Poems

ಗಾಂವಾ ಥಾವ್ನ್ ನವೆಂ ಆಯ್ಲಾಂ

ರೊಬರ್ಟ್ ಫೆರ್ನಾಂಡಿಸ್, ಉದ್ಯಾವರ್

ಸಂಪಾದಕೀಯ್:

ನವೆಂ ಜೆಂವ್ಚೆಂ ಆನಿ ಕಿತ್ತುನ್ ಪರ್ಯಾಂತ್?

ಕಾಳಾನ್, ಪ್ರಗತೆನ್ ಸಗ್ಳೆಂ ಪುಸುನ್ ಕಾಡ್ಲಾಂ. ಎಕಾ ಕಾಳಾರ್ ಪರ್ಗಾಂವಾಕ್ ವೆಚೆಂ ಬೋವ್ ಅಪ್ರೂಪ್ ಆಸಲ್ಲ್ಯಾ ಕಾಳಾರ್, ಮೊಂತಿ ಫೆಸ್ತಾ ಸಂದರ್ಭಾರ್ ಮಾಯ್‌ಗಾಂವಾ ಭಾಯ್ರ್ ಅಸಲ್ಲ್ಯಾಂನಿ ಗಾಂವಾಕ್ ಯೇವ್ನ್ ಕುಟ್ಮಾ ಸಾಂಗಾತಾ ಮೆಳೊನ್ ಜೆಂವ್ಚಿ ಆಪುರ್ಬಾಯೆಚಿ ರಿವಾಜ್ ಆಸಲ್ಲಿ.  ಉಪ್ರಾಂತ್ ಮನೀಸ್ ವಿದೇಶಾಂಕ್ ಗೆಲ್ಲ್ಯಾ ತವಳ್, ಅಶೆಂ ಮೆಳ್ಚೆಂ ಕಷ್ಟಾಂಚೆಂ ಜಾತಾನಾ ಕಣ್ಶೆಂತ್ಲಿಂ ಭಾತಾಂ ತಪ್ಪಾಲಾ ದ್ವಾರಿಂ ಮೊಗಾಚ್ಯಾ ಮನ್ಶಾಂಕ್ ಪಾವ್ತಾಲಿಂ ಆನಿ ತಿಂ ಪಾವ್ಲ್ಯಾ ಮಾಗಿರಚ್ ತಿಂ ಸ್ವೀಕಾರ್ ಕೆಲ್ಲ್ಯಾಂನಿ ನವೆಂ ಜೆಂವ್ಚೆಂ ಆಸಲ್ಲೆಂ.  ತಸಲೆಂ ನವೆಂ ಕಾಗ್ದಾ ಸಾಂಗಾತಾ ಆಯಿಲ್ಲ್ಯಾ ಸಂದರ್ಭಾಚೆ ಸನ್ನಿವೇಶ್ ಆನಿ ಉಮಾಳೆ ಹೆ ಕವಿತೆಂತ್ ಆಸಾತ್.

ಪುಣ್ ಆತಾಂ, ಅಸಲಿ ರಿವಾಜ್ ಬಿಲ್ಕುಲ್ ನಾ. ವಿದೇಶಾಂನಿ ಸೈತ್ ಮೊಂತಿಚೆಂ ಫೆಸ್ತ್ ಆಚರಣ್ ಜಾತಾ ಆನಿ ತ್ಯಾ ಸಂದರ್ಭಾರ್ ವಿಮಾನಾಂನಿ ಗಾಂವಾ ಥಾವ್ನ್ ಕಣ್ಶ್ಯೊ ವೆತಾತ್. ತಿತ್ಲೆಂ ಆಸೊನಯ್ ಕುಟ್ಮಾಚೆಂ ಮಹತ್ವ್ ಜಾಣಾ ಆಸಲ್ಲ್ಯಾಂನಿ ಬೆಂಜಾರ್ ಭಾತಾಂ ಧಾಡ್ಚೆಂ ರಾವಯ್ಜಾಯ್ ಮ್ಹಣ್ ನಾ ಕೊಣ್ಣಾ.

ಪುಣ್ ಆಯ್ಚ್ಯಾ ದಿಸಾ, ಕುಟ್ಮಾಚೊ ಅರ್ಥಚ್ ಬದ್ಲೊನ್ ಆಯ್ಲಾ ಮ್ಹಣ್ತಾನಾ!

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

 

 

 

 

 

ಗಾಂವಾ ಥಾವ್ನ್ ನವೆಂ ಆಯ್ಲಾಂ

ಗಾಂವಾ ಥಾವ್ನ್ ನವೆಂ ಆಯ್ಲಾಂ
ಮಟ್ವ್ಯಾ ಕಾಗ್ದಾಸವೆಂ ಆಯ್ಲಾಂ
ಕಾರ್ತಿ ಭಾತಾಚಿ ಕಣಸ್ ಸೊಬೀತ್
ಪಾವ್ಸ್ ಬೋವ್ಶಾ ಚುಕಲ್ಲೊ ಮೀತ್
ಥೊಡಿಂ ಭಾತಾಂ ಪುಡ್ಪುಡೀತ್
ಥೊಡಿಂ ಮಾತ್ರ್ ಪೊಕೊಳ್
ತರೀ
ಪಾಚ್ವ್ಯಾ ಮ್ಹಜ್ಯಾ ಗಾಂವಾರ್
ಪಡ್ಚೊನಾ ಕೆದಿಂಚ್ ದುಕೊಳ್

          ಕಾಗತ್ ಹಾತಿಂ ಘೆತಾಂ, ಯೆತಾ
          ರುಪ್ಣೆಂ ಮಾಂಯ್ಚೆಂ ಮತಿಕ್
          ಪಪ್ಪಾಚಿ ತಿ ಮಯ್ಪಾಸಿ ದೀಷ್ಟ್
          ಪಾಶಾರ್ ದೊಳ್ಯಾಂ ಹುಜಿರ್
          ಕಣಸ್ ಕಾಗ್ದಾಂತ್ ಘಾಲ್ತಾನಾ
          ಮಾಂಯ್ ರಡ್ಲ್ಯಾ ಕೊಣ್ಣಾ
          ವ್ಹಯ್
          ಕಾಗ್ದಾ ವಯ್ರ್ ಸುಕ್ಲ್ಯಾಂತ್ ದುಖಾಂ
          ಪಾರ್ಕುಂಕ್ ಹಾಂವ್ ಜಾಣಾಂ

ದೀಸ್ ಆದ್ಲೆ ನಿಯಾಳ್ತಾನಾ
ಕಾಳೀಜ್ ಯೆತಾ ಭರೊನ್
ಫೆಸ್ತಾ-ಸಂಭ್ರಮ್ ಪರ್ದೆಶಾನ್ ಹ್ಯಾ
ವೆಲಾಗಾಯ್ ಫಾರುನ್?
ಭಾತಾಂ ಎಕೇಕ್ ಭರ್ಸುನ್ ದುಧಾಂತ್
ಸೆಂವ್ಕ್ ಆಯ್ತೊ ಜಾತಾಂ
ಆನಿ
ಯೆಂವ್ಚ್ಯಾ ವರ್ಸಾ ಗಾಂವ್ಚ್ಯಾ ಥಳಾರ್
ಜೆಂವ್ಚೊ ನಿಚೆವ್ ಘೆತಾಂ...

-ರೊಬರ್ಟ್ ಫೆರ್ನಾಂಡಿಸ್, ಉದ್ಯಾವರ್



  A   B   C   D   E   F   G   H   I   J   K   L   M
 
  N   O   P   Q   R   S   T   U   V   W   X   Y   Z