ಸಮಿಉಲ್ಲಾ ಬರ್ಮಾವರಾಕ್ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ - 2024

ಮಂಗ್ಳೂರ್, 23 ದಶೆಂಬರ್: ಭಟ್ಕಳ್ಚ್ಯಾ ಸೈಯದ್ ಸಮಿಉಲ್ಲಾ ಬರ್ಮಾವರಾಕ್ ಕವಿತಾ ಟ್ರಸ್ಟಾಚೊ 2024 ವರ್ಸಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಜಾಹೀರ್ ಜಾಲಾ. ಹೊ ಪುರಸ್ಕಾರ್ 2025 ವರ್ಸಾಚ್ಯಾ ಜನೆರ್ ಮ್ಹಯ್ನ್ಯಾಚೆ 12 ತಾರ್ಕೆರ್ ಸಾಸ್ತಾನ್, ಉಡುಪಿ ಹಾಂಗಾ ಜಾಂವ್ಚ್ಯಾ ಎಕುಣಿಸಾವ್ಯಾ ಆವೃತ್ತಿಚ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ತಾಂಕಾಂ ಭೆಟಯ್ತಲೆ. ಹ್ಯಾ ಪುರಸ್ಕಾರಾಂತ್ ರು. 25 ಹಜಾರ್, ಪ್ರಶಸ್ತಿ ಪತ್ರ್ ಆನಿ ಸ್ಮರಣಿಕಾ ಆಟಾಪೂನ್ ಆಸಾ.

ಕರ್ನಾಟಕಾಚ್ಯಾ ಉತ್ತರ್ ಕನ್ನಡ್ ಜಿಲ್ಲ್ಯಾಂತ್ಲ್ಯಾ ಭಟ್ಕಳ್ ಹ್ಯಾ ಸೊಭೀತ್ ಶಾರಾಂತ್ 1956 ವರ್ಸಾ ಜಲ್ಮಲ್ಲೊ ಸೈಯದ್ ಸಮಿಉಲ್ಲಾ ಬರ್ಮಾವರ್ ಏಕ್ ಉತ್ತೀಮ್ ಕವಿ ಆನಿ ಗಾವ್ಪಿ. ತಾಣೆಂ ಆಪ್ಲೆಂ ಶಾಳೆಚೆಂ ಶಿಕ್ಷಣ್ ಜಾಮಿಯಾ ಇಸ್ಲಾಮಿಯಾ ಭಟ್ಕಳ್ ಹಾಂಗಾಸರ್ ಕೆಲೆಂ. ಲ್ಹಾನ್ ಪಿರಾಯೆ ಥಾವ್ನ್ ಸೈಯದ್ ಸಮಿಉಲ್ಲಾನ್ ಕವಿತಾ ಆನಿ ಸಂಗೀತಾಚಿ ವಿಶೆಸ್ ವಳಖ್ ದಾಖಯ್ಲಿ ಆನಿ ತಾಣೆಂ ಏಕ್ ಉಲ್ಲೆಖನೀಯ್ ಸಾಹಿತ್ಯೀಕ್ ಪ್ರವಾಸ್ ಸುರು ಕೆಲೊ.

ಸುರ್ವೆಕ್ ಉರ್ದು ಭಾಶೆಂತ್ ಬರೊವ್ಪಿ ಸಮಿಉಲ್ಲಾ ಉಪ್ರಾಂತ್ ನವಾಯ್ತಿ ಕಡೆನ್ ವೊಡೂನ್ ವಚೂನ್ ಸಮಾಜಾಂತ್ಲೊ ಏಕ್ ನಾಮ್ನೆಚೊ ಸಾಹಿತಿ ಜಾಲೊ. ತಾಂಚಿ ಕವಿತಾ ಶ್ರದ್ಧಾ, ಮೋಗ್, ಸಾಮಾಜೀಕ್ ಸವಾಲಾಂ, ಸಾಂಸ್ಕೃತೀಕ್ ಅಭಿಮಾನ್ ಹ್ಯಾ ಸಾರ್ಕ್ಯಾ ವಿಂಗಡ್ ವಿಂಗಡ್ ವಿಶಯಾಂಕ್ ಸಂಬೊಧೀತ್ ಕರ‍್ತಾ.

