Poems

ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ

ಪ್ರಕಾಶ್ ಪಡ್‌ಗಾಂವ್ಕರ್


ಸಂಪಾದಕೀಯ್:

ಉಜ್ವಾಡಾಚೊ ಮೋಗ್ ಕರ್‍ಚೆ ಕಾಳೊಕಾಕ್ ಖೆಂಡ್ತಾತ್

ಉಜ್ವಾಡಾಚ್ಯಾ ಮೋಗ್ ಕರ್‍ನಾರಾಂನಿ ಕಾಳೊಕಾಕ್ ಕೆನ್ನಾಂಯ್ ಖೆಂಡ್ಚೆಂ ಆಸ್ತಾ. ಮಾಗೀರ್ ಅಸಲ್ಯಾ ಮೊಗಾಂತ್ ಬುಡೊನ್ ಗೆಲ್ಲೆ, ಉಜ್ವಾಡಾಚ್ಯಾ ಅಸ್ಥಿತ್ವಾಚೀಚ್ ವೊಳಕ್ ವಿಸ್ರತಾತ್ ಆನಿ ಕಿತೆಂಚ್ ಪಡೊನ್ ವಚನಾತ್‌ಲ್ಲ್ಯಾಬರಿ ಜಿಯೆತಾತ್. ಉಜ್ವಾಡಾಚಿಂ ಬರೆಪಣಾಂ ತೆ ವೊಳ್ಕುನ್ ಘೆನಾಂತ್. ಭೋವ್‌ಶ್ಯಾ ತಸಲ್ಯಾಂನಿ ಪರತ್ ಏಕ್ ಪಾವ್ಟಿಂ ಕಾಳೊಕಾಕ್ ಪಾಟಿಂ ವಚಜಾಯ್ ಕೊಣ್ಣಾ ಆನಿ ಉಜ್ವಾಡಾಚೆಂ ಮಹತ್ವ್ ಶಿಕಜಾಯ್ ಕೊಣ್ಣಾ!

ತೆ ಎಕೆ ನದ್ರೆನ್ ಹಾಂಗಾಸರ್‍ಚಿ ಕವಿತಾ ಉಬ್ಜಲ್ಯಾ ತೆಂ ಹಾಂವ್ ಸಾಂಗನಾ. ಪುಣ್ ತಸಲೆಂ ಏಕ್ ಚಿಂತಪ್‌ಯ್ ಹಿ ಕವಿತಾ ಹಾಂಗಾಸರ್ ವೆಕ್ತ್ ಕರಿನಾಸ್ತಾಂ ರಾವನಾ. ಥೊಡೆ ಉಜ್ವಾಡಾಂತ್ ಜಲ್ಮೊನ್‌ಯ್ ದೊಳೆ ಧಾಂಪ್ತಾತ್ ತರ್, ಥೊಡ್ಯಾಂಚೆ ದೊಳೆ ಹೆರ್ ಧಾಂಪಯ್ತಾತ್. ಕಾಂಯ್ ತಸಲ್ಯಾ ವರ್ಗಾಕ್ ಹೆ ಕವಿತೆಂತ್ಲೊ ನಾಯಕ್ ಶಿರ್‍ಕಲಾ ಜಾಂವ್ಕ್‌ಯ್ ಪುರೊ.

ಪ್ರಕಾಶ್ ಪಡ್‌ಗಾಂವ್ಕರ್ ಎಕ್ಲೊ ಪ್ರಬುದ್ಧ್ ಕವಿ. ಕೊಂಕಣಿಕ್ ನವ್ಯ್ ಕಾವ್ಯಾಚೆಂ ವಾರೆಂ ತಾಚೆಥಾವ್ನ್ ಧಾರಾಳ್ ವ್ಹಾಳ್ಳಾಂ. ಕೇಂದ್ರ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತೀಯ್ ಹ್ಯಾ ಕವಿಕ್ ಫಾವೊ ಜಾಲ್ಯಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

... ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ

    ಕಾಲ್‌ಮೆರೆನ್ ಹಾಂವೆಂ,
        ಝಗ್‌ಝಗೀತ್ ಉಜ್ವಾಡಾಂತ್ ರಾವುನ್
            ಬೆಳ್ಶೆಲ್ಲ್ಯಾ ಕಾಳ್ಖಾಚಿ ನಿಂದಾ ಕೆಲ್ಲಿ
                ಆನಿ,
                    ಆಯ್ಜ್ ಹಾಂವ್ ಅಚ್‌ಕೀತ್
                        ಹ್ಯಾ ಕಾಳ್ಖಾಂತ್ ಖೋಲ್ ಬುಡುನ್ ಗೆಲೊ.

    ಯುಗಾನ್‌ಯುಗಾಂ ಮ್ಹಜ್ಯಾ ಆಂಗಾರ್ ದಾಟಿಲ್ಲೊ
        ಉಜ್ವಾಡಾಚ್ಯಾ ಧುಲ್ಲಾಚೊ ಥರ್ ವಿರ್ಗಳೂನ್
            ಆಂಗ್ ಸಾಮ್ಕೆಂ ಲ್ಹವ್ ಜಾಲೆಂ,
                ಮನಾಚ್ಯಾ ರಿತ್ಯಾ ಮಳ್ಬಾಂತ್
                    ಲಾಖಾಂನಿ ನೆಕೆತ್ರಾಂ ಪೆಟ್ಲಿಂ
                        ಶೀಮ್-ಮೇರ್ ನಾಶಿಲ್ಲಿಂ
                            ಕಿತ್ಲಿಶಿಂಚ್ ಮಳ್ಬಾಂ ಉಕ್ತಿಂ ಜಾಲಿಂ...

    ....ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ.

    -ಪ್ರಕಾಶ್ ಪಡ್‌ಗಾಂವ್ಕರ್



  A   B   C   D   E   F   G   H   I   J   K   L   M
 
  N   O   P   Q   R   S   T   U   V   W   X   Y   Z