಕ್ ಸಾಂಗ್ಲಿ. ಎಡಿ ನೆಟ್ಟೊ ತಶೆಂ ಡೇವಿಡ್ ಧರ್ಮಗಿರಿ ಹಾಂಣಿ ಹ್ಯಾ ಸಂವಾದಾಂತ್ ಭಾಗ್ ಘೆತ್ಲೊ.

ಪ್ರಿಥುಮಾ ಮೊಂತೇರೊ ಆನಿ ಚಂದ್ರಿಮಾ ಮೊಂತೇರೊ - ಹ್ಯಾ ಭುರ್ಗ್ಯಾಂನಿ ಎ. ಟಿ. ಲೋಬೊನ್ ಭುರ್ಗ್ಯಾಂ ಖಾತೀರ್ ಬರಯಿಲ್ಲಿಂ ಗಾಣಾಂ ಗಾಯ್ಲಿಂ. ಎ. ಟಿ. ಲೋಬೊ ಫೌಂಡೇಶನಾಚಿ ಅಧ್ಯಕ್ಷಿಣ್ ಆಲಿಸ್ ಲೋಬೊನ್ ಉಪ್ಕಾರ್ ಆಟಯ್ಲೊ. ಎವ್ರೆಲ್ ರೊಡ್ರಿಗಸಾನ್ ಸಗ್ಳೆಂ ಕಾರ್ಯೆಂ ಚಲೊವ್ನ್ ವೆಲೆಂ.

ಧಾ ಮಿನುಟಾಂಚ್ಯಾ ವಿರಾಮಾ ಉಪ್ರಾಂತ್ ಕೊಟ್ಟಾರ್ ಕ್ರೊಸ್ ರೈಮಂಡ್ ಲೋಬೊ ಆನಿ ವೆರೊನಿಕಾ ಲೋಬೊಚ್ಯಾ ಘರ್‍ಚ್ಯಾ ಆಂಗ್ಣಾಂತ್ ಸರ್ವಾಂ ಮೆಳ್ತಚ್ ಉಲಯಿಲ್ಲ್ಯಾ ಮೆಲ್ವಿನ್ ರೊಡ್ರಿಗಸಾಲಾಗಿಂ ಪಲ್ತಡಿ ರಸ್ತ್ಯಾಲಾಗಿಂ ಎ. ಟಿ. ಲೋಬೊ ಆಪ್ಲ್ಯಾ ಕಲಾಕಾರ್ ಇಷ್ಟಾಂ ಸಾಂಗಾತಾ ಕೆದಳಾಯ್ ಮೆಳ್ತಾಲೊ. ಮಿತ್ರ್ ಮಂಡಳಿ ಜಿ ವೆವೆಗ್ಳ್ಯಾ ಜಾಗ್ಯಾಂನಿ ನಾಟಕಾಂ ಖೆಳಯ್ತಾಲಿ, ತಿಚ್ಯೊ ಸಗ್ಳ್ಯೊ ಯೆವ್ಜಣ್ಯೊ ಥಂಯ್ಸರಚ್ ಜಾತಾಲ್ಯೊ. ಎ. ಟಿ; ಲೋಬೊಚ್ಯಾ ನಾಟಕಾಂನಿ ಪಾತ್ರ್ ಖೆಳಲ್ಲೆ ಕಲಾಕಾರ್ ಚಾರ್ಲಿ ಸಿಕೇರ್, ರೈಮಂಡ್ ಲೋಬೊ, ಫೆಲಿಕ್ಸ್ ಸಲ್ಡಾನ್ಹಾ, ಕಾರ್ಮೆಲಿಟಾ ಗೋವಿಯಸ್, ಜೊನಿ ಪಿರೇರ್, ಮೆಲ್ವಿನ್ ಪೆರಿಸ್ - ಹ್ಯಾ ಸಂದರ್ಭಾರ್ ಹಾಜರ್ ಆಸಲ್ಲೆ.

