Poems

ಹಾಂವ್ ಜಾತಾನಾ....

ಮ್ಯಾಕ್ಸಿಮ್ ಲೋಬೊ


ಸಂಪಾದಕೀಯ್:

ಕೊಂಕಣಿಚೆ ಕಾವ್ಯಶೆತ್ ಗಿರೇಸ್ತ್ ಕರ್‍ಚ್ಯಾ ಲಕ್ಷಣಾಂಚಿ ಕವಿತಾ!

ಅಸಲ್ಯೊ ಕವಿತಾ ಮನ್ಶಾಚ್ಯಾ ಕಾಳ್ಜಾಥಾವ್ನ್ ಭುಂಯ್ ಪಡೊನ್ ಉತ್ರಾಂಚೆ ಅತ್ಮೆ ಕಾಣ್ಘೆವ್ನ್ ಆಮ್ಚ್ಯಾ ದೊಳ್ಯಾಂ ಮುಕಾರ್ ಮೊಡಸ್ತಾನಾಂ ಘಾಲುಂಕ್ ಇತ್ಲ್ಯೋಯ್ ಭಿಯೆತಾತ್ ಕಿತ್ಯಾಕ್? ಅಶೇಂಯ್ ಕಾವ್ಜೆತಾತ್ ಕಿತ್ಯಾಕ್? ಹ್ಯಾ ಉತ್ರಾಂಕ್ ತಾನೆಲ್ಲ್ಯಾ ಕಾಳ್ಜಾಂಕ್ ಥಂಡ್ಸಾಣೆಚಿ ಧಾರ್ ದಿಂವ್ಚಿ ತಾಕತ್ ಆಸ್ತಾಂ! ಹ್ಯಾ ಉತ್ರಾಂಕ್ ಕೊಂಕಣಿಚೆಂ ಕಾವ್ಯಶೆತ್ ಗಿರೇಸ್ತ್ ಕರ್‍ಚಿಂ ಪುರಾಯ್ ಲಕ್ಷಣಾಂ ಆಸ್ತಾಂ!

ಭಾಯ್ಲೆ ದೆಕುಕ್, ಹಿ ಕವಿತಾ ಸಾದಿ ದಿಸೊಂಕ್ ಪುರೊ. ಪುಣ್ ಹಿ ಕವಿತಾ ಮೊಗಾನ್ ವೆಂಗ್‌ಲ್ಲ್ಯಾವೆಳಾರ್ ಹಾಂತ್ಲ್ಯಾನ್ ನಾಚೊಂಕ್ ಯೆಂವ್ಚ್ಯೊ ಪ್ರತಿಮಾ, ಅಪ್ರತಿಮ್! ತ್ಯಾದೆಕುನ್ ಹಿ ಕವಿತಾ - ಬೋವ್‌ಶಾ ಕವಿನ್ ಕೊಂಕಣಿಂತ್ ಪಯ್ಲೆಚ್‌ಪಾವ್ಟಿಂ ಲಿಖ್ಲ್ಯಾ ಕೊಣ್ಣಾ - ಮ್ಹಜೆ ತಸಲ್ಯಾ ಕವಿಕ್ ವಿಜ್ಮಿತ್ ಕರಯ್ತಾ!

ಏಕ್ ಗಾಬ್ಳೊ ಮನ್ಶಾರೂಪ್ ಜೊಡ್ಚೊ ಸಂದರ್ಭ್; ಜಿವಿತಾಂತ್ ವೆಗ್ಳಿ ಏಕ್ ಘುಂವ್ಡಿ ಲಾಭ್‌ಲ್ಲೊ ಸಂದರ್ಭ್; ಹ್ಯಾ ಲಾಯಿಕ್ ಜಿಣ್ಯೆಚ್ಯಾಕ್‌ಯ್ ವೆಗ್ಳಿ ಏಕ್ ಜೀಣ್ ಸಾಧ್ಯ್ ಆಸಾ ಮ್ಹಣ್ ಲೆಕ್‌ಲ್ಲೊ ಸಂದರ್ಭ್; ಹೆ ಜಿಣ್ಯೆಭಾಯ್ಲ್ಯಾ ಸಂಸಾರಾಕ್ ಪಾಂವ್ಚೊ ಸಂದರ್ಭ್; ಮಿಸಾಂವಾಚ್ಯಾ ಪೊಂತಾಕ್ ಪಾವ್‌ಲ್ಲೊ ಸಂದರ್ಭ್; ತಿತ್ಲೆಂಚ್ ಕಿತ್ಯಾಕ್ ಏಕ್ ಕವಿ ಜಾಲ್ಲೊ ಸಂದರ್ಭ್ - ಅಶೆಂ ವೆವೆಗ್ಳೆ ಸಂದರ್ಭ್ ಮತಿಂತ್ ಘೊಳವ್ನ್ ವಾಚ್ತಾನಾ ಸೈತ್ ಹೆ ಕವಿತೆಂತ್ಲ್ಯಾನ್ ಸುಖ್ ಲಾಭೊಂಕ್ ಸುರು ಜಾತಾ. ಮ್ಹಾಕಾ ಇತ್ಲೆಂ ಜಾತಾ. ತುಮ್ಕಾಂ ಕಿತ್ಲೆಂ ಜಾತಾ ತುಮಿಂಚ್ ಸಾಂಗಜೆ!

