ಕಾವ್ಯದಾಸ್ ನಾಮಾಂಕಿತ್ ಲಿಯಾಬ್ (ಲಿಯೊ ಡಿ’ಸೋಜಾ) ಸಂಸಾರಾಕ್ ಅಂತರ‍್ಲೊ

ಒಕ್ಟೋಬ್ರಾಚೆ 10 ತಾರಿಕೆರ್ ಸಕಾಳಿಂ ಬೆಂಗ್ಳುರ್ ಥಾವ್ನ್ ಜೂಡಿಚೆಂ ಫೊನ್ ವ್ಹಾಜ್ತಾನಾ ಕಾಂಯ್ ಲಿಯಾಬ್ ಮಂಗ್ಳುರಾಕ್ ಯೆಂವ್ಚಿ ಖಬರ್ ದಿತಾ ಕೊಣ್ಣಾ ಮ್ಹಣೊನ್ ಹಾಂವೆಂ ಖಿಣಾಕ್ ಚಿಂತಲ್ಲೆಂ. ಪಾಟ್ಲ್ಯಾ ಪಂದ್ರಾ ದಿಸಾಂನಿ ಕಾಂಯ್ ಪಾಂಚ್ ಪಾವ್ಟಿಂ ಹಾಂವ್ ಜೂಡಿಲಾಗಿಂ ಉಲಯಿಲ್ಲೊಂ. ಜೂಡಿ ಮ್ಹಳ್ಯಾರ್ ಕೊಂಕಣಿ ಕವಿ, ಲೇಖಕ್ ಲಿಯಾಬಾಚಿ ಮ್ಹಾಲ್ಗಡಿ ಧುವ್. ಬೆಂಗ್ಳುರಾಂತ್ ತಿ ಆಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರ‍್ತಾ. ಪುಣ್ ಜೂಡಿಚ್ಯಾ ತಾಳ್ಯಾಂತ್ ಹುಸ್ಕಾರೆ ಆಸಲ್ಲೆ. ದೂಕ್ ಆಸಲ್ಲಿ. ಹಿ ದೂಕ್, ಹುಸ್ಕಾರೆ ಉಲಯ್ತಾಂ ಉಲಯ್ತಾನಾ ರಡ್ಣ್ಯಾಕ್ ಘುಂವ್ಲೆ. ‘ಲಿಯಾಬ್ ಆನಿ ನಾ’ ಮ್ಹಳ್ಳಿ ಗಜಾಲ್ ತಿಣೆಂ ಮ್ಹಾಕಾ ಸಾಂಗ್ಲಿ. ‘ರಾತಿಕ್ ಕಿತ್ಲ್ಯಾ ವೆಳಾರ್, ಕಸೊ ತೊ ಮೆಲಾ ಮ್ಹಳ್ಳೆಂಯ್ ಆಮ್ಕಾಂ ಕಳೊಂಕ್ ನಾ’ ಮ್ಹಣೊನ್ ತಿ ಕಳ್ವಳ್ಳಿ.

ಕಾಂಯ್ ವೀಸ್ ದಿಸಾಂ ಆದಿಂ ಆಪ್ಲೆ ಶೆಳಿಕ್ ಲಾಗೊನ್ ಕಾಣ್ಗೆಲ್ಲ್ಯಾ ಗುಳಿಯಾಂಚೊ ಪರಿಣಾಮ್ ಕಿಡ್ನಿಚೆರ್ ಪಡಲ್ಲ್ಯಾನ್ ತುರ್ತ್ ಚಿಕಿತ್ಸೆಚಿ ಗರ್ಜ್ ಸಮ್ಜೊನ್ ಜೂಡಿನ್, ಲಿಯಾಬಾಕ್ ಬೆಂಗ್ಳುರ್ ಸೈಂಟ್ ಜೊನ್ಸ್ ಆಸ್ಪತ್ರೆಂತ್ ದಾಖಲ್ ಕೆಲ್ಲೆಂ. ತೊ ಸಂಪೂರ್ಣ್ ಗಳಲ್ಲೊ. ಥಂಯ್ಸರ್ ಐಸಿಯೂಂತ್ ತಾಕಾ ದವರ‍್ಚೆಂ ಪಡಲ್ಲೆಂ. ಮ್ಹಾಕಾ ಫೊನಾಚೆರ್ ಲಿಯಾಬಾಲಾಗಿಂ ಉಲೊವ್ಯಾಂ ಮ್ಹಣೊನ್ ಭೊಗುಂಕಯ್ ಆನಿ ಜೂಡಿನ್ ‘ಉಲಯ್ತಾಯ್ಗಿ’ ಮ್ಹಣ್ ವಿಚಾರುಂಕ್ ತಾಳ್ ಪಡ್ಲೆಂ. ಪುಣ್ ತೊ ಬೋರೊ ಅಸ್ಕತ್ ಆಸಾ, ಉಲೊಂವ್ಕ್ ಕಷ್ಟತಾ ಮ್ಹಣೊನ್ ಸಮ್ಜಲ್ಯಾ ಉಪ್ರಾಂತ್, ಹಾಂವೆಂಚ್ ದೋನ್ ದಿಸಾಂ ಉಪ್ರಾಂತ್ ಉಲೊಂವ್ಚಿ ಮಾಂಡ್ಣಿ ಕೆಲಿ.

