ಮ್ಹಜ್ಯಾ ಗಾಂವಾರ್

ಸಂಪಾದಕೀಯ್:

ಮನ್ಶಾಕುಳಾಕ್ ಚಿಮ್ಟೆ ಕಾಡ್ಚಿ ಬರಿ ಆನಿ ಗರ್ಜೆಚಿ ಸವಯ್

`ಮ್ಹಜೊ ಹಾತ್ ಮ್ಹಜ್ಯಾ ಮಾತ್ಯಾರ್' ಮ್ಹಳ್ಳಿ ಗಾದ್ ಆಸಾ. ಮ್ಹಜ್ಯಾ ಶೆಜ್-ಸಾಮ್ರಾ ಕಿತ್ಲ್ಯಾಯ್ ವ್ಹಡ್‌ಪಣಾಚೊ ಲೋಕ್ ಆಸ್ಲ್ಯಾರ್ ಕಿತೆಂ ಜಾಲೆಂ, ಮ್ಹಜ್ಯಾ ಲಾಗ್ಶಿಲ್ಯಾ ದಾಯ್ಜಿ ಗೊತ್ರ್ಯಾಂಲಾಗಿಂ ಆಸ್ತ್-ಬದಿಕ್ ಆಸ್ಲ್ಯಾರ್ ಕಿತೆಂ ಜಾಲೆಂ -ತಾಂತುಂ ಆಪ್ಣಾಕ್ ಕಾಂಯ್ ಬರೆಪಣ್ ಮೆಳತ್ ಮ್ಹಳ್ಳಿ ಗ್ಯಾರಂಟಿ ನಾ. ನಿಮಾಣೆಂ ಮ್ಹಜೆಂ ಬರೆಂ ಆನಿ ಮ್ಹಜೆಂ ವಾಯ್ಟ್ ಮ್ಹಜ್ಯಾಚ್ ಹಣೆಬರ್ಪಾಂತ್ ಬರಯಿಲ್ಲೆಂ ಆಸ್ತಾ ನ್ಹಯ್? ಅಸಲೆಂ ಏಕ್ ಚಿಂತಪ್ ಹಿ ಕವಿತಾ ಉಗ್ತಿ ಕರ್‍ತಾ.

ತಶೆಂ ಸಾಂಗ್ತಾನಾ, ಆಪ್ಲ್ಯಾ ಪೆಲ್ಯಾಚಿ ಪರ್‍ವಾ ಕರಿನಾಸ್ತಾನಾ ಬೆಪರ್‍ವಾ ದಾಕಂವ್ಚ್ಯಾ ಹ್ಯಾ ಸಂಸಾರಾ ಥಂಯ್ ಹಿ ಕವಿತಾ ಬೋಟ್ ಜೊಕ್ತಾ. ಸಾಂಗಾತಾ ಕಟ್ಟಿ ದಾಂಡ್ಯಾರ್ ಜಿಯೆಂವ್ಚ್ಯಾಂತ್ ಸುಖ್ ಜೊಡ್ಚ್ಯಾ ವ್ಯಕ್ತಿಚ್ಯಾ ಆತ್ಮ್‌ವಿಸ್ವಾಸಾಚೆಂ ಗುಣ್‌ಗಾನ್ ಗಾಯ್ತಾ.

ವಲ್ಲಿ ಕ್ವಾಡ್ರಸ್ ಸಭಾರ್ ತೆಂಪಾನ್ ಕವಿತಾ ಕುಳಾರಾಕ್ ಆಯ್ಲಾ. ಆಪ್ಲ್ಯಾ ಕವಿತಾದ್ವಾರಿಂ ಮನ್ಶಾಕುಳಾಕ್ ಚಿಮ್ಟೆ ಕಾಡ್ಚಿ ಬರಿ ಆನಿ ಗರ್ಜೆಚಿ ಸವಯ್ ತಾಣೆ ಹಾಂಗಾಸರ್‌ಯ್ ಸಾಂಬಾಳ್ಳ್ಯಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಮ್ಹಜ್ಯಾ ಗಾಂವಾರ್

