ಕವಿತಾ ಟ್ರಸ್ಟಾಚಿ ಭುರ್ಗ್ಯಾಂಕ್ ಆನಿ ಯುವಜಣಾಂಕ್ ಕೊಂಕಣಿ ಕವಿತಾ ಸಾದರ್ ಸರ್ತ್ ಜಾಹೀರ್
ಕವಿತಾ ಟ್ರಸ್ಟಾನ್ ಸಾದರ್ ಕರ್‍ಚ್ಯಾ ಅಖಿಲ್ ಭಾರತ್ ಕೊಂಕಣಿ ಕವಿತಾ ಸಾದರ್ ಸರ್ತೆಚ್ಯೊ ತಾರಿಕೊ ಜಾಹೀರ್ ಜಾಲ್ಯಾತ್. ಭುರ್ಗ್ಯಾಂಚ್ಯಾ ತಶೆಂ ಯುವಜಣಾಂಚ್ಯಾ ವಿಭಾಗಾಂನಿ ಚಲ್ಚ್ಯೆ ಹ್ಯೆ ಸರ್ತೆಚೆ ಪ್ರಾಥಮಿಕ್ ಪಾಂವ್ಡೆ ಇಕ್ರಾ ಜಾಗ್ಯಾಂನಿ ಚಲ್ತಲೆ.
ಕವಿತಾ ಫೆಸ್ತ್ 2019 ತಸ್ವೀರ್ / कविता फेस्त - २०१९ तस्वीर
ಮುಂಬಯಾಂತ್ ಕವಿ ವಲ್ಲಿ ಕ್ವಾಡ್ರಸಾಚ್ಯಾ ಆಶಾವಾದಿ ಪ್ರಕಾಶನ್ ಆನಿ ಥಳೀಯ್ ಸಂಸ್ಥ್ಯಾಂನಿ, ಬೆಂಗ್ಳುರಾಂತ್ ಜಯನಗರಾಚ್ಯಾ ಕೊಂಕಣಿ ಸಮುದಾಯ್ ತಶೆಂ ಎಫ್. ಕೆ. ಸಿ. ಎ., ಗೊಂಯಾಂತ್ ಕೊಂಕಣಿ ಭಾಷಾ ಮಂಡಳ್, ಉಡುಪಿಂತ್ ಐ.ಸಿ.ವೈ.ಎಮ್. ಬಾರ್ಕೂರ್ ಘಟಕ್, ಬಂಟ್ವಾಳಾಂತ್ ಐ.ಸಿ.ವೈ.ಎಮ್. ಮೊಡಂಕಾಪ್ ಘಟಕ್, ಕೇರಳಾಂತ್ 'ಮಹಿಮಾ' ಕೊಂಕಣಿ ಪತ್ರ್ ಆನಿ ಕೊಂಕಣಿ ಸಂಘಟನ್, ಕಾಸರ್‌ಗೋಡ್, ಮಂಗ್ಳುರಾಂತ್ ಕೊಂಕಣಿ ನಾಟಕ್ ಸಭಾ, ಭಟ್ಕಳಾಂತ್ ನವಾಯತಿ ಮೆಹಫಿಲ್ - ಹಾಂಣಿ ಕವಿತಾ ಟ್ರಸ್ಟ್ ಸಾಂಗಾತಾ ಹಾತ್ ಮೆಳಯ್ಲಾ.
ಹ್ಯಾ ಪ್ರಾಥಮಿಕ್ ಪಾಂವ್ಡ್ಯಾಂನಿ ವಿಂಚ್ಲಲ್ಯಾಂಕ್ 2020 ಜನೆರಾಚ್ಯೆ 12 ತಾರಿಕೆರ್ ಗೊಂಯ್ಚ್ಯಾ ಮಡ್ಗಾಂವಾಂತ್ ಚಲ್ಚ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ಫೈನಲಾಂತ್ ಭಾಗ್ ಘೆಂವ್ಚೊ ಆನಿ ಇನಾಮಾಂ ಜೊಡ್ಚೊ ಸುಯೋಗ್ ಲಾಭ್ತಲೊ. ಪ್ರಾಥಮಿಕ್ ಪಾಂವ್ಡ್ಯಾಂನಿ ಭಾಗ್ ಘೆಂವ್ಚ್ಯಾ ಹರ್‍ಯೆಕ್ಲ್ಯಾಕ್ ಪ್ರಮಾಣ್ ಪತ್ರ್ ಲಾಭ್ತಲೆಂ ಆನಿ ಫೈನಲಾಂತ್ ಭಾಗ್ ಘೆಂವ್ಚ್ಯಾ ಹರ್‍ಯೆಕ್ಲ್ಯಾಚೊ ಪಯ್ಣಾ ಖರ್ಚ್, ರಾವ್ಪಾಚಿ ವೆವಸ್ಥಾ ಕವಿತಾ ಟ್ರಸ್ಟ್ ಪಳಯ್ತಲೆಂ. ಫೈನಲಾಂತ್ ಜಿಕಲ್ಲ್ಯಾಂಕ್ ನಗ್ದೆಚಿಂ ಇನಾಮಾಂ, ಪ್ರಮಾಣ್ ಪತ್ರಾಂ ತಶೆಂಚ್ ಯಾದಸ್ತಿಕಾ ಆಸ್ತಲ್ಯೊ.
