ಉದ್ಯಾವರಾಕ್ ಸುಂರ್ಗಾರಾಯಿಲ್ಲಿ ’ಕವಿತಾ ಧೊಣು’ ಕಾರ್ಯಾವಳ್
ಕೊಂಕ್ಣಿ ಕವಿತೆಚಾ ಮಿಸಾಂವಾಂತ್ ನಿರಂತರ್ ವಾವುರ‍್ಚ್ಯಾ ಕವಿತಾ ಟ್ರಸ್ಟ್ ಆನಿ ಕೊಂಕ್ಣಿ ನಾಟಕ್ ತಶೆಂ ಭಾಶೆಚಿ ನಿರಂತರತಾ ಸಾಂಬಾಳ್ನ್ ವ್ಹರ‍್ಚ್ಯಾಕ್ ವ್ಹರ‍್ತಿ ದೇಣ್ಗಿ ದಿಂವ್ಚ್ಯಾ ನಿರಂತರ್ ಉದ್ಯಾವರ್ - ಹಾಂಣಿ ಸಾಂಗಾತಾ ಮೆಳುನ್ ಹ್ಯಾಚ್ ಆಗೋಸ್ತ್ 11, 2024 ತಾರಿಕೆರ್ ಉದ್ಯಾವರ್ ಸಾಂ ವಿಶೆಂತ್ ಪಾಲೊಟ್ಟಿ ಕೊವೆಂತಾಚ್ಯಾ ಸಭಾಸಾಲಾಂತ್ ’ಕವಿತಾ ಧೊಣು’ ಮ್ಹಳ್ಳೆಂ ಕಾರ್ಯೆಂ ಚಲಯ್ಲೆಂ.
ಕಾರ್ಯಕ್ರಮಾಚೆಂ ಉಗ್ತಾವಣ್ ಉದ್ಯಾವರ್ ಸಾಂ ಫ್ರಾನ್ಸಿಸ್ ಸಾವೆರ್ ಫಿರ್ಗಜೆಚೆ ವಿಗಾರ್ ಬಾಪ್ ಅನಿಲ್ ಡಿಸೋಜಾಂನಿ ಇಂಗ್ಳ್ಯಾಂಕ್ ಧುಂಪ್ ಘಾಲ್ಚೆಂ ಸವೆಂ ಉಗ್ತಾವಣ್ ಕೆಲೆಂ. ಉಗ್ತಾವಣೆ ಉಪ್ರಾಂತ್ ಬಾಪ್ ಅನಿಲ್ ಮ್ಹಣಾಲೆ ಕೀ "ಕೊಂಕ್ಣಿ ಸಾಹಿತ್ ಆನಿ ಕೊಂಕ್ಣಿ ಭಾಶೆಚ್ಯಾ ವಾವ್ರಾಂತ್ ಮೆತೆರ್ ಜಾವ್ನಾಸ್ಚ್ಯಾ ದೋನ್ ಸಂಘಟನಾಂನಿ ಉದ್ಯಾವರಾಂತ್ ಕವಿತಾ ಧೊಣು ತಸಲೆಂ ಕಾರ್ಯೆಂ ಮಾಂಡುನ್ ಹಾಡ್‌ಲ್ಲೆಂ ಭೋವ್ ಧಾದೊಸ್ಕಾಯೆಚಿ ಗಜಾಲ್. ಜಶೆಂ ಧುಂಪಾಚೊ ಧುಂವರ್ ಭೊಂವ್ತಣಿ ಪರ್ಮಳ್ ಪ್ರಸಾರ‍್ತಾಕೀ, ತೆಚ್ ಭಾಶೆನ್ ಸಾಹಿತ್ಯ್ ಹರ್ ಸುವಾತ್ಯಾಂನಿ ಬರೆಪಣ್ ಪ್ರಸಾರ‍್ತಾ. ಸಾಹಿತಿ ಆನಿ ಕವಿ ಅಸಲೆಂ ಬರೆಪಣ್, ಪರ್ಮಳ್ ಪ್ರಸಾರ‍್ಚಿಂ ಹಾತೆರಾಂ ಜಾವ್ನಾಸಾತ್. ಸಾಹಿತಿ, ಸಾಮಾಜಿಕ್ ಬರೆಪಣ್ ಅಶೆತಾ ಆನಿ ಸಮಾಜಾಕ್ ಸಾರ್ಕೆ ವಾಟೆನ್ ಚಲಯ್ತಾ ಮ್ಹಳ್ಳ್ಯಾಕ್ ಜಾಯ್ತೆ ದಾಕ್ಲೆ ಆಮ್ಚೆ ಮಧೆಂ ಆಸಾತ್. ಆಯ್ಚೆ ಪಿಳ್ಗೆಕ್ ಸಾಹಿತ್ಯಾಚಿ ವೋಡ್ ಉಣಿ ಜಾಲ್ಯಾರೀ ಕವಿತಾ ಧೊಣು ತಸಲಿಂ ಕಾರ್ಯಿಂ ತಾಂಕಾಂ ಹ್ಯೆ ದಿಶೆನ್ ಆಕರ್ಷಿತ್ ಕರುಂಕ್ ಸಕ್ತೆಲಿಂ ಮ್ಹಳ್ಳ್ಯಾಕ್ ಕಿತೆಂಚ್ ದುಬಾವ್ ನಾ. ದೆಕುನ್ ಹ್ಯಾ ಕಾರ್ಯಾಚ್ಯಾ ಕಾರ್ಭಾರ‍್ಯಾಂಕ್ ಅಭಿನಂದನ್ ಪಾಟಯ್ತಾಂ ಆನಿ ಉದ್ಯಾವರಾಂತ್ ಅಸಲಿಂಚ್ ಚಡಿತ್ ಕಾರ್ಯಿಂ ಆಶೆತಾಂ".
