ಆಶಿಯಾನಾಚ್ಯಾ ನಂದನಾವನಾಂತ್ ಸಂಭ್ರಮ್ಲೆಂ 19-ವೆಂ ಕವಿತಾ ಫೆಸ್ತ್
.ಕಾನಾಮನಾಂಕ್ ಕಾವ್ಯಾಳ್ ಜಾಲ್ಲೆಂ ಕವಿತಾ ಫೆಸ್ತ್ 2025
.ವಿಶಿಶ್ಟ್ ಶೈಲೆರ್ ಉಗ್ತಾವ್ಣಿ, ದೀಸ್ ಭರ್ ಕಾವ್ಯಾಳ್ ಸಜೊವ್ಣಿ, ಜೈತೆವಂತ್ ಸೊಂಪ್ಣಿ
.ಕವಿ ಸಯ್ಯದ್ ಸಮೀವುಲ್ಲಾ ಬರ್ಮಾವರ್ ಹಾಕಾ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಹಾತಾಂತರ್
.ಕವಿಂಸವೆಂ ಭಾಸಾಭಾಸ್ , ಉಗ್ತಿ ಕವಿತಾ ಮಾಂಚಿ, ’ಸ್ವರ್ಗಾಚಿ ಪಕ್ಷಿ’ ಪುಸ್ತಕ್ ಲೋಕಾರ್ಪಣ್, ಯುವ ಸಾಹಿತಿಂಚೆಂ ಕವಿತಾ ಸಾದರೀಕರಣ್
ಕೊಂಕ್ಣಿ ಕಾವ್ಯಾಕ್ ಗರ್ಜೆಚೊ ಭೊಂವಾರ್ ಆನಿ ಅಂತರಾಷ್ಟ್ರೀಯ್ ಪಾಂವ್ಡೊ ಜೊಡುನ್ ದಿಂವ್ಚ್ಯಾ ಶೆವೊಟಾಖಾಲ್ ವಾವುರ‍್ಚ್ಯಾ ಕವಿತಾ ಟ್ರಸ್ಟಾಚೆಂ 19-ವೆಂ ಕವಿತಾ ಫೆಸ್ತ್ 12-01-2025 ವೆರ್ ಉಡುಪಿ ಜಿಲ್ಲ್ಯಾಚ್ಯಾ ಸಾಸ್ತಾನ್ ಪಾಂಡೇಶ್ವರ್ ಆಸ್ಚ್ಯಾ ಸುಜಾತಾ–ಆಲ್ವಿನ್ ಆಂದ್ರಾದೆ ಜೊಡ್ಯಾಚ್ಯಾ ಆಶಿಯಾನಾ ಘರ‍್ಚ್ಯಾ ಆಂಗ್ಣಾಂತ್, `ದಿ ಎಕ್ಸ್’ಪ್ರೆಶನ್ಸ್’ ಪಂಗ್ಡಾಚ್ಯಾ ಸಹಕಾರಾನ್ ದೀಸ್‌ಭರ್ ವ್ಹಡಾ ಸಂಭ್ರಮಾನ್ ಮನಾಯ್ಲೆಂ.
ಸಂಭ್ರಮಿಕ್ ಉಗ್ತಾವ್ಣಿ:
ಮಂಗ್ಳುರ್, ಉಡುಪಿ, ಗೊಂಯ್, ಕೇರಳ ಅಶೆಂ ಕೊಂಕಣಾಚ್ಯಾ ವಿವಿಧ್ ವಠಾರಾಂ ಥಾವ್ನ್ ಆಯಿಲ್ಲ್ಯಾ ಕಾವ್ಯರಸಿಕಾಂನಿ ಇಡ್ಲ್ಯೊ ಆನಿ ಮಣ್ಣಿಚೊ ರುಚಿಕ್ ಫಳಾರ್ ಘೆತಚ್, ಬೆಂಡಾ-ತೊಂಬೊರಾಚ್ಯಾ ನಾದಾನ್ ಕವಿತಾ ಫೆಸ್ತಾಚೊ ಪುರ್ಶಾಂವ್ ಸುರ್ವಾತ್ಲೊ. ಬಳ್ಳಾರಿಚೊ ಬಿಸ್ಪ್ ಅ.ಮಾ.ದೊ. ಹೆನ್ರಿ ಸೊಜ್ ಹಾಣಿಂ ಬ್ಯಾಂಡ್ ಬಡೊವ್ನ್ ಪುರ್ಶಾಂವಾಕ್ ಚಾಲನ್ ದಿಲೆಂ.
ಉಪ್ರಾಂತ್ ಕವಿತಾ ಫೆಸ್ತಾಚ್ಯಾ ಸಂಪ್ರದಾಯಾ ಪರ್ಮಾಣೆಂ ಕಾವ್ಯಾಳ್ ಪರ್ಮಳ್ ಸಗ್ಳ್ಯಾ ಜಗಾಕ್ ಪಾಚಾರ‍್ಚೆ ಸಾಂಕೇತಿಕತೆ ಸವೆಂ ಫುಲಾಂ ಪಾಕ್ಳ್ಯೊ ವಾರ‍್ಯಾರ್ ಉಬೊವ್ನ್, ವೆದಿ ವಯ್ಲ್ಯಾ ಸಯ್ರ್ಯಾಂನಿ ಕವಿತಾ ಫೆಸ್ತ್ 2025 ಉಗ್ತಾಯ್ಲೆಂ. ಸಾಂಗಾತಾ ಟ್ರಸ್ಟಿಂನಿ, ಕವಿತಾ ಟ್ರಸ್ಟಾಕ್ ಆನಿ ಫೆಸ್ತಾಕ್ ಮಜತೆಚೆ ಬಾವ್ಳೆ ದಿಲ್ಲ್ಯಾಂನಿ ಫುಲಾಂ ಪಾಕ್ಳ್ಯೊ ಸುಂರ್ಗಾರಾಯಿಲ್ಲೆ ಕಡಾಯೆಚ್ಯಾ ಉದ್ಕಾಂತ್ ಸೊಡುನ್ ಕಾವ್ಯಾಳ್ ಭೊಂವಾರ್ ನಿರ್ಮಾಣಾಂತ್ ಆಪ್ಲೊ ಸಾಂಗಾತ್ ಭಾಸಾಯ್ಲೊ. ಹ್ಯಾಚ್ ಸಂದರ್ಭಾರ್ ಪಾಟ್ಲ್ಯಾ ದಿಸಾಂನಿ ಸಂಸಾರಾಕ್ ಆದೇವ್ಸ್ ಮಾಗಲ್ಲೆ ಕವಿ ಎಮ್. ಪಿ. ರೊಡ್ರಿಗಸ್, ಪಂಚು ಬಂಟ್ವಾಳ್, ಅನಂತ್ ಭಟ್ ಕೊಚ್ಚಿ ಆನಿ ಸಿಕೆರಾಮ್ ಸುರತ್ಕಲ್ ಹಾಂಚ್ಯಾ ಆತ್ಮ್ಯಾಕ್ ಶಾಂತಿ ಲಾಭ್ಚ್ಯಾಕ್ ಜಮಲ್ಲ್ಯಾಂನಿ ಎಕಾ ಮಿನುಟಾಂಚೆಂ ಮಾಗ್ಣೆಂ ಭೆಟಯ್ಲೆಂ.