ಥೊಡ್ಯಾ ದಿಸಾಂನಿ ಬರೊ ಜಾವ್ನ್ ತೊ ಬೆಂಗ್ಳುರ್ ಧುವೆಚ್ಯಾ ಘರಾ ಆಯ್ಲ್ಯಾ ಉಪ್ರಾಂತ್, ತಾಚೆಲಾಗಿಂ ಹಾಂವ್ ಫೊನಾರ್ ಉಲಯ್ಲೊಂ: "ಕಶೆಂ ಜಾಲೆಂ ಲಿಯಾಬ್ ತುಮ್ಚೆಂ ಹೆಂ ಪಯ್ಣ್?" ವಿಚಾರ‍್ಲೆಂ ಹಾಂವೆಂ. ಹಾಸ್ಲೊ ತೊ, "ಪಯ್ಣ್ ಸಂಪೊವ್ನ್ ಪಾಟಿಂ ಆಯ್ಲಾಂ ಹಾಂವ್. ಕಠಿಣ್ ದೂಕ್ ಭೊಗ್ಲಿ. ಆತಾಂ ಬರೊ ಜಾಲಾಂ" ಮ್ಹಣೊನ್ ಸಾಂಗಲಾಗ್ಲೊ.

ಲಿಯಾಬಾಚಿ ಆನಿ ಮ್ಹಜಿ ವೊಳಕ್ ಕಾಂಯ್ ಪಾಂತ್ತೀಸ್ ವರ್ಸಾಂ ಆದ್ಲಿ. ತೊ ಪದ್ವಾ ಹೈಸ್ಕೂಲಾಂತ್ ಶಿಕಯ್ತಾನಾ ಆಮ್ಚಿ ವೊಳಕ್. ಮಾಗೀರ್ ಚಡಿತ್ ದಾಟಾಯೆನ್ ನ್ಹಯ್ ತರೀ, ಆಮಿ ಸಂಪರ್ಕಾಂತ್ ಆಸಲ್ಲ್ಯಾಂವ್. ಕವಿತಾ ಟ್ರಸ್ಟ್ ಸ್ಥಾಪನ್ ಜಾಲ್ಯಾ ಮಾಗೀರ್, ದುಬಾಯ್ ಶೆರಾಂತ್ ತೊ ಪಾವಲ್ಲ್ಯಾವೆಳಾ "ಲಿಯಾಬಾಲಾಗಿಂ ಮುಲಾಕತ್" ಕಾರ್ಯಕ್ರಮ್ ಹಾಂವೆಂ ಮಾಂಡುನ್ ಹಾಡಲ್ಲೆಂ. ದುಬಾಯ್ಚೆ ಜಾಯ್ತೆ ಕೊಂಕ್ಣಿ ಕವಿ ಆನಿ ಮೋಗಿ ಹ್ಯಾ ಕಾರ್ಯಾಕ್ ಹಾಜರ್ ಆಸಲ್ಲೆ. ಆಮಿ ತಾಚೆಲಾಗಿಂ ಉಗ್ತ್ಯಾ ಮನಾನ್ ಸಂವಾದ್ ಚಲಯಿಲ್ಲೊ. ತಾಣೆ ಆಪ್ಲ್ಯೊ ಕವಿತಾ ವಾಚುನ್ ಸಾಂಗಲ್ಲ್ಯೊ ಸೈತ್.