ಕವಿತಾ ಟ್ರಸ್ಟ್ ಸಂಸ್ಥಾಪಕ್ ಮೆಲ್ವಿನ್ ರೊಡ್ರಿಗಸ್ ಹಾಂಣಿ ಕವಿತಾ ಧೊಣು ಕಾರ್ಯಾಪಾಟ್ಲ್ಯಾನ್ ಆಸ್ಚೆ ಆಲೋಚನೆವಿಶಿಂ ಆನಿ ಶೆವೊಟಾವಿಶಿಂ ಮಾಹೆತ್ ದಿಲಿ. ನಿರಂತರ್ ಉದ್ಯಾವರ್ ಸಂಘಟನಾನ್ ಕರ‍್ಚ್ಯಾ ಕೊಂಕ್ಣಿ ವಾವ್ರಾಚೊ ಉಲ್ಲೇಖ್ ಕೆಲ್ಲ್ಯಾ ತಾಣೆ ಉದ್ಯಾವರಾಂತ್ ಕೊಂಕ್ಣಿ ಕಾರ್ಯಾಂಚಿ ಶಿಂಖಳ್ ಆರಂಭ್ ಜಾಂವ್ಕ್ ಜಾಯ್ ಮ್ಹಳ್ಳೆಂ ಸೂಚನ್ ದಿಲೆಂ.
ಉಪ್ರಾಂತ್ ’ಕವಿತಾ ಗಜಾಲಿ’ ಮ್ಹಳ್ಳ್ಯಾ ಮಾತಾಳ್ಯಾಖಾಲ್ ಕವಿ ಆಂಡ್ರ್ಯೂ ಎಲ್ ಡಿಕುನ್ಹಾನ್ ಮಟ್ವೆಂ ಉಲೊವ್ಪ್ ಸಾದರ್ ಕೆಲೆಂ. "ಕವಿತಾ ಬರೊಂವ್ಕ್ ಧರ‍್ತಾನಾ ಮೋರ್ಗ್ ಕರ್ನಾರಾಂನಿ ಮೊಗಾಚೀಟ್ ಬರೊಂವ್ಚೆ ಭಾಶೆನ್, ಕವಿಥಂಯ್ ತಾಚ್ಯಾ ’ವಿಶಯ್ ಆನಿ ಚಿಂತ್ಪಾ’ಚೆರ್ ಎಕೆ ರಿತಿಚೊ ಸಂವೇದನ್‌ಶೀಲ್ ಮೋಗ್ ಉಬ್ಜಾತಾ. ತೊ ಆಪ್ಲ್ಯಾ ಚಿಂತ್ಪಾಚೊ, ತಾಂತ್ಲ್ಯಾ ಉತ್ರಾಂಚೊ ಮೋಗ್ ಕರ‍್ತಾನಾ ಕವಿತೆಂಕ್ ನವೊ ಜೀವ್ ಭರ‍್ತಾ. ಕವಿ ಮೆಲ್ವಿನ್ ರೊಡ್ರಿಗಸಾಚ್ಯಾ ಉತ್ರಾಂನಿ ಸಾಂಗ್ಚೆಂ ತರ್ ತಾರ್ಲ್ಯಾಂಚಿ ಕಡಿ ತೀನ್ ದೀಸ್ ಆಟಯಿಲ್ಲೆ ಭಾಶೆನ್ ಕವಿತಾ ಕವಿ ಭಿತರ್ ಆಟೊಂವ್ಕ್ ಸೊಡ್ಲ್ಯಾರ್ ಉಪ್ರಾಂತ್ ತಿ ಉತ್ರಾಂನಿ ವಾಡ್ಲ್ಯಾರ್ ತಾಚಿ ರೂಚ್ ಅವ್ವಲ್ ಆಸ್ತಾ. ಕವಿತೆಂನಿ ಉಪ್ಯೋಗ್ ಕರ್ಚಿ ರೂಪಕಾಂ ಹಿ ರೂಚ್ ಚಡಯ್ತಾ ಆನಿ ಕವಿತೆಕ್ ಮನ್ಶಾಮನಾಂತ್ ಥಿರ್ ಕರ‍್ತಾ ಮ್ಹಳ್ಳಿ ಗಜಾಲ್ ತಾಣೆ ವಿವರಾವ್ನ್ ಸಾಂಗ್ಲಿ.
