ವಡಾ ರುಕಾ ಮುಳಾಂತ್ಲಿ ಕಾಣಿ..

　

ಕವಿತಾ:

ವಡಾ ರುಕಾ ಮುಳಾಂತ್ಲಿ ಕಾಣಿ..

ವಡಾ ರುಕಾ ಪಾಳಾಂ ಇಡ್ಯಾಂತ್
ಅಡ್ಚಲ್ಲ್ಯಾ ಝಾಡಾಕೀ
ಸೊಸ್ಲಿನಾ ಮುಳಾಂತ್ಲಿ ಜಿಣಿ
ಸಂಪೊಂವ್ಕ್ ಚಿಂತ್ಲಿ ಕಾಣಿ

ರುಕಾ ಸಾವ್ಳೆಂತ್ ಬಾಂದ್ತಾ ಉಸ್ವಾಸ್
ಪುಣ್ ಕಸೊ ಘೆಂವ್ಚೊ ಗಳ್ಪಾಸ್?

ಕಾಟ್ಯಾರ್ ಬಸೊನ್ ಬಿಡಿ ವೊಡ್ಚ್ಯಾ
ಮೊಯ್ದಿನಿಲಾಗಿಂ ಮಾಗ್ಲೊ ಆಡ್ಡೊಸ್
ಕುರಾಡೆನ್ ಮಾರ್‍ನ್ ಕಾಡ್ ಲಗಾಡ್
ಮೊಯ್ದಿನ್ ಗೆಲೊ ಪಾನಾಂ ಕಿಮ್ಚುನ್
ಪೊಪ್ಸಾ ಕೆನ್ಸರಾ ಖೊಂಕ್ಲಿ ಕಾಡುನ್
ಕಾಳೊ ಧುಂವೊರ್ ಪೆಲ್ಯಾಕ್ ವಾಂಟುನ್
ಸಂಪ್ಲಿನಾ ಕಾಣಿ..

ಕಾಟ್ಯಾಕ್ ತೆಂಕೊನ್ ಬೊತ್ಲ್ ಘೊಟ್ಚ್ಯಾ
ಮೊಡ್ತಿನಿ ಲಾಗಿಂ ಜೊಡ್ಲೊ ಹಾತ್
ಖಾಂದ್ ದಿತಾಯ್ ಘೆಂವ್ಕ್ ಗಳ್ಪಾಸ್?
ಮೊಡ್ತಿನ್ ಗೆಲೊ ಫಾಂಟೊ ಮೊಡುನ್
ಆನ್ಕಿಟೆ ಕೆನ್ಸರಾ ವೊಂಕಾರೆ ಕಾಡುನ್
ಬೊತ್ಲೆ ಖೊಂವ್ಚಿ ವಾಟೆರ್ ಶಿಂಪೊನ್
ಸಂಪ್ಲಿನಾ ಕಾಣಿ

ಮನೀಸ್ ಖಾಂದ್ ದಿತಾ ಮಡ್ಯಾಕ್
ದೀನಾ ಬಾಯೆ ಖಾಂದ್ ಜಿವ್ಯಾಕ್..
ಕಿಟಿ ಕಿಟಿ ನಂಜಿ ಹಾಸ್ಲಿ
ವಯ್ಲಿ ಚಾನಿ

ಮಾತ್ಯೆಂತ್ ಹುಳ್ವುಳ್ಚೊ ಗಾಂಯ್ದೊಳ್ ಎಕ್ಲೊ
ಮುಳಾಕ್ ಕುಟ್ಟುನ್ ಆಪೊಂವ್ಕ್‌ಲಾಗ್ಲೊ
ನಾ ಕುಡ್ಕೊ ಪಾಟ್ಲೊ ಮುಕ್ಲೊ
ಹಾಡಾಂ ತುಟಲ್ಲ್ಯಾ ರೈತಾ ತಸ್ಲೊ
ಭಿರ್ಮತೆನ್ ವಿಚಾರಿ ತಾಕಾ ಝಾಡ್
ಕಾಂಯ್ ತುಕಾಯ್ ಜಾಲಾ ಜೀವ್ ಜಡ್?

