Poems

ಕಾಜಾರಾಚೊ ಆದ್ಲೊ ದೀಸ್

ಚಾ ಫ್ರಾ ದೆಕೊಸ್ತಾ

ಕವಿತಾ:

ಕಾಜಾರಾಚೊ ಆದ್ಲೊ ದೀಸ್

ಬೊರೀರ್ ಪಿಕ್ಲ್ಯಾಂತ್ ಬೊರಾಂ, ದೊಳ್ಯಾಂಕ್ ದಿಸ್ತಿತ್ ತೊರಾಂ
ಕಾಜ್ರಾಕ್ ಆಸ್ತಾಂ ವೊರಾಂರೆ ವ್ಹರೆತಾ, ದೊಳ್ಯಾಂತ್ ಭರ್ತಿತ್ ಲ್ಹಾರಾಂ

ಫಾಂತ್ಯಾರ್ ದಾರಾರ್ ಮಾರ್, ಉಗಡ್ತಾಂ ಮಾತ್ ಗಾರ್
ಮೊಗಾಚೊ ಹೊ ಭಾರ‍್ಗೆ ವ್ಹಕ್ಲೆ, ಪಾಲಂವ್ ಭುಜಾರ್ ಸಾರ್

ಸಪ್ಣಾಂತ್ ತೂಂರೆ ರಾಯ್, ಬಗ್ಲೆನ್ ಬಸ್ಲ್ಯಾ ರಾಣಿ
ಮೊಗಾಚಿ ಹಿ ಕಾಣಿರೆ ವ್ಹರೆತಾ, ಮ್ಹಜಿ ಆಯ್ಕ್ ವಾಣಿ

ರಾತಿಂ ಉಶೆಂ ಸಾಫ್, ಫಾಂತ್ಯಾರ್ ದುಕಾಂ ಕೊಪ್
ಮೊಗಾಚೊ ಹೊ ಜೋಪ್‌ಗೆ ವ್ಹಕ್ಲೆ, ದೊಳ್ಯಾಂತ್ ಕಾಜಳ್ ಲೇಪ್

ಭೊಂವ್ತಿಂ ವಾಡ್ಲಾ ಗುಡೊ, ಮನ್ ಭೊಂವ್ತಾ ವಾಡೊ
ಮೊಗಾಚೊ ಹೊ ಖೊಡೊಗೆ ವ್ಹಕ್ಲೆ, ಆಂಗಾರ್ ನ್ಹೆಸ್ ಸಾಡೊ

ದೀಸ್ ವೆತೀತ್ ವೀಸ್, ವರ್ಸಾಂ ವೆತಿತ್ ತೀಸ್
ಕಾಜಾರಾ ಆದ್ಲೊ ದೀಸ್‌ರೆ ವ್ಹರೆತಾ, ಮೆಳ್ಚೊನಾ ಕೆದೀಂಚ್

-ಚಾಫ್ರಾ ದೆಕೊಸ್ತಾ