ನಾಮ್ನೆಚೊ ಕವಿ, ಸಂಪಾದಕ್, ವಿಮರ್ಶಕ್ ಎಚ್ಚೆಮ್ ಪೆರ್ನಾಲ್ ಹಾಣೆ ಕವಿತೆಚ್ಯಾ ಗಜಾಲಿಂಚೆರ್ ಚಲಲ್ಲ್ಯಾ ಸಂವಾದಾಚೆ ಸುಂಕಾಣ್ ಧರ್ಲೆಲೆಂ. ಜೊನಿ ಮರಿಯಭೂಮಿ, ಜುಡಿತ್ ಫೆರ್ನಾಂಡಿಸ್, ರಿತೇಶ್ ಡಿಸೋಜಾ ಹಾಣಿಂ ಸಂವಾದಾಂತ್ ವಾಂಟೊ ಘೆತ್ಲೊ.
ಅಖೇರಿಕ್ ಚಲಲ್ಲ್ಯಾ ಕವಿತಾ ವಾಚನ್ ಆನಿ ಸಾದರೀಕರಣ್ ಕಾರ್ಯಾವಳಿಂತ್ ಮ್ಹಾಲ್ಘಡಿ ಲೇಖಿಕಾ ಕ್ಯಾಥರಿನ್ ರೊಡ್ರಿಗಸ್, ಪಿಯುಸ್ ಜೇಮ್ಸ್ ಕರುಗಳ್ನಡೆ, ವಲೇರಿಯನ್ ಮೆಂಡೊನ್ಸಾ ಪಿತ್ರೋಡಿ, ಜಿತಾ ಗೊನ್ಸಾಲ್ವಿಸ್, ಪ್ರಕಾಶ್ ರೊಡ್ರಿಗಸ್, ಫೆಲ್ಸಿ ಲೋಬೊ ದೆರೆಬೈಲ್ ಆನಿ ನಿನಿಶಾ ಮೊಂತೆರೋನ್ ವಾಂಟೊ ಘೆತ್ಲೊ.
ನಿರಂತರ್ ಉದ್ಯಾವರ್ ಹಾಂಚ್ಯಾ ಸವ್ಯಾ ವರ್ಸುಗೆ ದಿಸಾಚ್ಯಾ ಉಗ್ಡಾಸಾಕ್ ಸಂಸ್ಥ್ಯಾಕ್ ಸಹಕಾರಿ ಜಾಲ್ಲ್ಯಾಂಕ್ ಆದ್ಲೊ ಅಧ್ಯಕ್ಷ್ ಸ್ಟೀವನ್ ಕುಲಾಸೊನ್ ಮಾನ್ ಕೆಲೊ. ಮೈಕಲ್ ಡಿಸೊಜಾನ್ ಉಪ್ಕಾರ್ ಆಟಯ್ಲೆ. ನಿರಂತರ್ ಉದ್ಯಾವರ್ ಹಾಚೊ ಅಧ್ಯಕ್ಷ್ ರೋಶನ್ ಕ್ರಾಸ್ಟೊನ್ ಸುರ್ವೆರ್ ಯೆವ್ಕಾರ್ ಮಾಗಲ್ಲೊ. ಸ್ಟ್ಯಾನಿ ಬೆಳಾನ್ ಕಾರ್ಯೆಂ ಚಲಯ್ಲೆಂ.
उद्यावराक सुंर्गारायिल्ली ’कविता धोणू’ काऱ्यावळ
कोंकणी कवितेच्या मिसांवांत निरंतर वावुरच्या कविता ट्रस्ट आनी कोंकणी नाटक तशें भाशेची निरंतरता सांबाळन व्हरच्याक व्हरती देणगी दिंवच्या निरंतर उद्यावर - हांणी सांगाता मेळून ह्याच ओगोस्ट 11, 2024 तारकेर उद्यावर सां विशेंत पालोट्टी कोवेंताच्या सभासालांत ’कविता धोणू’ म्हळ्ळें काऱ्यें चलयलें.
