ಕವಿತಾ ಟ್ರಸ್ಟಾಚೆ ಮನೋಹರ್ ಸಾಂಜೆರ್ ಕಾವ್ಯಾಳ್ ಧೊಣು ರಂಗ್ಲೆ

ಕೊಂಕಣಿ ಕವಿತೆಚ್ಯಾ ಸಮಗ್ರ್ ವಾಡಾವಳಿ ಖಾತೀರ್ ವಾವುರ‍್ಚ್ಯಾ ಕವಿತಾ ಟ್ರಸ್ಟಾನ್, ಭಾರತಾಚೊ ಉಂಚ್ಲೊ ಕೊಂಕಣಿ ಕವಿ ಮನೋಹರ್ ರಾಯ್ ಸರ್ದೇಸಾಯಿಚ್ಯಾ ಮಾನಾಕ್ ಹ್ಯಾಚ್ ಎಪ್ರಿಲ್ 6, 2025 ತಾರಿಕೆರ್ ಮಂಗ್ಳುರ್ ಆಂಜೆಲೊರ್ ಲಾಗ್ಸಾರ‍್ಚ್ಯಾ ಜವಾಹರ್-ಜ್ಯೋತಿ ಘರಾಂತ್ ’ಮನೋಹರ್ ಸಾಂಜ್’ ಕಾರ್ಯಾವಳ್ ಮಾಂಡುನ್ ಹಾಡ್‌ಲ್ಲಿ.

ಕವಿತಾ ಟ್ರಸ್ಟಾಚೊ ಸ್ಥಾಪಕ್ ಮೆಲ್ವಿನ್ ರೊಡ್ರಿಗಸ್ ಹಾಣೆ ಸುರ‍್ವಾತಿರ್ ಆಪ್ಲ್ಯಾ ಪ್ರಾಸ್ತಾವಿಕ್ ಉಲೊವ್ಪಾಂತ್ ಮನೋಹರ್ ಸರ್ದೇಸಾಯಿಚೆಂ ಜಿವಿತ್ ಆನಿ ಸಾಹಿತ್ಯಾವಿಶಿಂ ಉಜ್ವಾಡ್ ಫಾಂಕ್ಲೊ. ತಾಚ್ಯಾ ಜಿವಿತಾಚ್ಯಾ ವೆವೆಗ್ಳ್ಯಾ ಕಾಳಾಂಕ್ ದಾಖಲ್ ಕೆಲ್ಲ್ಯೊ ಕವಿತಾ ವಿಂಚುನ್ ತಾಣೆಂ ಹ್ಯಾ ಸಂದರ್ಭಾರ್ ಸಾದರ್ ಕೆಲ್ಯೊ.

ನಾಮ್ಣೆಚೊ ಉಲೊವ್ಪಿ ಎಚ್ಚೆಮ್ ಪೆರ್ನಾಳ್ ಹಾಣೆ ಸರ್ದೇಸಾಯಿ ಕಸೊ 1950-1990 ವರ್ಸಾಂಚ್ಯಾ ಕಾಳಾಚೊ ಪ್ರಮುಖ್ ಕವಿ ಜಾವ್ನಾಸಲ್ಲೊ ಮ್ಹಳ್ಳೆಂ ಸಾಂಗ್ಲೆಂ. ಜಿವಿತ್, ಧರ್ಮ್ ಆನಿ ಅಧ್ಯಾತ್ಮಿಕತೆಚಿಂ ತತ್ವಾಂ ತಾಚ್ಯಾ ವ್ಯಕ್ತಿತ್ವಾಂತ್ ಕಶಿಂ ಆಯ್ಲ್ಯಾಂತ್ ಮ್ಹಳ್ಳೆವಿಶಿಂ ಕವಿತೆಂಚೆ ದಾಕ್ಲೆ ದೀವ್ನ್ ತಾಣೆ ಕಳಯ್ಲೆಂ.

