ಸಂಪಾದಕೀಯ್:
ಹಿಂದ್ಳ್ಯಾರ್ ಬಸ್‌ಲ್ಲ್ಯಾಂನಿ ರುಕಾವಿಶಿಂ ಕೆದಳಾಯ್ ಚಿಂತ್ಲಾಂ?
ಬದ್ಲೊನ್ ಗೆಲ್ಲೆ ಸಮಾಜೆನ್ ಆಮಿ ಖುಶಿ ಪಾವೊನ್ ಆಸ್‌ಲ್ಲ್ಯೊ ಜಾಯ್ತ್ಯೊ ಸಂಗ್ತಿ, ಗಜಾಲಿ ಪೊಕೊರ್‍ನ್ ಖೆಲ್ಯಾತ್. ಚಡಿತ್ ಘಾಯೆಲ್ಲ್ಯೊ ಗಜಾಲಿ ಮ್ಹಳ್ಯಾರ್ ಭುರ್ಗ್ಯಾಪಣಾರ್ ಭುರ್ಗ್ಯಾಂಕ್ ಸಂತೊಸ್ ವಾಂಟುನ್ ಆಸ್‌ಲ್ಲ್ಯೊ ವೆವೆಗ್ಳ್ಯೊ ಸಂಗ್ತಿ. ತಾಂತುಂ ಹಿಂದ್ಳೊ ಏಕ್. ಹ್ಯಾ ಹಿಂದ್ಳ್ಯಾರ್ ಧಲ್ತಾನಾ ಕಿತ್ಲೆಶ್ಯಾ ಭುರ್ಗ್ಯಾಂನಿ ತಾಂಚ್ಯಾ ಫುಡಾರಾಚಿಂ ಮಿಸಾಂವಾಂ ರಚ್ಲ್ಯಾಂತ್; ಹ್ಯಾ ಹಿಂದ್ಳ್ಯಾರ್ ಧಲೊನ್ ಕಿತ್ಲೆಶ್ಯಾ ಭುರ್ಗ್ಯಾಂನಿ ಆಪ್ಲ್ಯಾ ದೊಳ್ಯಾಂತ್ಲಿಂ ದುಕಾಂ ಪುಸುನ್ ಕಾಡ್ಲ್ಯಾಂತ್; ಕಿತ್ಲೆಶ್ಯಾ ಭುರ್ಗ್ಯಾಂಕ್ ತಾಂಚೆ ಲ್ಹಾನ್ ಸಾನ್ ರಾಗ್ ಹ್ಯಾ ಹಿಂದ್ಳ್ಯಾನ್ ನಿವಯ್ಲ್ಯಾತ್ ಆನಿ ಮುಖಮಳಾಚೆರ್ ಸಂತೊಸಾಚಿಂ ಕಿರ್ಣಾಂ ಫಾಂಕಯ್ಲ್ಯಾಂತ್.
ಹ್ಯಾ ಹಿಂದ್ಳ್ಯಾವಿಶಿಂ ಸಾಂಗೊಂಕ್ ವಚೊನ್ ತೊ ಹಿಂದ್ಳೊ ಬಾಂಧ್‌ಲ್ಲ್ಯಾ ರುಕಾಚಿ ಗತ್ ಮಾರ್ಮಿಕ್ ರಿತಿನ್ ಹಾಂಗಾಸರ್ ಕವಿನ್ ಸಾದರ್ ಕೆಲ್ಯಾ. ಭಾಯ್ಲ್ಯಾನ್ ಹಿ ಕವಿತಾ ಭುರ್ಗ್ಯಾಂಚಿ, ಹಿಂದ್ಳ್ಯಾಚಿ ಮ್ಹಣ್ ದಿಸ್ಲ್ಯಾರಿ - ಪರಿಸರಾಚ್ಯಾ ನಿರ್ನಾಮಾವಿಶಿಂ ಹಿ ಸಗ್ಳಿ ಕವಿತಾ ಖಂತ್ ಹುಸ್ಕಾಯ್ತಾ ಆನಿ ಚೇತಾವ್ಣಿ ದಿತಾ. ಲೊಕಾಂನಿ ಕಾನಾರ್ ಘಾಲಿನಾತ್‌ಲ್ಲೊ ವಿಶಯ್ ಆಪುರ್ಬಾಯೆಚ್ಯಾ ವಾಹನಾರ್ ತಾಂಣಿ ಆಯ್ಕೊಂಕ್ ಕೆಲ್ಲೆಂ ಕವಿಚೆಂ ವ್ಹಡ್‌ಪಣ್ ಆನಿ ತಾಚಿ ಗಿರೇಸ್ತ್‌ಕಾಯ್.
