Poems

ಮೋಗ್ - ದೋನ್

ಚಾ. ಫ್ರಾ. ದೆಕೊಸ್ತಾ

ಕವಿತಾ:

ಮೋಗ್ - ದೋನ್

ಮೋಗ್ ಕೊಣೇಂಯ್ ಕರ್‍ಚೊ ನಾಸ್ತಾ
ಮೋಗ್ ಆಪ್ಸೊ ಜಾತಾ
ಬಿಯೇಂತ್ ಜೋಯ್ ಜೀವ್ ಆಸ್ತಾ
ಧೊವಾಂತ್ ಆಂಕ್ರಿ ದಿತಾ

ಮೋಗ್ ಜಾತಾ ದಿಶ್ಟಿ ಜೆದ್ನಾಂ
ಮಿಕಿ ಮಿಕಿ ಮೆಳ್ಟಾತ್
ತ್ಯಾಯಿ ಮೆಳಿಂತ್ ಜಾಲ್ಲಿಂ ಭುರ್ಗಿಂ
ರಾತ್ಚೆಂ ಮಳ್ಬಾರ್ ಖೆಳ್ಟಾತ್

ಥೊಡೊ ಮೋಗ್ ಅತ್ಮ್ಯಾಂತ್ ಜಾತಾ
ಮಾಗೀರ್ ಭುಗ್ಗ ಜಳ್ಟಾ
ಕುಡಿಚ್ಯಾ ದರ್ ಬುರಾಕಾಂತ್ಲ್ಯಾನ್
ದಾಟ್‌ಶೀ ಲಾಳ್ ಗಳ್ಟಾ

ಥೊಡೊ ಮೋಗ್ ಇಂಗ್ಳ್ಯಾಂಬರಿ
ಭಿತರ್ ಭಿತರ್ ಜಳ್ಟಾ
ಗಳ್ಟಾ, ವೊಳ್ಟಾ, ಮೊಳ್ಟಾ, ದೊಳ್ಟಾ
ಕೆಸೊಳಿಶೀ ಪಿಳ್ಟಾ.

ಮ್ಹಾತಾರ್‍ಯಾಂಚ್ಯಾ ವಾಯಾಂಬರಿ
ಮೋಗ್ ಭರ್‍ತಾ, ಸುಟ್ಟಾ
ಜಿತ್ಲೆ ಜಿತ್ಲೆ ಪಾವ್ಟಿಂ ಉಟ್ಟಾ
ತಿತ್ಲೆ ಪಾವ್ಟಿಂ ಪಡ್ಟಾ

ತರ್ನೊ ಮೋಗ್ ದೆಕೀಕ್ ಬರೊ
ಗಾಲಾಂರ್ ಭಿರಿಂಡ್ ಪಿಕ್ತಾ
ಎಕೇಕ್ ಕೂಡ್ ಫುಗುನ್ ಯೆತಾ
ಎಕೇಕ್ ಕೂಡ್ ಸುಕ್ತಾ.

ಪಿಕೊ ಮೋಗ್ ಪೊಕೊ ಪೊಕೊ
ಪಯ್ಸಾಪಯ್ಸ್ ರಾವ್ತಾ
ಪಾತಳ್ ಸಾರಾಂತ್ ಸುಕೊ ಸುಕೊ
ಪಳೇತ್ ರಾವ್ಲ್ಯಾರ್ ಪಾವ್ತಾ

ದೆವಾಸಾಕ್ಷಿನ್ ಸಾಂಗ್ತಾಂ ತುಮ್ಕಾಂ
ಘೊವಾ ಬಾಯ್ಲಾಂಕ್ ಮೋಗ್ ನಾ
ಚುಕುನ್ ಕೊಣೇಂಯ್ ಕೆಲೊ ಜಾಲ್ಯಾರ್
ತಾಂಚೆ ಜಿಣ್ಯೆಕ್ ರೋಗ್ ನಾ

ಮೋಗ್ ಹಾಂವೆಂ ಕೆಲ್ನಾ ಕೆದಿಂ
ಘಾತ್ ನಾಂಗೊ ಮ್ಹಜೆಲಾಗಿಂ
ಮೋಗ್ ಮ್ಹಾಕಾ ಜಾಲಾ ಬಾಯೆ
ತುಜೆ ಆನಿ ತುಜೇಚ್ ಲಾಗಿಂ.

-ಚಾ. ಫ್ರಾ. ದೆಕೊಸ್ತಾ


कविता:

मोग - दोन

मोग कोणेंय कर‍चो नासता
मोग आप्सो जाता
बियेंत जोय जीव आसता
धोवांत आंक्री दिता

मोग जाता दिश्टी जेदनां
मिकी मिकी मेळटात
त्यायी मेळिंत जाल्लीं भुरगीं
रातचें मळबार खेळटात

थोडो मोग अत्म्यांत जाता
मागीर भुग्गा जळटा
कुडिच्या दर बुराकांतल्यान
दाट‌शी लाळ गळटा

थोडो मोग इंगळ्यांबरी
भितर भितर जळटा
गळटा, वोळटा, मोळटा, दोळटा
केसोळिशी पिळटा.

म्हाताऱ्यांच्या वायांबरी
मोग भर‍ता, सुट्टा
जितले जितले पावटीं उट्टा
तितले पावटीं पडटा

तर्नो मोग देकीक बरो
गालांर भिरिंड पिकता
एकेक कूड फुगून येता
एकेक कूड सुकता.

पिको मोग पोको पोको
पयसापयस रावता
पातळ सारांत सुको सुको
पळेत रावल्यार पावता

देवासाक्षीन सांगतां तुमकां
घोवा बायलांक मोग ना
चुकून कोणेंय केलो जाल्यार
तांचे जिण्येक रोग ना

मोग हांवें केलना केदीं
घात नांगो म्हजेलागीं
मोग म्हाका जाला बाये
तुजे आनी तुजेच लागीं.

-चा. फ्रा. देकोस्ता



  A   B   C   D   E   F   G   H   I   J   K   L   M
 
  N   O   P   Q   R   S   T   U   V   W   X   Y   Z