2012 ವರ್ಸಾ ’ನೀಟ್ ವಾಟ್’ ಹೊ ತಾಚೊ ಪಯ್ಲೊ ಕಾವ್ಯಸಂಗ್ರಹ್ ಕೊಂಕ್ಣಿ ಸಾಹಿತ್ಯಾಂತ್ಲ್ಯಾ ನವಾಯ್ತಿ ಬೊಲೀಂತ್ ಏಕ್ ಮಾರ್ಗದರ್ಶಕ್ ಫಾತರ್ ಥಾರ‍್ಲೊ. ಹ್ಯಾ ಪುಸ್ತಕಾ ಬರಾಬರ್ ತಾಚಿ ಸಿಡಿ ಲೆಗುನ್ ಪ್ರಕಾಶಿತ್ ಜಾಲಿ. ನವಾಯ್ತಿ ಮುಶಾಯ್ರಾಂಕ್ ಫುಡಾಕಾರ್ ದೀವ್ನ್ ತಾಣೆಂ ಸಮಾಜಾಚೆಂ ಲಕ್ಷ್ ಉರ್ದೂಂತ್ಲ್ಯಾನ್ ನವಾಯ್ತೀಂತ್ ರುಪಾಂತರೀತ್ ಕೆಲೆಂ ಆನಿ ಅಶೆ ತರೆನ್ ಭಾಶೆಚೆ ಗಿರೆಸ್ತ್ ಸಾಹಿತ್ಯ್ ಪರಂಪರೆಕ್ ಪರ‍್ತುನ್ ಜಿವೀತ್ ದಿಲೆಂ ಆನಿ ತಿ ತಿಗೊವ್ನ್ ದವರ‍್ಲಿ.

ಸಮಿಉಲ್ಲಾನ್ ಆಪ್ಣೆಂ ಬರಯಿಲ್ಲ್ಯಾ ಕೃತಿಯಾಂ ಸಾಂಗಾತಾ, ಜಾಯ್ತ್ಯೊ ಒಡಿಯೊ ಕೆಸೆಟಿ ಆನಿ ಸೀಡಿ ತಯಾರ್ ಕರೂನ್ ನವಾಯ್ತಿ ಕವಿತೆಚಿ ವಳಖ್ ತರ್ನಾಟೆ ಪಿಳ್ಗೆಮೆರೆನ್ ಕೆಲ್ಯಾ. ನವಾಯ್ತ್ ಮೆಹಫಿಲಾಚೊ ಸಂಸ್ಥಾಪಕ್ ಜಾವ್ನ್ ತಾಣೆಂ ನವೆ ಪಿಳ್ಗೆ ಖಾತೀರ್ ನವಾಯ್ತಿ ಸಂಸ್ಕೃತಾಯ್ ಆನಿ ಭಾಸ್ ಸಾಂಬಾಳುಂಕ್ ಆನಿ ಪೊಸುಂಕ್ ಸ್ವತಾಕ್ ಸಮರ್ಪಿಲಾ.

ತಾಚ್ಯಾ ಸಾಹಿತ್ಯೀಕ್ ಯೋಗದಾನಾಕ್ ಲಾಗೂನ್ ತಾಕಾ ರಾಶ್ಟ್ರೀಯ್ ಆನಿ ಅಂತರರಾಶ್ಟ್ರೀಯ್ ಮಳಾರ್ ತೊಖ್ಣಾಯ್ ಮೆಳ್ಳ್ಯಾ. ಅಖಿಲ್ ಭಾರತೀಯ್ ಕೊಂಕ್ಣಿ ಪರಿಶದ್ (2002), ಭಟ್ಕಳ್ ಮುಸ್ಲಿಮ್ ಜಮಾತ್, ಬೆಂಗ್ಳುರ್ (2006), ಉತ್ತರ್ ಕನ್ನಡ್ ಜಿಲಾ ಸಾಹಿತ್ಯ್ ಸಮ್ಮೇಳನ್, ಭಟ್ಕಳ್ (2007), ಉತ್ತರ್ ಕನ್ನಡ್ ಸಾಹಿತ್ಯ್ ಸಮ್ಮೇಳನ್, ಭಟ್ಕಳ್ (2010) ಆನಿ ಹೆರ್ ಜಾಯ್ತ್ಯಾ ಸಂಸ್ಥಾಂನಿ ಜಾಯ್ತ್ಯಾ ಸಂದರ್ಭಾಂನಿ ತಾಕಾ ಸನ್ಮಾನ್ ಕೆಲಾ.

