’ಪಾವ್ಲಾಬ್ - ಏಕ್ ಜಿವಿತ್ ಸಾಸ್ಣಾಚೆಂ’ ಕಾರ್ಯಾವಳಿಂತ್ ದೆವಾಧೀನ್ ಕವಿಕ್ ಅರ್ಗಾಂ ವೊಂಪ್ಲಿಂ
ಕೊಂಕಣಿ ಕವಿ ತಶೆಂ ಕವಿತಾ ಟ್ರಸ್ಟಾಚೊ ಹಿತಚಿಂತಕ್ ಎಮ್. ಪಿ. ರೊಡ್ರಿಗಸ್ (ಮೇರಿಯನ್ ಪಾವ್ಲ್ ರೊಡ್ರಿಗಸ್) ಹಾಚೊ ಉಡಾಸ್ ಕಾಡುನ್ ತಾಕಾ ಅರ್ಗಾಂ ವೊಂಪ್ಚಿ ಕಾರ್ಯಾವಳ್ ಹ್ಯಾಚ್ ಜನೆರ್ 20, 2025 ತಾರಿಕೆರ್ ಡೊನ್ ಬೊಸ್ಕೊ ಮಿನಿ ಹೊಲಾಂತ್ ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡ್ಲಿ. ’ಪಾವ್ಲಾಬ್ - ಏಕ್ ಜಿವಿತ್ ಸಾಸ್ಣಾಚೆಂ’ ನಾಂವಾಖಾಲ್ ಮಾಂಡುನ್ ಹಾಡಲ್ಲೆ ಕಾರ್ಯಾವಳಿಂತ್ ಕವಿ ಆಂಡ್ರ್ಯೂ ಎಲ್. ಡಿಕುನ್ಹಾ ಆನಿ ಮೆಲ್ವಿನ್ ರೊಡ್ರಿಗಸಾನ್ ಪ್ರಮುಖ್ ಉಲೊವ್ಪಾಂ ಕೆಲಿಂ.
ಕವಿತಾ ಟ್ರಸ್ಟಾಚೊ ಸಾಂಗಾತಿ ಸ್ಟೇನಿ ಬೆಳಾನ್ ಸರ್ವಾಂಕ್ ಯೆವ್ಕಾರ್ ಮಾಗ್ತಚ್, ಅಧ್ಯಕ್ಷ್ ಕಿಶೂ ಬಾರ್ಕೂರಾನ್ ಹ್ಯೆ ಕಾರ್ಯಾವಳಿಚಿ ಗರ್ಜ್ ಆನಿ ಕಾರಣಾಂ ಸಾಂಗ್ಲಿಂ. ವಿಶನ್ ಕೊಂಕಣಿ ಪ್ರಾಯೋಜಕ್ ಮೈಕಲ್ ಡಿಸೊಜಾ, ಪಾವ್ಲಾಬಾಚಿ ಪತಿಣ್ ಜೆಸಿಂತಾ ರೊಡ್ರಿಗಸ್, ಪೂತ್ ಜೊನಾಥನ್ ರೊಡ್ರಿಗಸ್, ಕಿಶೂ ಬಾರ್ಕೂರ್, ಆಂಡ್ರ್ಯೂ ಎಲ್. ಡಿಕುನ್ಹಾ, ಮೆಲ್ವಿನ್ ರೊಡ್ರಿಗಸ್ ಹಾಂಣಿ ಪಾವ್ಲಾಬಾಚೆ ತಸ್ವಿರೆಕ್ ಫುಲಾಂ ಭೆಟೊವ್ನ್ ಅರ್ಗಾಂ ವೊಂಪ್ಲಿಂ.
