Poems

ರಾಧೆಕ್ ಮತ್ಸರ್ ಮುರಲಿಚೊ

ಉದಯ್ ಭೆಂಬ್ರೊ

ಸಂಪಾದಕೀಯ್:

ರಾಧಾಚ್ಯಾ ಕಾಳ್ಜಾಚೆ ತಳ್ಮಳೆ ಪಿರ‍್ಲುಕ್ ಫುಂಕ್ಚ್ಯಾ ಕೃಷ್ಣಾಕ್ ಖಂಯ್ ಸಮ್ಜತಾತ್?

ಭೋವ್ ಸುರಸ್ ಸುಂದರ್ ಕವಿತಾ ಹಾಂಗಾಸರ್ ಆಸಾ - ಗೊಂಯ್ಚೊ ಗೀತಕಾರ್ ಉದಯ್ ಭೆಂಬ್ರೆ ಥಾವ್ನ್. ಹೆ ಕವಿತೆಕ್ ಕಾಂಯ್ ಪಾಂತ್ತೀಸ್ ವರ್ಸಾಂ ಜಾಲಿಂ. ಗೀತಕಾರ್, ಕವಿ ಜಾವ್ನ್ ನಾಂವ್ ಕೆಲ್ಲ್ಯಾ ಉದಯ್ ಭೆಂಬ್ರೆನ್, ವಕಾಲತ್ ಚಾಲು ಕೆಲ್ಯಾ ಉಪ್ರಾಂತ್ ಅಸಲಿಂ ಸುಂದರ್ ಗಿತಾಂ ಬರೊಂವ್ಚಿಂ ರಾವಯ್ಲಿಂ. ಆಜ್ ತೆ ಏಕ್ ಚಳುವಳೆಗಾರ್ ತಶೆಂ ಲೇಖಕ್ ಜಾವ್ನ್ ಆಸಾತ್.

ಕೃಷ್ಣ ಖಾತೀರ್ ರಾಧೆಚೊ ಮೋಗ್ ಖತ್ಕತೊನ್ ಉಮಾಳ್ತಾ ಹಾಂಗಾಸರ್. ಪಿರ‍್ಲುಕ್ ಫುಂಕಲ್ಲಿ ಪುರೊ, ರಾವಯ್ - ತುಜ್ಯಾ ವೊಂಟಾಂಚೆಂ ಅಮೃತ್ ತೆ ಪಿರ‍್ಲುಕೆಕ್ ದೀನಾಕಾ ಮ್ಹಣ್ತಾನಾ ಆನ್ಯೇಕೆ ವಾಟೆನ್ ಮನಾಂತ್ಲ್ಯಾ ಮನಾಂತ್ ಆಪ್ಣಾಚ್ಯಾ ವೊಂಟಾಂಕ್ ದೀ ಮ್ಹಣೊನ್ ಹಿ ರಾಧಾ ಸಾಂಗ್ತಾ ಆಸ್ತಲಿ.

ಮೊಗಾಚಿ ಕವಿತಾ ಹಿ. ಮೊಗಾನ್ ಜಳಲ್ಲ್ಯಾಚಿ ಕವಿತಾ ಹಿ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

 

 

 

 

 

 

 

ರಾಧೆಕ್ ಮತ್ಸರ್ ಮುರಲಿಚೊ

ಕೃಷ್ಣಾ ನಾಕಾ, ಮುರಲಿ ನಾಕಾ...
ತಾನ್ ಮುರಲಿಚಿ ಕೃಷ್ಣಾ ನಾಕಾ
ತಿಜೆ ಜಿಣೆಚೊ ಮತ್ಸರ್ ಮ್ಹಾಕಾ

ಸಕಾಳ್-ಸಾಂಜ್ ಏಕ್ ತಿಜೋಚ್ ನಾದ್
ಮ್ಹಜೊ ಆಯ್ಕುಶಿ ಕೆನ್ನಾ ಸಾದ್
ನಾಕಾ ದೀಂವ್ ನಾಕಾ, ತುಜ್ಯಾ ವೊಂಠಾಂಚೆಂ
        ಅಮೃತ್ ಪೀಂವ್ಕ್ ತಿಕಾ!

ಲಾಗಿಂ ಆಸ್ತಾನಾ ತುಜಿ ಹಿ ಮುರಲಿ
ರಾಧಾ ಕಶಿ ರೆ ತುಕಾ ಸುಚ್ತಲಿ
ಹಾಂಸ್ ಹಾಂಸ್ ತುಂ, ತುಜೊ ಖೆಳ್ ಹೊ
        ಲಾಯ್ತಾ ಕಾಂಟಿ ಸುಖಾ!

ಕಿತೆಂ ಉಣೆ-ರೆ ಮ್ಹಜ್ಯಾಂತ್ ಆಶಿಲ್ಲೆಂ
ತನ್ ಮನ್ ತುಕಾ ವೊಂಪುನ್ ಬಶಿಲ್ಲೆಂ
ತುಜೆ ಸಂಗ್ತಿಚಿ ಭಾಗಯ್ ತಾನ್-ರೆ
        ಘಾಲ್ತಾ ಸಪೂತ್ ತುಕಾ!

-ಉದಯ್ ಭೆಂಬ್ರೊ

संपादकीय:

राधाच्या काळजाचे तळमळे पीर‍्लूक फुंकच्या कृषणाक खंय समजतात?

भोव सुरस सुंदर कविता हांगासर आसा - गोंयचो गीतकार उदय भेंबरे थावन. हे कवितेक कांय पांत्तीस वर्सां जालीं. गीतकार, कवी जावन नांव केल्ल्या उदय भेंबरेन, वकालत चालू केल्या उपरांत असलीं सुंदर गितां बरोंवचीं रावयलीं. आज ते एक चळुवळेगार तशें लेखक जावन आसात.

कृषण खातीर राधेचो मोग खत्कतोन उमाळता हांगासर. पीर‍्लूक फुंकल्ली पुरो, रावय - तुज्या वोंटांचें अमृत ते पीर‍्लुकेक दीनाका म्हणताना आन्येके वाटेन मनांतल्या मनांत आपणाच्या वोंटांक दी म्हणोन ही राधा सांग्ता आसतली.

मोगाची कविता ही. मोगान जळल्ल्याची कविता ही.

-मेलवीन रोड्रिगस

कविता:

राधेक मत्सर मुरलिचो

कृषणा नाका, मुरली नाका...
तान मुरलिची कृषणा नाका
तिजे जिणेचो मत्सर म्हाका

सकाळ-सांज एक तिजोच नाद
म्हजो आयकुशी केन्ना साद
नाका दींव नाका, तुज्या वोंठांचें
        अमृत पीवंक तिका!

लागीं आसताना तुजी ही मुरली
राधा कशी रे तुका सुचतली
हांस हांस तूं, तुजो खेळ हो
        लायता कांटी सुखा!

कितें उणे-रे म्हज्यांत आशिल्लें
तन मन तुका वोंपून बशिल्लें
तुजे संग्तिची भागय तान-रे
          घाल्ता सपूत तुका!

-उदय भेंबरो



  A   B   C   D   E   F   G   H   I   J   K   L   M
 
  N   O   P   Q   R   S   T   U   V   W   X   Y   Z