ಮನೀಸ್ ನ್ಹಯ್ ಗಾಂಯ್ದೊಳ್ ಹಾಂವ್
ಹುಳ್ವುಳ್ತಾಂ ನ್ಹಯ್ ಘೊಳ್ತಾಂ ಹಾಂವ್
ಮರೊಂಕ್ ನಾಕಾ, ವಾಂಚೊಂಕ್ ಜಾಯ್
ಹಸ್ತಿ ಜೀವ್ ಕಿತ್ಯಾಕ್ ಮ್ಹಾಕಾ?
ವಡಾರುಕಾಕ್ ಭೆಶ್ಟೆಂ ದುರ್‍ಸನಾಕಾ
ಮಾತಿ ಮೊಳುನ್, ಮ್ಹೆಳೆಂ ಖಾವ್ನ್
ಮುಳಾಕ್ ತುಜ್ಯಾ ಭರ್‍ತಾಂ ಈಟ್
ಜೀವ್ಘಾತ್ ಮಾತ್ ಕರಿನಾಕಾ..

ವಡಾ ರುಕಾ ಮುಳಾ ಸಾವ್ಳೆಂತ್
ವಾಡ್ಚ್ಯಾ ಝಾಡಾಕ್ ದಿಸ್ಲೊ ಉಜ್ವಾಡ್
ಪಾಲೆಲಿ ಗರ್ಭಾಂತ್ ಜಿಯೆಂವ್ಚಿ ಉರ್‍ಬಾ
ಘೊಳ್ಚ್ಯಾ ಗಾಂಯ್ದೊಳಾನ್ ಭರ್‍ಲೆಂ ತ್ರಾಣ್
ಶಿಕಯ್ಲಿ ಜಿಣಿ, ಬದ್ಲಲಿ ಕಾಣಿ

-ಆಂಡ್ರ್ಯೂ ಎಲ್ ಡಿಕುನ್ಹಾ

कविता:

वडा रुका मुळांतली काणी..

वडा रुका पाळां इड्यांत
अडचल्ल्या झाडाकी
सोसलिना मुळांतली जिणी
संपोवंक चिंतली काणी

रुका सावळेंत बांदता उस्वास
पूण कसो घेंवचो गळपास?

काट्यार बसोन बिडी वोडच्या
मोयदिनिलागीं मागलो आड्डोस
कुराडेन मार‍न काड लगाड
मोयदीन गेलो पानां किमचून
पोप्सा केन्सरा खोंकली काडून
काळो धुंवोर पेल्याक वांटून
संपलिना काणी..

काट्याक तेंकोन बोतल घोटच्या
मोडतिनी लागीं जोडलो हात
खांद दिताय घेवंक गळपास?
मोडतीन गेलो फांटो मोडून
आनकिटे केन्सरा वोंकारे काडून
बोतले खोंवची वाटेर शिंपोन
संपलिना काणी

मनीस खांद दिता मड्याक
दीना बाये खांद जिव्याक..
किटी किटी नंजी हासली
वयली चानी

मात्येंत हुळवुळचो गांयदोळ एकलो
मुळाक कुट्टून आपोवंक‌लागलो
ना कुडको पाटलो मुकलो
हाडां तुटल्ल्या रैता तसलो
भिर्मतेन विचारी ताका झाड
कांय तुकाय जाला जीव जड?

मनीस न्हय गांयदोळ हांव
हुळवुळतां न्हय घोळतां हांव
मरोंक नाका, वांचोंक जाय
हसती जीव कित्याक म्हाका?
वडारुकाक भेश्टें दूर‍सनाका
माती मोळून, म्हेळें खावन
मुळाक तुज्या भर‍तां ईट
जीवघात मात करिनाका..

वडा रुका मुळा सावळेंत
वाडच्या झाडाक दिसलो उज्वाड
पालेली गर्भांत जियेंवची ऊर‍बा
घोळच्या गांयदोळान भर‍लें त्राण
शिकयली जिणी, बदलली काणी

-आंडऱ्यू एल डिकुन्हा