ತಾಚ್ಯಾ ಸನ್ಮಾನಾ ಖಾತೀರ್ ಕಿತ್ಲೆಶ್ಯೋಚ್ ಮುಶಾಯ್ರಾ ಕಾರ್ಯಾವಳಿ ಘಡೊವ್ನ್ ಹಾಡ್ಲ್ಯಾತ್, ಜಶೆಂ, ಶೆಮ್-ಸಾಮಿ ಕಂದ್ಳೂರ್, ಶೆಮ್-ಸಾಮಿ ಮುರ್ಡೆಶ್ವರ್, ಶೆಮ್-ಸಾಮಿ ಮಾನ್ಕಾಯ್, ಸಮೀಉಲ್ಲಾ ನಾಈಟ್ಸ್ ಇತ್ಯಾದಿ. ನವಾಯ್ತಿ ಸಂಸ್ಕೃತಾಯೆಚೆರ್ ಆನಿ ತಿಚೆ ಕವಿತೆಚೆ ಪರಂಪರೆಚೆರ್ ಹ್ಯಾ ಕಾರ್ಯಾವಳಿಂನಿ ಉಜ್ವಾಡ್ ಫಾಂಕಯ್ಲಾ.

ಸೈಯದ್ ಸಮಿಉಲ್ಲಾ ಬರ್ಮಾವರಾನ್ ಆಪ್ಲ್ಯೊ ಕವಿತಾ ಅಂತರರಾಷ್ಟ್ರೀಯ್ ಮಂಚಾಚೆರ್ ದುಬಾಯ್, ದಮ್ಮಾಮ್, ರಿಯಾದ್, ಶಾರ್ಜಾ, ಕುವೆತ್, ಕತಾರ್, ಬಾಹ್ರೇನ್, ಒಮಾನ್, ಆಬುಧಾಬಿ ಹ್ಯಾ ಸಾರ್ಕ್ಯಾ ಖಾಡಿ ಗಾಂವಾಂನಿ ಸಾದರ್ ಕೆಲ್ಯಾತ್. ರಾಷ್ಟ್ರೀಯ್ ಪಾಂವ್ಡ್ಯಾರ್ ಗೊಂಯ್, ವಿಜಯ್ವಾಡಾ, ಮಂಗ್ಳೂರ್, ಚೆನ್ನಯ್, ಕಾರ್ವಾರ್, ಸಿರ್ಸಿ, ಉಡುಪಿ, ಕಾಸರ‍್ಗೋಡ್, ಕ್ಯಾಲಿಕಟ್ ಆನಿ ಬೆಂಗ್ಳುರ್ ಹಾಂಗಾ ತಾಂಣಿ ಆಪ್ಲೆಂ ಕವಿತಾ ಸಾದರೀಕರಣ್ ಕೆಲಾಂ.

ಸೈಯದ್ ಸಮಿಉಲ್ಲಾ ಬರ್ಮಾವರಾನ್ ಆಪ್ಲ್ಯಾ ರಚ್ಣೆವರ್ವಿಂ ಕೊಂಕ್ಣಿ ಕವಿತೆಕ್ ನವೆ ಉಂಚಾಯೆಕ್ ಪಾವಯ್ಲಾಂ. ತಾಚೆ ಕವಿತೆನ್ ಸಮಾಜಾಚ್ಯಾ ಸಾಂಸ್ಕೃತೀಕ್ ಅಸ್ಮಿತಾಯೆಚೆಂ ಸಾರ್ ತಿಗೊವ್ನ್ ದವರುನ್ ಸಭಾರ್ ನವೋದಿತ್ ಕವಿಂಕ್ ಪ್ರೇರಣಾ ದಿಲ್ಯಾ.