ಹ್ಯಾ ಸಂದರ್ಭಾರ್ ಉಲಯಿಲ್ಲ್ಯಾ ಫೆಲಿಕ್ಸ್ ಸಲ್ಡಾನ್ಹಾನ್ ಎ. ಟಿ. ಲೋಬೊ ಆಪ್ಲ್ಯಾ ನಾಟಕಾಂತ್ಲೆಂ ಸಂಭಾಷಣ್ ಬದ್ಲುಂಕ್ ಬಿಲ್ಕುಲ್ ಸೊಡಿನಾತಲ್ಲೊ. ಆಪ್ಲ್ಯಾ ನಾಟಕಾಂನಿ ಕೊಂಕಣಿ ಸೊಡುನ್ ಹೆರ್ ಭಾಶೆಚಿಂ ಉತ್ರಾಂ ಘಾಲಿನಾತಲ್ಲೊ ಮ್ಹಳೆಂ. ನಾಟಕ್ ಖೆಳ್ತಲ್ಯಾಂಕ್ ಕಾಂಯ್ ಮೆಳನಾತಲ್ಲೆಂ, ಪ್ರಾಕ್ಟೀಸಾವೆಳಾರ್ ಕಾಲಯಿಲ್ಲೊ ಫೊವ್ ಏಕ್ ಸೊಡ್ಲ್ಯಾರ್ ಮ್ಹಣುನ್ ಆದ್ಲೆ ಉಡಾಸ್ ಜಿವೆ ಕೆಲೆ. ಕಾರ್ಮೆಲಿಟಾ ಗೋವಿಯಸಾನ್ ಆಪುಣ್ ಕಶಿಂ 'ಆಂಕ್ವಾರ್ ಆವಯ್' ನಾಟಕಾಂತ್ ಪಯ್ಲೆ ಪಾವ್ಟಿಂ ನಟನ್ ಕರುಂಕ್ ಪಾವ್ಲಿಂ ಮ್ಹಣ್ ಕವಿತಾ ರುಪಾರ್ ಸಾಂಗ್ಲೆಂ. ಆಕ್ರೇ ಪಾಸುನ್ ಎಕೆ ಮ್ಹಾನ್ ವ್ಯಕ್ತಿತ್ವಾಚ್ಯಾ ಮಾರ್ಗದರ್ಶನಾಖಾಲ್ ಆಪ್ಣೆಂ ಕಶೆಂ ರಂಗಮಾಂಚಿಯೆಕ್ ಮೊಗಾಚೆಂ ಕರ್ನ್ ಘೆತ್ಲೆಂ ಮ್ಹಣುನ್ ತಿಣೆಂ ಸಾಂಗ್ಲೆಂ.

ಹ್ಯಾ ಸಂದರ್ಭಾರ್ ಫೆಲ್ಸಿ ಲೋಬೊ, ಜೊನ್ ಫೆರ್ನಾಂಡಿಸ್ ಆನಿ ಸೆಲಿನ್ ಸಿಕ್ವೇರಾ ಹಾಂಣಿ ಎ. ಟಿ. ಲೋಬೊಚ್ಯೊ ಶಾಯರಿ ವಾಚುನ್ ಸಾಂಗ್ಲ್ಯೊ. ರೈಮಂಡ್ ಲೋಬೊನ್ ಧನ್ಯವಾದ್ ದಿತಚ್ ದುಸ್ರ್ಯಾ ಸ್ತೆಸಾಂವಾ ಥಾವ್ನ್ ಸಕ್ಕಡಯ್ ತಿಸ್ರ್ಯಾ ಸ್ತೆಸಾಂವಾಕ್ ಗೆಲೆ.