ಮಂಗ್ಳುರ್‍ಚೊ ಪ್ರಾಥಮಿಕ್ ಪಾಂವ್ಡೊ ಕೊಂಕಣಿ ನಾಟಕ್ ಸಭೆಚ್ಯಾ ಸಹಕಾರಾನ್ ಸಪ್ಟೆಂಬರ್ 1 ತಾರಿಕೆರ್ ಮಂಗ್ಳುರ್‍ಚ್ಯಾ ಡೊನ್ ಬೊಸ್ಕೊ ಹೊಲಾಂತ್ ಸಕಾಳಿಂಚ್ಯಾ ಧಾ ವೊರಾರ್ ಚಲ್ತಲೊ.
ಮುಂಬಯ್ಚೆ ಪ್ರಾಥಮಿಕ್ ಪಾಂವ್ಡೆ ಆಶಾವಾದಿ ಪ್ರಕಾಶನಾಚ್ಯಾ ಸಹಕಾರಾನ್ ಕಾಂದಿವಲಿ (ಸಪ್ಟೆಂಬರ್ 22), ಮೀರಾರೋಡ್ (ಸಪ್ಟೆಂಬರ್ 29) ಆನಿ ಜೆರಿಮೆರಿ (ಒಕ್ಟೋಬರ್ 6) ತಾರಿಕೆಂನಿ ಚಲ್ತಲೆ
ಗೊಂಯ್ ಪ್ರಾಥಮಿಕ್ ಪಾಂವ್ಡೆ ಕೊಂಕಣಿ ಭಾಷಾ ಮಂಡಳ್, ಗೊಂಯ್ ಹಾಂಚ್ಯಾ ಸಹಕಾರಾನ್ ಪಣ್ಜೆಂತ್ ಸಪ್ಟೆಂಬರ್ 16 ತಾರಿಕೆರ್ ಟಿ. ಬಿ. ಕುನ್ಹಾ ಸಭಾಸಾಲಾಂತ್ ಆನಿ ಸಪ್ಟೆಂಬರ್ 17 ತಾರಿಕೆರ್ ರವೀಂದ್ರ ಕೆಳೆಕಾರ್ ಗ್ಯಾನ್‌ಮಂದಿರ್, ಮಡ್ಗಾಂವ್ ಹಾಂಗಾಸರ್ ಸಕಾಳಿಂ ಧಾ ವೊರಾಂಚೆರ್ ಚಲ್ತಲೆ.
ಬಂಟ್ವಾಳ್ ಪ್ರಾಥಮಿಕ್ ಪಾಂವ್ಡೊ ಐ.ಸಿ.ವೈ.ಎಮ್. ಮೊಡಂಕಾಪ್ ಘಟಕ್ ಹಾಂಚ್ಯಾ ಸಹಕಾರಾನ್ ಮೊಡಂಕಾಪ್ ಶಾಳೆಚ್ಯಾ ಸಾಲಾಂತ್ ಸಪ್ಟೆಂಬರ್ 22 ತಾರಿಕೆರ್ ಸಕಾಳಿಂ ಧಾ ವೊರಾಂಚೆರ್ ಚಲ್ತಲೊ.
ಕೇರಳ್ ಪ್ರಾಥಮಿಕ್ ಪಾಂವ್ಡೊ ಸೈಂಟ್ ಬಾರ್ಥೊಲೊಮೇವ್ ಕೊವೆಂತ್, ಬೆಳಾ ಹಾಂಗಾಸರ್ ಒಕ್ಟೋಬರ್ 6 ತಾರಿಕೆರ್ ದೊನ್ಪಾರಾಂ: 2 ವೊರಾಂಚೆರ್ ’ಮಹಿಮಾ’ಕೊಂಕಣಿ ಪತ್ರಾಚ್ಯಾ ಸಹಕಾರಾನ್ ಚಲ್ತಲೊ.