2008 ವರ್ಸಾ ದುಬಾಯ್ಚ್ಯಾ ಮೆರಿಟ್ ಫ್ರೈಟ್ ಸಿಸ್ಟಮ್ಸಾಚೆ ವೆವಸ್ಥಾಪಕ್ ದಿರಿಕ್ತೊರ್ ಜೋಸೆಫ್ ಮಥಾಯಸ್ ಹಾಂಣಿ ಆಪ್ಲ್ಯಾ ಕುಟ್ಮಾಚ್ಯಾ ನಾಂವಾನ್ ಸ್ಥಾಪನ್ ಕೆಲ್ಲ್ಯಾ ಹ್ಯಾ ಪುರಸ್ಕಾರ್ ಶಿಂಕ್ಳೆಂತ್ ಸಮಿಉಲ್ಲಾ ಬರ್ಮಾವರ್ 17ವೊ ಪುರಸ್ಕಾರ್ ಮೆಳೊವ್ಪಿ ಕವಿ ಆಸಾ.

ಕೊಂಕ್ಣಿ ಕವಿತೆಚ್ಯಾ ಸಮಗ್ರ್ ವಾಡಾವಳಿ ಖಾತೀರ್ ವಾವುರ‍್ಚೆಂ ಕವಿತಾ ಟ್ರಸ್ಟ್ ಫುಡ್ಲ್ಯಾ ವರ್ಸಾ 12 ಜನವರೀಂತ್ ಉಡುಪಿ ಸಾಸ್ತಾನಾಂತ್ಲ್ಯಾ ಪಾಂಡೇಶ್ವರ್ ಗಾಂವಾಂತ್ ದಿ ಎಕ್ಸಪ್ರೆಶನ್, ಉಡುಪಿ ಹೆ ಸಂಸ್ಥೆಚ್ಯಾ ಸಹಯೋಗಾನ್ ಆಪ್ಲೆಂ ’ಕವಿತಾ ಫೆಸ್ತ್' ಘಡೊವ್ನ್ ಹಾಡ್ಟಾ.

समिउल्ला बर्मावराक मथायस कुटुंब कविता पुरस्कार - 2024 जाहीर

मंगळूर, 23 डिसेंबर : भटकळच्या सैयद समिउल्ला बर्मावराक कविता ट्रस्टचो 2024 वर्साचो मथायस कुटुंब कविता पुरस्कार जाहीर जाला. हो पुरस्कार 2025 वर्साच्या जानेर म्हयन्याचे 12 तारकेर सास्तान, उडुपी हांगा जांवच्या एकुणिसाव्या आवृत्तीच्या कविता फेस्त संदर्भार तांकां भेटयतले. ह्या पुरस्कारांत 25 हजार रुपया, प्रशस्तीपत्र आनी प्रशंसापत्र आटापून आसा.

कर्नाटकाच्या उत्तर कन्नड जिल्ह्यांतल्या भटकळ ह्या सोभीत शारांत 1956 वर्सा जल्मल्लो सैयद समिउल्ला बर्मावर हो एक उत्तीम कवी आनी गायक. ताणें आपलें शाळेचें शिक्षण जामिया इस्लामिया भटकळ हांगा पुराय केलें. ल्हान पिराये सावन सैयद समिउल्लान कविता आनी संगीताची विशेस वळख दाखयली आनी ताणें एक उल्लेखनीय साहित्यीक प्रवास सुरू केलो.