ಸ್ಟೇನ್‌ರೊ ಆಜೆಕಾರ್ ಕಥಾಕಾರ್ ಜಾವ್ನ್ ಫಾಮಾದ್. ಕಥಾಕಾರಾಂನಿ ಕವಿತಾ ಬರಂವ್ಕ್‌ಯ್ ಸಾಧ್ಯ್ ಆಸಾತ್, ತ್ಯೋಯ್ ಆಪುರ್ಬಾಯೆಚ್ಯೊ ಮ್ಹಳ್ಳ್ಯಾಕ್ ತೊ ಏಕ್ ಉತ್ತೀಮ್ ನಿದರ್ಶನ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹಿಂದ್ಳೊ
ಶೆಜಾರ್‍ಚ್ಯಾ ರುಕಾರ್
ಉಮ್ಕಳ್ತಾಂ ಹಾಂವ್
ಹಿಂದ್ಳೊ ಮ್ಹಜೆಂ ನಾಂವ್
ಸಾಂಜೆಚ್ಯಾ ವೆಳಾರ್
ಧಾಕ್ಟುಲ್ಯಾಂಕ್ ವ್ಹಾವವ್ನ್
ಸುರು ಕರ್‍ತಾಂ ಧಾಂವ್
ಸರ್‍ತೆ ಪ್ರಕಾರ್
ಭುರ್ಗಿಂ ತಿಂ
ಬಸ್ತಾಂ ಮ್ಹಜೆರ್
ಧಲಂವ್ಚೆಂ ಮ್ಹಜೆಂ ಕಾಮ್
ತಕ್ಲೆ ವಯ್ರ್
ಖೊಲ್ಯಾಂ ಪಾಕೆಂ
ತರೀ
ಪಾವ್ಸಾಕ್ ಭಿಜ್ತಾಂ
ವೊತಾಕ್ ಸುಕ್ತಾಂ
ವಿಚಾರ್‍ತಲೊ ನಾ ಕೊಣ್
ರುಕಾ ಫಾಂಟ್ಯಾಕ್
ಚಡ್ಲೊ ಕೆದ್ನಾಂ
ಬಾಂಧ್ಲೊ ಕೊಣೆ
ಆಜೂನ್ ಘಟ್
ಉರ್‍ಲಾಂ ಹಾಂವ್
ಮ್ಹಜೆರ್ ಬಸೊನ್
ಧಲೊನ್ ಗೆಲ್ಲಿಂ
ಭುರ್ಗಿಂ ಕಿತ್ಲಿಂ
ತಾಂಚೆಂ ಬರೆಂ ಜಾಂವ್
|
ಪುಣ್ ಹಾಯ್!
ತವಳ್ ತಿಂ
ಕಿತೆಂಚ್ ನೆಣಾಸ್ಚಿಂ
ನೆಣ್ತಿಂ ಬಾಳಾಂ
ಆತಾಂ ವಾಡೊನ್ ರಾವ್ಲ್ಯಾಂತ್
ಜಾಣ್ತಿಂ ಫಳಾಂ
ಝಗ್ಡೊನ್ ಪಡೊನ್
ಲೆಕಾಂ ಘಾಲ್ತಾತ್
ರೂಕ್ ಪರ್ತುನ್
ಉಬೊ ಚಿರುನ್
ದುಡು ಜಮಂವ್ಕ್
ಹಾಂವ್‌ರೇ ಬಾವ್ಡೊ
ಅನಾಥ್ ಜಾತಾಂ
ಖಂತಿ ದುಕಿನ್
ಸುಸ್ಕಾರ್ ಸೊಡ್ತಾಂ
ಸುಟಯಾರೆ ಸುಟಯಾ ಮ್ಹಾಕಾ
ಆನಿ ಕುಶಿಚ್ಯಾ
ಸರ್ಕಾರಿ ಗುಡ್ಯಾ ವಯ್ಲ್ಯಾ
ರುಕಾಕ್ ಅಂರ್ದಿಯಾ
ಉಗ್ಡಾಸ್ ಮ್ಹಜೊ
ಆಯ್ಲೊ ತೆನ್ನಾಂ
ಭುರ್ಗ್ಯಾಂಕ್ ತುಮ್ಚ್ಯಾ
ಮ್ಹಜೆಶಿಂ ಧಾಡುನ್
ದೀಸ್‌ಭರ್ ಖೆಳಯಾ
-ಸ್ಟೇನ್‌ರೊ ಅಜೆಕಾರ್
(ನವೆಂಬರ್ 25, 2006 ತಾರಿಕೆರ್ 'ಕವಿತಾ'ನ್ ಚಲಯಿಲ್ಲ್ಯಾ ಕವಿತಾಗೋಷ್ಟಿಂತ್ ಮ್ಹಯ್ನ್ಯಾಚಿ ಕವಿತಾ ಜಾವ್ನ್ 'ದಾಯ್ಜಿ ದುಬಾಯ್' ಇನಾಮ್ ಜೊಡ್‌ಲ್ಲಿ ಕವಿತಾ)