ಬಾಳ್ಪಣಾಚ್ಯೊ ಯಾದಿ ಉಮಾಳಾಯಿಲ್ಲೆಂ ಭುರ್ಗ್ಯಾಂಚೆಂ ಕವಿತಾ ಸಾದರೀಕರಣ್
ಆಂಕ್ರಿ ಜಾಳಿಜಾಗೊ ಆನಿ ಗೀತ್-ಗಜಾಲ್ ಪಂಗ್ಡಾಚ್ಯಾ ಮುಕೆಲ್ಪಣಾರ್ ದುಬಾಯ್‌ಚ್ಯಾ ಬಿರಿಯಾನಿ-2020 ಸಾಲಾಂತ್ ಹ್ಯಾಚ್ ಆಗೋಸ್ತ್ 25, 2024 ತಾರಿಕೆರ್ ಚಲ್‌ಲ್ಲೆಂ ಭುರ್ಗ್ಯಾಂಚೆಂ ಕವಿತಾ ಸಾದರೀಕರಣ್ ಆನಿ ಕವಿ ಕಿರಣ್ ನಿರ್ಕಾಣ್ ಹಾಚೊ ಬಾಳ್ ಕವಿತೆಂಚೆಂ ಪುಸ್ತಕ್ "ನಕ್ತಿರಾಂ" ಹಾಚೆಂ ಲೋಕಾರ್ಪಣ್ ಕಾರ್ಯೆಂ ಜಮ್ಲೆಲ್ಯಾ ಕೊಂಕಣಿ ಸಾಹಿತ್ಯ್ ರಸಿಕಾಂಕ್ ತಾಂಚ್ಯೊ ಬಾಳ್ಪಣಾಚ್ಯೊ ಯಾದಿ ಜಿವ್ಯೊ ಕರುಂಕ್ ಸಕ್ಲೆಂ ಆನಿ ಮಧುರ್ ಘಡಿಯಾಂಚೆ ಉಮಾಳೆ ಚಾಕೊಂಕ್ ಕಾರಣ್ ಜಾಲೆಂ.
ಕಾರ್ಯಾಚಿ ಸುರ್ವಾತ್ ಮೆಲ್ವಿನ್ ಕಲಾಕುಲ್ ಹಾಣೆಂ ಕವಿ ಕಿಶೂ ಬಾರ್ಕುರ್ ಹಾಂಚಿ "ಧಾಕ್ಟ್ಯಾ ದೆವಾಚಿಂ ಭುರ್ಗಿಂ" ಕವಿತಾ ವಾಚುನ್ ಆರಂಬ್ ಕೆಲಿ. ಎಮಿರೆತಾಂತ್ ಪಯ್ಲೆ ಪಾವ್ಟಿಂ ಭುರ್ಗ್ಯಾಂನಿ ಕವಿತಾ ಸಾದರೀಕರಣ್ ಕರ‍್ಚಿ ಆನಿ ಹ್ಯಾ ಕಾರ್ಯಾಚೆಂ ಅಧ್ಯಕ್ಷ್‌ಪಣ್ ಡಿಯೋನಾ ಕೊರೆಯಾ ಹಾಣೆಂ ಘೆತ್‌ಲ್ಲೆಂ. ಬಾಯ್ ಡಿಯೋನಾನ್ ಸುಂದರ್ ಥರಾನ್ ಕವಿತಾ ಸಾದರ್ ಕರ‍್ಚ್ಯಾ ಭುರ್ಗ್ಯಾಂ ಸಾಂಗಾತಾ ಸಂವಾದ್ ಚಲಯ್ಲೊ ಆನಿ ಕವಿತೆಚಿ ವಳಕ್ ಕರ್ನ್ ದಿಲಿ. ಬ್ರಿಯಾನ್ನಾ ನವೋಮಿ ಡಿಸೋಜ ಮಡಂತ್ಯಾರ್, ಅಮೋರ್ ಮ್ಯಾನುವೆಲ್ ಮೆಂಡೊನ್ಸಾ ತಲ್ಲೂರ್, ಲಿಯೋರಾ ಡಿಸೋಜ ಪಾಂಬೂರ್, ಅಲಿಕಾ ಸೆನೋರಾ ಪಿಂಟೊ ಬಜ್ಪೆ, ಲನಿಶಾ ಸಿಯೊನಾ ನೊರೊನ್ಹಾ ಬೆಳ್ಳೂರ್, ಡೆಲಿಶಾ ರೂಥ್ ಕೊರೆಯಾ ಪೆರ್ನಾಲ್, ನಿಕೋಲ್ ಜೆನೆಲ್ ಸಿಕ್ವೇರಾ ಬ್ರಹ್ಮಾವರ್, ಅನೋರ್ ಟೆರೆನ್ ಮೆಂಡೊನ್ಸಾ ತಲ್ಲೂರ್ ಆನಿ ಅಧ್ಯಕ್ಷಿಣ್ ಡಿಯೋನಾ ರೆಬೆಕ್ಕಾ ಕೊರೆಯಾ ಪೆರ್ನಾಲ್ ಹಾಂಣಿ ಕವಿ ಕಿರಣ್ ನಿರ್ಕಾಣ್ ಹಾಚ್ಯಾ ’ನಕ್ತಿರಾಂ’ ಪುಸ್ತಕಾಂತ್ಲ್ಯೊ ಕವಿತಾ ವಾಚನ್ ಕೆಲ್ಯೊ. ಕಿರಣ್ ನಿರ್ಕಾಣ್ ಹಾಣೆಂ ವಾಚನ್ ಕೆಲ್ಲ್ಯಾ ಕವಿತೆಂ ಪಾಟ್ಲಿ ಕಾಣಿ ಆನಿ ತಾಂತುಂ ಲಿಪೊನ್ ಆಸ್ಚ್ಯಾ ಲಿಸಾಂವಾಂವಿಶಿಂ ಝಳಕ್ ದಿಲಿ.
ಕಾವ್ಯ್ ರಸಿಕಾಂಚೆಂ ಮನಾಂ ಜಿಕ್‌ಲ್ಲ್ಯಾ ಭುರ್ಗ್ಯಾಂಚ್ಯಾ ಕವಿತಾ ಸಾದರೀಕರಣಾಚ್ಯಾ ಉಪ್ರಾಂತ್, ನಾಮ್ನೆಚೊ ಕವಿ ಆರ್ಥರ್ ಪಿರೇರಾ ಹಾಣೆಂ ತಾಚ್ಯೊ ಆನಿ ಇತರ್ ಭಾಸಾಂಥಾವ್ನ್ ಅನುವಾದಿತ್ ಕೆಲ್ಲ್ಯೊ ಕವಿತಾ ಸಾಂಗಾತಾ ಗುಂತುನ್ ಸಾದರ್ ಕೆಲ್ಯೊ ಆನಿ ತಾಚ್ಯಾ ವಿಶಿಷ್ಟ್ ಸಾದರೀಕಣಾಚ್ಯಾ ಶೈಲೆವರ್ವಿಂ ಲೊಕಾಮನಾಂ ಪಿಸ್ವೊಂಕ್ ಪಾವ್ಲಿಂ.