ಆಪುಣ್ ಬರೊ ಕೊಂಕ್ಣಿ ಉಲೊವ್ಪಿ ನ್ಹಯ್ ಮ್ಹಣ್ ಉತ್ರಾಂ ಸುರ್ವಾತ್ಲಲ್ಯಾ ಫೆಸ್ತಾಚೊ ಉಗ್ತಾವ್ಪಿ ಡೆಲ್ಲಿಚ್ಯಾ ಫೊರ್ಚೂನ್ ಲೈಫ್ ವೆಲ್ತ್ ಪ್ರೈ.ಲಿ. ಕಂಪ್ಣೆಚೊ ದಿರೆಕ್ತೊರ್ ಆನಿ ದಾನಿ ಜೋಸೆಫ್ ಎಲಿಯಾಸ್ ಮಿನೇಜಸ್ ಹಾಣೆ ಭುರ್ಗೆಪಣಾರ್ ಪದ್ಯ ಉಗ್ಡಾಸ್ ದವ್ರುಂಕ್ ಕಷ್ಟುಂಚಿ ಗಜಾಲ್ ಭೋವ್ ಗಮ್ಮತಾಯೆನ್ ವರ್ಣಿಲಿ. ಕವಿಂಚೆ ತಕ್ಲೆಂತ್ ಕೆನ್ನಾಂಯ್ ಏಕ್ ಪೊಜಿಟಿವ್ ಚಿಂತಪ್ ಆಸ್ತಾ. ಕವಿತಾ ಕಶಿ ಬರೊಂವ್ಚಿ, ಧಾ ಜಣಾಂಚೊ ಸಂತೊಸ್ ಕಸೊ ವಾಡೊಂವ್ಚೊ, ಕಶೆಂ ಹೆರಾಂಕ್ ಪ್ರೇರಣಾಂನಿ ಭರ‍್ಚೆಂ ಮ್ಹಣ್ ಚಿಂತ್ತಾತ್. ಸಾಂಗಾತಾ ಖಂಯ್ಚೀಯ್ ಗಜಾಲ್ ಸಕಾರಾತ್ಮಕ್ ರಿತಿನ್ ಘೆಜೆ. ಖೊಡಿ ಕಾಡ್ತಲೆ ಕೆನ್ನಾಯ್ ಆಸಾತ್. ಆಪ್ಲ್ಯಾ ಜಿವಿತಾಂತ್ ಮನಿಸ್ ಕುಟ್ಮಾ ಖಾತಿರ್, ಸಮಾಜಾ ಖಾತಿರ್ ಆನಿ ದೇಶಾ ಖಾತಿರ್ ಕಿತೆಂ ಕರ‍್ನ್ ದಾಕಯ್ತಾ ತೆಂ ಗರ್ಜೆಚೆಂ ಮ್ಹಣ್ ಉಗ್ತಾವ್ಣೆಚೊ ಸಂದೇಶ್ ದಿಲೊ.
ಮುಖೆಲ್ ಸಯ್ರೊ ಬಿಸ್ಪ್ ಹೆನ್ರಿ ಡಿಸೋಜಾನ್ ಹ್ಯಾ ಗಾಂವ್ಚೆ ಆಪ್ಲೆ ಉಗ್ಡಾಸ್ ಜಿವಾಳ್ ಜಾತಾತ್ ಮ್ಹಣ್ ಸಾಂಗುನ್ ಕವಿತೆಕ್ ಪ್ರೇರಣ್ ದಿಂವ್ಚಿ, ಅಭಿಪ್ರಾಯ್ ಆಸಾ ಕರ‍್ಚಿ, ಮನೋರಂಜನ್ ದಿಂವ್ಚಿ ಸಕತ್ ಆಸಾ. ಮನ್ಶಾ ಸಂಬಂಧ್ ವಾಡೊಂವ್ಕ್, ಭಾಸ್ ಜಾತಿ ಕಾತಿಚೆ ದೊರೆ ಕೊಸ್ಳಾಂವ್ಕ್ ಕಾವ್ಯಾ ಮಾರಿಫಾತ್ ಸಾಧ್ಯ್ ಆಸಾ. ಅಸಲೊ ವಾವ್ರ್ ಕರೀತ್ ಆಸ್ಚ್ಯಾ ಕವಿತಾ ಟ್ರಸ್ಟಾಚಿ ತೊಕ್ಣಾಯ್ ಕರ‍್ನ್ ಬರೆಂ ಮಾಗ್ಲೆಂ.
ದಿ ಎಕ್ಸ್‌ಪ್ರೆಶನ್ಸ್ ಅಧ್ಯಕ್ಷ್ ಪ್ರವೀಣ್ ಕಾರ್ವಾಲ್ಲೊನ್ ಆಪ್ಲ್ಯಾ ಗಾಂವಾಂತ್ ಹೊ ಸಂಭ್ರಮ್ ಘಡ್ತಾನಾ ಆಮಿಂಯ್ ಹ್ಯಾ ವಾವ್ರಾಚೆ ವಾಂಟೆಲಿ ಮ್ಹಣ್ ಅಭಿಮಾನ್ ಭೊಗ್ತಾ ಮ್ಹಣ್ ಸಾಂಗ್ಲೆಂ. ಕವಿತಾ ಟ್ರಸ್ಟ್ ಅಧ್ಯಕ್ಷ್ ಕಿಶೂ ಬಾರ್ಕೂರ್ ಹಾಣೆಂ ಟ್ರಸ್ಟಾಚೊ ಜಲ್ಮ್ ಆನಿ ವಾಡಾವಳ್ ಹಾಚಿ ಮಾಹೆತ್ ದೀವ್ನ್ ಸರ್ವಾಂಚೊ ಮಾಯ್ಪಾಶಿ ಯೆವ್ಕಾರ್ ಮಾಗ್ಲೊ. ವೆದಿರ್ ಕಾರ್ಯದರ್ಶಿ ಎವ್ರೆಲ್ ರೊಡ್ರಿಗಸ್, ಘರ‍್ಚಿಂ ಯೆಜ್ಮಾನ್-ಯೆಜ್ಮಾನಿ ಸುಜಾತಾ ಆನಿ ಆಲ್ವಿನ್ ಆಂದ್ರಾದೆ ಹಾಜರ್ ಆಸ್‌ಲ್ಲಿಂ.