काऱ्यक्रमाचें उगतावण उद्यावर सां फ्रान्सीस सावेर फिर्गजेचे विगार बाप अनील डीसोजांनी इंगळ्यांक धुंप घालचे सवें उगतावण केलें. उगतावणे उपरांत बाप अनील म्हणाले की "कोंकणी साहीत आनी कोंकणी भाशेच्या वावरांत मेतेर जावनासच्या दोन संघटनांनी उद्यावरांत कविता धोणू तसलें काऱ्यें मांडून हाडल्लें भोव धादोस्कायेची गजाल. जशें धुंपाचो धुंवर भोंवतणी पर्मळ प्रसारता, तेच भाशेन साहीत हर सुवात्यांनी बरेपण प्रसारता. साहिती आनी कवी असलें बरेपण, पर्मळ प्रसारचीं हातेरां जावनासात. साहिती, सामाजीक बरेपण अशेता आनी समाजेक सारके वाटेन चलयता म्हळ्ळ्याक जायते दाकले आमचे मधें आसात. आयचे पिळगेक साहित्याची वोड उणी जाल्यारी कविता धोणू तसलीं काऱ्यीं तांकां ह्ये दिशेन आकर्शीत करुंक सकतेलीं म्हळ्ळ्याक कितेंच दुबाव ना. देकून ह्या काऱ्याच्या कार्भार्यांक अभिनंदन पाटयतां आनी उद्यावरांत असलींच चडीत काऱ्यीं आशेतां".
कविता ट्रस्ट संस्थापक मेल्विन रोड्रीगस हांणी कविता धोणू काऱ्याफाटल्यान आसच्या आलोचनेविशीं आनी शेवोटाविशीं माहेत दिली. निरंतर उद्यावर संघटनान करच्या कोंकणी वावराचो उल्लेख केल्ल्या ताणे उद्यावरांत कोंकणी काऱ्यांची शिंखळ आरंभ जावंक जाय म्हळ्ळें सूचन दिलें.
उपरांत ’कविता गजाली म्हळ्ळ्या माताळ्याखाल कवी आंडऱ्यू एल डिकुन्हान मटवें उलोवप सादर केलें. "कविता बरोवंक धरताना मोग कर्नारांनी मोगाचीट बरोंवचे भाशेन, कवीथंय ताच्या ’विशय आनी चिंतपा’ थंय एके रितिचो संवेदनशील मोग उबजाता. तो आपल्या चिंतपाचो, तांतल्या उत्रांचो मोग करताना कवितेंक नवो जीव भरता. कवी मेल्विन रोड्रीगसाच्या उत्रांनी सांगचें तर तारल्यांची कडी तीन दीस आटयिल्ले भाशेन कविता कवी भितर आटोवंक सोडल्यार उपरांत ती उत्रांनी वाडल्यार ताची रूच अव्वल आसता. कवितेंनी उप्योग करचीं रूपकां ही रूच चडयता आनी कवितेक मनशामनांत थिर करता म्हळ्ळी गजाल ताणे विवरावन सांगली.
नामनेचो कवी, संपादक, विमर्शक एच्चेम पेर्नाल हाणे कवितेच्या गजालींचेर चलल्ल्या संवादाचे सुंकाण धरलेलें. जोनी मरियाभूमी, जुडीत फेर्नांडीस, रितेश डीसोजा हाणीं संवादांत वांटो घेतलो.
अखेरीक चलल्ल्या कविता वाचन आनी सादरीकरण काऱ्यावळींत म्हालघडी लेखिका कॅथरीन रोड्रीगस, पियूस जेम्स करुगळनडे, वलेरियन मेंडोन्सा पित्रोडी, जिता गोन्साल्वीस, प्रकाश रोड्रीगस, फेल्सी लोबो देरेबैल आनी निनिशा मोंतेरोन वांटो घेतलो.
निरंतर उद्यावर हांच्या सव्या वर्सुगे दिसाच्या उगडासाक संस्थ्याक सहकारी जाल्ल्यांक आदलो अध्यक्ष स्टीवन कुलासोन मान केलो. मैकल सोजान उपकार आटयले. कार्याचे सुरवेक निरंतर उद्यावर अध्यक्ष रोशन क्रास्टोन येवकार दिल्लो. स्टॅनी बेळान काऱ्यें चलयलें.