सुरवेक उर्दू भाशेंत बरोवपी समिउल्ला उपरांत नवायती कडेन ओडून वचून समाजांतलो एक नामनेचो साहित्यीक व्यक्ती जालो. तांची कविता श्रद्धा, मोग, समाजीक प्रस्न, सांस्कृतीक अभिमान ह्या सारक्या विंगड विंगड विशयांक संबोधीत करता.

2012 वर्सा ऑडिओ सीडी वांगडा प्रकाशीत जाल्लो ‘नीट वाट’ हो ताचो पयलो काव्यसंग्रह कोंकणी साहित्यांतल्या नवायती बोलींत एक मार्गदर्शक फातर थारलो. नवायती मुशायरांक फुडाकार दीवन ताणें समाजाचें लक्ष उर्दूंतल्यान नवायतींत रुपांतरीत केलें आनी अशे तरेन भाशेची गिरेस्त साहित्य परंपरेक परतून जिवीत दिलें आनी ती तिगोवन दवरली.

समिउल्लान आपल्या बरयल्ल्या कृतींवांगडाच जायत्यो ऑडिओ कॅसेटी आनी सीडी तयार करून नवायती कवितेची वळख तरणाट्या पिळगेमेरेन केल्या. नवायत मेहफिलाचो संस्थापक जावन ताणें नवे पिळगे खातीर नवायती संस्कृताय आनी भास सांबाळपाक आनी पोसपाक स्वताक ओंपला.

ताच्या साहित्यीक योगदानाक लागून ताका राश्ट्रीय आनी आंतरराश्ट्रीय मळार तोखणाय मेळ्ळ्या. अखिल भारतीय कोंकणी परिशद (2002), भटकळ मुस्लिम जमात, बेंगळुरू (2006), उत्तर कन्नड जिला साहित्य सम्मेलन, भटकळ (2007), उत्तर कन्नड साहित्य सम्मेलन, भटकळ (2010) आनी हेर जायत्या संस्थांनी जायत्या संदर्भांनी ताचो भोवमान केला.

ताच्या सन्मानार्थ कितलेशेच मुशायरा आनी कार्यावळी घडोवन हाडल्यात, जशे की शेम-सामी कंदळूर, शेम-सामी मुरडेश्वर, शेम-सामी मानकाय, समीउल्ला नाईट्स इत्यादी. नवायती संस्कृतायेचेर आनी तिचे कवितेचे परंपरेचेर ह्या कार्यावळिंनी उजवाड फांकयला.

सैयद समिउल्ला बर्मावरान आपल्यो कविता अंतरराष्ट्रीय मंचाचेर दुबाय, दम्माम, रियाद, शारजाह, कुवेत, कतार, बहरीन, ओमान, अबुधाबी ह्या सारक्या मध्य प्राच्य देशांनी सादर केल्यात. राष्ट्रीय पांवड्यार गोंय, विजयवाडा, मंगळूर, चेन्नय, कारवार, सिरसी, उडुपी, कासरगोड, कालिकत आनी बेंगळुरू हांगा तांणी आपलें कविता सादरीकरण केलां.

सैयद समिउल्ला बर्मावरान आपल्या रचनांवरवीं कोंकणी कवितेक नवे उंचायेचेर व्हेला. ताचे कवितेन समाजाच्या सांस्कृतीक अस्मितायेचें सार तिगोवन दवरून असंख्य नवोदित कवींक प्रेरणा दिल्या.

2008 वर्सा दुबायच्या मेरिट फ्रेट सिस्टम्साचे वेवस्थापकीय संचालक जोसेफ मथायस हांणी आपल्या कुटुंबाच्या नांवान स्थापन केल्ल्या ह्या पुरस्कार शिंकळेंत समिउल्ला बर्मावर 17वो पुरस्कार मेळोवपी कवी आसा.

कोंकणी कवितेच्या प्रचाराक वावुरपी कविता ट्रस्ट फुडल्या वर्सा 12 जानेवारीक उडुपी सास्तानांतल्या पांडेश्वर गांवांत दी एक्सप्रेशन, उडुपी हे संस्थेच्या सहकारान आपलो कविता महोत्सव घडोवन हाडटा.