ಹ್ಯಾ ಸಂದರ್ಭಾರ್ ಕವಿ ಆಂಡ್ರ್ಯೂ ಡಿಕುನ್ಹಾ ’ಪಾವ್ಲಾಬಾಚೆಂ ಜಿವಿತ್ ಸಾಸ್ಣಾಚೆಂ’ ಹ್ಯಾ ವಿಶಯಾಚೆರ್ ಉಲೊವ್ನ್ ಪಾವ್ಲಾಬಾಚ್ಯಾ ಗಾಂವಾಂತ್ ಆಪ್ಣಾಚೋಯ್ ಜಲ್ಮ್ ಜಾಲ್ಲೊ ಆಸ್ತಾಂ ತವಳ್ಚ್ಯೊ ಕಾಂಯ್ ಗಜಾಲಿ ಉಗ್ಡಾಪ್ಯೊ ಕೆಲ್ಯೊ.ಉಪ್ರಾಂತ್ ಪಾವ್ಲಾಬಾನ್ ಬರೊವ್ನ್ ಪರ್ಗಟ್ ಕೆಲ್ಲ್ಯಾ ’ದೇವ್ ಮನ್ಶಾಂತ್ ಆಯ್ಲೊ’ ಪುಸ್ತಕಾಂತ್ಲ್ಯಾ ಕಾಂಯ್ ಅಧ್ಯಾಯಾಂಚೆಂ ತಾಣೆ ವಿಶ್ಲೇಷಣ್ ಕೆಲೆಂ. ’ಉದ್ಕಾಚೊ ಏಕ್ ವ್ಹಾಳೊ ಸಾಗೊರಾಂತ್ ಮಿಸ್ಳೊನ್ ಗೆಲ್ಲೆಪರಿಂ, ಪಾವ್ಲಾಬ್ ಜೆಜುಸಂಗಿಂ ಮಿಸ್ಳೊನ್ ಗೆಲ್ಲೊ’ ಮ್ಹಳ್ಳೆಂ ಹೊ ಪುಸ್ತಕ್ ವಾಚ್ತಾನಾ ಕೊಣಾಕೀ ಸುಸ್ತತಾ ಮ್ಹಣುನ್ ತಾಣೆ ಸಾಂಗ್ಲೆಂ. ’ಮರ್ಣಾಂತ್ ಆಮ್ಚೆಂ ಕಿತೇಂಯ್ ಸೊಂಪನಾ. ಪುಣ್ ಮರಣ್ - ಆನಂದಾಚೆ ನವ್ಯೆ ಜಿಣ್ಯೆಕ್ ಏಕ್ ಉತ್ರೊವ್ಣಿ’ ಅಶೆಂ ತಾಣೆ ಪಾವ್ಲಾಬಾಚ್ಯಾ ಉತ್ರಾಂಚೊ ಹ್ಯಾ ಸಂದರ್ಭಾರ್ ಉಲ್ಲೇಕ್ ಕೆಲೊ.
’ಪಾವ್ಲಾಬಾಚೆಂ ಕವಿತ್ ಸಾಸ್ಣಾಚೆಂ’ ವಿಶಯಾಚೆರ್ ಉಲಯಿಲ್ಲ್ಯಾ ಮೆಲ್ವಿನ್ ರೊಡ್ರಿಗಸಾನ್ ಮನ್ಶಾಚೆಂ ಜಿವಿತ್ ಸಾಸ್ಣಾಚೆಂ ಕಶೆಂ ಜಾತಾ ಮ್ಹಣುನ್ ಸಾಂಗ್ಲ್ಯಾ ಉಪ್ರಾಂತ್ ಉತ್ರಾಂಕ್ ಸಯ್ತ್ ಉಸ್ವಾಸ್ ಆಸ್ತಾ, ತ್ಯಾದೆಕುನ್ ತಾಂಕಾಂ ಆತ್ಮೊ ಆಸ್ತಾ ಜಾಲ್ಲ್ಯಾನ್ ಪಾವ್ಲಾಬಾಚ್ಯಾ ಕಾವ್ಯಾಳ್ ಉತ್ರಾಂನಿ ಜೀವ್ ಆಸಾ, ಹಿಂ ಉತ್ರಾಂ ಸಾಸ್ಣಾಕ್ ಉರ್‍ಚೆ ತಸಲಿಂ ಮ್ಹಣುನ್ ಸಾಂಗ್ಲೆಂ. ಪಾವ್ಲಾಬಾನ್ ಆಪ್ಲ್ಯಾ ಕವಿತಾಂನಿ ಮರ್ಣಾಕ್ ವೆಂಗುನ್ ಧರಲ್ಲೆಂ ಆನಿ ತಾಚೆಲಾಗಿಂ ಜಾಯ್ತ್ಯಾ ಸಂದರ್ಭಾಂನಿ ಸಂವಾದ್ ಚಲಯಿಲ್ಲೊ ಮ್ಹಳ್ಳೆವಿಶಿಂ ಕವಿತಾಂಚೆ ದಾಕ್ಲೆ ದೀವ್ನ್ ಸಾಂಗ್ಲೆಂ.
ಡ್ಯಾನಿಕಾ ಡಿಸೋಜಾ, ನಿನಿಶಾ ಮೊಂತೇರೊ, ಚೆಲ್ಸಿಯಾ ಕ್ಯಾಸ್ತೆಲಿನೊ ಆನಿ ವಿಶ್ವಾಸ್ ರೆಬಿಂಬಸ್ ಹಾಂಣಿ ಪಾವ್ಲಾಬಾಚ್ಯೊ ಕವಿತಾ ಸಾದರ್ ಕೆಲ್ಯೊ.
ಅಧ್ಯಕ್ಷ್ ಕಿಶೂ ಬಾರ್ಕೂರಾನ್ ಜೆಸಿಂತಾ ಆನಿ ಜೊನಾಥಾನಾಕ್ ಭೆಟ್ ವಸ್ತ್ ದೀವ್ನ್ ಉಪ್ಕಾರ್ ಆಟಯ್ಲೊ.
