Poems

ದಾರಾಭಾಯ್ಲೊ ಘೊವ್

ಕವಿತಾ:

ದಾರಾಭಾಯ್ಲೊ ಘೊವ್

ಸೊಡ್ ಸೊಡ್ ನಿದ್ರಾ, ಹಾಂವ್ ತುಜೊ ಘೊವ್
ಕುಡಿಚೆಂ ಮಾಸ್, ಆಂಗಾಚೆಂ ಹಾಡ್
ಮೊಡುನ್ ಸೊಡಿನ್, ಹಾಂವ್ ತುಜೊ ದೇವ್
ದಾರ್ ಕಾಡ್‍ಗೋ, ದಾರ್ ಕಾಡ್

ಹಾಂವ್‌ಗೋ ತುಗೆಲ್ಯಾ ಗಳ್ಯಾಚೊ ಮಾನ್
ಧಾಂವ್ ರಗ್ತಾಚಿ ಆಶೆಚೆಂ ಝಾಡ್
ಥಾವ್ನ್ ಜಿಣ್ಯೆಚೊ ಸಾಂಗ್ತಾಂ ಪುರಾಣ್
ದಾರ್ ಕಾಡ್‌ಗೋ, ದಾರ್ ಕಾಡ್

ಯೆತಾಂ ವ್ಹಾವವ್ನ್ ಬೊಟಾಂ ಝರವ್ನ್
ಪಿತಾಂಚ್ಯಾ ಪಾಪಾಂಚಿ ವಾಡಿಚಿ ವಾಡ್
ರಾತ್ ಗೆಲಿಗೇ ಅರ್ದಿ ಜಿರುನ್
ದಾರ್ ಕಾಡ್‌ಗೇ, ದಾರ್ ಕಾಡ್

ಗುಗಿಂಚಿಂ ಗಾಣಾಂ ಅಪಶಕುನಾಂ
ಗಾಗೆಲಾ ವಾಡೊ ಕಾಳ್ಶೆಲ್ಯಾ ಫಾಡ್
ತುಗೆಲೊ ಪತಿ ದುಬಾವ್ ನಾಸ್ತಾನಾ
ದಾರ್ ಕಾಡ್‍ಗೇ, ದಾರ್ ಕಾಡ್

ವಯ್ಲ್ಯಾನ್ ಚಂದ್ರ್ ಹಾಸತ್ ಲೋವ್
ಬಾಯ್ಲೆಚೊ ರಾಗ್ ಆಸನಾ ಪಾಡ್
ಪಾಶಾಣಾಂ ಭೊಂವ್ತಿಲಿಂ ಮಾತಿಶೀ ಮೋವ್
ದಾರ್ ಕಾಡ್‌ಮಾ, ದಾರ್ ಕಾಡ್

ಮಳ್ಬಾರಿ ತಾರಾಂ ಮಿಣ್ಕಯಿ ದೊಳೆ
ಗಳ್ತಾ ಕುಡಿರಿ ಕಿರ್ಣಾಂಚೆಂ ಖಾಡ್
ವೊಳ್ವಳೆ ಲಜೆನ್ ಜಾಲೊಂಯಾ ಗುಳೆ
ದಾರ್ ಕಾಡ್‍ಯಾ, ದಾರ್ ಕಾಡ್

ರಾನಾಂತ್ಲಿಂ ಮುರ್ಗಾಂ ಗರ್ಜೊಣ್ಯೊ ಘಾಲಿ
ಕಾನಾಂತ್ಲೊ ಕಾನ್ಪೊ ಜಾಲೊ ಪಾಡ್
ಮನಾಂತ್ಲ್ಯಾ ಧೈರಾಚ್ಯೊ ನಿಸರ್‍ಲ್ಯೊ ಸಾಲಿ
ದಾರ್ ಕಾಡ್‍ಮಾ, ದಾರ್ ಕಾಡ್

ಧರ್‍ಲಲ್ಯಾ ಹಾತಾನ್ ಮಾರ್‍ತಾಂ ಸಲಾಮ್
ಉರ್‍ಲಲಿ ಜಿಣೀ ಕರುಂ ಮೂ ಲಾಡ್
ಹಾಂವ್ ನ್ಹಯ್ ಪತಿ, ತುಜೊ ಗುಲಾಮ್
ದಾರ್ ಕಾಡ್‍ಮಾ, ದಾರ್ ಕಾಡ್

-ಚಾ.ಫ್ರಾ. ದೆಕೊಸ್ತಾ