Poems
ಬಿರಿ ಬಿರಿ ಪಾವ್ಸ್
ಕವಿತಾ:
ಬಿರಿ ಬಿರಿ ಪಾವ್ಸ್
ರಡುಂನಾಕಾ ಫಾಯ್ಚ್ಯಾ ಝಾಡಾ, ದೀಸ್ ತುಗೆಲೊ ಯೆತಲೊ
ಬಿರಿ ಬಿರಿ ಪಾವ್ಸ್ ಸುಟ್ಕಾ ತುಕಾ ದಿತಲೊ
ವ್ಹಯ್, ಬಿರಿ ಬಿರಿ ಪಾವ್ಸ್...
ಫಾಂತ್ಯಾಫಾರಿಂ ಕೊಗ್ಳಿಪಿಲಾನ್ ಸಗ್ಳೆಂ ಮಳಬ್ ಗಾಜಯ್ಲೆಂ
ಆಯ್ಚ್ಯಾ ಝಾಡಾರ್ ಚಾಂಫ್ಲೆಂ ಜಾಲಾಂ, ಧೊವಾನ್ ತೊಂಡ್ ಭಿಜಯ್ಲೆಂ
ಮುಳಿಂ ಆಸ್ಲಲ್ಯಾ ಫಾಯ್ಚ್ಯಾ ಝಾಡಾನ್ ಆಪ್ಲೆಂ ಕಾಳೀಜ್ ಶಿಜಯ್ಲೆಂ
ಆನಿ ವಾರ್‍ಯಾನ್ ತಾಕಾ ಭಿವಯ್ಲೆಂ
ಯೆಂವ್ಚೊ ತುಜೊ ಯೆತಲೊಗೊ, ವೆಂಗೆಂತ್ ತುಕಾ ಘೆತಲೊ
ಬಿರಿ ಬಿರಿ ಪಾವ್ಸ್ ಸುಟ್ಕಾ ತುಕಾ ದಿತಲೊ
ವ್ಹಯ್, ಬಿರಿಬಿರಿ ಪಾವ್ಸ್....
ಚಾಂಫ್ಲ್ಯಾ ಮುಳಿಂ ಫಾಯ್ಚೆಂ ಝಾಡ್ ಕುಸುಂ ಕುಸುಂ ರಡ್ಲೆಂ
ಕುಸುಂ ಕುಸುಂ ರಡ್ತಾಂ ರಡ್ತಾಂ ಆಯ್ಚೆಂ ಚಾಂಫ್ಲೆಂ ಝಡ್ಲೆಂ
ಆಯ್ಚೆಂ ಚಾಂಫ್ಲೆಂ ಝಡ್ಟಾಂ ಝಡ್ಟಾಂ
ಮಳ್ಬಾ ಧಾಂಪಣ್ ಉಡ್ಲೆಂ
ಯೆಂವ್ಚೊ ತುಜೊ ಆಯ್ಲೊಗೆ, ದೀಸ್ ತುಗೆಲೊ ಉದೆಲೊ
ಬಿರಿ ಬಿರಿ ಪಾವ್ಸ್, ಸುಟ್ಕಾ ತುಕಾ ದಿತಲೊ
ವ್ಹಯ್, ಬಿರಿ ಬಿರಿ ಪಾವ್ಸ್...
-ಚಾ.ಫ್ರಾ.ದೆಕೊಸ್ತಾ
Copyright © Kavita Trust (R) 2026 . All Rights Reserved.