ಕವಿತಾ.ಕೊಮ್ ಜಾಳಿಜಾಗ್ಯಾ ಖಾತೀರ್ ತೊ ತವಳ್ ತವಳ್ ಕವಿತಾ ಧಾಡುನ್ ದಿತಾಲೊ. ಹಾಂವೆಂ ಕೆಲ್ಲೆ ವಿನವ್ಣೆಕ್ ಲಾಗೊನ್ ತಾಣೆ ‘ಜಾಣ್ತ್ಯಾಂಚ್ಯಾ ಪಾವ್ಲಾಂನಿ’ ಮ್ಹಳ್ಳಿ ಲೇಖನಾಂಚಿ ಶಿಂಕಳ್ ಬರಯಿಲ್ಲಿ. ತಿ ಉಪ್ರಾಂತ್ ಹಾಂವೆಂ ಪುಸ್ತಕಾ ರುಪಾರ್ ಪರ್ಗಟ್ ಕೆಲ್ಲಿ. ಮಂಗ್ಳುರಾಂತ್ ಸೈತ್ ಆಮಿ ತಾಚೆಸಾಂಗಾತಾ ಏಕ್ ಮುಲಾಕತೆಚೆಂ ಕಾರ್ಯಕ್ರಮ್ ಬಿಕ್ಕರ್ನಕಟ್ಟೆ ಬಾಳೊಕ್ ಜೆಜು ಪೂನ್‌ಶೆತಾಚ್ಯಾ ಲೈಬ್ರೆರಿಂತ್ ಮಾಂಡುನ್ ಹಾಡಲ್ಲೆಂ. ಕವಿತಾ ಟ್ರಸ್ಟಾ ತರ್ಫೆನ್ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ದೀವ್ನ್ ತಾಕಾ ಆಮಿ ಬಾರ್ಕೂರ್ ಕವಿತಾ ಫೆಸ್ತ್ ಸಂದರ್ಭಾರ್ ಮಾನ್ ಕೆಲ್ಲೊ. ತೊ ಮಾನ್ ಸ್ವೀಕಾರ್ ಕರುಂಕ್ ಆಪ್ಲೆ ಪತಿಣೆಸವೆಂ ತೊ ಆಯಿಲ್ಲೊ ಆನಿ ಕನ್ನಡ ಲೇಖಕ್ ಜಯಂತ ಕಾಯ್ಕಿಣಿ ಹಾಂಚ್ಯಾ ಹಾತಾಂ ಥಾವ್ನ್ ಹೊ ಪುರಸ್ಕಾರ್ ಸ್ವೀಕಾರ್ ಕೆಲ್ಲೊ.

ಬಾರ್ಕೂರ್ ಕವಿತಾ ಫೆಸ್ತಾಂತ್ ಲಿಯಾಬಾಕ್ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ದಿತಾನಾ

ತಾಚಿ ‘ಕಣ್ಶೆಚೆಂ ಕಾಜಾರ್’ಕವಿತಾ ಬೋವ್ ಗಾಜ್ಲ್ಯಾ. ಕೊಂಕಣಿ ಲೇಖಕ್, ಕವಿ, ನವಲ್‌ಕಾರ್, ಅನುವಾದಕ್ ಜಾವ್ನ್ ಲಿಯಾಬಾನ್ ಕೊಂಕಣಿಕ್ ವಿಶೇಸ್ ದೇಣ್ಗಿ ದಿಲ್ಯಾ. ರಾಕ್ಣೊ ಪತ್ರಾಚೊ ಸಹ-ಸಂಪಾದಕ್ ಜಾವ್ನ್, ಬಾಹ್ರೇನಾಂತ್ ಗಲ್ಫ್ ಡೈಲಿ ನ್ಯೂಸ್ ಪತ್ರಾಂತ್ ವಾವುರ್ನ್ ಪತ್ರಿಕೋದ್ಯಮಾಂತಯ್ ತಾಣೆ ವಾವ್ರ್ ಭೆಟಯ್ಲಾ. ಎಕ್ಲೊ ಬಾಪಯ್ ಜಾವ್ನ್, ಎಕ್ಲೊ ಪತಿ ಜಾವ್ನ್, ಎಕ್ಲೊ ಶಿಕ್ಷಕ್ ಜಾವ್ನ್, ಎಕ್ಲೊ ಮ್ಯಾನೇಜರ್ ಜಾವ್ನ್, ಎಕ್ಲೊ ಸಹ-ವಾವ್ರಾಡಿ ಜಾವ್ನ್ - ಲಿಯಾಬಾನ್ ಜಾಯ್ತ್ಯಾ ವ್ಯಕ್ತಿತ್ವಾಂ ಥಂಯ್ ಹುಮೆದಿಚಿ ಝರ್ ವೊಂಪ್ಲ್ಯಾ. ಆತಾಂಚ್ಯಾ ನವ್ಯಾ ಲೇಖಕಾಂ ಥಂಯ್ ತಾಕಾ ವಿಶೇಸ್ ಹುಸ್ಕೊ ಆಸಲ್ಲೊ. ಮ್ಹಾಲ್ಗಡ್ಯಾಂಚಿ ತಾಂಕಾಂ ವೊಳಕ್ ದವ್ರುಂಕ್ ಕಳನಾ ಮ್ಹಳ್ಳಿ ಖಂತ್ ತಾಕಾ ಧೊಸ್ತಾಲಿ. ಹಾಚಿಂ ಕಾರಣಾಂಯ್ ತೊ ಮ್ಹಜೆಲಾಗಿಂ ವಾಂಟುನ್ ಘೆತಾಲೊ.