ದೀಸ್ ಭರ್ ಕಾವ್ಯಾಳ್ ಸಜೊವ್ಣಿ:
ಉಪ್ರಾಂತ್ ಡೊಲ್ಪಿ ಮಸ್ಕರೇನ್ಹಸ್ ಆನಿ ಪಂಗ್ಡಾ ಥಾವ್ನ್ ಪಾಳ್ಣ್ಯಾ ಗಿತಾಂ ಆನಿ ವೊವಿಯೊ ವೆರ್ಸಾಂಚೆಂ ಸಾದರ್ಪಣ್ ಚಲ್ಲೆಂ.
’ಮ್ಹಜಿ ಜೀಣ್, ಮ್ಹಜಿ ಕವಿತಾ’ ಕಾರ್ಯಾಂತ್ ಪುರಸ್ಕೃತ್ ಸಮೀವುಲ್ಲಾ ಬರ್ಮಾವರ್ ಹಾಚೆಸವೆಂ ಡೊ. ರಾಜಯ್ ಪವಾರ್ ಹಾಣೆಂ ಕೆಲ್ಲಿ ಭಾಸಾಭಾಸ್ ಆಯ್ಕೊವ್ಪ್ಯಾಂಕ್ ನವಾಯತಿ ಕಾವ್ಯಾ ಶೆತಾಚಿ ವಳಖ್ ಕರುನ್ ದೀಂವ್ಕ್ ಪಾವ್ಲಿ. ಆಪ್ಲ್ಯಾ ಸಾಹಿತಿಕ್ ಪಯ್ಣಾಚಿ ಮಾಹೆತ್ ಸಮೀವುಲ್ಲಾನ್ ದಿಲಿ. ಆನಿ ಫುಡಾರಾಂತ್ ಕೊಂಕ್ಣೆಂತ್ ಬರೊಂವ್ಚಿ ಆಪ್ಲಿ ಬದ್ಧತಾ ಜಾಯ್ರ್ ಕೆಲಿ. ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ವಳಖ್ ಕರುನ್ ದಿಲಿ.
ಮಾಗಿರ್ ಕವಿ ಆನಿ ವಾಚ್ಪ್ಯಾ ಮದ್ಲೊ ಸಂವಾದ್ ಚಲ್ಲೊ. ವಾಚ್ಪಿ ಅನ್ವೇಶಾ ಸಿಂಗ್‌ಬಾಳ್ ಹಿಣೆಂ ಕವಿ ಸ್ಮಿತಾ ಶೆಣೈ ಹಿಚ್ಯಾ ಕಾವ್ಯಾಂತ್ ಬರೊಂವ್ಚಿಂ ಪ್ರೇರಣಾಂ, ಸ್ತೀ ಸಂವೇದನಾಂ ಆನಿ ಸ್ತ್ರೀಯೆಕ್ ಬರ್ಪಾಂತ್ ನಿರಂತರತಾ ಸಾಂಬಾಳುಂಕ್ ಲಾಗ್ಚ್ಯೋ ಆಡ್ಕಳ್ಯೊ ಹಾಂಚೆರ್ ಕಾಂಯ್ ಗಜಾಲಿ ಚಲಯ್ಲ್ಯೊ.
ಕವಿತಾ ಫೆಸ್ತಾಂತ್ ಫಕತ್ ವೆದಿ ವಯ್ಲ್ಯಾಂಕ್ ಮಾತ್ರ್ ನ್ಹಯ್ ವೆದಿ ಸಕಯ್ಲ್ಯಾಂಕ್‌ಯಿ ಆವ್ಕಾಸ್ ಕರುನ್ ದಿಂವ್ಚಿ ಉಗ್ತಿ ಕವಿತಾ ಮಾಂಚಿ 14 ಕವಿಂನಿ ಚಲೊವ್ನ್ ವೆಲಿ. ಪಿಯುಸ್ ಜೇಮ್ಸ್ ಕರುಗಳ್ನಡೆ, ಫ್ಲಾವಿಯಾ ಆಲ್ಬುಕರ್ಕ್, ಜುಲಿಯೆಟ್ ಮೊರಾಸ್, ಮರಿಯಾ ಪಿಂಟೊ, ನವೀನ್ ಕುಲ್ಶೇಕರ್, ಸಲೊಮಿ ಮಿಯಾಪದವ್, ವನಿತಾ ಮಾರ್ಟಿಸ್, ಜೊಯ್ಸ್ ಪಿಂಟೊ, ಜಿತಾ ಗೊನ್ಸಾಲ್ವಿಸ್, ಶಬ್ಬೀರ್ ಆಜಾಯ್ವ್, ಸಾದಿಕ್ ಅಸರ್ಮಠ್, ನೌಫಿಲ್ ದಾಮುದಿ, ಪ್ರಮಿಳಾ ರೆಂಜಾಲ್, ಕ್ಲೊಡಿ ಬ್ರಹ್ಮಾವರ್ ಹಾಣಿಂ ಚಲಯ್ಲಿ. ಪೊರ‍್ನ್ಯಾ ತಶೆಂ ತರ‍್ನ್ಯಾ ಕವಿ ಕವಯಿತ್ರಿಂನಿ ಹ್ಯಾ ಸುವಾಳ್ಯಾಚೊ ಫಾಯ್ದೊ ಜೊಡ್ಲೊ. ನವಾಯತಿ ಕವಿತೆಂನಿ ಮನಾಂ ವೊಡ್ಲಿಂ.
ವಿಶೇಸ್ ಜಾವ್ನ್ ಕೆಲ್ಲೆ ಪತ್ರಾಡೆ, ಕುಂಕಡ್ ಸುಕೆಂ, ವೋರ್ನ್ ಆನಿ ಪುರಣ್-ಪೊಳಿ ಮ್ಹಣ್ತಾನಾ ದೊನ್ಪಾರಾಂಚೆಂ ರುಚಿಕ್, ಫೆಸ್ತಾ ಶೈಲೆಚೆಂ ಜೆವಣ್ ಗಡ್ದ್ ಆಸಲ್ಲೆಂ.
