Poems
ಭಿರಾಂತ್
ಚಾ.ಫ್ರಾ.ದೆಕೊಸ್ತಾ
ಕವಿತಾ:
ಭಿರಾಂತ್
ಫಾಂತ್ಯಾಫಾರಾರ್ ಮರ್ತಾನಾ ನಿಶಾ
ಚೊಯ್ಲ್ಯಾಯ್ ಕೆದಿಂ ದಿವ್ಯಾಚಿ ಆಶಾ?
ಮೊಗಾನ್ ದಿವ್ಟಿ ತೇಲ್ ಎಕಾಮೆಕಾ
ಖಾತಾನಾ ಕಾಳ್ಜಾಕ್ ಭಿರಾಂತ್ ತುಕಾ
ಭಿರಾಂತಿನ್ ಘರಾಂತಚ್ ರಾವ್ತಾಮು ಪಿಶ್ಯಾ?
ಸಕಾಳಿಂ ದೊವಾಂತ್ ನ್ಹಾತಾನಾ ಕಳೆ
ಮೋಗಾ ತಾಂಚೊ ಬಾಳಾ, ಮೊಗಾನ್ ಪಳೆ
ದೊವಾಚಿ ಭಿರಾಂತ್ ದಿಸ್ತಾಮು ತುಕಾ
ಶೆಳಿಚಿ ಭಿರಾಂತ್ ದಿಸ್ತಾಮು ತುಕಾ
ಹಾಸ್ತಾತ್ ಮೊಗ್ರೆ ಕಳೆ ತೆ ಭೊಳೆ
ದೊನ್ಪಾರಾಂ ತಳ್ಯಾಂತ್ ಮಳ್ಬಾಚೊ ಮೇಳ್
ಉದ್ಕಾಚೆ ಗುಂಡ್ಯೆಂತ್ ಮೊಡಾಂಚೊ ಖೆಳ್
ಪಳೆಂವ್ಚೆಂ ಭಾಗ್‌ಶೆಂ ನಾಮು ತುಕಾ
ವೊತ್ ಭಾಜಿತ್ ಮ್ಹಣ್ ಭಿರಾಂತ್ ತುಕಾ
ಪಾಕ್ಯಾ ಭಿತರಚ್ ಖಳ್ಟಾಯ್ ವೇಳ್
ಸಾಂಜೆಚೆ ಪಾಸ್ಳೆಂತ್ ಬೊಕ್ಡೆಚಿಂ ಪಿಲಾಂ
ಮೊಗಾಚೆ ಸಾವ್ಳೆನ್ ತಾಂಕಾಂಮು ಧುಲಾಂ
ಆಪಯ್ತಾತ್ ಉಲೆ ಎಕಾ ಲೆಕಾ
ಎಕ್ಸುರ್ಯಾಕ್ ಯೇಂವ್ಕ್ ಭಿರಾಂತ್ ತುಕಾ
ಭಾಗೆಂತ್ ಲೆಗುನ್ ರಡ್ತಾತ್ ಫುಲಾಂ
ರಾತಿಚೆ ಥಂಡಾಯೆಂತ್ ಆತಾಂ ಹಾಂವ್ ಯೆತಾಂ
ದಾರ್ವಟ್ಯಾರ್ ತುಗೆಲ್ಯಾ ಕಾನ್‌ಸೊ ದಿತಾಂ
ರಡ್ಕುರೊ ತಾಳೊ ತುಜೊ ಆಯ್ಕತ್ ಮ್ಹಾಕಾ
ಧಯ್ರ್ ಕಶೆಂ ಆತಾಂ ಮೆಳತ್ ತುಕಾ
ದಿಸಾಚೊ ಮೋಗ್ ವಿಶೆವ್ ಘೆತಾಂ?
-ಚಾಫ್ರಾ ದೆಕೊಸ್ತಾ
Copyright © Kavita Trust (R) 2026 . All Rights Reserved.