ಜನೆರ್ 5, 2025 ತಾರಿಕೆರ್ ಆಮೇರಿಕಾಂತ್ ಸಂಸಾರಾಕ್ ಆದೇವ್ಸ್ ಮಾಗಲ್ಲ್ಯಾ ಪಾವ್ಲಾಬಾಚ್ಯಾ ಮರ್ಣಾಚಿ ನಿಮಾಣಿ ವಿಧಿ ಜನೆರ್ 13, 2025 ತಾರಿಕೆರ್ ಮಂಗ್ಳುರ್ ಮಿಲಾಗ್ರಿಸ್ ಇಗರ್ಜೆಂತ್ ಚಲಲ್ಲಿ.
’पावलाब - एक जिवीत सासणाचें’ काऱ्यावळींत देवाधीन कवीक अर्गां वोंपलीं
कोंकणी कवी तशें कविता ट्रस्टाचो हितचिंतक एम. पी. रोड्रीगस (मेरियन पावल रोड्रीगस) हाचो उडास काडून ताका अर्गां वोंपची काऱ्यावळ ह्याच जानेर 20, 2025 तारकेर डॉन बोस्को मिनी हॉलांत कविता ट्रस्टान मांडून हाडली. ’पावलाब - एक जिवीत सासणाचें’ नांवाखाल मांडून हाडल्ले काऱ्यावळींत कवी आंडऱ्यू एल. डिकुन्हा आनी मेल्विन रोड्रीगसान रोड्रिगसान प्रमूख उलोवपां केलीं.
कविता ट्रस्टाचो सांगाती स्टेनी बेळान सर्वांक येवकार मागतच, अध्यक्ष किशू बार्कूरान ह्ये काऱ्यावळिची गर्ज आनी कारणां सांगलीं. विशन कोंकणी प्रायोजक मैकल डिसोजा, पावलाबाची पतीण जेसिंता रोड्रिगस, पूत जोनाथन रोड्रिगस, किशू बार्कूर, आंडऱ्यू एल. डिकुन्हा, मेल्विन रोड्रीगस हांणी पावलाबाचे तस्विरेक फुलां भेटोवन अर्गां वोंपलीं.
ह्या संदर्भार कवी आंडऱ्यू डिकुन्हा ’पावलाबाचें जिवीत सासणाचें’ ह्या विशयाचेर उलोवन पावलाबाच्या गांवांत आपणाचोय जल्म जाल्लो आसतां तवळच्यो कांय गजाली उगडाप्यो केल्यो. उपरांत पावलाबान बरोवन पर्गट केल्ल्या ’देव मनशांत आयलो’ पुस्तकांतल्या कांय अध्यायांचें ताणे विशलेषण केलें. ’उदकाचो एक व्हाळो सागोरांत मिसळोन गेल्लेपरीं, पावलाब जेजुसंगीं मिसळोन गेल्लो’ म्हळ्ळें हो पुस्तक वाचताना कोणाकी सुस्तता म्हणून ताणे सांगलें. ’मर्णांत आमचें कितेंय सोंपना. पूण मरण - आनंदाचे नव्ये जिणयेक एक उत्रोवणी’ अशें ताणे पावलाबाच्या उत्रांचो ह्या संदर्भार उल्लेक केलो.
’पावलाबाचें कवीत सासणाचें’ विशयाचेर उलयिल्ल्या मेल्विन रोड्रीगसान मनशाचें जिवीत सासणाचें कशें जाता म्हणून सांगल्या उपरांत उत्रांक सयत उस्वास आसता, त्यादेकून तांकां आत्मो आसता जाल्ल्यान पावलाबाच्या काव्याळ उत्रांनी जीव आसा, हीं उत्रां सासणाक उरचे तसलीं म्हणून सांगलें. पावलाबान आपल्या कवितांनी मर्णाक वेंगून धरल्लें आनी ताचेलागीं जायत्या संदर्भांनी संवाद चलयिल्लो म्हळ्ळेविशीं कवितांचे दाकले दीवन सांगलें.
डॅनिका डिसोजा, निनिशा मोंतेरो, चेल्सिया कॅस्तेलिनो आनी विश्वास रेबिंबस हांणी पावलाबाच्यो कविता सादर केल्यो.
अध्यक्ष किशू बार्कूरान जेसिंता आनी जोनाथानाक भेट वस्त दीवन उपकार आटयलो.
जानेर 5, 2025 तारकेर आमेरिकांत संसाराक आदेवस मागल्ल्या पावलाबाच्या मर्णाची निमाणी विधी जानेर 13, 2025 तारकेर मंगळूर मिलाग्रीस इगर्जेंत