ಬಿಜೈ ಇಗರ್ಜೆಚೆ ಸಿಮಿಸ್ತ್ರಿಂತ್ ಆಸ್ಚಿ ಎ. ಟಿ. ಲೋಬೊಚಿ ಸಮಾಧಿ ಫುಲಾಂಚ್ಯಾ ಪಾಕ್ಳೆಂನಿ ಸುಂರ್ಗಾರಾಯಿಲ್ಲೆ. ಪಣ್ತ್ಯೊ ಪೆಟಾಲ್ಯೊ. ಚಂದ್ರಿಮ್ ಉದೆವ್ನ್ ಯೆತಾಲೊ ಮಾತ್ರ್. ಹಾಜರ್ ಆಸ್ಚ್ಯಾ ಸರ್ವಾಂನಿ ಹಾತಾಂತ್ ಜಳ್ಚ್ಯೊ ವಾತಿ ಧರಲ್ಲ್ಯೊ. ಮಾರ್ಚ್ 2 ತಾರಿಕೆರ್ ಜಲ್ಮಲ್ಲ್ಯಾ ಎ. ಟಿ. ಲೋಬೊಚ್ಯಾ 95 ವ್ಯಾ ಜಲ್ಮಾದಿಸಾಚೆಂ ಆಚರಣ್ ಹೆಪರಿಂ ಜಾಯ್ತ್ ಮ್ಹಣುನ್ ಕೊಣೇಂಯ್ ಚಿಂತುಂಕ್ ನಾತಲ್ಲೆಂ. ಕಾಳೊಕ್ ಪಡುನ್ ಯೆತಾಲೊ ಮಾತ್ರ್. ತ್ಯಾ ವೆಳಾರ್ ಮೆಲ್ವಿನ್ ರೊಡ್ರಿಗಸಾನ್ 'ಮರ್ಣಾದ್ವಾರಿಂ ಆಪ್ಲ್ಯಾ ಜಿವಿತಾಕ್ ಸಂಪೂರ್ಣತಾ ಜೊಡುನ್ ದಿಲ್ಲೊ ಎ. ಟಿ. ಲೋಬೊ ಹಾಂಗಾಸರ್ ಜಿಯೆತಾ' ಮ್ಹಳೆಂ.

ಉಪ್ರಾಂತ್ ಮೆಲ್ವಿನ್ ಪೆರಿಸಾನ್ ಎ. ಟಿ. ಲೋಬೊಚ್ಯಾ ನಾಟಕಾಂನಿ ಆಪ್ಣಾಕ್ ದಿಲ್ಲ್ಯಾ ಸಮಾಧಾನಾವಿಶಿಂ ವಿವರ್ ದಿಲೊ ಆನಿ ತಾಚಿ ಶಾಯರಿ ವಾಚ್ಲಿ. ಎಡ್ಡಿ ಸಿಕೇರಿನ್ ತರೀ ತಸಲ್ಯಾಚ್ ಘಡಿತಾಂಚಿ ಯಾದ್ ಕರುನ್ ಶಾಯರಿ ವಾಚ್ಲಿ. ವಿಲಿಯಮ್ ಪಾಯ್ಸಾನ್ ಆನ್ಯೇಕ್ ಕವಿತಾ ವಾಚ್ಲಿ.

ಕೆನರಾ ಕಮ್ಯುನಿಕೇಶನ್ಸಾಚೊ ದಿರೆಕ್ತೊರ್ ಫಾ ರಿಚರ್ಡ್ ಡಿಸೋಜಾನ್ 'ಮರ್ಣಾ ಉಪ್ರಾಂತ್ ಜಿವಿತಾ ಕಶೆಂ ಜಿಯೆಂವ್ಕ್ ಸಾಧ್ಯ್ ಆಸಾ' ಮ್ಹಳ್ಳೆ ಸಂಗ್ತಿಚೆರ್ ಎ. ಟಿ. ಲೋಬೊಕ್ ಮುಕಾರ್ ದವರುನ್ ಉಲೊವ್ಪ್ ಕೆಲೆಂ. ವ್ಯಕ್ತಿ ಕೆದಳಾಯ್ ಮರನಾ. ಮರಣ್ ಎಕೆ ವ್ಯಕ್ತಿಚ್ಯಾ ಸಂಸಾರಾಚೆಂ ಮಾತ್ರ್ ಅಂತ್ಯ್. ತ್ಯಾ ಅಂತ್ಯಾ ಉಪ್ರಾಂತ್ ಸಭಾರ್ ವ್ಯಕ್ತಿಂಚ್ಯಾ ಸಂಸಾರಾಂತ್ ತಾಚೊ ಜಲ್ಮ್ ಜಾತಾ. ಜಶೆಂ ಎ. ಟಿ. ಲೋಬೊಚ್ಯಾ ಮರ್ಣಾಂತ್ ಆಮ್ಚೆ ಥಂಯ್ ಘಡ್ಲಾಂ. ತಶೆಂ ಘಡುಂಕ್ ನಾತಲ್ಲೆಂ ತರ್ ಇತ್ಲ್ಯಾ ಸಂಖ್ಯಾನ್ ಆಮಿ ಕೊಣೀಂಯ್ ಹಾಂಗಾಸರ್ ಪಾವ್ತೆನಾಂವ್" ಅಶೆಂ ತಾಂಣಿ ಸಾಂಗ್ಲೆಂ.

