Poems

ಕಾನೂನ್

ವಿಲ್ಮಾ ಬಂಟ್ವಾಳ್

ಸಂಪಾದಕೀಯ್:

ಧಾರುಣ್ ಕಾಳೀಜ್ ಲೆಗುನ್ ಕಡಂವ್ಚಿ ಕವಿತಾ

ಆಮ್ಚ್ಯಾಚ್ ಗಾಂವ್ಚಿ ಸ್ತ್ರೀ ಎಕ್ಲಿ, ಐರ‍್ಲೆಂಡ್ ಗಾಂವ್ಚ್ಯಾ ಕಾನೂನಾವರ್ವಿಂ, ವೆಳಾರ್ ಶುಶ್ರೂಷಾ ಲಾಭನಾಸ್ತಾಂ, ಥೊಡ್ಯಾ ತೆಂಪಾ ಆದಿಂ ಮರಣ್ ಪಾವಲ್ಲಿ ಖಬರ್ ಆಮ್ಕಾಂ ಸರ್ವಾಂಕ್ ಆಸ್ತಲಿಚ್. ಹ್ಯಾ ಎಕಾ ಮರ್ಣಾವರ್ವಿಂ ಗಾಂವಾಕ್ ಗಾಂವ್ ಉಚಾಂಬಳ್ ಜಾಲೊ. ಪುರ್ಶಾಂವ್ ಕಾಡ್ಲೆ, ಘೋಷಣಾಂ ಅಂತ್ರಳಾಕ್ ಚಡ್ಲಿಂ, ವರ್ದ್ಯೊ ಛಾಪುನ್ ಆಯ್ಲ್ಯೊ.

ಪುಣ್ ಇತ್ಲೆಂ ಪುರಾಯ್ ಜಾತಾನಾ ಪಾಂಯಾಂ ಮುಳಾಂತ್ ಘಡಲ್ಲ್ಯಾ ಘಡಿತಾಕ್ ತಾಳೊ ದಿಂವ್ಚೆ ಕೊಣಯ್ ನಾ ಜಾಲೆ. ಕಸಲೆಂ ಏಕ್ ವಿಪರ‍್ಯಾಸ್? ಅಸಲಿಂ ಹಜಾರಾಂನಿ ಘಡಿತಾಂ ಸದಾಂನೀತ್ ಮ್ಹಳ್ಳೆಬರಿ ಆಮ್ಚ್ಯಾ ದೊಳ್ಯಾಂ ಸಾಮ್ಕಾರ್ ಘಡ್ತಾತ್. ಕೊಣಾಯ್ಚಿ ದೀಷ್ಟ್ ತೆವ್ಶಿನ್ ವಚನಾ. ವಿಲ್ಮಾ ಬಂಟ್ವಾಳಾನ್ ತಸಲ್ಯಾ ಘಡಿತಾಂಕ್ ಆಪ್ಲೆ ಕವಿತೆದ್ವಾರಿಂ ತಾಳೊ ದಿಲಾ.

ಹ್ಯಾಚ್ ಹಪ್ತ್ಯಾಂತ್ ಕಿಟಾಳ್ ಯುವಪುರಸ್ಕಾರ್ ಜೊಡಲ್ಲ್ಯಾ ವಿಲ್ಮಾನ್, ಜನೆರಾಂತ್ ಕವಿತಾ ಫೆಸ್ತ್ ಸಂದರ್ಭಾರ್ ವಾಚಲ್ಲಿ ಹಿ ಕವಿತಾ ಖಂಯ್ಚ್ಯಾಯ್ ಧಾರುಣ್ ಕಾಳ್ಜಾಕಯ್ ಏಕ್ ಪಾವ್ಟಿಂಚ್ಯಾಕ್ ಧರ್ನ್ ಹಾಲಯ್ತಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

 

 

 

 

 

 