ಮ್ಯಾಕ್ಸಿಮ್ ಲೋಬೊನ್ ಕೊಂಕಣಿ ಕವಿತಾ ಸದಾಂಕಾಳ್ ವೆಂಗೊನ್ ಧರಿಜೆ!

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಹಾಂವ್ ಜಾತಾನಾ....

ಹಾಂವ್ ರಡ್ಲೊಂ
ಸಂಬಂಧಾ ಗಾಂಚ್, ಮಾನಾಚೊ ಲೊಂಚ್
ಹ್ಯಾ ತಾರ್‍ವಾರ್ ಚಮ್ಕಾನಾ ಕೆದಿಂಚ್

ಹಾಂವ್ ಕಡ್ಲೊಂ
ಮೊಗಾ ಊಬ್, ಸಂಪರ್ಕ್ ಖೂಬ್
ಹ್ಯಾ ಸರ್ಗಾರ್ ಆವ್ಚಿತ್ ಧಾಬ್

ಹಾಂವ್ ಪಿಗ್ಳಾಲೊಂ
ವೆಗ್ಳಿ ಸಂಸ್ಕೃತಿ, ಬರ್ಪಾ ಪ್ರಕೃತಿ
ಹ್ಯಾ ಗಾಂವಾರ್ ಭೆಷ್ಟಾಂವ್ಚಿ ಆಕೃತಿ

ಹಾಂವ್ ಶೆವ್ಟಾಲೊಂ
ಪದ್ವೆ ಹುಕುಮ್, ಖೆಂಡ್ಪಾ ಜಕಮ್
ಹಾಂಚ್ಯಾ ಖುಸ್ತಾರ್ ಮೆಳ್ತಾ ರಖಮ್

ಹಾಂವ್ ಸರ್‍ಲೊಂ
ಅಕ್ಕಲ್ ಪಹರೊ, ಕಾಳ್ಜಾ ಹಿಶಾರೊ
ಹೆ ಮೆಳೆರ್ ವೊಮ್ತೊ ಉದಾರೊ

ತೆನ್ನಾಂ ಝೊಂಪಯ್ ಮಾರ್‍ನ್
ಪಾಕಾಟ್ಯಾಂನಿ ಆರಾವ್ನ್
ಆಂಗಟ್ಯಾಂನಿ ಗುಟ್ಲಾವ್ನ್
ತಾಣೆ ಮೋಗ್‌ಚ್ ಲಾಯ್ತಾಂ
ಹಾಂವ್ ಜೀವ್ ಜಾಲೊಂ
ಮೆಂದ್ವಾಂತ್ ವೀಜ್ ಚರ್‍ಲಿ
ಕಾಳ್ಜಾಂತ್ ಊಬ್ ಭರ್‍ಲಿ
ಹಾಂವ್ 'ಹಾಂವ್' ಜಾಲೊಂ
ಆತಾಂ ಉತ್ರಾಂ ಧಾರ್
ದಿಷ್ಟಿ ಖಾರ್
ಅಂತರ್ ಲ್ಹಾರ್
ಹವ್ಯಾಭಾರ್
ಮ್ಹಾಕಾ ಹಾರಂವ್ಕ್ ಸಕನಾ
ಹಾಂವ್ 'ಹಾಂವ್' ಜಾಲಾಂ!

-ಮ್ಯಾಕ್ಸಿಮ್ ಲೋಬೊ



  A   B   C   D   E   F   G   H   I   J   K   L   M
 
  N   O   P   Q   R   S   T   U   V   W   X   Y   Z