ಕವಿತಾ ಮ್ಹಳ್ಯಾರ್ ಪ್ರಾಸಾಂತ್, ಮೀಟರಾಂತ್, ಸಂಗೀತಾಂತ್ ನೆಟಯಿಲ್ಲಿ ಆಸೊಂಕ್ ಜಾಯ್ ಮ್ಹಣೊನ್ ಕೆದಳಾಯ್ ಸಾಂಗೊನ್ ಆಸಲ್ಲೊ ಲಿಯಾಬ್, ಹಾಂವೆಂ ‘ಕರಾಮಾಂತ್ ಕಾಂಪಾನ್ ಕಾಂಪ್, ಕಾಯ್ಬೆವಾಚೆ ರೂಕ್’ ಕವಿತಾ ಪರ್ಗಟ್ ಕೆಲ್ಲ್ಯಾ ವೆಳಾರ್ ಗಾಂವಾಥಾವ್ನ್ ದುಬಾಯ್ ಫೊನ್ ಕರುನ್, ‘ಹಿ ಜಾಲ್ಯಾರ್ ನೀಜ್ ಕವಿತಾ, ಕವಿತಾ ಮ್ಹಳ್ಯಾರ್ ಅಶಿ ಆಸಜಾಯ್’ ಮ್ಹಣೊನ್ ಮ್ಹಜಿ ಹೊಗ್ಳಿಕ್ ಉಚಾರಲ್ಲಿ.

ಲಿಯಾಬ್ ಆಪ್ಲಿ ಪತಿಣ್ ಮೇರಿಬಾಯ್, ಭುರ್ಗಿಂ ಜೂಡಿ, ಸುನೀತಾ, ಸಂದೀಪ್ ಆನಿ ಫಾ. ಸುಧೀರ್ ಹಾಂಕಾಂ ಸಾಂಡುನ್ ಗೆಲಾ. ತಾಂಚ್ಯಾ ದುಖಾಂತ್ ಕವಿತಾ ಟ್ರಸ್ಟ್ ವಾಂಟೆಲಿ ಜಾತಾ.

-ಮೆಲ್ವಿನ್ ರೊಡ್ರಿಗಸ್,
 ಅಧ್ಯಕ್ಷ್: ಕವಿತಾ ಟ್ರಸ್ಟ್

• ‘ಜಾಣ್ತ್ಯಾಂಚ್ಯಾ ಪಾವ್ಲಾಂನಿ’ ಕಾವ್ಯದಾಸ್ ಲೇಖನಾಂ-ಶಿಂಕಳ್
• ಕವಿತಾ: ಕಣ್ಶೆಚೆಂ ಕಾಜಾರ್
• ಕವಿತಾ: ಭುಂಯ್ ಕಮಳ್
• ಕವಿತಾ: ಭಾರತಾಚೊ ಮಹಾತ್ಮಾ ತುಂ
• ಕವಿತಾ: ಪರತ್ ಆಯ್ಲ್ಯಾ ದೀವಾಳಿ
• ಕವಿತಾ: ಭುರ್ಗ್ಯಾಂಚೆಂ ಸವಾಲ್
• ಕವಿತಾ: ನಮಾನ್ ತುಕಾ ತಿರಂಗ್ ಬಾವ್ಟ್ಯಾ
• ಕವಿತಾ: ನತಾಲಾಂಚೆ ರಾತಿಂ
• ಕವಿತಾ: ಅನ್ಯಾಯ್, ಅನೀತ್ ನಾಕಾ
• ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್
• ಕಣ್ಶೆಚೆಂ ಕಾಜಾರ್ ಕವಿತೆಚೆರ್ ಜೆರಿ ರಾಸ್ಕಿನ್ಹಾ