ಬೆಂಗ್ಳುರ್‍ಚೊ ಪ್ರಾಥಮಿಕ್ ಪಾಂವ್ಡೊ ಕೊಂಕಣಿ ಸಮುದಾಯ್, ಜಯನಗರ ಹಾಂಚ್ಯಾ ಸಹಕಾರಾನ್ ಜಯನಗರಾಚ್ಯಾ ಕಾರ್ಮೆಲ್ ಕೊನ್ವೆಂಟ್ ಶಾಳೆಂತ್ ಒಕ್ಟೋಬ್ರಾಚ್ಯೆ 13 ತಾರಿಕೆರ್ ಸಕಾಳಿಂ 10 ವೊರಾರ್ ಚಲ್ತಲೊ.
ಹ್ಯಾ ಭಾಯ್ರ್ ದಶೆಂಬ್ರಾಂತ್ ನವಾಯತಿ ಮೆಹಫಿಲ್, ಭಟ್ಕಳ್ ಹಾಂಚ್ಯಾ ಸಹಯೋಗಾನ್ ಭಟ್ಕಳಾಂತ್ ಹಿ ಸರ್ತ್ ಚಲ್ತಲಿ.
ಉಡುಪಿಂತ್ ಹ್ಯಾಚ್ ಜುಲಾಯ್ 28 ತಾರಿಕೆರ್ ಹಿ ಸರ್ತ್ ಕಲ್ಯಾಣ್ಪುರ್‍ಚ್ಯಾ ಮೌಂಟ್ ರೋಜರಿ ಇಗರ್ಜೆಚ್ಯಾ ಸಭಾಸಾಲಾಂತ್ ಚಲ್ಲ್ಯಾ. ಉಡುಪಿ ವಠಾರಾಂತ್ಲ್ಯಾ ಕೊಣಾಯ್ಕಿ ಹ್ಯಾವಿಶಿಂ ಮ್ಹಾಯೆತ್ ಮೆಳುಂಕ್ ನಾಂತರ್ ತಾಂಣಿ ಮಂಗ್ಳುರಾಕ್ ಯೇವ್ನ್ ಭಾಗ್ ಘೆಂವ್ಚೊ ಆವ್ಕಾಸ್ ಆಸಾ.
ಮಂಗ್ಳುರ್ ಸರ್ತೆ ವೆಳಾರ್ ತೀಸ್ ವರ್ಸಾಂ ವಯ್ಲ್ಯಾಂಕ್ ಸ್ಪರ್ಧೊ ಆಸುನ್ ತಾಚಿಂ ಇನಾಮಾಂ ಕೊಂಕಣಿ ನಾಟಕ್ ಸಭಾ ದಿತಲೆಂ.
ಹ್ಯೆ ಸರ್ತೆಂನಿ ವಿಂಚುನ್ ಆಯಿಲ್ಲ್ಯಾಂನಿ ಫೈನಲಾ ವೆಳಾರ್ ಸಾದರ್ ಕರುಂಕ್ ವಿಂಚಲ್ಲ್ಯೊ, ಭುರ್ಗ್ಯಾಂನಿ ತರ್ ದೋನ್ ಆನಿ ಯುವಜಣಾಂನಿ ತರ್ ತೀನ್ ಕವಿತಾ, ದಶೆಂಬರ್ 20 ತಾರಿಕೆ ಭಿತರ್ ಕವಿತಾ ಟ್ರಸ್ಟಾಚ್ಯಾ ವಿಳಾಸಾಕ್ ಧಾಡುನ್ ದೀಂವ್ಕ್ ಜಾಯ್: Kavita Trust, 403, Venus Prime, Kadri Kambla Road, Pinto Lane, Bejai, Mangalore - 575004. ಈಮೇಯ್ಲಾ ದ್ವಾರಿಂ ಧಾಡ್ಚ್ಯೊ ಕವಿತಾ ಸ್ವೀಕಾರ್ ಕರಿನಾಂವ್.
ಕವಿತಾ ಸಾದರ್ ಸರ್ತೆಂತ್ ಭಾಗ್ ಘೆತಲ್ಯಾಂನಿ www.kavitaa.com ತಶೆಂಚ್ www.youtube.com/c/KavitaTrust ಹ್ಯಾ ಜಾಳಿಜಾಗ್ಯಾಂಚೊ ಬರ್ಪೂರ್ ಉಪೇಗ್ ಕರ್‍ಚೊ ಮ್ಹಣುನ್ ಆಯೋಜಕಾಂನಿ ಸಾಂಗ್ಲಾಂ.
कविता ट्रस्टाची भुरग्यांक आनी युवजणांक कोंकणी कविता सादर सर्त जाहीर.
गोंयांत सप्टेंबर 16 आनी 17 तारकेर
कविता ट्रस्टान सादर करच्या अखिल भारत कोंकणी कविता सादर सर्तेच्यो तारिको जाहीर जाल्यात. भुरग्यांच्या तशें युवजणांच्या विभागांनी चलच्ये ह्ये सर्तेचे प्राथमीक पांवडे इकरा जाग्यांनी चलतले.