ಮೆಲ್ವಿನ್ ಪೆರಿಸ್ ಆನಿ ಅನಿಲ್ ಪತ್ರಾವೊನ್ ಮುಕೆಲ್ಪಣ್ ಘೆವ್ನ್ "ಹಿ ಘಡಿ ಮ್ಹಜ್ಯಾ ಜಿವಿತಾಚಿ" ಕಾಂತಾರ್ ಗಾಯ್ತಚ್, ಸರ್ವಾಂನಿ ಎಕೇಕ್ ಗುಲೊಬ್ ಸಮಾಧಿಚೆರ್ ದವ್ರುನ್ ಮ್ಹಾನ್ ಲೇಖಕ್ ಎ. ಟಿ. ಲೋಬೊಕ್ ಶೃದ್ಧಾಂಜಲಿ ಭೆಟಯ್ಲಿ.

ಹೆಂ ಕಾರ್ಯೆಂ ಸಭಾರ್ ಕಾಳಾ ಪರ್ಯಾಂತ್ ಉಡಾಸಾಂತ್ ಉರ್‍ಚೆಂ ಯಾದಗಾರ್ ಕಾರ್ಯೆಂ ಜಾಂವ್ಕ್ ಪಾವ್ಲೆಂ. ಹ್ಯಾ ಕಾರ್ಯಾಂತ್ ಎ. ಟಿ. ಲೋಬೊಚ್ಯಾ ಕುಟ್ಮಾಚ್ಯಾಂನಿ, ಕಲಾಕರಾಂನಿ, ಕೊಂಕಣಿ ಲೇಖಕಾಂನಿ ವಾಂಟೊ ಘೆತಲ್ಲೊ. ಸಾಹಿತ್ಯ ಅಕಾಡೆಮಿಚೊ ರಿಜಿಸ್ಟ್ರಾರ್ ದೇವದಾಸ್ ಪೈ, ಹೇಮಾಚಾರ್ಯ, ರಿಚರ್ಡ್ ಮೊರಾಸ್, ರೊನ್ ರೊಚ್ ಕಾಸ್ಸಿಯಾ, ಮನು ಬಾಹ್ರೇನ್, ಎಡಿ ನೆಟ್ಟೊ, ಗ್ಲೇಡಿಸ್ ರೇಗೊ, ಸಿಜ್ಯೆಸ್ ತಾಕೊಡೆ, ರೊನಿ ಸಿಕ್ವೇರಾ,ವ್ ಜೆ. ಎಫ್. ಡಿಸೋಜಾ, ಕೆವಿನ್ ಮಿಸ್ಕಿತ್, ವಿನ್ಸಿ ಪಿಂಟೊ, ಪ್ರವೀಣ್ ತಾವ್ರೊ ಆನಿ ಜಾಯ್ತ್ಯಾಂನಿ ವ್ಹಡೆ ಉರ್ಬೆನ್ ತೀನ್ ಸ್ತೆಸಾಂವಾಂಚ್ಯಾ ಹ್ಯಾ ಪಯ್ಣಾಂತ್ ಭಾಗ್ ಘೆತಲ್ಲೊ.

सिमीस्त्रींत कविता वाचन. 'ए.टी. लोबो - काव्याळ जिवित' एक अपरूपाचें घडीत

कविता ट्रस्टान मांडून हाडल्लें 'ए. टी. लोबो - काव्याळ जिवित' कारयें, अडेज वोरांनी, तीन जाग्यांनी जाल्ल्या संवादां मारिफात, ए. टी. लोबोन बरयिल्ल्या कवितांच्या वाचना मारिफात, तशेंच इजय सिमिस्त्रींत आसचे ताचे समाधिलागीं ए. टी. लोबोक मुखार दवरून 'मरणा उपरांत मनशाचें जिवित' म्हळ्ळे संगतिचेर नियाळ करून, कोंकणिंतच एक अपरूप कारयें म्हळ्ळी होगळीक आपणावंक सकलें. ए. टी. लोबो फौंडेशनाच्या जोड आश्रयाखाल मांडून हाडल्लें हें कारयें ह्याच मार्च १ तारिकेर आयतारा सांजेर साडे-च्यार थावन सात वोरां पर्यांत चल्लें.

