Poems

ದಾರ್ ಉಗ್ಡೆಂಚ್ ಆಸಾ

ಅರುಣ್ ಸಾಖರ್‌ದಾಂಡೆ

ಸಂಪಾದಕೀಯ್:

ಸುಖ್ ದಾರಾರ್ ಉಬೆಂ, ಪುಣ್ ದುಖಾಕ್ ಧಾಂವ್ಡಾಂವ್ಚೆಂ ಕಶೆಂ?

ಹಿ ಕವಿತಾ ಅರುಣ್ ಸಾಖರ್‌ದಾಂಡೆಚ್ಯಾ ‘ಕಾವ್ಳ್ಯಾಚೆಂ ಶ್ರಾದ್ಧ್’ ಕವಿತಾ ಸಂಗ್ರಹಾಂತ್ಲ್ಯಾನ್ ವಿಂಚ್ಲ್ಯಾ. ಹ್ಯಾ ಪುಸ್ತಕಾಕ್ 2010  ವರ್ಸಾ ಕೇಂದ್ರ್ ಸಾಹಿತ್ಯ್ ಆಕಾಡೆಮಿಚೊ ಪುರಸ್ಕಾರ್ ಲಾಭ್ಲಾ.  ಹಾಂಗಾಸರ್ ಘರಾಂತ್ಲೆ ವ್ಯಕ್ತಿಕ್ ದುಖಾ ಸಾಂಗಾತಾ ರಾವೊನ್ ಸವಯ್ ಜಾವ್ನ್ ಗೆಲ್ಯಾ. ಹಿ ಸವಯ್ ಇತ್ಲಿ ದಾಟ್ ಜಾಲ್ಯಾ ಕಿ, ಹ್ಯಾ ದುಖಾಕ್ ಘರಾಂತ್ಲೆಂ ಧಾಂವ್ಡಾಂವ್ಕ್ ತಾಕಾ ಅಸಾಧ್ಯ್ ಜಾಲಾಂ.

ಅಸಲಿ ಏಕ್ ಸಂಧಿಗ್ದ್ ಪರಿಗತ್ ಹೆ ವ್ಯಕ್ತಿಚಿ ಮ್ಹಣ್ಚೆಂ? ಆನಿ ಅಸಲಿ ಏಕ್ ಪರಿಗತ್ ತಾಕಾ ಉಬ್ಜಾತಾ, ಸುಖ್ ಯೇವ್ನ್ ದಾರಾರ್ ರಾವ್ತಾನಾ.  ಕಾಂಯ್ ಹಾಂಗಾಚೊ ವ್ಯಕ್ತಿ ಆಪ್ನಾಚ್ಯಾ ಜಿವಿತಾಂತ್ ಸುಖ್ ಆಯ್ಲೆಂ ತರ್ ಆಪ್ಣಾಚೆಂ ಅಸ್ಥಿತ್ವ್ ಹೊಗ್ಡಾಯ್ತಲೊಂ ಮ್ಹಣೊನ್ ಚಿಂತುನ್ ಆಸಾ? ತೊ ಕಿತ್ಯಾ ಖಾತೀರ್ ಅಶೆಂ ಚಿಂತಾ?

ಹಜಾರ್ ಸವಾಲಾಂ ಧೊಸ್ತಾತ್! ಕವಿತೆಂನಿ ಧೊಶಿಜಾಯ್, ತಿ ಕಾಳ್ಜಾಂತ್ ಠಿಕೊನ್ ಉರಜಾಯ್ ಜಾಲ್ಯಾರ್!

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

 

 

 

 

 

 

ದಾರ್ ಉಗ್ಡೆಂಚ್ ಆಸಾ

ಕೊಣೆಂ ತರೀ ದಾರ್ ವಾಜಯ್ಲೆಂ
ಮ್ಹಣ್ ಹಾಂವೆಂ ದಾರ್ ಉಗಡ್ಲೆಂ

ಪಳಯ್ಲ್ಯಾರ್
ದಾರಾರ್ ಉಬೆಂ ಆಸ್ಲೆಂ ಸುಖ್
ಸುಖಾನ್ ಮ್ಹಳೆಂ
ಹಾಂವ್ ಭಿತರ್ ಯೇಂವ್?

ಹಾಂವೆಂ ಘರಾಂತ್ ಭಿತರ್ ನದರ್ ಮಾರ್ಲಿ
ಇತ್ಲಿಂ ವರ್ಸಾಂ ಮ್ಹಗೆರ್ ಆಶಿಲ್ಲೆಂ ದುಖ್
ದುಕಾಂ ಗಳಯ್ತ್ ಭಿತೊಡೆ ಉಬೆಂ ಆಸ್ಲೆಂ

ಹಾಂವೆಂ ಸುಖಾಕ್ ಮ್ಹಳೆಂ
ಇತ್ಲಿಂ ವರ್ಸಾಂ ಮ್ಹಗೆರ್ ಆಶಿಲ್ಲ್ಯಾ
ದುಖ್ಖಾಕ್ ಹಾಂವ್ ಕಸೊ ಧಾಂವ್ಡಾಂವ್?

ಸುಖಾನ್ ಮ್ಹಳೆಂ,
ಪಳಯ್ ವಿಚಾರ್ ಕರ್
ಹಾಂವ್ ಪರತ್ ಯೇನ್ ನಾ ಯೇನ್

ತೆನ್ನಾಸಾವ್ನ್ ಹಾಂವ್ ಬಾವ್ಡೊ
ಹುಂಬ್ರ್ಯಾರ್ ಉಬೊ ಆಸಾಂ
ಭಾಯ್ರ್ ಭಿತರ್ ಪಳಯ್ತ್

-ಅರುಣ್ ಸಾಖರ್‌ದಾಂಡೆ



  A   B   C   D   E   F   G   H   I   J   K   L   M
 
  N   O   P   Q   R   S   T   U   V   W   X   Y   Z