ಹ್ಯಾ ಸಾಹಿತೀಕ್ ಸಂಬ್ರಮಾ ವೆಳಾರ್ ಮನೋಹರ್ ರಾಯ್ ಸರ್ದೇಸಾಯಿಚ್ಯೊ ವೆವೆಗ್ಳ್ಯೊ ಕವಿತಾ ಫೆಲ್ಸಿ ಲೋಬೊ, ಜೊಯ್ಸ್ ಪಿಂಟೊ, ಮನೋಜ್ ಫೆರ್ನಾಂಡಿಸ್, ಸಲೋಮಿ ಮಿಯಾಪದವ್, ಗ್ರೀಶ್ಮಾ ಸಲ್ಡಾನ್ಹಾ, ಜೇಸನ್ ಲೋಬೊ ಆನಿ ಫ್ಲಾವಿಯಾ ಆಲ್ಬುಕೆರ್ಕ್ ಹಾಂಣಿ ವಾಚುನ್ ಸಾಂಗ್ಲ್ಯೊ. ಹಾಜರ್ ಆಸಲ್ಲ್ಯಾ ಜಾಯ್ತ್ಯಾ ಸಭಿಕಾಂನಿ ಸರ್ದೇಸಾಯಿಚ್ಯಾ ’ಜಾಯೊ-ಜುಯೊ’ ಆನಿ ’ಪಿಸೊಳಿಂ’ ಪುಸ್ತಕಾಂತ್ಲ್ಯೊ ಕವಿತಾ ಸಾದರ್ ಕೆಲ್ಯೊ.

ಕಾರ್ಯಾವಳಿಚ್ಯಾ ಮುಕ್ಲ್ಯಾ ಭಾಗಾಂತ್ ಆಂಜೆಲೊರ‍್ಚ್ಯಾ ರಾಸ್ಕಿಞ್ ಕುಟ್ಮಾಥಾವ್ನ್ ಮ್ಹಾಲ್ಗಡ್ಯಾಂ ಥಾವ್ನ್ ದೆಂವೊನ್ ಆಯಿಲ್ಲ್ಯಾ ಆದ್ಲ್ಯಾ ಪದಾಂಚೆಂ ವಾಚಪ್ ತಶೆಂ ಸಾದರೀಕರಣ್ ಚಲ್ಲೆಂ. ದಿವಂಗತ್ ಭಾವ್ ಸೈಮನ್ ರಾಸ್ಕಿಞ್ ಆನಿ ಜೆ. ಬಿ. ರಾಸ್ಕಿಞ್ ಹಾಂಚೆ ಸುಪುತ್ರ್ ಆರ್ಥರ್ ರಾಸ್ಕಿಞ್ ಆನಿ ಉಲ್ಲಾಸ್ ರಾಸ್ಕಿಞ್ ಹಾಂಣಿ ವೇದಿ ಸಜಯಿಲ್ಲಿ. ಕುಟ್ಮಾಚ್ಯಾಂನಿ ಹ್ಯಾ ಸಂದರ್ಭಾರ್ ನೊವೊದ್ ವರ್ಸಾಂ ಆದಿಂ ಜೆ.ಜೆ. ರೇಗೊನ್ ಸಂಕಲನ್ ಕೆಲ್ಲ್ಯಾ ’ಚಾಲ್ತಿಂ ಪದಾಂ’ ಪುಸ್ತಕಾಂತ್ಲಿಂ ಗಿತಾಂ ಗಾಯ್ಲಿಂ ತಶೆಂ ವಾಚುನ್ ಸಾಂಗ್ಲಿಂ. ಪಾರಂಪಾರಿಕ್ ಕವಿತಾಂಚಿ ರೀತ್ ಆನಿ ಆಧುನಿಕ್ ಕವಿತಾಂಚಿ ರಿತಿಂ ಮಧ್ಲ್ಯಾ ಫರಕಾವಿಶಿಂ ಹ್ಯಾ ಸಂದರ್ಭಾರ್ ಆರ್ಥರ್ ರಾಸ್ಕಿಞ್ ಉಲಯ್ಲೊ.