ह्या यादगार पयणाचें पयलें स्तेसांव ए. टी. लोबोचो भाव लोरेन्स लोबो आनी भावोज आलीस लोबोच्या बिजै कापिकाड आसच्या घरच्या आंगणांत चल्लें. सुर्वेर कविता ट्रस्टाचो ट्रस्टी वितोरी कारकळान ए. टी. लोबोची कोंकणिचें गुणगान गांवची 'माणकुलें म्हजें कोंकण, चंदनाची बावली' कविता वाचून मेळाव्याक भरम हाडलो. काऱ्याच्या पयलें ह्या मार्च म्हयन्याक अपरूप सैरो म्हळळेबरी पावस शिंवराल्लो तरी रचनाराचीं बेसांवां चडतीक आपणावंक मौन प्रार्थन सरवांनी केलें. अनील पत्रावो तशें सांगात्यांनी ए. टी. लोबोची खवाली 'आमकां भेद कित्याक? जात आनी कुळी कित्याक? आमकां हगें जाय कित्याक? आमी दुस्मान जायजाय कित्याक?' गायली. बोव सुंदर रितीन हारमोनियम, धोलक तशें गितार व्हाजंत्रां संगीं गायलेली ही खवाली जातां जाताना सरवांनी ताळियांच्या शिंवरा सांगाता पोटलून धरली.

कविता ट्रस्टाचो अध्यक्ष मेल्विन रोड्रीगसान आपल्या येवकार उलोवपांत 'हे भुंयचे मातयेंत जायते म्हापुरुष, म्हा स्त्रीयो येवन गेल्यात. तांणी तांचे समाज सेवेद्वारीं, साहित्याद्वारीं आमच्या गांवचे समतूक सांबाळून वेलां. आमच्या गांवचें समतोलन राकून वेलां. तसल्या म्हापुरुषां पयकी ए. टी. लोबो एकलो. चेन्ना, एट्येल नांवाखाल बरोवन आसल्ल्या आपोल्लो तोमास लोबोन आपल्या कादंबरिंनी तशें नाटकांनी कोंकणिकच अपरूपाच्यो थोड्यो खवाली, शायरी, कविता, गितां बरोवन दवरल्यांत. हांचें पुस्तक छापून आयिल्लें ना देकून कोणय ए. टी. लोबोक कवी म्हणून आपयिल्लें ना. त्या देकून ताच्या शायरिंचो संग्रह परगट करून, ताका कविंचे वळेरींत भरती करचें काम आज कविता ट्रस्ट करीत आसा' म्हणून सांगलें.

कविता ट्रस्टाच्या वावराचो उल्लेक केल्ल्या ताणे, हें कारयें मांडून हाडूंक प्रेरण दिल्ल्या ए.टी लोबो फौंडेशनाची तोखणाय केली. प्रत्येक करून ए. टी. लोबोचो पुतन्यो सैमन लोबोच्या उत्तेजना वरवीं हें कारयें घडोवन हाडूंक साध्य जालां म्हण ताणे सांगलें.

कन्सेप्टा फेरनांडिसान ए. टी. लोबोच्यो तीन शायरी 'रडता ताका हासय', 'पर्जळ त्या नेकेत्रांचो' आनी 'खांदार पालंव पडतावरेग' वाचून सांगतच देवाधीन लेखकाचो भाव लोरेन्स लोबो तशें भयण मोंती मोंतेरो हांणी मेल्विन रोड्रीगस हाचे सांगाता 'ए.टी. लोबो - एक कावयाळ पयण' पुस्तक लोकारपण केलें. भाची सेलीन सिकवेरान हाजर आसल्ल्या सगळ्या कुटमादारांची वोळक करून दिली.