ದೊನ್ಪಾರಾಂ ಉಪ್ರಾಂತ್ ಸಾಹಿತ್ಯ್ ಅಕಾಡೆಮಿಚ್ಯಾ ಜೋಡ್ ಪಾಲ್ವಾನ್ ಯುವ ಕವಿಂ ಥಾವ್ನ್ ಕವಿತಾ ಸಾದರೀಕರಣ್ ಚಲ್ಲೆಂ. ಆಂಡ್ರ್ಯೂ ಎಲ್ ಡಿಕುನ್ಹಾಚ್ಯಾ ಅಧ್ಯಕ್ಷ್‌ಪಣಾರ್ ಚಲ್ಲೆಲ್ಯಾ ಹ್ಯಾ ಸಾದರೀಕರಣಾಂತ್ ಅಂತರಾ ಭಿಡೆ, ವೆಂಕಟೇಶ್ ನಾಯಕ್, ಸುಪ್ರಿಯಾ ಕಾಣ್‌ಕೋಣ್‌ಕಾರ್ ಆನಿ ಅಮೇಯ್ ನಾಯ್ಕ್ ಹಾಂಣಿ ಆಪಾಪ್ಲ್ಯೊ ಸಮಕಾಳಿನ್ ಗಜಾಲಿಂಕ್ ಸ್ಪಂದನ್ ಕರ‍್ಚ್ಯೊ ಕವಿತಾ ಸಾದರ್ ಕೆಲ್ಯೊ. ಕೊಂಕ್ಣಿ ಭಾಶಾ ಸಲ್ಲಾಗಾರ್ ಮಂಡಳಾಚೊ ನಿಮಂತ್ರಕ್ ಮೆಲ್ವಿನ್ ರೊಡ್ರಿಗಸಾನ್ ಕಾರ್ಯಾವಿಶಿಂ ಮಾಹೆತ್ ದಿಲಿ ತರ್, ಸಾಂದೊ ಸ್ಟ್ಯಾನಿ ಬೇಳಾನ್ ಆಭಾರ್ ಮಾಂದ್ಲೊ. ಫೆಲ್ಸಿ ಲೋಬೊನ್ ಕವಿಂಚಿ ವಳಖ್ ಕರುನ್ ದಿಲಿ.
ಫ್ರಾಂಕ್ಲಿನ್ ಫೆರ್ನಾಂಡಿಸ್ ಆನಿ ಪಂಗ್ಡಾಚ್ಯಾ ಯುವ ಗಾವ್ಪ್ಯಾಂ ಥಾವ್ನ್ ಮನಾಂ ಖುಶಾಲಾಂವ್ಚಿಂ ಪದಾಂ ಸಾದರ್ ಜಾಲಿಂ. ಚಾ ಪಿಯೆತಚ್ ಸೊಂಪ್ಣೆಂ ಕಾರ್ಯೆಂ ಸುರ್ವಾತ್ಲೆಂ.
ಜೈತೆವಂತ್ ಸೊಂಪ್ಣಿ:
ಮುಖೆಲ್ ಸಯ್ರೊ ಸಾಹಿತ್ಯ್ ಅಕಾಡೆಮಿಚ್ಯಾ ಸಾಭಾರ್ ಮಂಡಳಾಚೊ ವಾಂಗ್ಡಿ ಡೊ ಪೂರ್ಣಾನಂದಾ ಚಾರಿ, ಕಾಣಕೊಣಾಂತ್ಲ್ಯಾ ಶ್ರೀ ಮಲ್ಲಿಕಾರ್ಜುನ್ ಆನಿ ಶ್ರೀ ಚೇತನ್ ಮಂಜು ದೇಸಾಯಿ ಕೊಲೆಜಿಚ್ಯಾ ಹಿಂದಿ ವಿಭಾಗಾಚಿ ಮುಖೆಲಿ, ಡೊ ರೂಪಾ ಚಾರಿ, ಸಾಸ್ತಾನ್ ಸಾಂತ್ ಆಂತೊನಿ ಫಿರ್ಗಜೆಚೊ ವಿಗಾರ್ ಮಾ.ಬಾ. ಸುನೀಲ್ ಡಿಸಿಲ್ವಾ, ಪುರಸ್ಕೃತ್ ಸಯ್ಯದ್ ಸಮೀವುಲ್ಲಾ ಬರ್ಮಾವರ್, ಲೇಖಕಿ ಸ್ಮಿತಾ ಶೆಣೈ ಹಾಂಣಿ ಅಧ್ಯಕ್ಷ್ ಕಿಶೂ ಬಾರ್ಕೂರ್ ಆನಿ ಕಾರ್ಯದರ್ಶಿ ಎವ್ರೆಲ್ ರೊಡ್ರಿಗಸ್ ಹಾಂಚೆ ಸವೆಂ ವೆದಿ ಸೊಭಯ್ತಚ್ ಸೊಂಪ್ಣೆ ಕಾರ್ಯೆಂ ಸುರ್ವಾತ್ಲೆಂ.
ಪಯ್ಲೆಂ ಸ್ಮಿತಪ್ರಜ್ಞ ಹಿಣೆಂ ಲಿಖುನ್ ಕವಿತಾ ಟ್ರಸ್ಟಾನ್ ಪರ್ಗಟ್ಲಲೊ ’ಸ್ವರ್ಗಾಚಿ ಪಕ್ಷಿ’ ಕವಿತಾ ಪುಂಜೊ ಲೊಕಾರ್ಪಣ್ ಜಾಲೊ. ಟ್ರಸ್ಟಿ ವಿತೊರಿ ಕಾರ್ಕಳಾನ್ ಬುಕಾಚಿ ವಳಖ್ ಕರುನ್ ದಿಲಿ. ಕವಯಿತ್ರಿ ಸ್ಮಿತಾ ಶೆಣೈನ್ ಆಪ್ಲ್ಯಾ ಪ್ರೇರಣಾಂಚೊ ಕವಿತಾ ಟ್ರಸ್ಟಾಚೊ ಪಾಟಿಂಬೊ ಉಲ್ಲೇಕ್ ಕರುನ್, ಆವ್ಕಾಸಾ ಖಾತಿರ್ ಆಭಾರ್ ಮಾಂದ್ಲೊ.
ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ನವಾಯತಿ ಕವಿ ಸಯ್ಯದ್ ಸಮಿವುಲ್ಲಾ ಬರ್ಮಾವರ್ ಹಾಕಾ ವೆದಿ ವಯ್ಲ್ಯಾ ಸಯ್ರ್ಯಾಂನಿ ಹಾತಾಂತರ್ ಕೆಲೊ. ಸ್ಟ್ಯಾನಿ ಬೇಳಾನ್ ಪುರಸ್ಕಾರಾವಿಶಿಂ ಮಾಹೆತ್ ದಿಲಿ ತರ್, ಟ್ರಸ್ಟಿ ಆಂಡ್ರ್ಯೂ ಎಲ್ ಡಿಕುನ್ಹಾನ್ ಮಾನ್ ಪತ್ರ್ ವಾಚ್ಲೆಂ. ಶ್ಹೆಲೊ, ಮೊಗ್ರ್ಯಾಂ ಝೆಲೊ, ಮಾನ್-ಪತ್ರ್, ಯಾದಿಸ್ತಿಕಾ ಆನಿ ರು 25,000/- ಆಟಾಪ್ಚೊ ಹೊ ಪುರಸ್ಕಾರ್ ಕುಪ್ಪೆಪದವುಚ್ಯಾ ಜೊಸೆಫ್ ಮಥಾಯಸ್ ಆನಿ ಕುಟ್ಮಾಚ್ಯಾ ನಾಂವಾನ್ ದಿಂವ್ಚೊ. ಪ್ರಶಸ್ತಿ ಸ್ವೀಕಾರ್ ಕರ‍್ನ್ ಸಮೀವುಲ್ಲಾನ್ ಆಪ್ಲಿಂ ಭೊಗ್ಣಾಂ ಉಚಾರ‍್ಲಿಂ. ತುಮ್ಕಾಂ ಮ್ಹಜಿ ನವಾಯತಿ ಶಾಯರಿ ಆಂವಡ್ಲಿ, ಮ್ಹಜ್ಯಾ ಕವಿತೆಚ್ಯಾ ಉತ್ರಾಂಚಿ, ಭೊಗ್ಣಾಂಚಿ ಏಕ್ ವಳಖ್ ತುಮ್ಕಾಂ ಜಾಲಿ ದೆಕುನ್ ಹೊ ಮಾನ್ ಫಾವೊ ಜಾಲೊ. ಹಿ ಫಕತ್ ಏಕ್ ಪ್ರಶಸ್ತಿ ನ್ಹಯ್, ಮ್ಹಜ್ಯೆ ಕವಿತೆಕ್ ಮೆಳ್ಳಲಿ ಮರ್ಯಾದ್. ನವಾಯತಿ ಶಾಯರಿ ಕರ‍್ತಲ್ಯಾ, ಕವಿತಾ ಬರಯ್ತಲ್ಯಾ ಸರ್ವಾಂಕ್ ಮೆಳ್ಳಲೊ ಮಾನ್. ಸರ್ವಾಂಚೊ ಆಭಾರ್ ಮಾಂದ್ತಾಂ ಆನಿ ಫುಡೆಂಯ್ ಕೊಂಕ್ಣೆಂತ್ ಚಡ್ ಆನಿ ಚಡ್ ಬರಯ್ತಾಂ ಮ್ಹಣ್ ಉಜಾರ್ ಕರ‍್ತಾಂ.
ಡೊ ಪೂರ್ಣಾನಂದ ಚಾರಿ ಮುಖೆಲ್ ಸಯ್ರ್ಯಾಚ್ಯಾ ನಾತ್ಯಾನ್ ಉಲಯ್ಲೊ. ಆಜ್ ಹಾಂಗಾ ವೆವೆಗ್ಳ್ಯಾ ಧರ್ಮಾಚೊ ಕೊಂಕ್ಣಿ ಲೋಕ್ ಆಸಾ. ಪೂಣ್ ಹಾಂಗಾ ಬೇಧ್-ಭಾವ್ ನಾ. ಸರ್ವ್ ಧರ್ಮಾಂಚೆಂ ತೇಲ್ ಎಕಾಚ್ ದಿವ್ಯಾನ್ ಪೆಟ್ಟಾ. ಕೊಂಕ್ಣಿ ದಿವ್ಯಾನ್ ಪೆಟ್ಟಾ. ಹಾಂವ್ ಮ್ಹಜ್ಯೆ ಕವಿತೆಂತ್ ಸಾಂಗ್ತಾಂ - ಕರ್ನಾಟಕಾಂತ್ಲ್ಯಾನ್ ಪಂಟಿ ಮೆಳುಂ, ಗೊಂಯ್ಚ್ಯಾನ್ ವಾತ್ ಮೆಳುಂ, ಕೇರಳಾಚ್ಯಾನ್ ತೇಲ್ ಮೆಳುಂ ಆನಿ ಮುಂಬಯ್ಚ್ಯಾನ್ ಜ್ವಾಲಾ ಮೆಳುನ್ ಪೆಟುಂ ಆಮ್ಚ್ಯಾ ಕೊಂಕ್ಣೆಚೊ ದಿವೊ. ಹೊ ಆಸಾ ಎಕ್ವಟ್, ಕೊಂಕ್ಣೆಚ್ಯಾ ಎಕ್ವಟಾ ಖಾತಿರ್ ಸದಾಂಚ್ ಆಮ್ಚೊ ವಾವ್ರ್ ಚಲ್ತಾ ಆನಿ ಕೊಣಿ ಜರ್ ಮ್ಹಾಕಾ ಮ್ಹಣತ್, ತುಮ್ಚ್ಯಾ ಎಕ್ವಟಾಚ್ಯಾ ವಾವ್ರಾಚೆಂ ಏಕ್ ಸಿಂಬಲ್ ಮ್ಹಾಕಾ ದಾಕಯಾ, ಹಾಂವ್ ಬೋಟ್ ದಾಕಯ್ತಲೊಂ ಕವಿತಾ ಟ್ರಸ್ಟಾಕಡೆ. ಹೆಂ ಕವಿತಾ ಟ್ರಸ್ಟಾಚೆಂ ಫೆಸ್ತ್ ನ್ಹಯ್, ಹೆಂ ಕೊಂಕ್ಣಿ ಮನ್ಶಾಂಚೆ ಅಸ್ಮಿತಾಯೆಚೆಂ ಆನಿ ಎಕ್ವಟಾಚೆಂ ಫೆಸ್ತ್. ಆನಿ ಗಾಂವಾಂ ಗಾಂವಾಂನಿ ಕವಿತಾ ಫೆಸ್ತ್ ಘಡೊವ್ನ್ ಹಾಡ್ನ್, ಕೊಂಕ್ಣಿ ಮನ್ಶಾಂಚೊ, ಕೊಂಕ್ಣಿ ಭಾಶೆಚೊ ಆನಿ ಕೊಂಕ್ಣಿ ಆವಯ್ಚೊ ಸನ್ಮಾನ್ ಕರ‍್ತಾತ್.