ನಾಟಕಿಸ್ತ್ ಆನಿ ಕವಿ ಡೊನಿ ಕೊರೆಯಾ ಹಾಣೆಂ "ಗಲ್ಫಾಂತ್ಲಿಂ ಕೊಂಕ್ಣಿ ಭುರ್ಗಿಂ ಆನಿ ಕೊಂಕ್ಣೆಚೊ ಫುಡಾರ್" ಮ್ಹಳ್ಳ್ಯಾ ವಿಶಯಾಚೆರ್ ಆಪ್ಲೆ ವಿಚಾರ್ ಪ್ರಸ್ತುತ್ ಕೆಲೆ. ಆಪ್ಲ್ಯಾ ಉಲೊವ್ಪಾಂತ್ ಡೊನಿನ್ ಘರಾಂತ್ ಭುರ್ಗ್ಯಾಂ ಸಾಂಗಾತಾ ಕೊಂಕ್ಣಿ ಉಲೊಂವ್ಚಿ ಆನಿ ತಾಂಕಾಂ ಕೊಂಕಣಿ ಭಾಸ್, ಸಾಹಿತ್ಯ್ ಆನಿ ಸಂಸ್ಕೃತೆಥಂಯ್ ವೋಡ್ ಉಬ್ಜಾಂವ್ಚಿಂ ಹರ್ ಪ್ರಯತ್ನಾಂ ಕರ‍್ಚ್ಯಾಕ್ ಉಲೊ ದಿಲೊ. ಹ್ಯಾ ಸಂಧರ್ಭಾರ್ "ಘರಾಂತ್ ಕೊಂಕಣಿ" ಮ್ಹಳ್ಳೆಂ ಅಭಿಯಾನ್ ಸೂಚಿತ್ ಕರ‍್ಚ್ಯಾ ಮುಕಾಂತ್ರ್ ಹರ್ ಕೊಂಕಣಿ ಘರಾಂನಿ ಕೊಂಕಣಿ ಭಾಶೆಂತ್‌ಚ್ ಉಲೊಂವ್ಕ್ ಪ್ರಯತ್ನ್ ಕರುಂಕ್ ಡೊನಿನ್ ಉಪ್ಕಾರ್ ಮಾಗ್ಲೊ ಆನಿ ಸರ್ವಾಂನಿ ಹ್ಯಾ ಅಭಿಯಾನಾಚೊ ವಾಂಟೊ ಜಾಂವ್ಕ್ ಸುಚಯ್ಲೆಂ.
ಹ್ಯಾ ಉಪ್ರಾಂತ್ ಚಲ್‌ಲ್ಲ್ಯಾ ಮಟ್ವ್ಯಾ ವೆದಿ ಕಾರ್ಯಾಕ್ ಕೊಂಕಣಿ ಸಮರ್ಥಕ್, ನಟ್, ಗಾವ್ಪಿ ಆನಿ ಉದ್ಯಮಿ ಮಾನೆಸ್ತ್ ಜೋಸೆಫ್ ಮಥಾಯಸ್ ಮಾನಾಚೆ ಸಯ್ರೆ ಜಾವ್ನಾಸ್‌ಲ್ಲೆ. ತಾಂಚೆ ಸಾಂಗಾತಾ ವೆದಿರ್ ಆರ್ಥರ್ ಪಿರೇರಾ, ಕಿರಣ್ ನಿರ್ಕಾಣ್ ಆನಿ ಆಂಕ್ರಿ ಜಾಳಿಜಾಗ್ಯಾಚೆ ಸಂಪಾದಕ್ ಸನ್ನು ಮೋನಿಸ್ ಬೊಳಿಯೆ ಹಾಜರ್ ಆಸ್‌ಲ್ಲೆ. ಸನ್ನು ಮೋನಿಸ್ ಬೊಳಿಯೆನ್ ಆಂಕ್ರಿ ಜಾಳಿಜಾಗೊ ಆನಿ ಗೀತ್-ಗಜಾಲ್ ಪಂಗ್ಡಾವಿಶಿಂ ಮ್ಹಾಯೆತ್, ’ನಕ್ತಿರಾಂ’ ಬುಕಾಚಿ ಪರಿಚಯ್ ಕರ‍್ಚ್ಯಾಸವೆಂ ಸರ್ವಾಂಕ್ ಯೆವ್ಕಾರ್ ದಿಲೊ. ಸ್ಟೇಫನ್ ವಾಮಂಜೂರ್ ಹಾಣೆಂ ಗೋಡ್-ಉದ್ಕಾಚೊ ಯೆವ್ಕಾರ್ ಸಯ್ರ್ಯಾಂಕ್ ಆನಿ ಜಮ್ಲೆಲ್ಯಾ ಸಭಿಕಾಂಕ್ ಮಾಗ್ಲೊ. ಮಾನೆಸ್ತ್ ಜೋಸೆಫ್ ಮಥಾಯಸ್ ಹಾಂಣಿ ಕವಿತಾ ಸಾದರೀಕರಣ್ ಕಾರ್ಯಾಚಿ ಅಧ್ಯಕ್ಷಿಣ್ ಬಾಯ್ ಡಿಯೋನಾ ಆನಿ ಕವಿತಾ ಸಾದರ್ ಕೆಲ್ಲ್ಯಾ ಭುರ್ಗ್ಯಾಂಕ್ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ. ಕಿರಣ್ ನಿರ್ಕಾಣ್ ಹಾಚೊ ಬಾಳ್ ಸಾಹಿತ್ಯಾಚೊ ಪುಸ್ತಕ್ "ನಕ್ತಿರಾಂ" ಬಾಯ್ ನಿಕೋಲ್ ಇವಾ ಹಾಚ್ಯಾ ಇಸ್ಕೊಲಾಚ್ಯಾ ಪೊತ್ಯಾಥಾವ್ನ್ ಕಾಡ್ನ್ ಮೊಕ್ಳಿಕ್ ಕೆಲೊ. ಹ್ಯಾಚ್ ಸಂದರ್ಭಾರ್ ಸಾಂ ಲುವಿಸ್ ಕೊಲೆಜ್ ಮಂಗ್ಳುರ್ ಮುಕಾಂತ್ರ್ ಜಾಂವ್ಚ್ಯಾ ದೋನ್ ವರ್ಸಾಂಚ್ಯಾ ಪದ್ಯುತ್ತರ್ ಕೊಂಕಣಿ ಡಿಪ್ಲೊಮಾಂತ್ ದುಸ್ರೆಂ ಆನಿ ತಿಸ್ರೆಂ ಸ್ಥಾನ್ ಜೊಡ್‌ಲ್ಲ್ಯಾ ಆರ್ಥರ್ ಪಿರೇರಾ ಆನಿ ಕಿರಣ್ ನಿರ್ಕಾಣ್ ಹಾಂಕಾಂ ಜೋಸೆಫ್ ಮಥಾಯಸ್ ಹಾಂಣಿ ಶಾಲ್ ಪಾಂಗ್ರುನ್, ಫುಲಾಂ ತುರೊ ದೀವ್ನ್ ಉಲ್ಲಾಸಿಲೆಂ.
ಸಾಹಿತ್ಯ್ ಅಭಿಮಾನಿಂಕ್ ಉದ್ದೇಸುನ್ ಉಲಯಿಲ್ಲ್ಯಾ ಮಾನೆಸ್ತ್ ಜೋಸೆಫ್ ಹಾಣೆಂ, ಆಂಕ್ರಿ ಆನಿ ಗೀತ್-ಗಜಾಲ್ ಪಂಗ್ಡಾಕ್, ತಾಂಚ್ಯಾ ನವೆಸಾಂವಾಂಚ್ಯಾ ಚಿಂತ್ಪಾಕ್ ಶಾಭಾಸ್ಕಿ ದಿಲಿ. ಭುರ್ಗ್ಯಾಂಕ್ ಕೊಂಕ್ಣೆಚೆಂ ಭವಿಶ್ಯ್ ಮ್ಹಣ್ ಸಾಂಗ್ಚ್ಯಾ ಸಾಂಗಾತಾ ತಾಂಕಾಂ ಕೊಂಕ್ಣೆಥಂಯ್ ಆಕರ್ಶಿತ್ ಕರುಂಕ್ ಅಸಲ್ಯೊ ಯೆವ್ಜಣ್ಯೊ ಉಪ್ಕಾರ‍್ತಾತ್. ವ್ಯವಹಾರಿಕ್ ವಾ ವಾವ್ರಾಚೆ ದಿಶ್ಟಿನ್ ಕೊಂಕಣಿ ಗರ್ಜ್ ನಾ ಮ್ಹಣ್, ಕೊಂಕಣಿ ತಿರಸ್ಕಾರ್ ಕರಿನಾಸ್ತಾಂ ಆಮ್ಚ್ಯಾ ಮ್ಹಾಲ್ಘಡ್ಯಾಂನಿ ಜಿಯೆಲ್ಲ್ಯಾ ಆನಿ ಆಮ್ಕಾಂ ವಾಂಟ್‌ಲ್ಲೆ ಗ್ರೇಸ್ತ್ ಸಂಸ್ಕೃತೆಕ್ ಉರೊಂವ್ಕ್ ಆನಿ ವಾಡೊಂವ್ಕ್ ಆಮಿ ವ್ಹಡಿಲಾಂನಿ ಮ್ಹಿನತ್ ಘೆಜಾಯ್ ಆನಿ ಭುರ್ಗ್ಯಾಂಕ್ ಹ್ಯೆ ದಿಶೆನ್ ಪ್ರೇರಿತ್ ಕರುಂಕ್ ಉಲೊ ದೀವ್ನ್ ಸರ್ವಾಂಕ್ ತಾಂಣಿ ಅಭಿನಂದನ್ ಕೆಲೆಂ.