मेल्विन रोड्रीगसान लोरेन्स लोबो आनी मोंती मोंतेरोलागीं चलयिल्ल्या संवादांत जायत्यो स्वारस्यभरीत गजाली हाजर आसल्ल्यांक आयकूंक मेळ्ळ्यो. "लोबोगेलें कुटम नेल्लितीर्थाचें. म्हळ्यार नीरुडे, फेरार आनी बजब्यां मधलो गांव. ए. टी. लोबो देड वर्सांचो आसताना ताचे आजियेन - आवयचे आवयन - ताका कोडियाळ आपणासर्शीं रावूंक हाडलें. आजी मेरी कोसेस कुतीञ तवळ हंपनकाट्यार आतां आसच्या सेंट्रल टोकिसाच्या जाग्यालागीं होटेल चलयताली. ए. टी. लोबोन रुजाय तशें सां. लुविस कोलेजिच्या शाळेंत शिकप जोडलें. सोळा वर्सां प्रायेर ताका तिणें बोंबय धाडलें. बोंबय पावून देड वर्सान बापूय सरलो. सगळ्या कुटमाचो हारभार ताच्या मात्यार पडलो" ह्यो आनी जायत्यो हेर गजाली सांगल्ल्या लोरेन्स लोबोन आपणें बीडी वोडूंक धरल्ल्या वेळार आनी सट्ट्यांत दुडू घालूंक लागल्ल्या वेळार ए. टी. लोबोन कशें आपणाक तांतलें निवरायलें म्हणून सोभित करून सांगलें. मुकारीं उलोवन आपुण कुवैटाक पावूंक ए. टी. लोबो सांगाता दुसरो भाव कारण आनी कुवैटांत आपणाक सरकारी काम मेळुंकय ए. टी. लोबोच कारण म्हणून सांगलें.

भयण मोंती मोंतेरो उलोवन, "जिवितांत जायते कष्ट आसल्ले. म्हज्या काजारा वेळार दाट्टूक (ए. टी. लोबोक) येवंक जावंक ना. तरी ताणें बोंबय थावन वस्तुराची पोटली धाडल्ली. एक पावटीं म्हजे ल्हान प्रायेर आवय वयल्या रागान व्हड कोळसो घेवन उदक हाडल्ल्याक ताणे आपणाक ज्योर केल्लें सोडल्यार केदळाय दाट्टून आपणाक ज्योर केल्लें ना. तेंय जाल्यारी, व्हडल्या कोळशांतलें उदक वोडूंक कितलें कष्ट जाले कोण्णा म्हळ्ळे म्हजे वयले भिर्मतेन ताणे ज्योर केल्लें" म्हणून ए. टी. लोबोच्या बऱ्या गुणांची तिणे व्हडविक सांगली. एडी नेट्टो तशें डेविड धर्मगिरी हांणी ह्या संवादांत भाग घेतलो.

प्रिथुमा मोंतेरो आनी चंद्रिमा मोंतेरो - ह्या भुरग्यांनी ए. टी. लोबोन भुरग्यां खातीर बरयिल्लीं गाणां गायलीं. ए. टी. लोबो फौंडेशनाची अध्यक्षिण आलीस लोबोन उपकार आटयलो. एवरेल रोडरिगसान सगळें कारयें चलोवन वेलें.

धा मिनुटांच्या विरामा उपरांत कोट्टार क्रोस रैमंड लोबो आनी वेरोनिका लोबोच्या घरच्या आंगणांत सरवां मेळतच उलयिल्ल्या मेल्विन रोडरिगसालागीं पलतडी रस्त्यालागीं ए. टी. लोबो आपल्या कलाकार इषटां सांगाता केदळाय मेळतालो. मित्र मंडळी जी वेवेगळ्या जाग्यांनी नाटकां खेळयताली, तिच्यो सगळ्यो येवजण्यो थंयसरच जाताल्यो. ए. टी; लोबोच्या नाटकांनी पात्र खेळल्ले कलाकार चारली सिकेर, रैमंड लोबो, फेलिक्स सलडान्हा, कारमेलिटा गोवियस, जोनी पिरेर, मेल्विन पेरिस - ह्या संदरभार हाजर आसल्ले.