ಆಯ್ಲೆವಾರ್ ಶ್ರೀನಿವಾಸ್ ಮ್ಹಾವಿದ್ಯಾಲಯಾ ಥಾವ್ನ್ ಕೊಂಕಣಿ ಭಾಶೆಂತ್ ಡೊಕ್ಟರೇಟ್ ಸನದ್ ಆಪ್ಣಾಯಿಲ್ಲ್ಯಾ ಡೊ. ಪ್ರೇಮ್ ಮೊರಾಸಾಕ್ ಕವಿತಾ ಟ್ರಸ್ಟಾ ತರ್ಫೆನ್ ಘರ‍್ಚಿ ಯೆಜ್ಮಾನ್ ಜೋಸೆಫಿನ್ ಡಿಸೋಜಾ ಹಿಣೆ ಶೊಲ್ ಪಾಂಗ್ರುನ್ ಮಾನ್ ಕೆಲೊ. ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಫುಲಾಂ ದಿಲಿಂ. ಎಚ್ಚೆಮ್ ಪೆರ್ನಾಳಾನ್ ಟ್ರಸ್ಟಾಚಿಂ ಪುಸ್ತಕಾಂ ದಿಲಿಂ. ಹ್ಯಾಚ್ ಸಂದರ್ಭಾರ್ ಕವಿತಾ ಟ್ರಸ್ಟಾನ್ ಪರ್ಗಟ್ ಕೆಲ್ಲ್ಯಾ ಪುಸ್ತಕಾಂ ಖಾತೀರ್ ಗೊಂಯ್ ಕೊಂಕಣಿ ಅಕಾಡೆಮಿ ಆನಿ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ಪುರಸ್ಕಾರ್ ಜೊಡಲ್ಲ್ಯಾ ಎಚ್ಚೆಮ್ ಪೆರ್ನಾಳ್ ಆನಿ ಫೆಲ್ಸಿ ಲೋಬೊ ಹಾಂಕಾಂ ಫುಲಾಂ ತುರೆ ದೀವ್ನ್ ಮಾನ್ ಕೆಲೊ.

ಸುರ್ವೆರ್ ಯೆಜ್ಮಾನ್ ಜೋಸೆಫಿನ್ ಡಿಸೋಜಾನ್ ಸಗ್ಳ್ಯಾಂಕ್ ಯೆವ್ಕಾರ್ ದಿಲೊ. ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಅಸಲ್ಯಾ ಮೆಳಾವ್ಯಾಂಚಿ ಗರ್ಜ್ ಸಾಂಗುನ್, ಹಾಲಿಂಚ್ಯಾ ದಿಸಾಂನಿ ಕಶೆಂ ಮಂಗ್ಳುರಾಂತ್ಲಿಂ ಇತಿಹಾಸಿಕ್ ಪೊರ‍್ನಿಂ ಬಾಂದ್ಪಾಂ ಆಧುನಿಕತೆಕ್ ಲಾಗುನ್ ಕೊಸ್ಳಾವ್ನ್ ಘಾಲ್ತಾತ್ ಮ್ಹಳ್ಳೆವಿಶಿಂ ಜಾಗ್ ಹಾಡಂವ್ಚೆಂ ಉಲೊವ್ಪ್ ಕೆಲೆಂ ಆನಿ ಸಗ್ಳ್ಯಾಂಚೆ ಉಪ್ಕಾರ್ ಆಟಯ್ಲೆ.

कविता ट्रस्टाचे मनोहर सांजेर काव्याळ धोणू रंगले

कोंकणी कवितेच्या समग्र वाडावळी खातीर वावुरच्या कविता ट्रस्टान, भारताचो उंचलो कोंकणी कवी मनोहर राय सर्देसायीच्या मानाक ह्याच एप्रील 6, 2025 तारकेर मंगळूर आंजेलोर लागसारच्या ’जवाहर-ज्योती’ घरांत ’मनोहर सांज’ कार्यावळ मांडून हाड‌ल्ली.

