Poems

ಶೆಣಿಲ್ಲೊ ಗಾಂವ್

ನೂತನ್ ಸಾಖರ್‌ದಾಂಡೆ

ಸಂಪಾದಕೀಯ್:

 

ಆಮಿ ಆಮ್ಕಾಂಚ್ ಹೊಗ್ಡಾವ್ನ್ ಆಯ್ಲ್ಯಾಂವ್

 

ಆಮಿ ಆಮ್ಚೆಂ ಮ್ಹಳ್ಳೆಂ ಹರ್ಯೆಕ್ ಹೊಗ್ಡಾವ್ನ್ ಆಯ್ಲ್ಯಾಂವ್. ಇತ್ಲೆಂ ಹೊಗ್ಡಾಯ್ಲ್ಯಾಂಕಿ ಆಮಿ ಆಮ್ಚ್ಯಾ ಭಾವಾಂಕ್, ಭಯ್ಣ್ಯಾಂಕ್ ಸಯ್ತ್ ಹೊಗ್ಡಾಯ್ಲಾಂ. ಘೊವಾನ್ ಬಾಯ್ಲೆಕ್ ಹೊಗ್ಡಾಯ್ಲಾಂ ಆನಿ ಬಾಯ್ಲೆನ್ ಘೊವಾಕ್. ಹ್ಯಾ ಎಕಾ ಖೆಳಾಂತ್ ಸಲ್ವಲ್ಲೆ ಆಮಿ ಭೋವ್ ಎಕ್ಸುರೆ ಜಾಲ್ಯಾಂವ್. ಆಮ್ಚಿ ವೊಳಕ್ ಸಯ್ತ್ ಆಜ್ ಕೊಣಾಕ್ ನಾ ಜಾಲ್ಯಾ.

 

ಆಯ್ಚ್ಯಾ ಸಂಸಾರಾಂತ್ಲೆ ಪ್ರಗತೆನ್ ಮನ್ಶಾಕ್ ಅಶೇಂಯ್ ಶಿಂದ್ಲಾಂ, ತೊ ತಾಚ್ಯಾ ಗಾಂವಾಂತ್ ಆಸೊನಯ್ ಪರ್ಕಿ ಜಾಲಾ. ಹೆ ಪ್ರಗತೆಚೆ ಸರಾಯೆ ಮುಕಾರ್ ತಾಚೆ ಧಾಂವೆಕ್ ಅರ್ಥ್ ನಾ ಜಾಲ್ಲ್ಯಾಬರಿ ಜಾಲಾಂ. 

 

ಭೋವ್ ಸಂಕೀರ್ಣ್ ವಿಶಯ್ ಏಕ್, ಬಾಯ್ ನೂತನಾನ್ ಭೋವ್ ಸಂಪೆ ರಿತಿನ್ ಹೆ ಕವಿತೆಂತ್ ಹಾತಾಳ್ಳಾ. ತ್ಯಾಚ್ ದೆಕುನ್ ಕೊಣ್ಣಾ ಹಿ ಕವಿತಾ ಯೆದೊಳಚ್ ಆಟ್ರಾ ಭಾಸಾಂನಿ ತರ್ಜಣ್ ಜಾಲ್ಯಾ. 

 

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

 

 

 

 

 

 

 

 

 

 

ಶೆಣಿಲ್ಲೊ ಗಾಂವ್

 

ಮ್ಹಜೊ ಏಕ್ ಗಾಂವ್ ಶೆಣ್ಲಾ

    ಶೆಣಿಲ್ಲ್ಯಾ ಗಾಂವಾಂತ್ ಮ್ಹಜ್ಯಾ

        ಎಕ್ಲೊ ಎಕ್ಸುರೊ ಆಪುರ್ಬಾಯೆಚೊ

            ವಾಟ್ ಚುಕಿಲ್ಲೊ ಭಾವ್ ಶೆಣ್ಲಾ.

 

ಮ್ಹಜೊ ಏಕ್ ಗಾಂವ್ ಶೆಣ್ಲಾ

    ಶೆಣಿಲ್ಲ್ಯಾ ಗಾಂವಾಂತ್ ಮ್ಹಜ್ಯಾ

        ಆಜ್ಯಾನ್ ಉಮೆದಿನ್ ಬಾಂದಿಲ್ಲ್ಯಾ 

            ಘರಾಚೆಂ ಘರ್‌ಪಣ್ ಶೆಣ್ಲಾಂ 

 

ತ್ಯಾ ಘರಾಂತ್ ತುಳಸ್ ಆಸಾ

    ತುಳ್ಶಿಕಡೆ ವಾತ್ ನಾ

        ನಿತ್ಯ ನೆಮಾನ್ ವಾತ್ ಲಾವ್ಪಿ

            ಥರ್‍ಥರ್ಪಿ ಹಾತ್ ನಾ 

 

ಘರಾಕ್ ತ್ಯಾ ಆಂಗಣ್ ಆಸಾ

    ವಾಟ್ ಪಳೊವ್ಪಿ ದೊಳೆ ನಾ

        ಆಂಗ್ಣಾಂತ್ ತ್ಯಾ ಝಾಡ್ ಆಸಾ

            ಫಾತೊಡೆರ್ ಫುಲ್ಪಿ ಕಳೆ ನಾ

 

ಚುಡ್ಟಾಚಿ ಕಿರ್ಣಾಕಣ್ ನಾ

    ಪದರಚಿ ಸಳ್ಸಳ್ ನಾ

        ಪಾಟಿ ನಾ ದಫ್ತರ್ ನಾ

            ಆಪಾಲಿಪಾಚೊ ಖೆಳ್ ನಾ

 

ಥೊಡೆಂ ಆಶಿಲ್ಲೆಂ ಶೆಣ್ಲಾಂ

    ಥೊಡೆಂ ನಾಶಿಲ್ಲೆಂ ಶೆಣ್ಲಾಂ 

        ಸೊಭೀತ್ ಸುಂದರ್ ಯಾದಿಂಚೊ 

            ಮ್ಹಜೊ ಏಕ್ ಗಾಂವ್ ಶೆಣ್ಲಾ

 

ಮ್ಹಜೊ ಏಕ್ ಗಾಂವ್ ಶೆಣ್ಲಾಂ

    ತ್ಯಾ ಗಾಂವ್ಚೆಂ ನಾಂವ್ ಶೆಣ್ಲಾಂ

        ಪಾಚ್ವ್ಯಾ ಚಾರ್ ಗಾಂವಾಂತ್ ತ್ಯಾ

            ಮಾಯೆಚೆಂ ಕುಳಾರ್ ಶೆಣ್ಲಾಂ

 

-ನೂತನ್ ಸಾಖರ್‌ದಾಂಡೆ



  A   B   C   D   E   F   G   H   I   J   K   L   M
 
  N   O   P   Q   R   S   T   U   V   W   X   Y   Z