ह्या संदरभार उलयिल्ल्या फेलिक्स सलडान्हान ए. टी. लोबो आपल्या नाटकांतलें संभाषण बदलूंक बिलकूल सोडिनातल्लो. आपल्या नाटकांनी कोंकणी सोडून हेर भाशेचीं उत्रां घालिनातल्लो म्हळें. नाटक खेळतल्यांक कांय मेळनातल्लें, प्राकटीसावेळार कालयिल्लो फोव एक सोडल्यार म्हणून आदले उडास जिवे केले. कारमेलिटा गोवियसान आपुण कशीं 'आंकवार आवय' नाटकांत पयले पावटीं नटन करूंक पावलीं म्हण कविता रुपार सांगलें. आकरे पासून एके म्हान व्यक्तित्वाच्या मारगदर्शनाखाल आपणें कशें रंगमांचियेक मोगाचें कर्न घेतलें म्हणून तिणें सांगलें.

ह्या संदरभार फेल्सी लोबो, जोन फेर्नांडिस आनी सेलीन सिकवेरा हांणी ए. टी. लोबोच्यो शायरी वाचून सांगल्यो. रैमंड लोबोन धन्यवाद दितच दुसऱ्या स्तेसांवा थावन सककडय तिसऱ्या स्तेसांवाक गेले.

बिजै इगर्जेचे सिमिस्त्रींत आसची ए. टी. लोबोची समाधी फुलांच्या पाकळेंनी सुंर्गारायिल्ले. पणत्यो पेटाल्यो. चंद्रीम उदेवन येतालो मात्र. हाजर आसच्या सरवांनी हातांत जळच्यो वाती धरल्ल्यो. मार्च २ तारिकेर जल्मल्ल्या ए. टी. लोबोच्या ९५ व्या जल्मादिसाचें आचरण हेपरीं जायत म्हणून कोणेंय चिंतूंक नातल्लें. काळोक पडून येतालो मात्र. त्या वेळार मेल्विन रोडरिगसान 'मर्णादवारीं आपल्या जिविताक संपूर्णता जोडून दिल्लो ए. टी. लोबो हांगासर जियेता' म्हळें.

उपरांत मेल्विन पेरिसान ए. टी. लोबोच्या नाटकांनी आपणाक दिल्ल्या समाधानाविशीं विवर दिलो आनी ताची शायरी वाचली. एड्डी सिकेरिन तरी तसलयाच घडितांची याद करून शायरी वाचली. विलियम पायसान आनयेक कविता वाचली.

केनरा कम्युनिकेशन्साचो दिरेकतोर फा रिचर्ड डिसोजान 'मरणा उपरांत जिविता कशें जियेवंक साध्य आसा' म्हळ्ळे संगतिचेर ए. टी. लोबोक मुकार दवरून उलोवप केलें. व्यक्ती केदळाय मरना. मरण एके व्यक्तिच्या संसाराचें मात्र अंत्य. त्या अंतया उपरांत सभार व्यक्तिंच्या संसारांत ताचो जल्म जाता. जशें ए. टी. लोबोच्या मरणांत आमचे थंय घडलां. तशें घडूंक नातल्लें तर इतल्या संख्यान आमी कोणींय हांगासर पावतेनांव" अशें तांणी सांगलें.

मेलविन पेरिस आनी अनील पत्रावोन मुकेलपण घेवन "ही घडी म्हज्या जिविताची" कांतार गायतच, सरवांनी एकेक गुलोब समाधिचेर दवरून म्हान लेखक ए. टी. लोबोक शृदधांजली भेटयली.

हें कारयें सभार काळा पर्यांत उडासांत उरचें यादगार कारयें जावंक पावलें. ह्या कार्यांत ए. टी. लोबोच्या कुटमाच्यांनी, कलाकरांनी, कोंकणी लेखकांनी वांटो घेतल्लो. साहित्य अकाडेमिचो रिजिसट्रार देवदास पै, हेमाचार्य, रिचर्ड मोरास, रोन रोच काससिया, मनू बाहरेन, एडी नेट्टो, ग्लेडिस रेगो, सिजयेस ताकोडे, रोनी सिकवेरा,व् जे. एफ. डिसोजा, केविन मिसकित, विन्सी पिंटो, प्रवीण तावरो आनी जायत्यांनी व्हडे उरबेन तीन स्तेसांवांच्या ह्या पयणांत भाग घेतल्लो.