कविता ट्रस्टाचो स्थापक मेल्विन रोड्रीगस हाणे सुरवातीर आपल्या प्रास्तावीक उलोवपांत मनोहर सर्देसायीचें जिवीत आनी साहित्याविशीं उजवाड फांकलो. ताच्या जिविताच्या वेवेगळ्या काळांक दाखल केल्ल्यो कविता विंचून ताणें ह्या संदर्भार सादर केल्यो.

नामणेचो उलोवपी एच्चेम पेर्नाळ हाणे सर्देसायी कसो 1950-1990 वर्सांच्या काळाचो प्रमुख कवी जावनासल्लो म्हळ्ळें सांगलें. जिवीत, धर्म आनी अध्यात्मिकतेचीं तत्वां ताच्या व्यक्तित्वांत कशीं आयल्यांत म्हळ्ळेविशीं कवितेंचे दाकले दीवन ताणे कळयलें.

ह्या साहितीक संभ्रमा वेळार मनोहर राय सर्देसायीच्यो वेवेगळ्यो कविता फेल्सी लोबो, जोयस पिंटो, मनोज फेर्नांडीस, सलोमी मियापदव, ग्रीश्मा सल्डान्हा, जेसन लोबो आनी फ्लाविया आलबुकेर्क हांणी वाचून सांगल्यो. हाजर आसल्ल्या जायत्या सभिकांनी सर्देसायीच्या ’जायो-जुयो’ आनी ’पिसोळीं’ पुस्तकांतल्यो कविता सादर केल्यो.

कार्यावळीच्या मुकल्या भागांत आंजेलोरच्या रास्कीञ कुटमाथावन म्हाल्गड्यां थावन देंवोन आयल्ल्या आदल्या पदांचें वाचप तशें सादरीकरण चल्लें. दिवंगत भाव सैमन रास्कीञ आनी जे. बी. रास्कीञ हांचे सुपुत्र आर्थर रास्कीञ आनी उल्लास रास्कीञ हांणी वेदी सजयल्ली. कुटमाच्यांनी ह्या संदर्भार नोवोद वर्सां आदीं जे.जे. रेगोन संकलन केल्ल्या ’चालतीं पदां’ पुस्तकांतलीं गितां गायलीं तशें वाचून सांगलीं. पारंपारीक कवितांची रीत आनी आधुनीक कवितांची रितीं मधल्या फरकाविशीं ह्या संदर्भार आर्थर रास्कीञ उलयलो.

आयलेवार श्रीनिवास म्हाविद्यालया थावन कोंकणी भाशेंत डॉक्टरेट सनद आपणायल्ल्या डॉ. प्रेम मोरासाक कविता ट्रस्टा तर्फेन घरची येजमान जोसेफीन डिसोजा हिणे शॉल पांग्रून मान केलो. ट्रस्टी विलियम पायसान फुलां दिलीं. एच्चेम पेर्नाळान ट्रस्टाचीं पुस्तकां दिलीं. ह्याच संदर्भार कविता ट्रस्टान पर्गट केल्ल्या पुस्तकां खातीर गोंय कोंकणी अकादेमी आनी कर्नाटक कोंकणी साहित्य अकादेमी थावन पुरस्कार जोडल्ल्या एच्चेम पेर्नाळ आनी फेल्सी लोबो हांकां फुलां तुरे दीवन मान केलो.

सुर्वेर येजमान जोसेफीन डिसोजान सगळ्यांक येवकार दिलो. ट्रस्टी विलियम पायसान असल्या मेळाव्यांची गर्ज सांगून, हालींच्या दिसांनी कशें मंगळुरांतलीं इतिहासीक पोरनीं बांदपां आधुनिकतेक लागून कोसळावन घालतात म्हळ्ळेविशीं जाग हाडंवचें उलोवप केलें आनी सगळ्यांचे उपकार आटयले.

ತಸ್ವೀರ‍್ಯೊ: ರಾಹುಲ್ ಪಾಯ್ಸ್
तस्वीर्‍यो: राहुल पायस