ಸದಾಂಯ್ ಸೊಭಾಣ್ ಮ್ಹಜ್ಯಾ ಗಾಂವಾರ್
ಕೊಣ್ ಸುಟಾರ್ ಕೊಣ್ ಬುಟಾರ್
ಆನಿ ಕೊಣ್ ನವ್ಯಾ ಕೊಟಾರ್
ಹಾಂವ್‌ಗಾ ಶಿಂವ್ತಾಂ ಪಾಕೆಂ
ನಾ ಕೊಲು ಮ್ಹಜ್ಯಾ ಘರ್‍ಚ್ಯಾ ಪಾಕ್ಯಾರ್
ಗಾಂವಾಂತ್‌ಮುಂಗಾ ವ್ಹಡಿಲ್ ಸಭಾರ್
ಕೊಣ್ ಕಾರಾರ್ ಕೊಣ್ ಜಿಪಾರ್
ಆನಿ ಕೊಣ್ ಮರ್ಸಿಡಿಸ್ ಬೆಂಜಾರ್
ಹಾಂವ್‌ಗಾ ಹಾಂಗಾ ಶಿಂವ್ತಾಂ
ನಾ ಘಾಲುಂಕ್ ವ್ಹಾಣೊ ಪಾಂಯಾರ್
ಸಗ್ಳೆ ವಿಧ್ವಾನ್ ಮ್ಹಜ್ಯಾ ಗಾಂವಾರ್
ಕೊಣ್ ಕಾನುನ್‌ಗಾರ್ ಕೊಣ್ ದೆವೊತ್‌ಗಾರ್
ಆನಿ ಕೊಣ್ ಸಾಹಿತ್‌ಕಾರ್
ಹಾಂವ್‌ಗಾ ಧಾಂಪ್ತಾಂ ಕುಲೆ
ನಾ ಲಿಪಂವ್ಕ್ ವಸ್ತುರ್ ಆಂಗಾರ್
ಗಾಂವಾರ್ ಮ್ಹಜ್ಯಾ ಪಟೆಲ್ ಅಪಾರ್
ಕೊಣ್ ಪೆಂಟಾಗಾರ್ ಕೊಣ್ ಉರ್ಮಾಲ್‌ಗಾರ್
ಆನಿ ಕೊಣ್ ಮುಂಡಾಸ್‌ಗಾರ್
ಹಾಂವ್‌ಗಾ ಉಪಾಶಿಂ ಹಾಂಗಾ
ನಾ ಶಿಜಂವ್ಕ್ ಶಿತ್ ಮ್ಹಜೆ ಮೊಡ್ಕೆರ್
ಗಾಂವಾಂತ್ ಮ್ಹಜ್ಯಾ ನವೊಚ್ ಸರ್ಕಾರ್
ಕೊಣ್ ಸುಬೆದಾರ್ ಕೊಣ್ ಮುನ್ಸುಬ್ದಾರ್
ಆನಿ ಕೊಣ್ ಪುನೆವಂತ್‌ಗಾರ್
ಹಾಂವ್‌ಗಾ ಕವಿ ಕೊಂಕ್ಣೆಚೊ
ನಾ ಕುಡ್ಕೊ ಸುತಾಚೊ ಪೆಂಕ್ಟಾರ್
ಸಗ್ಳೆ ಆಸಾತ್‌ಗಾ ಆಮ್ಚ್ಯಾ ಗಾಂವಾರ್
ಕೊಣ್ ಯುಕೆಗಾರ್ ಕೊಣ್ ಅಮೆರಿಕಾಗಾರ್
ಆನಿ ಕೊಣ್ ಕೆನಡಾಗಾರ್
ಹಾಂವ್‌ಗಾ ಭಕ್ತ್ ಕೊಂಕ್ಣೆಚೊ
ದೆಕುನ್ ಜಿಯೆತಾಂ ಕಟ್ಟಿ ದಾಂಡ್ಯಾರ್

- ವಲ್ಲಿ ಕ್ವಾಡ್ರಸ್