ಆಜ್ ಭಾರತೀಯ್ ಸಮಕಾಳೀನ್ ಸಾಹಿತ್ಯಾಂತ್ ಕೊಂಕ್ಣಿ ಕಾವ್ಯೆಂ ಖಂಯ್ ರಾವ್ತಾ? ಮ್ಹಳ್ಳೆಂ ಸವಾಲ್ ವಿಚಾರ‍್ತಾನಾ ಕವಿತಾ ಟ್ರಸ್ಟಾಚೊ ವಾವ್ರ್ ಯಾದ್ ಕರುಂಕ್ ಫಾವೊ. ಭಾರತೀಯ್ ಸಾಹಿತ್ಯಾಂತ್ಲೆ ಕಾವ್ಯೆಂ ಆಜ್ ಮಾತ್ಶೆಂ ಜಾಗೆಂ ಆಸಾ. ಸಂವೇದನ್ ಶೀಲ್ ಆಸಾ. ಕವಿತಾ ಲೊಕಾಕ್ ಜಾಗಯ್ತಾ. ಸಮಕಾಳೀನ್ ಜಿವಿತಾಚೆಂ ಪಡ್ ಬಿಂಬ್ ಆಸಾ. ಆಯ್ಚೆ ಕೊಂಕ್ಣಿ ಯುವಕವಿ ಭಾರತೀಯ್ ಸಾಹಿತ್ಯಾಂತ್ ಕೊಂಕ್ಣಿ ಕಾವ್ಯಾಕ್ ಪ್ರತಿನಿಧಿತ್ವ್ ಕರ‍್ತಾತ್. ಆಜ್ ಕವಿತಾ ಫಕತ್ ಮನೋರಂಜನಾಚೆಂ ಸಾಧನ್ ನ್ಹಯ್, ಮನೋಬಳಾಚೆಂ ಸಾಧನ್ ಜಾಲಾಂ. ಎಂಟರ್ಟೇಯ್ನಮೆಂಟ್ ಭೂಮಿಕಾ ಥಾವ್ನ್ ಅಕಾಡೆಮಿಕ್ ಹಂತಾಕ್ ಕೊಂಕ್ಣಿ ಕಾವ್ಯೆಂ ಚಡ್ಲಾಂ ತರ್ ಕವಿತಾ ಟ್ರಸ್ಟಾಚೊ ಮೊಟೊ ವಾವ್ರ್ ಆಸಾ. ಆಮಿಂಯ್ ಸಾಂಗಾತ್ ದಿಲೊ ತರ್, ಅಸ್ಮಿತಾಯೆಚೊ ಉಮಾಳೊ ರುತಾ ಜಾತಾ, ಕಾವ್ಯಾಳ್ ಸಂಸ್ಕೃತಿ ರುತಾ ಜಾತಾ. ತಶೆಂಚ್ ಜಾಂವ್ ಮ್ಹಣ್ ತಾಣೆಂ ಬರೆಂ ಮಾಗ್ಲೆಂ.
ಫಾದರ್ ಸುನೀಲ್ ಡಿಸಿಲ್ವಾ ಆನಿ ಡೊ ರೂಪಾ ಚಾರಿ ಹಾಣಿಂ ಆಪ್ಲೊ ಸಂದೇಶ್ ದೀವ್ನ್ ಕವಿತಾ ಫೆಸ್ತಾಕ್ ಆನಿ ಟ್ರಸ್ಟಾಕ್ ಬರೆಂ ಮಾಗ್ಲೆಂ. ದಿ ಎಕ್ಸ್‌ಪ್ರೆಶನ್ಸ್ ಉಪಾಧ್ಯಕ್ಷ್ ಶ್ವೇತಾ ಪಿಂಟೊ ಹಿಣೆಂ ಕವಿತಾ ಫೆಸ್ತ್ ಗದ್ದಾಳಾಯೆನ್ ಆಚರುಂಕ್ ಕಾರಣ್ ಜಾಲ್ಲ್ಯಾ ಸರ್ವಾಂಚೊ ಉಪ್ಕಾರ್ ಭಾವುಡ್ಲೊ.
ಸಗ್ಳ್ಯಾ ದಿಸಾಚೆಂ ಕಾರ್ಯೆಂ ವೆಳಾಮಿತಿ ಭಿತರ್, ಶಿಸ್ತೆನ್ ಆನಿ ಆಪುರ್ಬಾಯೆನ್ ಆನಿ ಸೊಭಿತ್ ರಿತಿನ್ ಸ್ಟೀವನ್ ಲುವಿಸ್ ಮಟ್ಪಾಡಿ ಹಾಣೆಂ ಚಲೊವ್ನ್ ವೆಲೆಂ.
ಭಾತ್ಮಿ: ವಿತೊರಿ ಕಾರ್ಕಳ್
ತಸ್ವಿರ‍್ಯೊ: ಆಲ್ಫೋನ್ಸ್ ಪಾಂಗ್ಳಾ / ಕಿಶೂ ಎಂಟರ್‌ಪ್ರೈಸಸ್
आशियानाच्या नंदनावनांत संभ्रमलें एकुणविसावें कविता फेस्त
.कानामनांक काव्याळ जाल्लें कविता फेस्त-2025
.विशिश्ट शैलेर उगतावणी, दीसभर काव्याळ सजवणी, जैतेवंत सोंपणी
.नवायती कवी सय्यद समीवुल्ला बर्मावर हाका मथायस कुटम कविता पुरस्कार हातांतर
.कवींसवें भासाभास, उगती कविता मांची, ’स्वर्गाची पक्षी’ पुस्तक लोकार्पण, युवा साहितींचें कविता सादरीकरण
कोंकणी काव्याक गरजेचो भोंवार आनी अंतराष्ट्रीय पांवडो जोडून दिंवच्या शेवोटाखाल वावुरच्या कविता ट्रस्टाचें 19-वें कविता फेस्त 12-01-2025वेर उडुपी जिल्ल्याच्या सास्तान पांडेश्वर आसच्या सुजाता–ऑल्वीन आंद्रादे जोड्याच्या आशियाना घरच्या आ<गणांत, `दी एक्स’प्रेशन्स’ पंगडाच्या सहकारान दीसभर व्हडा संभ्रमान मनायलें.