ಕಾನೂನ್

ಅನ್ನ್ಯಾಯ್ ಜಾಲೊ
  ಆಮ್ಚೆ ಸ್ತ್ರೀಯೆಕ್
    ಲಜ್ ಜಾಲಿ
      ಐರ‍್ಲೆಂಡಾಕ್

ರಾಕೊನಚ್ ರಾವಲ್ಲೆ
  ಆಮ್ಚೆ ಸಂಘ್ ಉಟ್ಲೆ
    ತಾಳೊ ಪಿಂದ್ತಾಸರ್
      ಬೊಬಾಟ್ಲೆ
ಭೋವ್ಶಾ
  ಬಿರ್ಮತೆನ್ ಹಾಂಚೆಂ
    ಕಾಳೀಜ್ ಪೆಟ್ಲೆಂ
ಕೊಣ್ ಎಕ್ಲ್ಯಾನ್
  ಘೋಷಣಾಂಚೆ ಬೋರ್ಡ್ ಹಾಡ್ಲೆ
    ಸಾಂದೆ ಸರ್ವ್
      ರಂಗಾಳ್ ವಸ್ತ್ರಾಂನಿ
        ಸೊಭ್ಲೆ.
ಆಪುರ್ಬಾಯೆನ್
  ಫೋಟೊ, ವಿಡಿಯೊ
    ಕಾಡ್ಲ್ಯೊ.
      ವರ್ದ್ಯೊ ಸಗ್ಳ್ಯಾ ಪತ್ರಾಂನಿ
        ಭರ‍್ಲ್ಯೊ
          ಅರ್ಧೆಂಚ್ ಕಿಲೋಮೀಟರ್
            ಪ್ರತಿಭಟನ್ ಸಂಪ್ಲೆಂ.

ಕೊಣೆ ಎಕ್ಲ್ಯಾನ್
  ಬೋರ್ಡ್ ಎಕ್ಟಾಂಯ್ಲೆ
    ಆನಿ ಕಚ್ರ್ಯಾಂತ್ ಉಡಯ್ಲೆ

ತೆದ್ನಾಂ
  ತ್ಯಾಚ್ ಕಚ್ರ್ಯಾಂತ್
    ಚಿಮ್ಟಿ ಉಸ್ವಾಸ್ ಸೊಡ್ನ್ ಆಸಲ್ಲೆಂ
      ಬಾಳ್ಶೆಂ
        ಬೋರ್ಡಾಂಚೆ ಜಡಾಯೆಕ್
          ಥಂಡ್ ಜಾಲೆಂ!

ಆಕಾಸಾಕ್ ಪಳೆಂವ್ಚೊ
  ಏಕ್ ಬೋರ್ಡ್
    ಅಶೆಂ ಸಾಂಗ್ತಾಲೊ:
      "ಐರ‍್ಲೆಂಡಾಚೆಂ ಕಾನೂನ್ ಬದ್ಲಿಯಾ!"

-ವಿಲ್ಮಾ ಬಂಟ್ವಾಳ್

 

संपादकीय:

धारूण काळीज लेगून कडंवची कविता

आमच्याच गांवची स्त्री एकली, ऐर‍्लेंड गांवच्या कानूनावर्वीं, वेळार शुश्रूषा लाभनासतां, थोड्या तेंपा आदीं मरण पावल्ली खबर आमकां सर्वांक आसतलीच. ह्या एका मर्णावर्वीं गांवाक गांव उचांबळ जालो. पुर्शांव काडले, घोषणां अंत्रळाक चडलीं, वर्द्यो छापून आयल्यो.

पूण इतलें पुराय जाताना पांयां मुळांत घडल्ल्या घडिताक ताळो दिंवचे कोणय ना जाले. कसलें एक विपर‍्यास? असलीं हजारांनी घडितां सदांनीत म्हळ्ळेबरी आमच्या दोळ्यां सामकार घडतात. कोणायची दीषट तेवशीन वचना. विल्मा बंटवाळान तसल्या घडितांक आपले कवितेद्वारीं ताळो दिला.

ह्याच हप्त्यांत किटाळ युवपुरसकार जोडल्ल्या विल्मान, जनेरांत कविता फेसत संदर्भार वाचल्ली ही कविता खंयच्याय धारूण काळजाकय एक पावटिंच्याक धर्न हालयता.

-मेलवीन रोड्रिगस

कविता:

कानून

अन्न्याय जालो
आमचे स्त्रीयेक
लज जाली
ऐर‍्लेंडाक

राकोनच रावल्ले
आमचे संघ उटले
ताळो पिंदतासर
बोबाटले
भोवशा
बिर्मतेन हांचें
काळीज पेटलें
कोण एकल्यान
घोषणांचे बोर्ड हाडले
सांदे सर्व
रंगाळ वसत्रांनी
सोभले.
आपुरबायेन
फोटो, विडियो
काडल्यो.
वर्द्यो सगळ्या पत्रांनी
भर‍्ल्यो
अर्धेंच किलोमीटर
प्रतिभटन संपलें.

कोणे एकल्यान
बोर्ड एकटांयले
आनी कचऱ्यांत उडयले

तेदनां
त्याच कचऱ्यांत
चिमटी उस्वास सोडन आसल्लें
बाळशें
बोर्डांचे जडायेक
थंड जालें!

आकासाक पळेंवचो
एक बोर्ड
अशें सांग्तालो:
"ऐर‍्लेंडाचें कानून बदलिया!"

-विल्मा बंटवाळ



  A   B   C   D   E   F   G   H   I   J   K   L   M
 
  N   O   P   Q   R   S   T   U   V   W   X   Y   Z