ಡೈನಾ ಶರಲ್ ಹಿಣೆಂ ಕಾರ್ಯೆಂ ಚಲೊವ್ನ್ ವೆಲೆಂ. ಕಿರಣ್ ನಿರ್ಕಾಣ್ ಹಾಣೆಂ ಧನ್ಯವಾದ್ ಭೆಟಯ್ಲೆ. ಸನ್ನು ನಿಡ್ಡೋಡಿ, ಹಿಲ್ಸನ್ ಅಲ್ಲಿಪಾದೆ ಹಾಂಣಿ ವೆದಿ ಆನಿ ಕಾರ್ಯಾಚಿ ಸರ್ಭರಾಯ್ ಸಾಂಬಾಳ್ಳಿ.
-ಖಬರ್: ಕಿರಣ್ ನಿರ್ಕಾಣ್
बाळपणाच्यो यादी उमाळायिल्लें भुरग्यांचें कविता सादरीकरण
आंक्री जाळीजागो आनी गीत-गजाल पंगडाच्या मुकेलपणार दुबायच्या बिरयानी-2020 सालांत ह्याच आगोस्ट 25, 2024 तारकेर चलल्लें भुरग्यांचें कविता सादरीकरण आनी कवी किरण निर्काण हाचो बाळ कवितेंचें पुस्तक "नक्तिरां" हाचें लोकार्पण कार्यें जमलेल्या कोंकणी साहित्य रसिकांक तांच्यो बाळपणाच्यो यादी जिव्यो करुंक सकलें आनी मधूर घडयांचे उमाळे चाकोंक कारण जालें.
कार्याची सुर्वात मेल्विन कलाकूल हाणें कवी किशू बार्कूर हांची "धाकट्या देवाचीं भुरगीं" कविता वाचून आरंब केली. एमिरेतांत पयले फावटीं भुरग्यांनी कविता सादरीकरण करची आनी ह्या कार्याचें अध्यक्षपण डियोना कोरेया हाणें घेतल्लें. बाय डियोनान सुंदर थरान कविता सादर करच्या भुरग्यां सांगाता संवाद चलयलो आनी कवितेची वळक करन दिली. ब्रियान्ना नवोमी डिसोज मडंत्यार, अमोर मॅनुवेल मेंडोन्सा तल्लूर, लियोरा डिसोज पांबूर, अलिका सेनोरा पिंटो बजपे, लनिशा सियोना नोरोन्हा बेळ्ळूर, डेलिशा रूथ कोरेया पेर्नाल, निकोल जेनेल सिकवेरा ब्रह्मावर, अनोर टेरेन मेंडोन्सा तल्लूर आनी अध्यक्षीण डियोना रेबेक्का कोरेया पेर्नाल हांणी कवी किरण निर्काण हाच्या ’नक्तिरां’ पुस्तकांतल्यो कविता वाचन केल्यो. किरण निर्काण हाणें वाचन केल्ल्या कवितें फाटली काणी आनी तांतूं लिपोन आसच्या लिसांवांविशीं झळक दिली.
काव्य रसिकांचीं मनां जिकल्ल्या भुरग्यांच्या कविता सादरीकरणाच्या उपरांत, नाम्नेचो कवी आर्थर पिरेरा हाणें ताच्यो
आनी इतर भासांथावन अनुवादीत केल्ल्यो कविता सांगाता गुंतून सादर केल्यो आनी ताच्या विशिष्ट सादरीकणाच्या शैलेवर्वीं लोकामनां पिसवोंक पावलीं.