संभ्रमीक उगतावणी:
मंगळूर, उडुपी, गोंय, केरळ अशें कोंकणाच्या विवीध वठारां थावन आयिल्ल्या काव्यरसिकांनी इडल्यो आनी मण्णिचो रुचीक फळार घेतच, बॅंडा-तोंबोराच्या नादान कविता फेस्ताचो पुरशांव सुरवातलो. बळ्ळारीचो बिस्प अ.मा.दो. हेन्री सोज हाणीं बॅंड बडोवन पुरशांवाक चालन दिलें.
उपरांत कविता फेस्ताच्या संप्रदाया पर्माणें काव्याळ पर्मळ सगळ्या जगाक पाचारचे सांकेतिकते सवें फुलां पाकळ्यो वार्यार उबोवन, वेदी वयल्या सोयर्यांनी कविता फेस्त 2025 उगतायलें. सांगाता ट्रस्टींनी, कविता ट्रस्टाक आनी फेस्ताक मजतेचे बावळे दिल्ल्यांनी फुलां पाकळ्यो सुंर्गारायिल्ले कडायेच्या उदकांत सोडून काव्याळ भोंवार निर्माणांत आपलो सांगात भासायलो. ह्याच संदर्भार फाटल्या दिसांनी संवसाराक आदेव्स मागल्ले कवी एम. पी. रोड्रीगस, पंचू बंटवाळ, अनंत भट कोच्ची आनी सिकेराम सुरत्कल हांच्या आत्म्याक शांती लाभच्याक जमल्ल्यांनी एका मिनुटांचें मागणें भेटयलें.
आपूण बरो कोंकणी उलोवपी न्हय म्हण उत्रां सुर्वातलल्या फेस्ताचो उगतावपी डेल्लिच्या फोर्चून लैफ वेल्त प्रै.ली. कंपणेचो दिरेक्तोर आनी दानी जोसेफ एलियास मिनेजस हाणे भुरगेपणार पद्य उगडास दवरुंक कष्टुची गजाल भोव गम्मतायेन वर्णिली. कविंचे तकलेंत केन्नांय एक पोजिटीव चिंतप आसता. कविता कशी बरोंवची, धा जाणांचो संतोस कसो वाडोंवचो, कशें हेरांक प्रेरणांनी भरचें म्हण चिंत्तात. सांगाता खंयचीय गजाल सकारात्मक रितीन घेजे. खोडी काडतले केन्नाय आसात. आपल्या जिवितांत मनीस कुटमा खातीर, समाजा खातीर आनी देशा खातीर कितें करन दाकयता तें गरजेचें म्हण उगतावणेचो संदेश दिलो.
मुखेल सोयरो बिस्प हेन्री डिसोजान ह्या गांवचे आपले उगडास जिवाळ जातात म्हण सांगून कवितेक प्रेरण दिंवची, अभिप्राय आसा करची, मनोरंजन दिंवची सकत आसा. मनशा संबंध वाडोवंक, भास जाती कातीचे दुरीग कोसळावंक काव्या मारीफात साध्य आसा. असलो वावर करीत आसच्या कविता ट्रस्टाची तोकणाय करन बरें मागलें.
दी एक्सप्रेशन्स अध्यक्ष प्रवीण कार्वाल्लोन आपल्या गांवांत हो संभ्रम घडताना आमींय ह्या वावराचे वांटेली म्हण अभिमान भोगता म्हण सांगलें. कविता ट्रस्ट अध्यक्ष किशू बार्कूर हाणें ट्रस्टाचो जल्म आनी वाडावळ हाची माहेत दीवन सर्वांचो मायपाशी येवकार मागलो. वेदीर सचीव एवरेल रोड्रीगस, घरचीं येजमान-येजमानी सुजाता आनी ऑल्वीन आंद्रादे हाजर आसल्लीं.
दीसभर काव्याळ सजोवणी:
उपरांत डॉल्फी मस्करेन्हस आनी पंगडा थावन पाळण्या गितां आनी वोवयो वेर्सांचें सादरपण चल्लें.
’म्हजी जीण, म्हजी कविता’ कार्यांत पुरस्कृत समीवुल्ला बर्मावर हाचेसवें डॉ. राजय पवार हाणें केल्ली भासाभास आयकोवप्यांक नवायती काव्या शेताची वळख करून दीवंक पावली. आपल्या साहितीक पयणाची माहेत समीवुल्लान दिली. आनी फुडारांत कोंकणींत बरोंवची आपली बद्धता जाहीर केली. ट्रस्टी विलियम पायसान वळख करून दिली.
मागीर कवी आनी वाचप्या मदलो संवाद चल्लो. वाचपी अन्वेशा सिंगबाळ हिणें कवी स्मिता शेणै हिच्या काव्यांत बरोंवचीं प्रेरणां, स्त्री संवेदनां आनी स्त्रीयेक बरपांत निरंतरता सांबाळुंक लागच्यो आडखळी हांचेर कांय गजाली चलयल्यो.
कविता फेस्तांत फकत वेदी वयल्यांक मात्र न्हय वेदी सकयल्यांकयी संधी करून दिंवची उगती कविता मांची 14॓ कविंनी चलोवन वेली. पियूस जेम्स करुगळनडे, फ्लाविया आल्बुकर्क, ज्यूलीयेट मोरास, मरिया पिंटो, नवीन कुलशेकर, सलोमी मियापदव, वनिता मार्टीस, जोयस पिंटो, जिता गोन्साल्वीस, शब्बीर आजाय्व, सादीक असर्मठ, नौफील दामुदी, प्रमिळा रेंजाल, क्लोडी ब्रह्मावर हाणीं चलयली. पोरन्या तशें तरन्या कवी कवयित्रिंनी ह्या सुवाळ्याचो फायदो जोडलो. नवायती कवितेंनी मनां वोडलीं.
विशेस जावन केल्ले पत्राडे, कुंकड सुकें, वोर्न आनी पुरण-पोळी म्हणताना दोनपारांचें रुचीक, फेस्ता शैलेचें जेवण गडद आसल्लें.