मुंबयांत कवी वल्ली क्वाड्रसाच्या आशावादी प्रकाशन आनी थळीय संस्थ्यांनी, बेंगळुरांत जयनगराच्या कोंकणी समुदाय तशें एफ. के. सी. ए., गोंयांत कोंकणी भाषा मंडळ, उडुपींत आय.सी.वै.एम. बारकूर घटक, बंटवाळांत आय.सी.वै.एम. मोडंकाप घटक, केरळांत 'महिमा' कोंकणी पत्र आनी कोंकणी संघटन, कासरगोड, मंगळुरांत कोंकणी नाटक सभा, भटकळांत नवायती मेहफील - हांणी कविता ट्रस्ट सांगाता हात मेळयला.
ह्या प्राथमीक पांवड्यांनी विंचलल्यांक २०२० जानेराच्ये १२ तारकेर गोंयच्या मडगांवांत चलच्या कविता फेस्त संदर्भार फैनलांत भाग घेंवचो आनी इनामां जोडचो सुयोग लाभतलो. प्राथमीक पांवड्यांनी भाग घेंवच्या हरयेकल्याक प्रमाण पत्र लाभतलें आनी फैनलांत भाग घेंवच्या हरयेकल्याचो पयणा खर्च, रावपाची वेवस्था कविता ट्रस्ट पळयतलें. फैनलांत जिकल्ल्यांक नगदेचीं इनामां, प्रमाण पत्रां तशेंच यादस्तिका आसतल्यो.
मंगळूरचो प्राथमीक पांवडो कोंकणी नाटक सभेच्या सहकारान सप्टेंबर 1 तारकेर मंगळूरच्या डॉन बोस्को हॉलांत सकाळींच्या धा वोरार चलतलो.
मुंबयचे प्राथमीक पांवडे आशावादी प्रकाशनाच्या सहकारान कांदीवली (सप्टेंबर 22), मीरारोड (सप्टेंबर 29) आनी जेरिमेरी (ऑक्टोबर 6) तारकेंनी चलतले.
गोंय प्राथमीक पांवडे कोंकणी भाषा मंडळ, गोंय हांच्या सहकारान पणजेंत सप्टेंबर 16 तारकेर टी. बी. कुन्हा सभासालांत आनी सप्टेंबर 17 तारकेर रवींद्र केळेकार ग्यानमंदीर, मडगांव हांगासर सकाळीं धा वोरांचेर चलतले.
बंटवाळ प्राथमीक पांवडो आय.सी.वै.एम्. मोडंकाप घटक हांच्या सहकारान मोडंकाप शाळेच्या सालांत सप्टेंबर 22 तारकेर सकाळीं धा वोरांचेर चलतलो
केरळ प्राथमीक पांवडो सैंट बार्थोलोमेव कोवेंत, बेळा हांगासर ओक्टोबर 6 तारकेर दोनपारां: 2 वोरांचेर ’महिमा’कोंकणी पत्राच्या सहकारान चलतलो.
बेंगळूरचो प्राथमीक पांवडो कोंकणी समुदाय, जयनगर हांच्या सहकारान जयनगराच्या कार्मेल कोन्वेंट शाळेंत ओक्टोबराच्ये 13 तारकेर सकाळीं 10 वोरार चलतलो.
ह्या भायर दशेंबरांत नवायती मेहफील, भटकळ हांच्या सहयोगान भटकळांत ही सर्त चलतली.
उडुपींत ह्याच जुलाय 28 तारकेर ही सर्त कल्याणपूरच्या मौंट रोजरी इगर्जेच्या सभासालांत चल्ल्या. उडुपी वठारांतल्या कोणायकी ह्याविशीं म्हायेत मेळुंक नांतर तांणी मंगळुराक येवन भाग घेंवची संधी आसा.
मंगळूर सर्ते वेळार तीस वर्सां वयल्यांक सर्त आसून ताचीं इनामां कोंकणी नाटक सभा दितलें.
ह्ये सर्तेंनी विंचून आयल्ल्यांनी फैनला वेळार सादर करुंक विंचल्ल्यो, भुरग्यांनी तर दोन आनी युवजणांनी तर तीन कविता, दशेंबर २० तारके भितर कविता ट्रस्टाच्या विळासाक धाडून दीवंक जाय: Kavita Trust, 403, Venus Prime, Kadri Kambla Road, Pinto Lane, Bejai, Mangalore - 575004. ईमेयला द्वारीं धाडच्यो कविता स्वीकार करिनांव.
कविता सादर सर्तेंत भाग घेतल्यांनी www.kavitaa.com तशेंच www.youtube.com/c/KavitaTrust ह्या जाळीजाग्यांचो बरपूर उपेग करचो म्हणून आयोजकांनी सांगलां.