Poems
ಮ್ಹಜೆಂ ವೋಡ್ತ್
ಟ್ರೀಜಾ ಲೋಬೊ, ದುಬಾಯ್
ಸಂಪಾದಕೀಯ್:
ಸಕಾಳಿಂಚಿಂ ಫುಲಾಂ ಬಾವ್‌ಲ್ಲಿಂ ಕಾಳ್ಜಾಂ ಸಂತೊಸಾಯ್ತಾತ್
ಆಪ್ಲೆ ಭಾಗಿಚ್ಯಾ ಮೊಗಾರ್ ಪಡ್‌ಲ್ಲೆ ವೆಕ್ತಿನ್, ತ್ಯಾ ಮೊಗಾಂತ್ ಲೊಳೊನ್ ವೆತಾಂ ವೆತಾಂ ಆಪುರ್ಬಾಯೆಚಿ ಕವಿತಾ ಏಕ್ ವಿಣುನ್, ವೆಗ್ಳ್ಯಾ ಎಕೆ ಭಾಗಿಕ್ - 'ಕವಿತೆಚೆ ಭಾಗಿಕ್' ರಿಗ್ಚೆಂ ಪ್ರೇತನ್ ಕೆಲಾಂ.
ಸಕಾಳಿಂಚ್ಯಾ ತರ್‍ನ್ಯಾ ವಾತಾವರಣಾಂತ್ ರಂಗ್‌ರಂಗಾಳ್, ಸುವಾಧಾಚ್ಯಾ ಫುಲಾಂ ಸಾಂಗಾತಾ ಆಪ್ಲೆಂ ಮನ್‌ಯ್ ಫುಲ್ ಕರ್‍ನ್ ಘೆತ್‌ಲ್ಲೆ ವೆಕ್ತಿನ್ ಸಂಸಾರಾಚೆ ಕಷ್ಟ್-ಸಂಕಷ್ಟ್ ವಿಸ್ರೊನ್ ದಾಧೊಸ್ ಜಾಂವ್ಚೆಂ ದಾಧೊಸ್ಕಾಯೆಚೆಂ ಚಿತ್ರಣ್ ಹಿ ಕವಿತಾ ಉಬಿ ಕರ್‍ತಾ.
ಕವಿತಾ ಕುಳಾರಾಕ್ ಟ್ರೀಜಾ ಲೋಬೊಚಿ ಭೆಟ್ ಹಿ ಪಯ್ಲೆ ಪಾವ್ಟಿಂಚಿ! ಕಾಂಯ್ ಪತ್ರಾಂನಿ ತಿಚ್ಯೊ ಕವಿತಾ ಪರ್ಗಟ್ ಜಾಲ್ಯಾತ್. ಫುಲಾಂಥಾವ್ನ್ ಹುಮೆದ್ ಜೊಡ್‌ಲ್ಲೆಬರಿ ಸಂಸಾರಾಚ್ಯಾ ವೆವೆಗ್ಳ್ಯಾ ಸಂಗ್ತಿಂ ಥಾವ್ನ್ ಹುಮೆದ್ ಜೊಡುನ್ ಕವಿತಾ ರಚುಂಕ್ ತಿ ಧರಿತ್ ಜಾಲ್ಯಾರ್, ಆಮ್ಚ್ಯಾ ಗಳ್ಯಾಂನಿ ಕವಿತೆಚ್ಯೊ ಮಾಳಾ ಸಜಂವ್ಕ್ ತಿಕಾ ಕಷ್ಟ್ ಜಾಂವ್ಚೆನಾಂತ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜೆಂ ವೋಡ್ತ್
ವೋಡ್ತ್ ಮ್ಹಜೆಂ ಸೊಭ್ತಾ ಸಜೊನ್
ಪಾಚ್ಯಾ ತಣಾನ್ ಉಬೆಂ ರಾವೊನ್
ಚಾರಾಂಯ್ ಕುಶಿನ್, ವಿವಿಧ್ ರುಪಾನ್
ಪರ್ಮಳ್ ಫುಲಾಂ, ಆಕರ್ಷಿಕ್ ರಂಗಾನ್
ಸಕಾಳಿಂಚೆಂ ಅಮೃತ್ ಧೊವಾ ಯೆಣೆಂ
ದೊಡ್ತೊ ಕರ್‍ತಾ ಫುಲಾಂ ಸುವಾಧ್
ಚುಂಬನ್ ಕರ್‍ತಾಂ ಫಾಂತ್ಯಾ ಕಿರಣ್
ವೋಡ್ತ್‌ಚ್ ಸಗ್ಳೆಂ ಜಾತಾ ಜವಾದ್
ಗುಲೊಬ್, ಶಿಂವ್ತಿಂ, ಲಿಲ್ಲಿಫುಲಾಂ
ಮೊಗ್ರೆ ಸಂಗಿಂ ಗಾಯ್ತಾತ್ ಗಾಣಾಂ
ದುಕಿ ಕಾಳ್ಜಾಕ್ ಸಂತೊಸ್ ದಿತಾತ್
ದಾಧೊಸ್ ಕರ್‍ತಾತ್ ಕಸ್ಲೀಂಯ್ ಮನಾಂ
ಹರ್‍ಯೆಕ್ ತೊಂಡಾರ್ ತರ್ನೊ ಹಾಸೊ
ಹಾಡ್ಚಿ ಸಕತ್ ಫುಲಾಂಕ್ ಆಸಾ
ವೊಡ್ತಾ ನಿಮ್ತಿಂ ಘರಾಕ್ ಮ್ಹಜ್ಯಾ
ಸಗ್ಳ್ಯಾ ಗಾಂವಾರ್ ನಾಂವ್ ಆಸಾ!
- ಟ್ರೀಜಾ ಲೋಬೊ, ದುಬಾಯ್
Copyright © Kavita Trust (R) 2026 . All Rights Reserved.