दोनपारां उपरांत साहित्य अकादमीच्या जोड पालवान युवा कवीं थावन कविता सादरीकरण चल्लें. आंड्र्यू एल डिकुन्हाच्या अध्यक्षपणार चल्लेल्या ह्या सादरीकरणांत अंतरा भिडे, वेंकटेश नायक, सुप्रिया काणकोणकार आनी अमेय नायक हांणी आपापल्यो समकाळीन गजालींक स्पंदन करच्यो कविता सादर केल्यो. कोंकणी सल्लागार मंडळाचो निमंत्रक मेल्विन रोड्रीगसान कार्याविशीं माहेत दिली तर, वांगडी स्टेनी बेळान आभार मांदलो. फेल्सी लोबोन कविंची वळख करून दिली.
फ्रांक्लीन फेर्नांडीस आनी पंगडाच्या युवा गावप्यां थावन मनां खुशालांवचीं पदां सादर जालीं. चा पियेतच सोंपणें कार्यें सुर्वातलें.
जैतेवंत सोंपणी:
मुखेल सोयरो साहित्य अकादमीच्या साभार मंडळाचो वांगडी डॉ पूर्णानंदा चारी, काणकोणांतल्या श्री मल्लिकार्जून आनी श्री चेतन मंजू देसायी कॉलेजीच्या हिंदी विभागाची मुखेली डॉ रूपा चारी, सास्तान सांत आंतोनी फिर्गजेचो विगार मा.बा. सुनील डिसिल्वा, पुरस्कृत सय्यद समीवुल्ला बर्मावर, लेखकी स्मिता शेणै हांणी अध्यक्ष किशू बार्कूर आनी सचीव एवरेल रोड्रीगस हांचे सवें वेदी सोभयतच सोंपणे कार्यें सुर्वातलें.
पयलें स्मितप्रज्ञ हिणें लिखून कविता ट्रस्टान पर्गटललो ’स्वर्गाची पक्षी’ कविता पुंजो लोकार्पण जालो. ट्रस्टी वितोरी कार्कळान बुकाची वळख करून दिली. कवयित्री स्मिता शेणैन आपल्या प्रेरणांचो कविता ट्रस्टाचो पाटिंबो उल्लेक करून, संधी खातीर आभार मांदलो.
मथायस कुटम कविता पुरस्कार नवायती कवी सय्यद समिवुल्ला बर्मावर हाका वेदी वयल्या सोयर्यांनी हातांतर केलो. स्टॅनी बेळान पुरस्काराविशीं माहेत दिली तर, ट्रस्टी आंड्र्यू एल डिकुन्हान मान पत्र वाचलें. श्हेलो, मोगर्यां झेलो, मान-पत्र, यादस्तीका आनी रू 25,000/- आटापचो हो पुरस्कार कुप्पेपदवुच्या जोसेफ मथायस आनी कुटमाच्या नांवान दिंवचो. प्रशस्ती स्वीकार करून समीवुल्लान आपलीं भोगणां उचारलीं. तुमकां म्हजी नवायती शायरी आंवडली, म्हज्या कवितेच्या उतरांची, भोगणांची एक वळख तुमकां जाली देकून हो मान फावो जालो. ही फकत एक प्रशस्ती न्हय, म्हज्ये कवितेक मेळ्ळली मर्याद. नवायती शायरी करतल्या, कविता बरयतल्या सर्वांक मेळ्ळलो मान. सरवांचो आभार मांदतां आनी फुडेंय कोंकणींत चड आनी चड बरयतां म्हण उजार करतां.
डॉ. पुर्णानंद चारी मुखेल सोयर्याच्या नात्यान उलयलो. आज हांगा वेवेगळ्या धर्माचो कोंकणी लोक आसा. पूण हांगा बेध-भाव ना. सर्व धर्मांचें तेल एकाच दिव्यान पेट्टा. कोंकणी दिव्यान पेट्टा. हांव म्हज्ये कवितेंत सांगतां - कर्नाटकांतल्यान पंटी मेळूं, गोंयच्यान वात मेळूं, केरळाच्यान तेल मेळूं आनी मुंबयच्यान ज्वाला मेळून पेटूं आमच्या कोंकणेचो दिवो. हो आसा एकवट, कोंकणेच्या एकवटा खातीर सदांच आमचो वावर चलता आनी कोणी जर म्हाका म्हणत, तुमच्या एकवटाच्या वावराचें एक सिंबल म्हाका दाकया, हांव बोट दाकयतलों कविता ट्रस्टाकडे. हें कविता ट्रस्टाचें फेस्त न्हय, हें कोंकणी मनशांचे अस्मितायेचें आनी एकवटाचें फेस्त. आनी गांवां गांवांनी कविता फेस्त घडोवन हाडन, कोंकणी मनशांचो, कोंकणी भाशेचो आनी कोंकणी आवयचो सन्मान करतात.
आज भारतीय समकाळीन साहित्यांत कोंकणी काव्यें खंय रावता? म्हळ्ळें सवाल विचारताना कविता ट्रस्टाचो वावर याद करुंक फावो. भारतीय साहित्यांतले काव्यें आज मातशें जागें आसा. संवेदन शील आसा. कविता लोकाक जागयता. समकाळीन जिविताचें पडबिंब आसा. आयचे कोंकणी युवकवी भारतीय साहित्यांत कोंकणी काव्याक प्रतिनिधित्व करतात. आज कविता फकत मनोरंजनाचें साधन न्हय, मनोबळाचें साधन जालां. एंटर्टेयनमेंट भूमिका थावन अकाडेमीक हंताक कोंकणी काव्यें चडलां तर कविता ट्रस्टाचो मोटो वावर आसा. आमींय सांगात दिलो तर, अस्मितायेचो उमाळो रुता जाता, काव्याळ संस्कृती रुता जाता. तशेंच जांव म्हण ताणें बरें मागलें.
फादर सुनील डिसिल्वा आनी डॉ. रूपा चारी हाणीं आपलो संदेश दीवन कविता फेस्ताक आनी ट्रस्टाक बरें मागलें. दी एक्सप्रेशन्स उपाध्यक्ष श्वेता पिंटो हिणें कविता फेस्त गद्दाळायेन आचरुंक कारण जाल्ल्या सर्वांचो उपकार भावुडलो.
सगळ्या दिसाचें कार्यें वेळामिती भितर, शिस्तेन आनी आपुरबायेन आनी सोभीत रितीन स्टीवन लुवीस मटपाडी हाणें चलोवन वेलें.
भात्मी: वितोरी कार्कळ
तस्वीर्यो :आल्फोन्स पांगळा / किशू एंटरप्रैसस
KAVITA FEST 2025: PHOTO ALBUM