नाटकीस्त आनी कवी डोनी कोरेया हाणें "गल्फांतलीं कोंकणी भुरगीं आनी कोंकणेचो फुडार" म्हळ्ळ्या विशयाचेर आपले विचार प्रस्तूत केले. आपल्या उलोवपांत डोनीन घरांत भुरग्यां सांगाता कोंकणी उलोंवची आनी तांकां कोंकणी भास, साहित्य आनी संस्कृतेथंय वोड उबजांवचीं हर प्रयत्नां करच्याक उलो दिलो. ह्या संधर्भार "घरांत कोंकणी" म्हळ्ळें अभियान सूचीत करच्या मुकांत्र हर कोंकणी घरांनी कोंकणी भाशेंतच उलोवंक प्रयत्न करुंक डोनीन उपकार मागलो आनी सर्वांनी ह्या अभियानाचो वांटो जावंक सुचयलें.
ह्या उपरांत चलल्ल्या मटव्या वेदी कार्याक कोंकणी समर्थक, नट, गावपी आनी उद्यमी मानेस्त जोसेफ मथायस मानाचे सोयरे जावनासल्ले. तांचे सांगाता वेदीर आर्थर पिरेरा, किरण निर्काण आनी आंक्री जाळीजाग्याचे संपादक सन्नू मोनीस बोळिये हाजर आसल्ले. सन्नू मोनीस बोळियेन आंक्री जाळीजागो आनी गीत-गजाल पंगडाविशीं म्हायेत, ’नक्तिरां’ बुकाची परिचय करच्यासवें सर्वांक येवकार दिलो. स्टेफन वामंजूर हाणें गोड-उदकाचो येवकार सोयर्यांक आनी जमलेल्या सभिकांक मागलो. मानेस्त जोसेफ मथायस हांणी कविता सादरीकरण कार्याची अध्यक्षीण बाय डियोना आनी कविता सादर केल्ल्या भुरग्यांक उडासाची काणीक दीवन मान केलो. किरण निर्काण हाचो बाळ साहित्याचो पुस्तक "नक्तिरां" बाय निकोल इवा हाच्या इस्कोलाच्या पोत्याथावन काडन मोकळीक केलो. ह्याच संदर्भार सां. लुवीस कॉलेज मंगळूर मुकांत्र जांवच्या दोन वर्सांच्या पद्युत्तर कोंकणी डिप्लोमांत दुसरें आनी तिसरें स्थान जोडल्ल्या आर्थर पिरेरा आनी किरण निर्काण हांकां जोसेफ मथायस हांणी शॉल पांग्रून, फुलां तुरो दीवन उल्लासिलें.
साहित्य अभिमानींक उद्देसून उलयिल्ल्या मानेस्त जोसेफ हाणें, आंक्री आनी गीत-गजाल पंगडाक, तांच्या नवेसांवांच्या चिंतपाक शाभास्की दिली. भुरग्यांक कोंकणेचें भविश्य म्हण सांगच्या सांगाता तांकां कोंकणेथंय आकर्शीत करुंक असल्यो येवजण्यो उपकारतात. व्यवहारीक वा वावराचे दिश्टीन कोंकणी गर्ज ना म्हण, कोंकणी तिरस्कार करीनासतां आमच्या म्हालघड्यांनी जियेल्ल्या आनी आमकां वांटल्ले ग्रेस्त संस्कृतेक उरोवंक आनी वाडोवंक आमी व्हडिलांनी म्हिनत घेजाय आनी भुरग्यांक हे दिशेन प्रेरीत करुंक उलो दीवन सर्वांक तांणी अभिनंदन केलें.
डैना शरल हिणें कार्यें चलोवन वेलें. किरण निर्काण हाणें धन्यवाद भेटयले. सन्नू निड्डोडी, हिल्सन अल्लिपादे हांणी वेदी आनी कार्याची सर्भराय सांबाळ्ळी.
-खबर: किरण निर्काण